Fakahā 12–13

Talateú

Naʻe mamata ʻa Sione ki ha meʻa-hā-mai ʻo ha talākoni ʻokú ne fakamanamanaʻi ha fefine mo ʻene tama, ʻa ia ʻokú ne fakataipe e feinga ʻa Sētane ke fakaʻauha e Siasi ʻo e ʻEikí mo hono kau mēmipa faivelengá. Naʻe tohi ʻa Sione fekauʻaki mo e Tau ʻi he Langí pea mo e ngaahi puleʻanga ʻo e māmaní te nau tauʻi e kau muimui ʻo e ʻOtuá.

Ngaahi Fokotuʻu ki hono Akoʻí

Fakahā 12

ʻOku fakahā kia Sione kuo fakafetau maʻu pē ʻa Sētane mo ʻene kau ʻāngeló ki he ʻEikí mo Hono Siasí

Kimuʻa e kalasí, hiki ʻa e ʻekitivitī fakatauhoa ko ʻení he palakipoé. Hili e kamata e kalasí, fakaafeʻi ha niʻihi ʻo e kau akó ke tā e ngaahi laine fehokotaki ʻi he vahaʻa ʻo e ngaahi fakamanamana takitaha ʻoku hiki ʻi he ʻotu toʻohemá mo e ngaahi founga ke fakafepaki’i ai kinautolú ʻoku hiki ʻi he ʻotu toʻomataʻú.

Ngaahi fakamanamaná	Ngaahi Founga ke Fakafepakiʻi ʻaki e Ngaahi Fakamanamaná
Vela mei he laʻaá	Ngaahi moʻoni ʻi he Fakahā 12
Kau sōtia filí	Faitoʻo pe mālōlō
Puke	Kilimi laʻā pe vala
Angahalá mo e halaiá	Fakatomala pea falala kia Sīsū Kalaisi
Ivi tākiekina ʻo Sētané	Ngaahi meʻa tau

Ko e fē ʻi he ngaahi fakamanamana ko ʻení kuó ke fakafepakiʻi kimuí ni? Ko e fē ʻokú ke pehē ʻoku fakatuʻutāmaki tahá? Ko e hā hono ʻuhingá?

Fakaafeʻi e kau akó ke kumi e ngaahi moʻoni ʻi heʻenau ako e Fakahā 12 ʻe lava ke tokoni ke nau fakafepakiʻi e ngaahi ivi tākiekina ʻa Sētané. Fakamatalaʻi ange ʻoku lekooti ʻe he Fakahā 12–14 ha vaha pe taimi mālōlō, ʻi he mata meʻa-hā-mai ʻa Sione ʻo e ngaahi meʻa naʻe hoko ʻi he meʻa fakamaʻu hono fitú. Mahalo naʻe tokoni e ʻEikí ke mahino kia Sione e ʻuhinga ʻo e ngaahi kupuʻi lea “ngaahi puleʻanga ʻo e maama [ko ʻení]” mo e “ngaahi puleʻanga ʻo hotau ʻEikí” ʻi he Fakahā 11:15.

Fakaʻaliʻali ki he kau akó ʻa e fakatātā fakafekauʻakí ʻo e fefine mo e talākoni ʻi hono tuʻá. Fakaafeʻi e kau akó ke fakakaukau pe ko e hā ʻe ala fakafofongaʻi ʻe he ngaahi fakataipe ko ʻení.

Fakaafeʻi ha tokotaha ako ke lau leʻolahi e Fakahā 12:1–2, 5. Kole ki he kalasí ke muimui ki ai, ʻo kumi e meʻa naʻe hoko ki he fefiné. Fakamatalaʻi ange ʻoku fokotuʻu ʻe he Liliu ʻa Siosefa Sāmitá ʻa e veesi 5 hili pē e veesi 2.

Ko e hā naʻe hoko ki he fefiné? (Naʻá ne fāʻeleʻi ha tama tangata “te ne puleʻi ʻa e puleʻanga kotoa pē” [ki he veesi 5].)
ʻOkú ke pehē ʻoku ʻuhinga ki he hā te ne “puleʻi ʻa e puleʻanga kotoa pē ʻaki ʻa e vaʻa ukameá”? (veesi 5). (ʻE fakaʻaongaʻi ʻe he tamasiʻí ʻa e vaʻa ukameá, ʻa ia te ne lava ʻo fakataipe e ongoongoleleí, lakanga fakataulaʻeikí, mo e folofola mo e mālohi ʻa e ʻOtuá, ke puleʻi ʻi he māʻoniʻoni e ngaahi puleʻanga ʻo e māmaní [vakai, Bruce R. McConkie, Doctrinal New Testament Commentary, 3 vols. (1965–73), 3:517].)

