Laipelí
Talateu ki he Tohi Lēsoni ʻa e Faiako Seminelí ʻi he Fuakava Foʻoú

Talateu ki he Tohi Lēsoni ʻa e Faiako Seminelí ʻi he Fuakava Foʻoú

Ko ‘Etau Taumuʻá

ʻOku pehē ʻe he Taumuʻa ʻo e Seminelí mo e ʻInisititiuti Fakalotú:

“Ko ʻetau taumuʻá ke tokoni ke mahino mo falala ʻa e toʻu tupú mo e kakai lalahi kei talavoú ki he ngaahi akonaki mo e Fakalelei ʻa Sīsū Kalaisí, fakafeʻungaʻi kinautolu ke maʻu ʻa e ngaahi tāpuaki ʻo e temipalé, pea teuteuʻi kinautolu, honau fāmilí, mo e niʻihi kehé ki he moʻui taʻengata mo ʻenau Tamai Hēvaní” (Ko Hono Akoʻi mo Ako ʻo e Ongoongoleleí: Ko ha Tohi Tuʻutuʻuni maʻá e Kau Faiako mo e Kau Taki ʻi he Seminelí mo e ʻInisititiuti Fakalotú [2012], xii).

Ke aʻusia ʻetau taumuʻá, ʻoku tau akoʻi ki he kau akó ‘a e ngaahi tokāteline mo e ngaahi tefitoʻi moʻoni ‘o e ongoongoleleí, ‘o hangē ko ʻene hā ‘i he folofolá mo e ngaahi lea ‘a e kau palōfitá. ‘Oku akoʻi ‘a e ngaahi tokāteline mo e ngaahi tefitoʻi moʻoni ko ‘ení ‘i ha founga ‘e maʻu ai ‘a e mahinó pea mo ha fakamāmá. ‘Oku tau tokoni ki he kau akó ke fakahoko honau fatongia ‘i he akó, mo teuteuʻi kinautolu ke akoʻi ‘a e ongoongoleleí ki ha niʻihi kehe.

Ke tokoni ke aʻusia e ngaahi taumuʻa ko ʻení, ʻoku poupouʻi koe mo e kau ako ʻoku ke akoʻí ke fakakau atu ʻa e Ngaahi Konga Mahuʻinga ʻo Hono Akoʻi mo Ako ʻo e Ongoongoleleí ʻi he taimi ʻoku mou ako fakataha ai ʻa e folofolá:

  • Faiako mo ako ʻi he Laumālié.

  • Tanumaki ha ʻātakai ako ʻo e ʻofa, fakaʻapaʻapa, pea mo ha taumuʻa.

  • Ako fakaʻaho e folofolá pea lau ʻa e fakamatala ki he lēsoní. [ʻE lava ke maʻu ʻa e saati ki hono muimuiʻi e lau folofolá ʻi he Fuakava Foʻoú kotoa ʻi he Ngaahi Kaati Fakataukei Folofola ki he Fuakava Foʻoú ʻi he LDS.org pea ʻi he store.lds.org(nāunau fika 10480).]

  • ʻAi ke mahino ʻa e kaveinga mo e kakano ʻo e folofolá mo e ngaahi lea ʻa e kau palōfitá.

  • Feinga ke ‘iloʻi, mahino, ongoʻi hono moʻoni mo hono mahuʻingá, mo fakaʻaongaʻi e ngaahi tokāteline mo e ngaahi tefitoʻi moʻoni ʻo e ongoongoleleí.

  • Fakamatalaʻi, vahevahe, mo fakamoʻoniʻi e ngaahi tokāteline mo e ngaahi tefitoʻi moʻoni ʻo e ongoongoleleí.

  • Taukei ʻi he ngaahi potufolofola mahuʻinga mo e Ngaahi Tefitoʻi Tokāteliné” (Ko hono Akoʻi mo Ako ʻo e Ongoongoleleí, 14).

ʻIkai ngata pē ʻi hono fakahoko ʻo e ngaahi taumuʻa ko ʻení, ʻoku totonu ke ke tokoni ki he kau akó ke nau tui faivelenga ki he ongoongolelei ʻo Sīsū Kalaisí mo ako ke ʻiloʻi ʻa e moʻoní mei he halá. Mahalo ʻe ʻi ai ha ngaahi fehuʻi ʻa e kau akó fekauʻaki mo e tokāteline, hisitōlia, pe ko e tuʻunga ʻo e Siasí ʻi he ngaahi meʻa fakasōsialé. Te ke lava ʻo teuteuʻi e kau akó ke tali e faʻahinga fehuʻi peheé ʻi hono tokoniʻi kinautolu ke “fekumi ki he akó, ʻio ʻi he ako pea ʻi he tui foki” (T&F 88:118) pea mo hono fakaʻaongaʻi ʻo e ngaahi maʻuʻanga tokoni ʻi he konga ʻo e Fekumi Ki he Moʻoní ʻi he si.lds.org.

Kuo ʻosi teuteuʻi e tohi lēsoni ko ʻeni ʻa e faiakó ke tokoniʻi koe ke ke lavameʻa ʻi hono fakahoko ʻa e ngaahi taumuʻá ni.

Teuteuʻi ‘o e Lēsoní

Naʻe fekauʻi ʻe he ʻEikí ʻa kinautolu ʻoku akoʻi ʻEne ongoongoleleí ke “akoʻi … ʻa e ngaahi tefitoʻi moʻoni ʻo ʻeku ongoongoleleí, ʻa ia ʻoku ʻi he Tohi Tapú mo e Tohi ʻa Molomoná, ʻa ia ʻoku ʻi ai ʻa hono kakato ʻo e ongoongoleleí” (T&F 42:12). Naʻá ne toe fakahinohinoʻi foki ʻoku totonu ke akoʻi e ngaahi moʻoni ko ʻení “ʻo fakatatau ki hono fakahinohinoʻi ʻa kinautolu ʻe he Laumālié,” ʻa ia “ʻe foaki atu … ʻi he lotu ʻo e tuí” (T&F 42:13–14). ʻI hoʻo teuteuʻi e lēsoni takitaha, lotua ke maʻu ʻa e tataki ʻa e Laumālié ke tokoni ke mahino kiate koe ʻa e ngaahi folofolá mo e ngaahi tokāteline mo e ngaahi tefitoʻi moʻoni ʻoku ʻi aí. Ko e meʻa tatau pē, muimui ki he ngaahi ueʻi ʻa e Laumālié ʻi hoʻo palani ʻa e founga ke tokoniʻi ai hoʻo kau akó ke mahino kiate kinautolu ʻa e folofolá, ako ke akoʻi ʻe he Laumālie Māʻoniʻoní, pea ongoʻi ha holi ke fakaʻaongaʻi e meʻa ʻoku nau akó.

