Talateu ki he Tohi ʻa Paula ki he Kakai Filipaí
Ko e hā hono ʻuhinga ʻoku ako ai e tohí ni?
ʻI heʻene Tohi ko ia ki he kakai ʻo Filipaí, naʻe fai ai ʻe Paula ha fakalotolahi pea naʻinaʻi ki he Kāingalotú ke nau tuʻu maʻu ʻi he uouangataha pea ngāue fakataha ke taukaveʻi e tuí. Mahalo ko e taha ʻo e ngaahi tefitoʻi moʻoni mahuʻinga taha naʻe akoʻi ʻe Paula ʻi he tohi Filipaí ko e ʻomi ko ia ʻe he lotu ki he ʻOtuá mo e falala kiate Iá ʻa e “melino ʻo e ʻOtuá, ʻa ia ʻoku lahi hake ʻaupito ʻi he faʻa ʻiloá” (Filipai 4:7). ʻE lava ke tokoni hono ako e ngaahi pōpoaki fakalotolahi ʻa Paulá ʻi he tohí ni ki he ngaahi feinga ʻa e kau akó ke kātaki faivelenga ki he ngataʻangá. ʻI he fāifeinga ʻa e kau akó ke muimui ʻia Kalaisí, te nau lava foki ʻo maʻu ha loto falala pea fakahaaʻi ʻo hangē ko Paulá, “ʻOku ou faʻa fai ʻa e ngaahi meʻa kotoa pē ʻia Kalaisi ʻokú ne fakamālohiʻi aú” (Filipai 4:13).
Ko hai naʻá ne tohi ʻa e tohí ni?
Neongo ʻoku hā ʻa Tīmote fakataha mo Paula ʻi he fakafeʻiloaki ʻo e tohí (vakai, Filipai 1:1), ka naʻe fai ʻe Paula ʻa e Tohi ki he Kakai Filipaí. ʻOku poupouʻi ʻeni ʻi hono ngāue ʻaki e hoanauna tokotaha ko e au ʻi he kotoa ʻo e tohí mo e fakamatala kia Tīmote ʻi he Filipai 2:19. Mahalo naʻe hoko ʻa Tīmote ko ha tangata tohi ʻa Paula, ʻo fai e tohí ʻi he malumalu ʻo e fakahinohino ʻa Paulá.
Ko e fē ʻa e taimi mo e feituʻu ne tohi aí?
Ngalingali naʻe tohi ʻa Paula ki he kakai Filipaí ʻi he vahaʻa e A.D. 60 mo e 62, lolotonga hono tuku pōpula ia ʻi Lomá (vakai, Filipai 1:7, 13, 17; vakai foki, Ngāue 28:16–31; Ko e Fakahinohino ki he Ngaahi Folofolá, “Kakai Filipaí,” scriptures.lds.org).
Ko hai naʻe fakataumuʻa ki ai hono hikí pea ko e hā hono ʻuhingá?
Ko Filipai ʻa e ʻuluaki feituʻu ʻi ʻIulope naʻe malangaʻi fakalelei ai ʻe Paula e ongoongoleleí mo fokotuʻu ha kolo ʻo e Siasí (vakai, Ngāue 16:11–40; Bible Dictionary ʻi he tatau faka-Pilitānia ʻo e Tohi Tapu ʻa e Siasí, “Pauline Epistles”). Ko e taha ʻo e ngaahi taumuʻa ʻa Paula ʻi hono fai e tohi ko ʻení ke fakahaaʻi e houngaʻia ʻi he ʻofa mo e tokoni fakapaʻanga ne fai ʻe he Kāingalotu ʻi Filipaí kiate iá lolotonga ʻene fononga fakafaifekau hono uá mo hono tuku pōpula ia ʻi Lomá (vakai, Filipai 1:3–11; 4:10–19; vakai foki, Bible Dictionary ʻi he tatau faka-Pilitānia ʻo e Tohi Tapu ʻa e Siasí, “Pauline Epistles”).
Naʻe fakahīkihikiʻi foki ʻe Paula ʻa e kāingalotu ʻi Filipaí ʻi heʻenau tui kia Sīsū Kalaisí pea ʻoange ha faleʻi makatuʻunga ʻi he fakamatala fekauʻaki mo kinautolu naʻá ne maʻu mei ha ākonga Filipai ko ʻEpafalotaito (vakai, Filipai 4:18). Naʻe kau ʻi he faleʻi ʻa Paulá ha fakalotolahi ke loto fakatōkilalo mo uouangataha (vakai, Filipai 2:1–18; 4:2–3). Naʻe fakatokanga foki ʻa Paula ki he kakai Filipaí ke tokanga telia ʻa e kau Kalisitiane faihalá, ʻo hangē ko kinautolu ne nau akoʻi naʻe fie maʻu ʻa e kamú ki he uluí. Ko e niʻihi fakafoʻituitui peheé (ne faʻa ui ko e kau Judaizers (kau akonaki loi)) ʻa ia naʻa nau pehē naʻe pau ke talangofua e kau papi ului foʻoú ki he fono kimuʻa ʻo e Fuakava Motuʻá ki he kamú kimuʻa pea toki hoko ko ha Kalisitiane (vakai, Filipai 3:2–3).
Ko e hā ha ngaahi fōtunga makehe ʻo e tohí ni?