Fakaafeʻi ha tokotaha ako ke lau leʻolahi e Fakahā 12:3–4. Kole ki he kalasí ke muimui ki ai, ʻo kumi e ngaahi fakataipe naʻe fakamatalaʻi ʻi he ngaahi veesi ko ʻení.

ʻOkú ke pehē ko e hā ʻe lava ke fakafofongaʻi ʻe he ngaahi fakataipe naʻe fakamatalaʻi ʻi he veesi 1–5?

Fakaafeʻi e kau akó ke lau fakalongolongo e Liliu ʻe Siosefa Sāmita, Fakahā 12:7–8 (ʻi he Fakahinohino ki he Folofolá). Kole ange ke nau kumi e meʻa ʻoku fakafofongaʻi ʻe he talākoní, fefiné, mo e tamasiʻí.

Fakatatau ki he Liliu ʻa Siosefa Sāmitá, Fakahā 12:7–8, ko e hā ʻoku fakafofongaʻi ʻe he talākoní, fefiné, mo e tamasiʻí ʻi he mata meʻa-hā-mai ʻa Sioné? (ʻOku fakafofongaʻi ʻe he talākoní ʻa Sētane [vakai, veesi 8]; ʻoku fakafofongaʻi ʻe he fefiné ʻa e “siasi ʻo e ʻOtuá;” pea ʻoku fakafofongaʻi ʻe he tamasiʻí ʻa e “puleʻanga ʻo e ʻOtuá mo hono Kalaisí” [veesi 7], ʻa ia ko ha puleʻanga fakapolitikale ʻe fokotuʻu ʻe he ʻEikí lolotonga e Nofo Tuʻí, ʻa ia te Ne puleʻi ai e ngaahi puleʻanga kotoa pē. [Vakai, New Testament Student Manual (Church Educational System manual, 2014), 550–52, ki ha fakamatala lahi ange ʻo e fakataipe ʻi he ngaahi potufolofola ko ʻení.])
Fakatatau ki he Fakahā 12:4, ko e hā e taumuʻa ʻo e talākoní? ʻOkú ke pehē ko e hā ʻoku feinga mālohi ai ʻa Sētane ke fakaʻauha e puleʻanga ʻo e ʻOtuá mo Kalaisí?

Fakaafeʻi ha tokotaha ako ke lau leʻolahi e Fakahā 12:6. Kole ki he kalasí ke muimui ki ai, ʻo kumi e meʻa naʻe fai ʻe he fefiné koeʻuhí ko e talākoni ne fakamanamaná?

Ko e hā naʻe hoko ki he fefiné? Ko e hā ʻe lava ke fakataipe ʻe he meʻá ni? (ʻOku fakafofongaʻi ʻe he hola e fefiné ki he feituʻu maomaonganoá ʻa e aʻusia ʻe he Siasí e Hē Fakaʻaufuli mei he Moʻoní mo hono ʻave e lakanga fakataulaʻeikí mei he māmaní hili e pekia ʻa e kau ʻAposetoló [vakai foki, T&F 86:3].)

Fakamatalaʻi ange hili e mamata ʻa Sione ki hono fakamanamanaʻi ʻe he talākoní ʻa e fefiné mo ʻene tamá, naʻá ne mamata ki he Tau ʻi he Langí ʻi he vahaʻa ʻo Sētane mo e Kāingalotu ʻo e ʻOtuá. Fakaafeʻi ha niʻihi ʻo e kau akó ke taufetongi hono lau leʻolahi e Liliu ʻa Siosefa Sāmitá, Fakahā 12:6–11 (ʻi he Fakahinohino ki he Folofolá). Kole ki he vaheua ʻe taha ʻo e kalasí ke kumi e meʻa naʻe hoko kia Sētane ʻi he Tau ʻi he Langí pea ke kumi ʻe he vaheua ʻe taha ʻo e kalasí e founga naʻe ikunaʻi ai ʻe he Kāingalotu ʻo e ʻOtuá ʻa Sētane mo hono kau muimuí.