ʻI he kalasi ko ʻení, ʻoku fakatefito hoʻo teuteú mo e akoʻí ʻi he Fuakava Foʻoú. Ako ʻi he faʻa lotu ʻa e ngaahi vahé pe ngaahi veesi te ke akoʻí. Fekumi ke mahino ʻa e kaveinga mo e kakano ʻo e konga folofolá, kau ai ʻa e talanoá, kakaí, ngaahi feituʻú, pea mo e ngaahi meʻa naʻe hokó. ʻI hoʻo maheni mo e kaveinga mo e kakano ‘o e konga folofolá, feinga ke ʻiloʻi ʻa e ngaahi tokāteline mo e ngaahi tefitoʻi moʻoni ʻoku ʻi aí, pea fili ʻa e ngaahi moʻoni ʻoku mahuʻinga taha ke mahino mo moʻui ʻaki ʻe hoʻo kau akó. Hili hoʻo ʻiloʻi ʻa e meʻa ʻe tukutaha ki ai e tokangá, te ke lava ʻo fili pe ko fē ʻa e ngaahi founga, fokotuʻutuʻu, mo e ʻekitivitī ʻe tokoni lelei taha ki hoʻo kau akó ke nau ako pea fakaʻaongaʻi ʻa e ngaahi moʻoni toputapu ʻoku maʻu ʻi he ngaahi folofolá.

ʻOku fokotuʻutuʻu e tohi lēsoni ko ʻení ke tokoniʻi koe ʻi he ngāue ko ʻení. Vakaiʻi fakalelei ʻa e naunau fakalēsoni fekauʻaki mo e konga folofola te ke akoʻí. Te ke lava ʻo fili ke fakaʻaongaʻi kotoa pe ko ha konga ʻo e ngaahi fokotuʻu ki ha konga folofola, pe ko hoʻo liliu e ngaahi fakakaukau ʻoku fokotuʻu atú ke hoa mo e ngaahi fie maʻu mo e ngaahi tūkunga ʻo e kau ako ʻokú ke akoʻí.

ʻOku mahuʻinga ke ke tokoni ke ako ʻe he kau akó ʻa e kotoa ʻo e konga folofola ʻi he lēsoni takitaha. ʻE tokoni hono fai iá ke maʻu ʻe he kau akó ʻa e pōpoaki kakato naʻe taumuʻa ʻa e tokotaha faʻu tohi ʻo e folofolá ke fakahokó. Ka neongo ia, ʻi hoʻo palani hoʻo lēsoní, te ke lava ʻo ʻiloʻi ʻoku ʻikai ke ke maʻu ha taimi feʻunga ʻi ha taimi kalasi ke fakaʻaongaʻi ai ʻa e ngaahi fokotuʻu fakafaiako kotoa pē ʻi he tohi lēsoní. Fekumi ki he fakahinohino ʻa e Laumālié pea fakakaukauʻi ʻi he faʻa lotu ʻa e ngaahi fie maʻu ʻa hoʻo kau akó ʻi hoʻo fakapapauʻi ʻa e ngaahi konga ʻo e folofolá ke fakamamafaʻí kae lava ke tokoni ki he kau akó ke nau ongo‘i ʻa e mo’oni mo e mahuʻinga ʻo e ngaahi moʻoni ʻo e ongoongoleleí pea fakaʻaongaʻi kinautolu ʻi heʻenau moʻuí. Kapau ʻoku nounou ʻa e taimí, mahalo ʻe fie maʻu ke ke liliu e ngaahi konga kehe ʻo e lēsoní ʻaki hono fakamatalaʻi fakanounou ha kulupu ngaahi veesi pe ko hono tataki ʻa e kau akó ke nau ʻiloʻi vave ha tefitoʻi moʻoni pe tokāteline kimuʻa pea hoko atu ki he ngaahi veesi hokó.

ʻI hoʻo fakakaukauʻi e founga ke liliu ai ʻa e ngaahi fakamatala ʻo e lēsoní, fakapapauʻi ke muimui ʻi he faleʻi ko ʻeni meia ʻEletā Tāleni H. ʻOakesi ʻo e Kōlomu ʻo e Kau ʻAposetolo ʻe Toko Hongofulu Mā Uá:

“ʻI heʻeku fanongó, kuo faʻa akoʻi ʻe Palesiteni Peeka, ke tau ʻuluaki ohi mai, pea tau toki liliu. Kapau te tau nofotaha pē he lēsoni kuo ʻomai ke tau faí, te tau lava leva ʻo muimui ki he Laumālié ke ne liliu ia” (“4.3.4 Decide through Inspiration,” mei he “A Panel Discussion with Elder Dallin H. Oaks” [Seminaries and Institutes of Religion satellite broadcast, Aug. 7, 2012]; LDS.org).

ʻI hoʻo teuteú, manatuʻi ʻa e kau ako ʻoku ʻi ai haʻanau ngaahi fie maʻu makehé. Fulifulihi ʻa e ngaahi ʻekitivitií mo e ngaahi fakaʻānauá ke tokoni ke nau lavameʻa. ʻE tokoni e fetuʻutaki mo e ngaahi mātuʻá mo e kau takí ke ke ʻiloʻi ʻa e ngaahi fie maʻu ʻa e kau akó pea tokoniʻi koe ke ke lavameʻa ʻi hono ʻoange ha aʻusia ʻoku mahuʻingamālie mo fakamaama ki he kau akó.

Lolotonga hoʻo teuteu lēsoní, mahalo te ke fili ke fakaʻaongaʻi e Ngaahi Fakamatalá mo e Tohinoa ʻi he LDS.org, pe ʻi he Gospel Library ki he ngaahi telefoni toʻotoʻó. Te ke lava ʻo fakaʻaongaʻi e ngaahi meʻangāue ko ʻení ke fakaʻilongaʻi ʻa e folofolá, ngaahi lea ʻo e konifelenisi lahí, ngaahi fakamatala ʻi he makasini ʻo e Siasí, pea mo e ngaahi lēsoní. Te ke lava foki ke tānaki atu pea seivi e ngaahi fakamatalá ke fakaʻaongaʻi lolotonga hoʻo lēsoní. Ke ako lahi ange fekauʻaki mo e founga ke fakaʻaongaʻi ai e ngaahi meʻangāue ko ʻení, vakai ki he peesi Notes and Journal Help ʻi he LDS.org.

Naʻe toʻo ha niʻihi ʻo e ngaahi nāunau ʻi he tohi lēsoni ko ʻení mei he New Testament Student Manual (Church Educational System Manual, 2014).