ʻOku faʻa ui e tohi Filipaí ko ha Tohi ʻo e fale fakapōpulá, fakataha mo ʻEfesō, Kolose mo Filimone. Neongo naʻe fai mei he fale fakapōpulá, ka kuo fakamatalaʻi ʻe he kau mataotao fakaʻatamaí ʻa e tohi ʻa Paula ki he kakai Filipaí ko ʻene tohi fakafiefia tahá. Naʻe fakahaaʻi ʻe Paula e loto houngaʻiá, ʻofá, mo e loto falala ki he kāingalotu ʻo e Siasí; fakamatalaʻi e ngaahi feilaulau naʻá ne fai ke muimui ʻia Sīsū Kalaisí; pea fakahinohinoʻi e Kāingalotu ʻi Filipaí ki he ngaahi tefitoʻi moʻoni ʻo e moʻui angatonú. Mahalo ʻe fakatokangaʻi ʻe he kau akó ʻi he Filipai 4:8 ha niʻihi ʻo e lea naʻe ngāue ʻaki ʻi he tefito ʻo e tui hongofulu mā tolú, ʻa ia naʻe hiki ʻe he Palōfita ko Siosefa Sāmitá.
Naʻe fakahaaʻi ʻe Paula ʻi ha founga fakapunake ʻa e afeitaulalo ʻa e Fakamoʻuí mei he tuʻunga faka-ʻOtua ʻi he maama fakalaumālié ki he moʻui fakamatelié, ʻa ia naʻá Ne mamahi ai ʻi he “mate ʻi he ʻakaú” (vakai, Filipai 2:3–8). ʻI hono fakahoko Hono misiona fakalangí, ʻoku hakeakiʻi ʻa Sīsū Kalaisí, pea ʻe hokosia ʻa e ʻaho ʻe “tūʻulutui … ʻa e tui ʻo ia kotoa pē” ʻi muʻa ʻiate Ia, pea “fakahā ʻe he ʻelelo kotoa pē ko e ʻEikí ʻa Sīsū Kalaisi” (Filipai 2:10–11). Naʻe fakahā ʻe Paula ʻoku maʻu ʻene loto-falalá mo e mālohí meia Sīsū Kalaisi (vakai, Filipai 4:13).
Fokotuʻutuʻú
Filipai 1 ʻOku fakahaaʻi ʻe Paula e houngaʻia ʻi he feohi mo e Kāingalotu ʻi Filipaí. ʻOkú ne akoʻi naʻe paotoloaki ʻe he fakafepaki naʻá ne aʻusia ʻi he ngāue maʻá e ʻEikí, ʻo kau ai hono tuku pōpula iá, ʻa e ngāue ʻa e ongoongoleleí. ʻOkú ne poupouʻi e kāingalotu ʻo e Siasí ke tuʻu maʻu ʻi he uouangataha ʻi hono taukaveʻi e tuí.
Filipai 2 ʻOku toe poupouʻi ʻe Paula ʻa e kāingalotu ʻo e Siasí ke faaitaha pea fakamahinoʻi e sīpinga ʻa Sīsū Kalaisí, ʻa ia ne afeitaulalo ke hifo mai ki he moʻui fakamatelié, ko ha sīpinga ʻo e ʻofá, talangofuá, mo e loto-fakatōkilaló. ʻE ʻi ai e ʻaho ʻe fakahaaʻi ai ʻe he tokotaha kotoa pē ko e ʻEikí ʻa Sīsū Kalaisi. ʻOku fakahinohinoʻi ʻe Paula e kāingalotu ʻo e Siasí ke ngāueʻi honau fakamoʻuí.
Filipai 3 ʻOku fakatokanga ʻa Paula kau ki he kau Judaizers. ʻOkú ne fakamatalaʻi ʻene moʻui kimuʻa ko ha tangata Fālesí mo e founga naʻá ne loto fiemālie ai ke liʻaki e meʻa kotoa pē ke muimui ʻia Sīsū Kalaisí. ʻOkú ne naʻinaʻi ki he Kāingalotú ke muimui ki heʻene sīpingá ʻi he vilitaki atu ki muʻa ki he fakamoʻuí. ʻOku fakamatalaʻi ʻe Paula ʻe liliu ʻe Sīsū Kalaisi hotau sino fakamatelié ki ha sino nāunauʻia hangē ko Iá.
Filipai 4 Ko e poupouʻi ʻe Paula e Kāingalotú ke fiefia maʻu pē ʻi he ʻEikí. ʻOkú ne naʻinaʻi kiate kinautolu ke fetongi ʻenau hohaʻá ʻaki ʻa e lotu mo e fakafetaʻi, ʻo talaʻofa ange te nau fiefia ʻi he melino ʻa e ʻOtuá, ʻa ia ʻoku mahulu hake ʻi he faʻa ʻiloá. ʻOkú naʻinaʻi ʻa Paula ki he kāingalotu ʻo e Siasí ke fakakaukau ki he ngaahi meʻa ʻoku faitotonu, angatonu, moʻoni, haohaoa, fakaʻofoʻofa, ongoongo lelei mo angamaʻá. ʻOkú ne fakahaaʻi te ne lava ʻo fai e ngaahi meʻa kotoa pē ʻia Sīsū Kalaisi, ʻa ia ʻokú ne fakamālohia iá.