Talateu ki he Tohi hono Ua ʻa Paula kia Tīmoté
Ko e hā hono ʻuhinga ʻoku ako ai e tohí ni?
ʻOku fakamamafaʻi ʻe he Tohi hono Ua ʻa Paula kia Tīmoté ʻa e mālohi ʻoku maʻu mei hono maʻu ha fakamoʻoni kia Sīsū Kalaisí (vakai, 2 Tīmote 1:7–8). ʻOku ʻi ai foki ha kikite ki he “kuonga fakatuʻutāmaki” ʻe hoko ʻi he ngaahi ʻaho ʻo Paula mo Tīmoté pea ʻi he ngaahi ʻaho fakaʻosí (vakai, 2 Tīmote 3:1–7). Ke tokoni ki he ngaahi faingataʻa ne fehangahangai mo Tīmoté, naʻe poupouʻi ia ʻe Paula ke falala ki he folofolá mo e kau taki ʻo e Siasí (vakai, 2 Tīmote 3:14–17) pea fakafalala ki he tokāteline moʻoní (vakai, 2 Tīmote 4:2). ʻE ʻilo ʻe he akó ʻi hono ako e tohi ko ʻení, ha ngaahi tokāteline mo e ngaahi tefitoʻi moʻoni ʻe lava ʻo tokoni ke nau moʻui faivelenga ʻi heʻenau aʻusia ʻa e ngaahi taimi fakatuʻutāmaki ʻo e ngaahi ʻaho kimui ní.
Ko hai naʻá ne tohi ʻa e tohí ni?
Naʻe tohi ʻe Paula ʻa e 2 Tīmoté (vakai, 2 Tīmote 1:1).
Ko e fē ʻa e taimi mo e feituʻu ne tohi aí?
Ne ngalingali ne fai ʻe Paula ʻene Tohi hono Ua kia Tīmoté ʻi ha taimi ʻi he vahaʻa ʻo e A.D. 64 mo e 65 (vakai, Fakahinohino ki he Ngaahi Folofolá, “Ngaahi Tohi ʻa Paulá,” scriptures.lds.org). Naʻe fai ʻe Paula ʻa e tohí lolotonga hono tuku pōpula hono ua ia ʻi Lomá ʻi ha taimi nounou kimuʻa hono fakapoongi iá (vakai, Bible Dictionary, “Pauline Epistles”).
Naʻe seiniʻi ʻa Paula lolotonga hono tuku pōpula iá (vakai, 2 Tīmote 1:16; 2:9), ngalingali naʻá ne ʻi ha loki pōpula pe ʻi ha loki ʻi lalo pea naʻe faingataʻaʻia (vakai, 2 Tīmote 4:13, 21), pea fāinga hono kaungāmeʻá ke ʻiloʻi ia (vakai, 2 Tīmote 1:17). Ne mahino ko Luke pē ne toutou ʻaʻahi kiate iá (vakai, 2 Tīmote 4:11), pea naʻe ʻamanaki ʻa Paula kuo ofi ke ne pekia (vakai, 2 Tīmote 4:6–8).
Ko hai naʻe fakataumuʻa ki ai hono hikí pea ko e hā hono ʻuhingá?
Naʻe poupouʻi ʻe Paula ʻa Tīmote ʻi he tohi ko ʻení, pea ʻoange ʻa e mālohi ke tokoniʻi ia ke ne hoko atu hili e pekia ʻa Paula ne tuʻunuku maí. Naʻe ʻiloʻi ʻe Paula naʻe nounou hono taimí, pea naʻá ne loto ke sio kia Tīmote, ʻa ia naʻe ui ʻe Paula “ko e foha ʻofeiná” (2 Tīmote 1:2).
ʻI he fakaʻosinga ʻo ʻene tohí, naʻe kole ʻe Paula ke ʻaʻahi ange ʻa Tīmote mo Maʻake pea ʻomi kiate ia ha ngaahi meʻa siʻi naʻá ne tuku (vakai, 2 Tīmote 4:9–13). Neongo naʻe fakataumuʻa e tohi ʻa Paulá ʻo tautautefito pē kia Tīmote, ka ʻe lava ʻo fakaʻaongaʻi ʻene faleʻí kiate kinautolu ʻoku moʻui ʻi he “ngaahi ʻaho fakamuí” (2 Tīmote 3:1) koeʻuhí naʻe akoʻi ʻe Paula ʻo kau ki he ngaahi faingataʻa mo e ngaahi founga veteki ʻo e palopalemá ʻa ia ʻoku kaunga ki hotau kuongá pea pehē ki hono kuongá foki.