Fakaʻaongaʻi ʻa e Tohi Lēsoni Fakaʻaho ʻa e Faiakó

Talateu ʻo e Tohí

ʻOku ʻomi ʻe he talateu ʻo e tohí ha vakai fakalūkufua ki he tohi takitaha. Makehe mei he ngaahi meʻa kehe, ʻoku nau fakamatalaʻi ʻa e tohi takitaha, fakamatalaʻi ʻa e ngaahi fōtunga makehe ʻo e tohi takitaha, pea ʻomai ha fakamatala fakanounou ʻo e kakano ʻo e tohi takitaha.

Talateu ‘o e Konga Folofolá

ʻOku ʻomi ʻe he talateu ki he konga folofolá ha vakai fakalūkufua nounou ʻo e kaveinga mo e kakano ʻo e ngaahi konga folofola ki he lēsoni takitaha.

Fakamatala Fakanounou ʻo e Ngaahi Veesi Fakakulupú mo e Kaveingá

ʻOku faʻa vahevahe e ngaahi konga folofolá ki ha ngaahi konga iiki pe kulupu ʻo e ngaahi veesi ʻa ia ʻoku nofotaha ʻi ha tefito pe ngāue pau. ʻOku hoko atu ʻi he fakamoʻoni fakafolofola ki he kulupu veesi takitaha ha fakamatala fakanounou ʻo e ngaahi meʻa naʻe hoko pe ngaahi akonaki ʻi he kulupu veesi ko iá.

Ngaahi Tokoni ki hono Akoʻí

ʻOku fakamatalaʻi ʻe he ngaahi tokoni fakafaiakó ʻa e ngaahi tefitoʻi moʻoni mo e founga hono akoʻi ʻo e ongoongoleleí. Te nau lava ʻo tokoni kiate koe ʻi hoʻo feinga ke fakalakalaka ʻi hoʻo hoko ko ha faiakó.

Kanotohi ‘o e Lēsoní

ʻOku ʻi he kanotohi ʻo e lēsoní ha fakahinohino maʻau ʻi hoʻo ako mo akoʻí. ʻOkú ne fokotuʻu mai ha ngaahi fakakaukau fakafaiako, kau ai ha ngaahi fehuʻi, ʻekitivitī, lea, ngaahi fakatātā mo ha ngaahi saati.

Ngaahi Tokāteliné mo e Ngaahi Tefitoʻi Moʻoní

Hangē ʻoku fakanatula pē hono ʻohake ʻo e ngaahi tokāteliné mo e tefitoʻi moʻoní ʻi hono ako ʻo e folofolá, ʻoku fakaʻilongaʻi atu kinautolu ke tokoniʻi koe ke ʻilo pea fakamamafaʻi kinautolu ʻi hoʻo fepōtalanoaʻaki mo e kau akó.

Ngaahi Fakatātā

ʻOku fakafofongaʻi ʻe he ngaahi fakatātā ʻo e kau taki ʻo e Siasí mo e ngaahi meʻa ne hoko he folofolá ha nāunau tokoni ki he ʻatá te ke lava ʻo fakaʻaliʻali lolotonga hoʻo faiakó ʻo kapau ʻoku lava ke maʻu.

Fakataukei Folofola

ʻOku fakaʻilongaʻi atu e ngaahi fakataukei folofola ʻe 25 ʻoku maʻu ʻi he Fuakava Foʻoú ʻi he ngaahi lēsoni ʻoku nau ʻasi aí. ʻOku ʻi he ngaahi lēsoni takitaha foki ko ʻení ha fakakaukau ke akoʻi ki he ngaahi potufolofola ko ʻení. Ke tokoni ke ke tauhi maʻu hono akoʻi e ngaahi veesi fakataukei folofolá, ʻoku ʻi ai ʻa e ngaahi ʻekitivitī fakamanatu fakataukei folofolá ʻi he kotoa ʻo e tohi lēsoní. Ki ha ngaahi fakakaukau fakafaiako fakataukei folofola kehe, vakai ki he fakamatala fakalahi ʻo e tohi lēsoni ko ʻení pe ko e Maʻuʻanga Tokoni ʻo e Tokotaha Ako Seminelí ʻi he LDS.org.

ʻOtu ʻOku ʻAtaá

ʻE lava ʻo fakaʻaongaʻi ʻa e ʻotu ʻoku ʻataá ʻi he tohi lēsoni ʻa e faiakó kuo pākí ki he teuteu ʻo e lēsoní, kau ai hono hiki ha ngaahi fakamatala, ngaahi tefitoʻi moʻoni, ngaahi aʻusia, pe ngaahi fakakaukau kehe, ʻi hoʻo ongoʻi ʻa e ueʻi ʻa e Laumālie Māʻoniʻoní.

Ngaahi Fakamatala Fakamahino mo e Puipuituʻá

ʻOku ʻoatu ha ngaahi konga lea mo e fakamatala ʻi he fakaʻosinga ʻo e ngaahi lēsoni ʻe niʻihi fakalahi atu ki hoʻo mahino ki he kaveinga fakahisitōlia, ngaahi fakakaukau pau, pe ngaahi potufolofola. Fakaʻaongaʻi ʻa e fakamatala ʻi he konga ko ʻení ke teuteu ke tali e ngaahi fehuʻí pe toe tānaki atu ha fakakaukau ʻi hoʻo akoʻí. ʻE lava ke maʻu ha ngaahi fakamatala lahi ange ʻi he ngaahi tatau fakaʻilekitulōnika ʻo e tohi lēsoni ko ʻení ʻi he LDS.org pea ʻi he Gospel Library app.

Ngaahi Fakakaukau Tokoni Fakafaiakó

ʻOku hā ʻa e ngaahi fakakaukau tokoni fakafaiakó ʻi he fakaʻosinga ʻo e ngaahi lēsoni ʻe niʻihi. ʻOku nau ʻomi ha ngaahi fokotuʻu ki hono akoʻi ʻo e ngaahi tokāteline mo e ngaahi tefitoʻi moʻoni ʻa ia ʻe lava ke ʻikai ke faʻa ʻiloʻi pe fakamamafaʻi ʻi he kakano ʻo e lēsoní. ʻE lava foki ke nau ʻomi ha ngaahi fokotuʻu ki hono fakaʻaongaʻi ʻo e ngaahi mītia lahi, hangē ko e ngaahi fakamatala fakavitiō ʻi he DVD mo e ngaahi vitiō ʻi he LDS.org. ʻE lava ke maʻu ʻa e ngaahi fakakaukau lahi ange ki he akoʻí ʻi he ngaahi tatau fakaʻilekitulōnika ʻo e tohi lēsoni ko ʻení ʻi he LDS.org pea ʻi he Gospel Library app.