Ko e hā naʻe hoko kia Sētane mo hono kau muimuí? (Mahalo te ke fie fakamahinoʻi ange ʻoku pehē ʻe he Fakahā 12:4 naʻe “toho ʻaki ʻe hono ikú hono tolu ʻo e vahe ʻo e ngaahi fetuʻu ʻo e langí.” Ko ha fakataipe ʻeni ʻo e tokolahi e fanau fakalaumālie ʻa e Tamai Hēvaní ne nau fili ke muimui ʻia Sētané. Mahalo foki te ke fakamatalaʻi ange ko “Maikeli mo ʻene kau ʻāngeló” [Liliu ʻa Siosefa Sāmitá, Fakahā 12:6] ko ʻĀtama ia mo e fānau fakalaumālie māʻoniʻoni kehe ʻa e ʻOtuá.)
Fakatatau ki he veesi 11, naʻe ikunaʻi fēfē ʻe he kau tau māʻoniʻoni ʻo e langí ʻa Sētané? (“ʻI he taʻataʻa ʻo e Lamí,” pe ʻi he Fakalelei ʻa e Fakamoʻuí, pea ʻi he kei tuʻu maʻu ʻi heʻenau fakamoʻoni ki he ongoongoleleí. Hiki e ngaahi tali ko ʻení ʻi he palakipoé.)
Fakatatau ki he veesi 8, ko e fē feituʻu ne fekauʻi ki ai ʻa Sētane mo hono kau muimuí hili ʻenau angatuʻú?

Fakaafeʻi ha tokotaha ako ke lau leʻolahi e Liliu ʻa Siosefa Sāmitá, Fakahā 12:12, 17 (ʻi he Fakahinohino ki he Folofolá). Kole ki he kalasí ke muimui ki ai, ʻo kumi pe ko hai naʻe fakafepaki ki ai ʻa Sētane hili hono kapusi ia ki tuʻa mei he langí.

Ko hai naʻe fakafepaki ki ai ʻa Sētane hili hono kapusi ia ki tuʻa mei he langí?
Fakatefito ʻi he meʻa ʻoku tau ako mei he veesi 11, ko e hā te tau lava ʻo fai ke ikunaʻi e ngaahi ivi tākiekina mo e ngaahi ʻohofi ʻa Sētane ʻi hotau kuongá ni? (Tokoni ke ʻiloʻi ʻe he kau akó ha tefitoʻi moʻoni tatau mo ʻení: Te tau lava ʻo ikunaʻi e ngaahi ivi tākiekina ʻa Sētané ʻo fakafou ʻi he Fakalelei ʻa e Fakamoʻuí pea ʻi he kei tuʻu maʻu ʻi heʻetau fakamoʻoni ki he ongoongoleleí. Tohi ʻa e tefitoʻi moʻoni ko ʻení ʻi he palakipoé.)

Fakaafeʻi ha tokotaha ako ke lau leʻolahi e fakamatala ko ʻeni ʻa ʻEletā Sēmisi J. Hamula ʻo e Kau Fitungofulú. Kole ki he kalasí ke fakafanongo ki he founga ʻoku ʻohofi ai ʻe Sētane honau toʻu tangatá.

“Naʻe ʻi ai ha niʻihi ʻo e ngaahi foha mo e ngaahi ʻofefine lototoʻa mo fakaʻeiʻeiki taha ʻo ʻetau Tamaí, naʻe tuku fakatatali ke toki omi he ngaahi ʻaho fakaʻosí ni ʻo tokoni ki heʻetau Tamaí mo Hono ʻAló. Naʻe fakahaaʻi ʻenau loto-toʻá mo ʻenau fakaʻeiʻeikí ʻi he tau ko ia ne fai mo Sētane he maama fakalaumālié. …

“ʻI hono toe fakafoki mai ko ia ki he māmaní e puleʻanga ʻo e ʻOtuá pea mo hoʻo haʻu ki he māmaní, ʻoku ʻiloʻi ai ʻe Sētane ʻoku ‘[toe] siʻi pē hono kuongá’ [Fakahā 12:12]. Ko ia ʻoku fakaʻaongaʻi ʻe Sētane ʻa e maʻuʻanga tokoni kotoa pē te ne ala maʻú, ke fakatauveleʻi kimoutolu ke mou maumaufono. ʻOkú ne ʻiloʻi te ne lava ʻo tohoakiʻi kimoutolu ki he maumaufonó, te ne lava ʻo taʻofi kimoutolu ke ʻoua te mou ʻalu ʻo ngāue fakafaifekau taimi kakato, mali ʻi he temipalé pea maluʻi homou fānau he kahaʻú ʻi he tui, ʻa ia he ʻikai ngata pē ʻi hono fakavaivaiʻi kimoutolu ʻe he ngaahi meʻá ni, ka ʻe kau foki ai mo e Siasí. ʻOkú ne ʻiloʻi he ʻikai ha meʻa te ne lava ʻo liua ʻaki e puleʻanga ʻo e ʻOtuá, ‘ka ko e maumaufono pē ʻa [hono] kakaí’ [Mōsaia 27:13]. ʻOua naʻá ke maʻuhala ia—ʻoku hanga atu ʻene feinga-taú he taimí ni kiate kimoutolu” (“Ko Hono Ikunaʻi e Feingatau mo e Filí,” Ensign pe Liahona, Nōvema 2008, 50, 51).