Ko e hā ha ngaahi fōtunga makehe ʻo e tohí ni?
Ko e tohi ko ʻení ko e taha ia ʻo e ngaahi Tohi fakatakimuʻá, fakataha mo e 1 Tīmote mo Taitusi, pea “ʻoku kau ʻi he tohi ko ʻení ʻa e ngaahi lea fakaʻosi ʻa Paulá pea ʻoku hā mei ai ʻa e fakaofo ʻo ʻene loto-toʻa mo e loto-falala naʻá ne maʻu ʻi heʻene fehangahangai mo e maté” (vakai, Bible Dictionary, “Pauline Epistles”). ʻI hono fakahokohokó, ʻoku ngalingali ko e 2 Tīmote ʻa e tohi fakaʻosi ʻa Paula ʻi he Fuakava Foʻoú (vakai, 2 Tīmote 4:6).
ʻOku ʻi he tohi ko ʻení ha niʻihi ʻo e ngaahi fakakaukauloto ʻa Paula ki he ngaahi tāpuaki mo e ngaahi faingataʻa ʻo hono fakanofo ke “malanga ʻaki ia, ko e ʻaposetolo, mo e akonaki ʻo e kakai Senitailé” (2 Tīmote 1:11). Naʻe pehē ʻe Paula, “Kuó u tau ʻa e tau lelei, kuó u lavaʻi ʻa e fakapuepué, kuó u tauhi maʻu ʻa e tuí: ngata aí, kuo hilifaki moʻoku ʻa e pale ʻo e māʻoniʻoni” (2 Tīmote 4:7–8), ʻo fakahaaʻi ai naʻá ne maʻu ha loto fakapapau fakataautaha te ne maʻu ʻa e moʻui taʻengatá. ʻI he hoko ko e tokotaha naʻe tauhi kia Sīsū Kalaisi ʻi he taʻu ʻe 30 tupu, naʻe ʻi ha tuʻunga lelei ʻa Paula ke fakahinohinoʻi ʻa Tīmote ʻi he founga ke ngāue lelei ai ʻi hono fakamālohia e tui ʻa e niʻihi kehé (vakai, 2 Tīmote 2:15–17, 22–26; 4:1–2, 5).
Fokotuʻutuʻú
2 Tīmote 1 ʻOku lea ʻa Paula kau ki he meʻafoaki mo e mālohi ʻo e ʻOtuá ʻoku maʻu ʻi he fakanofo ki he lakanga fakataulaʻeikí. ʻOkú ne akoʻi ʻoku ʻikai maʻu e “laumālie ʻo e manavasiʻí” (2 Tīmote 1:7) mei he ʻOtuá pea ʻoku ʻikai totonu ke tau mā ʻi heʻetau fakamoʻoni kia Sīsū Kalaisí. ʻOku fakamoʻoniʻi ʻe Paula naʻe ui ia ʻe Sīsū Kalaisi ke malanga ʻaki ʻa e ongoongoleleí (vakai, 2 Tīmote 1:11).
2 Tīmote 2 ʻOku fakaʻaongaʻi ʻe Paula ʻa e fakatātā ʻo ha sōtia lelei, tokotaha sipoti ikuna, mo ha tangata faama ngāue mālohi ke fakatātaaʻi ʻa e fie maʻu ke kātakiʻi e ngaahi faingataʻá kae lava ke maʻu ʻa e nāunau taʻengatá. Naʻá ne fakafaikehekeheʻi ʻa e kau faiako moʻoní mo e loí mo e ngaahi ipu lāngilangiʻiá mo e mole e ngeiá. ʻOkú ne fakatokanga kia Tīmote ke fakaʻehiʻahi mei he fakafekikí pea ke akoʻi ʻi he faʻa kātaki ʻa kinautolu ʻoku fie maʻu ke fakatomalá.
2 Tīmote 3–4 Ko e fakamatalaʻi ʻe Paula ʻa e ngaahi tūkunga kovi ʻo e ngaahi ʻaho fakaʻosí pea poupouʻi ʻa Tīmote ke fakaʻaongaʻi e folofolá ʻi hono fatongia ko ha taki lakanga fakataulaʻeikí. ʻOkú ne tohi kau ki heʻene pekia ʻoku tuʻunuku maí mo pehē, “Kuó u tauhi maʻu ʻa e tuí” (2 Tīmote 4:7). ʻOku fakamoʻoniʻi ʻe Paula ʻe fakahaofi ia ʻe he ʻEikí ki he “puleʻanga ʻi he langí” (2 Tīmote 4:18).