Polokalama Fakaʻaho ʻa e Seminelí (Lolotonga e Taimi Akó mo e Kalasi Pongipongí)

ʻOku ʻi he tohi lēsoni ko ʻení ʻa e ngaahi konga ko ʻeni ki he kau faiako semineli fakaʻahó: ngaahi lesoni fakaʻaho ʻa e faiakó ʻe 160, ngaahi tokoni fakafaiako, ngaahi talateu ki he tohí, ngaahi maʻuʻanga tokoni ki hono akoʻi ʻo e fakataukei folofolá mo e Ngaahi Tefitoʻi Tokāteliné.

Ngaahi Talateu ʻo e Tohí

ʻOku tuʻu ʻa e ngaahi talateu ʻo e tohí kimuʻa ʻi he ʻuluaki lēsoni ʻo e tohi takitaha ʻi he folofolá. ʻOku ʻomi ʻe he ngaahi talateu ʻo e tohí ha vakai fakalūkufua ki he tohi takitaha ʻaki hono tali e ngaahi fehuʻi ko ʻení: Ko e hā ʻoku ako ai ʻa e tohí ni? Ko hai naʻá ne hiki e tohí ni? Ko e fē e taimi mo e feituʻu ne hiki aí? Ko hai naʻe fakataumuʻa ki ai hono hikí pea ko e hā hono ʻuhingá? pea Ko e hā ha ngaahi fōtunga makehe ʻo e tohí ni? ʻOku fokotuʻutuʻu nounou foki ʻe h ngaahi talateú ʻa e kakano ʻo e tohi takitaha. ʻOku totonu ke fakakau ʻe he kau faiakó ʻa e fakamatala ki he kaveinga mo e puipuituʻa ʻo e tohí mei he talateu ʻo e tohí ʻi he ngaahi lēsoní ʻo ka fie maʻu.

Ngaahi Lēsoni Fakaʻaho ʻa e Faiakó

Fokotuʻutuʻu ʻo e Lēsoní

ʻOku nofotaha ʻa e lēsoni takitaha ʻi he tohi lēsoni ko ʻení ʻi ha konga folofola kae ʻikai ko ha foʻi fakakaukau, tokāteline pe tefitoʻi moʻoni pau. ʻE tokoniʻi koe mo hoʻo kau akó ʻe he fokotuʻutuʻú ni ke ako fakahokohoko ʻa e folofolá mo aleaʻi e ngaahi tokāteliné mo e ngaahi tefitoʻi moʻoní ʻi heʻenau ʻasi ʻi he folofolá. ʻI hono ako ʻe he kau akó ʻa e ʻuhinga naʻe maʻu ai ha tokāteline pe tefitoʻi moʻoni, ʻe lava ke fakalahi ange ʻenau mahino ki he foʻi moʻoni ko iá. ʻIkai ngata aí, ʻe lava ke toe vakai pea mahino lelei ange ki he kau akó ʻa e kakato ʻo e ngaahi pōpoaki naʻe ueʻi ʻa e tangata tohi folofolá ke ne ʻomaí. ʻE tokoni foki hono akoʻi ʻo e folofolá he founga ko ʻení ke ako ʻe he kau akó ʻa e founga ke ʻiloʻi pea fakaʻaongaʻi ai ʻa e ngaahi tefitoʻi moʻoni taʻengatá ʻi heʻenau ako folofola fakatāutahá.

ʻOku ʻikai fakamamafaʻi ʻa e konga kotoa ʻo ha konga folofola, ʻi he lēsoni takitaha. ʻOku ʻi ai ha ngaahi konga ʻoku siʻisiʻi ange ʻa e tokanga ki aí koeʻuhí ʻoku ʻikai mahuʻinga ki he pōpoaki fakakātoa ʻa e tokotaha faʻu tohi fakalaumālié pe koeʻuhí ʻoku ʻikai fuʻu ʻi ai haʻane kaunga ki he toʻu tupú. ʻOku ʻi ai ho fatongia ke liliu ʻa e ngaahi nāunau fakalēsoni ko ení ʻo fakatatau ki he ngaahi fie maʻu mo e meʻa ʻoku tokanga ki ai ʻa e kau ako ʻokú ke akoʻí. ʻE lava ke ke liliu ʻa e ngaahi fakakaukau ʻo e lēsoní ʻi he tohi lēsoni ko ʻení ʻi haʻo fili ke lahi ange e fakamamafá ki ha tokāteline pe tefitoʻi moʻoni pau kae ʻikai ko ia ʻoku ʻomi ʻi he nāunau fakalēsoní pe ko hoʻo fili ke ʻoua ʻe fuʻu fakamamafaʻi ha konga ʻo e konga folofolá ʻoku fakamatalaʻi loloto ange ʻi he tohi lēsoní. Fekumi ki he tataki ʻa e Laumālie Māʻoniʻoní ke tokoniʻi koe ʻi hoʻo fai e ngaahi liliu ko ʻení ʻi hoʻo teuteú mo hoʻo akoʻí.

Ngaahi Tokāteliné mo e Ngaahi Tefitoʻi Moʻoní

ʻI he kakano ʻo e lēsoni takitaha, te ke ʻilo ai ʻoku fakamamafaʻi atu ha ngaahi tokāteline mo e ngaahi tefitoʻi moʻoni mahuʻinga. ʻOku fakahā mai e ngaahi tokāteline mo e ngaahi tefitoʻi moʻoni ko ʻení ʻi he nāunau fakalēsoni koeʻuhí (1) ʻoku nau ʻomai ha tefitoʻi pōpoaki ʻo e konga folofolá, (2) ʻoku kaungatonu ki he ngaahi fie maʻú mo e tūkunga ʻa e kau akó, pe (3) ko e ngaahi moʻoni mahuʻinga ia ʻe lava ke tokoni ki he kau akó ke fakaloloto honau vā fetuʻutaki mo e ʻEikí. Fakatokangaʻi ʻoku akoʻi ʻe he Fuakava Foʻoú ha ngaahi moʻoni lahi ʻo hulu atu ʻi he ngaahi meʻa ʻoku ʻiloʻi ʻi he nāunau fakalēsoní. Naʻe akoʻi ʻe Palesiteni Poiti K. Peeka ʻo e Kau ʻAposetolo ʻe Toko Hongofulu Mā Uá ʻoku ʻi he folofolá “ha ngaahi moʻoni kuo fakatahaʻi ʻe feʻunga mo e fie maʻu ʻa e tokotaha fakafoʻituitui kotoa pē ʻi he tūkunga kotoa pē” (“The Great Plan of Happiness” [CES Symposium on the Doctrine and Covenants/Church History, Aug. 10, 1993], si.lds.org; vakai foki, Teaching Seminary: Preservice Readings [2004], 69, LDS.org).