Ko e hā e founga ʻoku feinga ai ʻa Sētane mo hono kau muimuí ke fakavaivaiʻi kitautolú?

Fakaafeʻi e kau akó ke fakakaukau ki he founga ʻoku tau fakatāutaha ai ʻa Sētane mo kinautolu.

Ko e hā e ngaahi meʻa te tau lava ʻo fai ke fakatupulaki ʻetau tui kia Sīsū Kalaisí mo fakamālohia ʻetau ngaahi fakamoʻoni kiate Iá? (Hiki e tali ʻa e kau akó ʻi he palakipoé.)

Lau leʻolahi e ongo fakamatala ko ʻení, pea fakaafeʻi e kau akó ke tali ha taha ʻo kinaua ʻi heʻenau pepa ki he kalasí pe tohinoa ako folofolá:

Tohi ʻo kau ki ha meʻa aʻusia ʻi he taimi naʻe tokoniʻi ai koe ʻe hoʻo fakamoʻoni mo e tui ki he Fakalelei ʻa e Fakamoʻuí ke fakafepakiʻi e ngaahi ivi tākiekina ʻo Sētané.
Hiki hoʻo fakamoʻoni ki he Fakalelei ʻa Sīsū Kalaisí, pea fakamatalaʻi e founga ʻe lava ke tokoniʻi ai kitautolu ʻe he Fakaleleí ʻi heʻetau tau mo Sētane mo hono kau muimuí.

Hili ha taimi feʻunga, fakaafeʻi ha niʻihi ʻo e kau akó ke nau vahevahe e meʻa ne nau hikí.

Poupouʻi e kau akó ke fili ha fakakaukau ʻe taha pe lahi ange ʻi he ngaahi fakakaukau ʻoku hiki he palakipoé pea fakaʻaongaʻi kinautolu ʻi heʻenau tau mo Sētane mo hono kau muimuí.

Fakahā 13

Ko e tohi ʻa Sione fekauʻaki mo e ngaahi puleʻanga ʻo e māmaní te nau maʻu e mālohi meia Sētané

Fakamatalaʻi fakanounou ʻa e Fakahā 13 ʻaki hono fakamatalaʻi ange naʻe mamata ʻa Sione ki ha mata meʻa-hā-mai ʻo e fanga manu fekai ne nau fakafofongaʻi e ngaahi puleʻanga fakamāmani naʻe puleʻi ʻe Sētané. Naʻe mamata foki ʻa Sione ʻe fai ʻe Sētane ha ngaahi mana fakaofo mo loi ʻo fakafou ʻi he ngaahi puleʻanga ko ʻení ke kākaaʻi e kakaí. Naʻe sio foki ʻa Sione ʻi he ngaahi puleʻanga ko ʻení, e ngāue fakaofo ʻa Sētane mo e ngaahi mana loi ke ne maʻu e tokolahi ʻo e māmaní.

Fakamanatu ʻo e Fakataukei Folofolá

Lolotonga e uike fakaʻosi ʻo e seminelí, fakakaukau ke ʻoange ki he kau akó ha sivi fakaʻosi ʻo e fakataukei folofolá. Te ke lava ʻo poupouʻi e kau akó ke ako ʻi ʻapi pe ʻi he taimi pē ko iá hili ʻa e siví. Ko e niʻihi ʻeni ʻo e ngaahi sivi te ke lava ʻo fakaʻaongaʻí (mahalo te ke lava ʻo liliu e ngaahi fakakaukau ko ʻení ke feʻunga mo e ngaahi fie maʻu ʻa e kau akó):

Sivi ʻo e fakamoʻoni fakafolofolá: ʻOange ki he kau akó ha fanga kiʻi tokoni mei he ngaahi veesi fakataukei folofolá. ʻE lava ke hoko e fanga kiʻi tokoni ko ʻení ko ha ngaahi foʻi lea mahuʻinga, ngaahi tokāteline pe ngaahi tefitoʻi moʻoni pe fakamatala fakanounou ʻo e potufolofolá. Fakaafeʻi e kau akó ke hiki e fakamoʻoni fakafolofola ki he potufolofolá ʻi ha laʻipepa hili hoʻo ʻoange e tokoni takitaha.