ʻOange maʻu pē ki he kau akó ha ngaahi faingamālie ʻi hoʻo faiakó, ke nau feinga ke ʻiloʻi ʻa e ngaahi tokāteline mo e ngaahi tefitoʻi moʻoni ʻi he folofolá. ʻI he fakahaaʻi ʻe he kau akó ʻa e ngaahi moʻoni ʻoku nau ʻiló, mahalo te nau fakaʻaongaʻi ha ngaahi lea ʻe kehe mei he founga ʻoku fakamatalaʻi ai ha tokāteline pe tefitoʻi moʻoni ʻi he tohi lēsoni ko ení. Mahalo naʻa nau toe ʻilo foki mo ha ngaahi moʻoni ʻoku ʻikai ke ʻi he fokotuʻutuʻu ʻo e lēsoní. Tokanga ke ʻoua naʻá ke fokotuʻu atu ʻoku hala ʻa e tali ʻa e kau akó koeʻuhí pē ko e kehe ʻa e lea ʻoku nau fakaʻaongaʻí mei he ngaahi lea ʻoku fakaʻaongaʻi he tohi lēsoní pe koeʻuhí ʻoku nau ʻilo ha moʻoni ʻoku ʻikai ke ʻasi ʻi he nāunau fakalēsoní. Ka neongo ia, kapau ʻoku hala fakatokāteline ʻa e fakamatala ʻa ha tokotaha ako, ko ho fatongiá ke tokoni fakalelei ki he tokotaha akó ke fakatonutonu ʻene fakamatalá kae kei tauhi pē ha ʻātakai ʻo e ʻofá mo e falalá. ʻE lava ke ʻoange ʻi hono fai ʻení, ha aʻusia mahuʻinga ʻo e akó ki he kau ako ʻi hoʻo kalasí.

Ko hono Vavé

ʻOku ʻi he tohi lēsoni ko ʻení ha ngaahi lēsoni semineli fakaʻaho ʻe 160. Mahalo naʻa lava ke ke liliu e lēsoní mo hono vavé ʻo fakatatau mo e fie maʻú ki he lahi ʻo e taimi ʻokú ke maʻu ke akoʻi ai e lēsoni ko ʻení. Vakai ki he fakamatala fakalahi ʻi he tohi lēsoni ko ʻení ki ha sīpinga ʻo ha fakahinohino ki he vave hono akoʻí. ʻOku fakatefito ʻa e vave hono akoʻí ʻi ha taʻu fakaako uike ʻe 36 pe ʻaho ʻe 180 pea kau ai ha “ngaahi ʻaho feliliuaki” ʻe 20 te ke lava ʻo fakaʻaongaʻi ke liliu e ngaahi lēsoni fakaʻahó, tokoni ke maʻuloto ʻe he kau akó ʻa e ngaahi potufolofola fakataukei mahuʻingá mo e Ngaahi Tefitoʻi Tokāteliné, toe vakaiʻi ʻa e ngaahi nāunau fakalēsoni kimuʻá, fakahoko pea toe vakaiʻi e ngaahi sivi ako naʻe fie maʻú, pea fakaʻatā ki he ngaahi feliliuaki ki he taimitēpilé.

Ngāue Fakakakató

ʻE lava ke fakaʻaongaʻi e Tohi Fakahinohino Ako ʻi he Fuakava Foʻoú maʻá e Kau Ako Semineli ʻi ʻApí ʻi he polokalama semineli fakaʻahó ko ha maʻuʻanga tokoni ke ʻoange ha ngāue fakakakato ki he kau akó. ʻOku lele tatau pē ʻa e ngaahi lēsoni ʻi he tohi fakahinohino ako maʻá e kau ako semineli ʻi ʻapí mo ia ʻoku ʻoatu ʻi he tohi lēsoni ko ʻení. ʻE lava ke vahe ki he kau ako ko ia ʻoku lahi ʻenau liʻakí ke fakakakato ʻa e ngaahi ngāue ʻi he tohi fakahinohino akó ʻa ia ʻoku felāveʻi mo e meʻa ne ʻikai ke nau maʻu he kalasí. ʻE lava ke paaki ʻa e ngaahi ngāue ke faí mei he LDS.org, ko ia ʻoku ʻikai fie maʻu ke ke ʻoange kotoa e tohi lēsoní ki he kau ako ʻoku fie maʻu ke fai e ngāue fakakakató. ʻOku ʻoatu ha fakamatala lahi ange ʻo kau ki he Tohi Fakahinohino Ako ʻi he Fuakava Foʻoú maʻá e Kau Ako Semineli ʻi ʻApí ʻi he konga ʻoku ui ko e “Polokalama Semineli Ako ʻi ʻApí” ʻi he tohi lēsoni ko ʻení.

Ngaahi Tokoni ki hono Akoʻí

ʻOku ʻasi atu e tokoni fakafaiakó ʻi he tafaʻaki ʻo e tohi lēsoni ko ʻení. ʻOku fakamatalaʻi mo fakatātaaʻi ʻe he ngaahi tokoni fakafaiako ko ʻení mo fakatātāʻi ʻa e founga te ke lava ai mo e kau ako ʻokú ke akoʻí ʻo fakaʻaongaʻi e Ngaahi Meʻa Mahuʻinga ʻo Hono Akoʻi mo Ako e Ongoongoleleí ʻi hoʻo ako ʻo e Fuakava Foʻoú. ʻOku nau ʻoatu foki ha ngaahi fokotuʻu ki hono fakaʻaongaʻi lelei ha ngaahi founga fakafaiako kehekehe, taukei, mo e ngaahi founga. ʻI he taimi ʻoku mahino ai kiate koe ʻa e ngaahi tefitoʻi moʻoni ʻoku kau ʻi he ngaahi tokoni fakafaiakó, kumi ha ngaahi founga ke fakaangaanga mo fakaʻaongaʻi maʻu pē kinautolu ʻi hoʻo faiakó.

Fakataukei Folofolá mo e Ngaahi Tefitoʻi Tokāteliné

Ke tokoni ki he kau akó ke fakamahuʻingaʻi ʻa e ngaahi moʻoni taʻengatá mo lahi ange ʻenau loto falala ʻi hono ako mo akoʻi mei he folofolá, kuo fili ai ʻe he Seminelí mo e Inisititiuti Fakalotú (S&I) ha ngaahi potufolofola ke ako maʻuloto ʻe he kau akó lolotonga e kalasi takitaha. ʻIkai ngata aí, kuo fakakau ha lisi ʻo e Ngaahi Tefitoʻi Tokāteliné ke fakaʻilongaʻi ʻa e ngaahi tokāteline mahuʻinga ʻoku totonu ke feinga e kau akó ke mahino, tui, pea moʻui ʻaki ʻi heʻenau taʻu ʻe fā ʻi he seminelí mo e toenga ʻo ʻenau moʻuí. Ne teuteuʻi e tohi lēsoni ki he kalasi semineli takitaha ke fakaʻilongaʻi ʻa e Ngaahi Tefitoʻi Tokāteliné ʻi heʻenau ʻasi hake lolotonga ha ako fakahokohoko ʻe he tokotaha akó e folofolá. Naʻe fili ʻa e ngaahi veesi fakataukei folofola lahi ʻi hono fakakaukauʻi ʻa e Ngaahi Tefitoʻi Tokāteliné, ko ia ʻi hoʻo akoʻi ʻa e ngaahi veesi fakataukei folofolá ki he kau akó, te ke akoʻi ai pē foki mo e Ngaahi Tefitoʻi Tokāteliné.

ʻI hono tokonaki ʻe he kau akó ʻa e ngaahi moʻoni taʻengatá ʻi honau ʻatamaí mo e lotó, ʻe fakamanatu kiate kinautolu ʻe he Laumālie Māʻoniʻoní ʻa e ngaahi moʻoni ko ʻení ʻi he taimi te nau fie maʻu aí mo ʻoange ʻa e fakalotolahi ke nau ngāue ʻi he tuí (vakai, Sione 14:26). Naʻe akonaki ʻa Palesiteni Hauati W. Hanitā ʻo pehē:

“‘Oku ou poupou mālohi kiate kimoutolu ke mou ngāue ‘aki ʻa e folofolá ‘i ho‘omou faiakó, pea fai homou tūkuingatá ke tokoni ki he kau akó ke nau ngāue ‘aki ia pea ke nau ongoʻi fiemālie ‘i he‘enau fai iá. ‘Oku ou loto ke falala hotau to‘u tupú ki he folofolá. …

“… ʻOku tau fie maʻu ʻa e fānau akó ke nau falala ki he ivi mo e ngaahi moʻoni ʻo e folofolá, pea nau falala ʻoku folofola moʻoni mai ʻenau Tamai Hēvaní kiate kinautolu ʻi he folofolá, pea nau falala te nau lava ʻo tafoki ki he folofolá ʻo maʻu mei ai ʻa e ngaahi tali ki heʻenau ngaahi palopalemá mo ʻenau lotú. …

“… ‘Oku tau ‘amanaki pē he ‘ikai ke ‘i ai ha taha ‘i hoʻomou kau akó te nau ‘alu atu mei homou loki akó ‘oku nau ilifia pē taʻefiemālie pe mā koeʻuhí ʻoku ‘ikai te nau lava ‘o maʻu ‘a e tokoni ‘oku nau fie maʻú koeʻuhí ʻoku ʻikai ke nau ‘ilo lelei ʻa e folofolá ke kumi ‘o ‘ilo ‘a e ngaahi potufolofola totonú” (“Eternal Investments” [address to CES religious educators, Feb. 10, 1989], 2, si.lds.org; vakai foki, Teaching Seminary: Preservice Readings [2004], 20, LDS.org).

Vakai ki he fakamatala fakalahi ʻo e tohi lēsoni ko ʻení ki ha fakamatala lahi ange kau ki he fakataukei folofolá pea mo e Ngaahi Tefitoʻi Tokāteliné.

Ko Hono Fakaʻaongaʻi ʻo e Ngaahi Tohi Lēsoni Ako ʻi ʻApí

Fakamatala Fakanounou ʻo e Ngaahi Lēsoni ʻa e Kau Akó

ʻE tokoni ʻa e fakamatala fakanounoú ke ke feangainga mo e kanotohí pea mo e ngaahi tokāteline mo e ngaahi tefitoʻi moʻoni ne ako ʻe he kau akó lolotonga e uiké ʻi he fakahinohino ʻa e tokotaha akó.

Talateu ʻo e Lēsoní

ʻE tokoni e talateu ki he lēsoní ke ke ʻilo e konga ʻo e konga folofolá ʻe fakamamafaʻi ʻi he lēsoní.

Fakamatala Fakanounou ʻo e Ngaahi Veesi Fakakulupú mo e Kaveingá

ʻOku vahevahe fakakulupu ʻa e ngaahi vēsí ʻo fakatatau ki he feituʻu ne fai ai e liliu ʻi he kaveingá pe kakanó ʻi he konga folofolá. ʻOku hoko atu ʻi he fakamoʻoni fakafolofola ki he kulupu veesi takitaha ha fakamatala fakanounou ʻo e ngaahi meʻa naʻe hoko pe ngaahi akonaki ʻi he kulupu veesi ko iá.

Kanotohi ‘o e Lēsoní

ʻOku ʻoatu ʻe he kanotohi ʻo e lēsoní ha fakahinohino kiate koe ʻi hoʻo ako mo akoʻí. ʻOkú ne fokotuʻu mai ha ngaahi fakakaukau fakafaiako, kau ai ha ngaahi fehuʻi, ʻekitivitī, lea, ngaahi fakatātā mo ha ngaahi saati.

Ngaahi Tokāteliné mo e Ngaahi Tefitoʻi Moʻoní

Hangē ʻoku fakanatula pē hono ʻohake ʻo e ngaahi tokāteliné mo e tefitoʻi moʻoní ʻi hono ako ʻo e folofolá, ʻoku fakaʻilongaʻi atu kinautolu ke tokoniʻi koe ke ʻilo pea fakamamafaʻi kinautolu ʻi hoʻo fepōtalanoaʻaki mo e kau akó.

Talateu ki he ʻIuniti Hokó

ʻOku ʻomi ʻe he palakalafi fakaʻosi ʻo e lēsoni takitaha ha vakai nounou ki he ʻiuniti hokó. Vahevahe ʻa e palakalafi ko ʻení mo hoʻo kau akó ʻi he fakaʻosinga ʻo e lēsoní takitaha ke tokoniʻi kinautolu ke nau ʻamanaki atu ki hono ako ʻa e folofolá he uike ka hoko maí.

Polokalama Semineli Ako ʻi ʻApí

ʻE lava ke fokotuʻutuʻu ʻa e ngaahi kalasi semineli ako ʻi ʻapí ʻi he malumalu ʻo e fakahinohino ʻa e kau taki lakanga fakataulaʻeiki fakalotofonuá mo e fakafofonga S&I, ʻi he ngaahi feituʻu he ʻikai lava ke ʻalu e kau akó ki ha kalasi fakaʻaho koeʻuhí ko e mamaʻó pe ko ha ngaahi meʻa kehe (hangē ko ha faingataʻaʻia fakaesino). ʻOku meimei ke ʻikai faʻa lava ʻa e ngaahi kalasi semineli ako ʻi ʻapí ʻi he feituʻu ʻoku fai ai e ngaahi kalasi fakaʻahó (lolotonga e uiké) ʻi he pongipongí pe taimi tukuangé.