Sivi ʻo e tokāteliné: Hiki ʻa e Ngaahi Tefitoʻi Tokāteliné ʻi he palakipoé. Kole ki he kau akó ke hiki ʻa e ngaahi fakamoʻoni fakafolofola ʻo e veesi fakataukei folofolá ʻi lalo ʻi he tokāteline takitaha. Te nau lava ʻo fai ʻeni ʻi hono fakamanatu e ngaahi veesi fakataukei folofolá mei heʻenau manatú pe fakaʻaongaʻi ha lisi ʻo e ngaahi veesi fakataukei folofolá.

Sivi ʻo e ako maʻulotó: Fakaafeʻi e kau akó ke fakaʻaongaʻi ʻa e ngaahi lea mo e ngaahi tefitoʻi moʻoni ako maʻuloto mei he ngaahi veesi fakataukei folofolá ke fakamatalaʻi ha niʻihi ʻo e Ngaahi Tefitoʻi Tokāteliné. Fakaafeʻi kinautolu ke hiki ʻenau ngaahi fakamatalá pe lau leʻolahi kinautolu ki he kalasí.

Manatuʻi ke fakamālō ki hoʻo kalasí ʻi heʻenau ngaahi feinga ke maʻuloto ʻa e ngaahi veesi fakataukei folofola mahuʻinga ko ʻení mo e Ngaahi Tefitoʻi Tokāteliné. Fakamoʻoni ki he mālohi fakalaumālie mo e fakamoʻoni te tau lava ʻo maʻu ʻi heʻetau maʻuloto ʻa e ngaahi potufolofolá mo e ngaahi tokāteliné.

Ngaahi Fakamatala Fakamahino mo e Puipuituʻá

Fakahā 13. Fanga manu fekai

Makehe mei he ʻilo ko ia ʻoku fakafofongaʻi ʻe he fanga manú ʻa e ngaahi puleʻanga fakamāmaní, ʻoku ʻikai haʻatau faʻahinga fakaʻuhinga mei he ʻEikí ʻo kau ki he fanga manú. ʻI heʻeku lea kau ki he ngaahi meʻa lilo ʻo e tohi ʻa Fakahaá, naʻe lea ʻaki ʻe he Palōfita ko Siosefa Sāmitá e ngaahi meʻá ni:

“ʻI he taimi pē ʻoku ʻomi ai ʻe he ʻOtuá ha meʻa-hā-mai ʻo ha fakatātā, pe manu, pe fakatātā ʻo ha faʻahinga meʻa, ʻokú Ne moʻua maʻu pē ke ʻomi ha fakahā pe fakaʻuhinga ki he ʻuhinga ʻo e meʻa ko iá, he ka ʻikai ke pehē ʻoku ʻikai leva ke tau fatongia ʻaki pe tali ui ki heʻetau tui ki aí. …

“… ʻOua ʻe teitei kau atu ʻi he ngaahi meʻa-ha-mai ʻo e fanga manú mo e ngaahi kaveinga ʻoku ʻikai mahino kiate koé” (ʻi he History of the Church, 5:343, 344).

Fakahā 13:8. “[Ko e] Lami ʻa ia naʻe tāmateʻi talu mei he fakatupu ʻo māmaní”

ʻOku ʻuhinga e kupuʻi lea “[ko e] Lami ʻa ia naʻe tāmateʻi talu mei he fakatupu ʻo māmaní” (Fakahā 13:8) kia Sīsū Kalaisi mo ʻEne Fakaleleí. ʻOku ʻuhinga e “talu mei he fakatupu ʻo māmaní” ki he maama fakalaumālié, kimuʻa pea toki fakatupu ʻa e māmaní. Ko ia ai, ʻe lava ke mahino kiate kitautolu mei he veesi ko ʻení ʻa e ngaahi nunuʻa ʻo e Fakalelei ʻa e Fakamoʻuí naʻe hoko kimuʻa pea ʻaloʻi ʻa Sīsuú. Hangē ko ʻení, ʻe lava ke ngāue ʻaki ʻe he kakai ne moʻui kimuʻa ʻi he kuonga ʻo Kalaisí ʻa e tui kia Kalaisí, fakatomala pea fakamolemoleʻi ʻenau ngaahi angahalá ʻo fakafou ʻi he mālohi ʻo ʻEne Fakaleleí, neongo naʻe teʻeki ke ʻaloʻi mai e Fakamoʻuí (vakai, T&F 20:25–26).