ʻOku fakaʻatā ʻe he polokalama semineli ako ʻi ʻapí ke maʻu ʻe he kau akó ha maaka ʻi he seminelí ʻi hono fakakakato e ngaahi lēsoni fakafoʻituituí mei ʻapi kae ʻikai maʻu kalasi he lolotonga ʻa e uiké. ʻOku maʻu ʻa e ngaahi lēsoni ko ʻení ʻi ha tohi lēsoni kehe ʻoku ui ko e Tohi Fakahinohino Ako ʻi he Fuakava Foʻoú maʻá e Kau Ako Semineli ʻi ʻApí. ʻOku talanoa e kau akó tuʻo taha ʻi he uike mo ha faiako semineli ke ʻave ʻenau ngāué pea kau ki ha lēsoni ʻi he loki akó. ʻOku toe fakamatalaʻi atu ʻi lalo ʻa e tohi fakahinohino ako ʻa e tokotaha akó pea mo e ngaahi lēsoni fakauike ʻi loki akó.

Tohi Fakahinohino Ako maʻá e Kau Ako ʻi ʻApí

ʻOku fakataumuʻa ʻa e Tohi Fakahinohino Ako ʻi he Fuakava Foʻoú maʻá e Kau Ako Semineli ʻi ʻApí ke tokoni ki he tokotaha ako ʻi ʻapí ke maʻu ha aʻusia ʻi hono ako e Fuakava Foʻoú ʻo tatau pē mo e tokotaha ako semineli ʻa ia ʻoku kau ʻi he ngaahi kalasi ʻo e ʻaho ʻo e uiké. Ko ia ai, ʻoku tatau ʻa e vave ʻo e tohi fakahinohino ako ʻa e kau akó pea pehē ki he ngaahi tokāteline mo e ngaahi tefitoʻi moʻoni ʻokú ne fakamamafaʻí mo e nāunau fakalēsoni ʻi he tohi lēsoni ko ʻení. ʻOku kau foki ʻi he tohi fakahinohino ako ʻa e tokotaha akó ha fakahinohino kau ki he fakataukei folofolá. ʻOku aleaʻi ʻa e ngaahi veesi fakataukei folofolá ʻi heʻenau hā ʻi he folofolá, pea ʻoku faʻa ʻomi e ngaahi ʻekitivitī fai tohí ʻi he ngaahi lēsoni ʻoku aleaʻi ai ʻa e ngaahi potufolofolá.

Kuo pau ke fakakakato ʻe he fānau semineli ako ʻi ʻapí ʻi he uike takitaha, ha ngaahi lēsoni ʻe fā mei he tohi fakahinohino ako ʻa e tokotaha akó pea kau atu ki ha lēsoni fakauike ʻoku fai ʻe heʻenau faiako seminelí. ʻOku fakakakato ʻe he kau akó e ngaahi ngāue kuo fakafikefika mei he tohi fakahinohino akó ʻi heʻenau tohinoa ako folofolá. ʻOku totonu ke ʻi ai ha tohinoa ako folofola ʻe ua ʻa e kau akó koeʻuhí ke nau tuku ʻa e taha mo ʻenau faiakó pea kei hokohoko atu pē ʻa e ngāué ʻi he meʻa ʻe tahá. ʻI he fakataha ʻa e kau akó mo ʻenau faiakó ʻi he uike takitaha, ʻoku ʻave ʻa e tohinoa ʻe taha ki he faiako ako ʻi ʻapí pea fakafoki ʻa e taha ki he tokotaha akó ke fakaʻaongaʻi ki he ngaahi lēsoni he uike hoko maí. (Hangē ko ʻení, lolotonga ha uike ʻe taha ʻoku fakakakato ʻe he kau akó e ngaahi ngāué ʻi he tohinoa ʻuluakí. ʻOku ʻomi leva ʻe he tokotaha akó ʻa e tohinoa ko ʻení ki he kalasí pea ʻoange ia ki he faiakó. Lolotonga e uike hono hokó, ʻoku fakakakato ʻe he tokotaha akó e ngaahi ngāué ʻi he tohinoa uá. ʻI he taimi ʻoku ʻoange ai ʻe he tokotaha akó ʻa e tohinoa uá, ʻe fakafoki ange ʻe he faiakó e tohinoa ʻuluakí. ʻOku fakaʻaongaʻi leva ʻe he tokotaha akó ʻa e tohinoa ʻuluakí ke fakakakato e ngāue ʻo e uike hoko maí.)

ʻOku poupouʻi atu e kau ako semineli kotoa pē ke ako fakaʻaho ʻa e folofolá pea lau ʻa e fakamatala ki he lēsoní, ka ʻoku totonu ke mahino ki he kau ako mei ʻapí ʻoku fie maʻu ke nau fakaʻaongaʻi ha toe miniti ʻe 30 ki he 40 kehe ʻi he lēsoni kotoa ʻe fā ʻi he ʻiuniti takitaha pea kau atu ki he lēsoni ʻo e kalasi fakauiké.

Lesoni Fakauike ʻa e Faiako Ako Mei ʻApí

ʻOku fekauʻaki e ʻiuniti takitaha ʻi he Tohi Fakahinohino Ako ʻi he Fuakava Foʻoú maʻá e Kau Ako Semineli ʻi ʻApí ki he lēsoni ʻe nima ʻi he tohi lēsoni fakaʻaho ʻa e faiakó. Te ke maʻu ʻi he fakaʻosinga ʻa e lēsoni ʻe nima kotoa pē ʻi he tohi lēsoni ko ʻení, ha lēsoni fakauike ʻi ʻapi ʻe taha ʻa e faiakó. ʻE tokoni ʻa e ngaahi lēsoni ako ʻi ʻapí ke toe fakamanatu, fakaloloto ʻenau mahinó, pea fakaʻaongaʻi ʻe he kau akó ʻa e ngaahi tokāteline mo e ngaahi tefitoʻi moʻoni naʻa nau ako ʻi heʻenau fakakakato e ngaahi lēsoni ʻi he fakahinohino ako ʻa e tokotaha akó lolotonga e uiké. ʻE lava foki e ngaahi lēsoni ko ʻení ʻo vakaiʻi ha toe ngaahi moʻoni ʻoku ʻikai fakamatala ki ai e tohi fakahinohino ako ʻa e tokotaha akó. (Ke maʻu ha tokoni ʻi hono palani hoʻo taimitēpile ki he lēsoní, vakai ki he fakahinohino ki he vave hono akoʻí maʻá e faiako ako ʻi ʻapí ʻi he fakamatala fakalahi ʻo e tohi lēsoni ko ʻení.)

ʻI hoʻo hoko ko e faiako ako ʻi ʻapí, ʻoku totonu ke ke maʻu ha mahino lahi ki he meʻa ʻokú ke ako ʻi ʻapí he uike takitaha kae lava ke ke tali ʻa e ngaahi fehuʻí pea fokotuʻu mo ha ngaahi fealeleaʻaki ʻoku mahuʻingamālié ʻi hoʻo fakataha mo kinautolú. Kole ki he kau akó ke nau omi mo ʻenau folofolá, tohinoa ki he ako folofolá, pea mo e tohi fakahinohino ʻa e tokotaha akó ki he kalasi fakauiké ke nau lava ke mou vakai ki ai lolotonga ʻa e lēsoní. Liliu e ngaahi lēsoní ʻo fakatatau ki he fie maʻu ʻa e kau ako ʻoku ke akoʻí pea fakatatau ki he tataki ʻa e Laumālie Māʻoniʻoní. Mahalo te ke fie vakai foki ki he ngaahi lēsoni fakaʻaho ʻa e faiakó ʻi he tohi lēsoni ko ʻení ʻi hoʻo teuteú mo hoʻo faiakó. ʻE lava ʻo fakalahi atu hoʻo faiako fakauiké ʻi hano ako e ngaahi tokoni fakafaiakó mo e ngaahi founga ʻoku ngāue ʻaki ʻi he ngaahi lēsoni fakaʻahó. Feau ha ngaahi fie maʻu pau ʻa e kau ako ʻokú ke akoʻí. Hangē ko ʻení, kapau ʻoku faingataʻaʻia ha tokotaha ako ʻi he tohí, tuku ke ne fakaʻaongaʻi ha meʻangāue hiki pe fakahoko e ngaahi fakakaukaú ki ha mēmipa ʻo e fāmilí pe kaungāmeʻa te ne lava ke hiki ʻa ʻene ngaahi talí.

ʻI he fakaʻosinga ʻo e lēsoni fakauike takitaha, tānaki ʻa e tohinoa ako folofola ʻa e kau akó pea poupouʻi kinautolu ʻi he hokohoko atu ʻenau akó. ʻOange kiate kinautolu ha tohinoa ako folofola ki he ngaahi ngāue ke fai he uike hono hokó, hangē ko hono fakamatalaʻi ʻi ʻolungá ʻi he konga ko e “Tohi Fakahinohino Ako maʻá e Fānau Ako ʻi ʻApí.” (ʻI he malumalu ʻo e fakahinohino ʻa e kau taki lakanga fakataulaʻeikí mo e ngaahi mātuʻá, ʻe lava e kau faiako semineli ʻo e siteikí [kuo uí] ʻo fetuʻutaki fakaʻilekitulōnika mo e kau ako semineli ʻoku kau ʻi he ako semineli ʻi ʻapí.)

ʻI hoʻo lau ʻi he ngaahi ngāue ʻi he tohinoa ako fakafolofola ʻa e kau akó, tali fakataimi ki heʻenau ngāué ʻaki haʻo tohi ha kiʻi nouti pe fakahikihikiʻi ʻi hoʻo mou fetaulaki ka hokó. Mahalo te ke fie fekumi ki ha ngaahi founga kehe ke fakahoko ai ha poupou mo ha tokoni ʻoku mahuʻingamālié. ʻE tokoni eni ke ʻiloʻi ʻe he kau akó ʻokú ke tokanga ki heʻenau ngāué pea ʻe tokoni ia ke fakaʻaiʻai kinautolu ke nau toe fakamaatoato ange ʻi heʻenau ngaahi talí.

ʻE fai e ngaahi feinga lahi taha ʻa e kau akó ke maʻuloto e ngaahi potufolofola mahuʻingá ʻi heʻenau fakakakato ʻa ʻenau ngaahi lēsoni ako ʻi ʻapí. ʻE lava ke muimuiʻi ʻe he kau faiako ako ʻi ʻapí e ngaahi ngāue ʻa e kau akó lolotonga e ngaahi lēsoni ako ʻi ʻapí, ʻaki hono fakaafeʻi ʻo e kau akó ke lau maʻuloto pe fakamanatu ha ngaahi veesi fakataukei folofola naʻe ʻasi ʻi he ʻiuniti ako ʻo e uike ko iá.

Ngaahi Maʻuʻanga Tokoni Kehé

LDS.org

ʻOku maʻu ʻa e Tohi Lēsoni ʻa e Faiako Seminelí ʻi he Fuakava Foʻoú (nttm.lds.org) mo e Tohi Fakahinohino Ako ʻi he Fuakava Foʻoú ʻa e Kau Ako Seminelí ʻi he LDS.org pea ʻi he Gospel Library ki he ngaahi telefoni toʻotoʻó. ʻOku ʻi he tatau fakaʻilekitulōnika ʻo e tohi lēsoni ʻa e faiakó ha Ngaahi Fakamatala Fakamahino mo e Puipuituʻá, Ngaahi Fakakaukau Fakafaiako, mo ha ngaahi maʻuʻanga tokoni fakamītia kehe ʻa ia ʻoku ʻikai fakakau atu ʻi he tohi lēsoni kuo ʻosi paaki ko ʻení koeʻuhí ko e ngaahi fakangatangatá.

si.lds.org

ʻE lava ke hū e kau faiakó ki he uepisaiti ʻa e Seminelí mo e ʻInisititiuti Fakalotú (si.lds.org) ki ha tokoni ʻi hono teuteu ʻa e ngaahi lēsoní pea kumi ha ngaahi fakakaukau fakafaiako kehe.

Meʻangāue ʻa e Ngaahi Fakamatalá mo e Tohinoá

ʻE lava ke fakaʻaongaʻi ʻe he kau faiakó mo e kau akó ʻa e ngaahi meʻangāue ʻa e Ngaahi Fakamatala mo e Tohinoa ʻi he ʻinitanetí mo e telefoni toʻotoʻó ke fakaʻilongaʻi pea tānaki atu ha fanga kiʻi fakamatala ki he tatau fakaʻilekitulōnika ʻo e tohi lēsoni ko ʻení ʻi heʻenau teuteu e ngaahi lēsoní mo ako e folofolá. ʻOku toe maʻu foki e ngaahi tohi lēsoni ʻa e faiakó mo e tohi fakahinohino ako ʻa e tokotaha akó ʻi he LDS.org ke download ʻi he ngaahi founga kehe (hangē ko e PDF, ePub, mo e ngaahi faile mobi [Kindle]).

Ngaahi Meʻa kehe

ʻOku maʻu ʻi he ʻinitanetí ʻa e ngaahi maʻuʻanga tokoni ko ʻení, fakafou ʻi hoʻo supavaisá, ʻi he senitā tufakiʻanga nāunau fakalotofonua ʻo e Siasí, pea ʻi he falekoloa ʻo e Siasí ʻi he ʻinitanetí (store.lds.org):

Paaki