Talateu ki he Tohi ʻa Paula ki he Kakai Kalētiá

Ko e hā hono ʻuhinga ʻoku ako ai e tohí ni?

Naʻe fai ʻa e Tohi ʻa Paula ki he Kakai Kalētiá ki he kau Siu Kalisitiane naʻe mavahe mei he ʻEikí ʻo toe falala pē ki he ngaahi ngāue ʻo e fono ʻa Mōsesé. Naʻe feinga ʻa e ʻAposetolo ko Paulá ke fakatonutonu e palopalemá ni ʻaki hono fakamamafaʻi e faikehekehe ʻi he “haʻamo” fakakavenga ʻo e fono ʻa Mōsesé, ʻa ia naʻe fakatau ki he fakapōpula fakalaumālié, pea mo e ongoongolelei ʻo Sīsū Kalaisí, ʻa ia ʻoku fakatau ki he tauʻatāina fakalaumālié. ʻE lava ʻo tokoni hono ako e tohí ni ke fakahoungaʻi ange ʻe he kau akó ʻa e tauʻatāina ʻoku ʻomi ʻi he ongoongolelei ʻo Sīsū Kalaisí.

Ko hai naʻá ne tohi ʻa e tohí ni?

Naʻe tohi ʻe he ʻAposetolo ko Paulá ʻa e tohi Kalētiá (vakai, Kalētia 1:1).

Ko e fē e taimi mo e feituʻu ne tohi aí?

ʻOku ngalingali ne fai ʻe Paula ʻene Tohi ki he Kakai Kalētiá lolotonga ʻene fononga ʻi Masitōniá ʻi he lolotonga ʻene fononga fakafaifekau hono tolú ʻi he A.D. 55–57 (vakai, Bible Dictionary ʻi he tatau faka-Pilitānia ʻo e Tohi Tapu ʻa e Siasí, “Pauline Epistles”).

Ko hai naʻe fakataumuʻa ki ai hono hikí pea ko e hā hono ʻuhingá?

“ʻOku ʻi ai ha veiveiua pe ko e hā e ngaahi potusiasi naʻe lau ki ai ʻi he tohí ni. Ko e ʻikai pē ko e fakatokelau ʻo Kalētiá, ʻa e vahefonua ko hono kolomuʻá ʻa ʻEnisilá, pe ʻi he vahefonua ʻi he ngaahi kauʻāfonua ʻo Filisia mo Kalētiá ʻa ia ne ʻaʻahi ki ai ʻa Paula ʻi heʻene ʻuluaki fononga fakafaifekaú. Ka naʻe ʻaʻahi ʻa Paula ki he ngaahi siasi ʻi Kalētiá ʻi heʻene fononga hono uá (Ngāue 16:6) mo e fononga (Ngāue 18:23) hono tolú” (Bible Dictionary ʻi he tatau faka-Pilitānia ʻo e Tohi Tapu ʻa e Siasí, “Pauline Epistles: Epistle to the Galatians”).

Naʻe tohi ʻa Paula ki he Kāingalotu ʻi Kalētiá, koeʻuhí naʻá ne hohaʻa lahi ʻoku nau mavahe mei he ʻEikí ʻi heʻenau muimui ki he ngaahi akonaki ʻa e niʻihi naʻe feinga ke “fakakehe ʻa e ongoongoleleí” (vakai, Kalētia 1:6–7). Naʻe akoʻi ʻe he kau Kalisitiane Siú ki he kau Kalisitiane Senitailé e ngaahi tokāteline hala ko ia naʻe pau ke nau kamu pea tauhi ʻa e ngaahi fie maʻu angamaheni ʻo e fono ʻa Mōsesé kae lava ke fakamoʻui kinautolu (vakai, Kalētia 6:12; vakai foki, Ngāue 15:1). Naʻe tali ʻe he Kāingalotu Kalētia ʻe niʻihi ʻa e ngaahi akonaki ʻa e kakaí ni (vakai, Kalētia 4:10).

Naʻe kau ʻi he ngaahi tefitoʻi taumuʻa ʻa Paula ʻi hono fai e tohí ni ʻa e:

Taukaveʻi ia mei he ngaahi tukuakiʻi loi ʻa e kau faiako loi ne fakafepaki kiate iá.
Akoʻi ʻoku fakamoʻui e kakai kotoa pē, ʻo tatau ai pē pe ko e Siu pe Senitaile, ʻi he Fakalelei ʻa Sīsū Kalaisí ʻaki ʻenau tui kia Sīsū Kalaisí kae ʻikai ko e falala ki he ngaahi ngāue ʻa e fono ʻa Mōsesé.
Fakamahinoʻi ʻa e fatongia ʻo e fono ʻa Mōsesé ʻi he palani ʻa e ʻOtuá.
Fakafaikehekeheʻi e fuakava motuʻa naʻe fai ʻe he ʻOtuá ʻo fakafou ʻia Mōsesé mo e fuakava foʻou ʻia Kalaisí.
Ui ʻa e Kāingalotú ke moʻui ʻaki e Laumālié.

Ko e hā ha ngaahi fōtunga makehe ʻo e tohí ni?

ʻOku makehe ʻa e tohi ʻa Kalētiá ko e tohi ongo fakaeloto lahi taha ʻa Paulá, ʻa ia naʻá ne ʻoatu ai ha valoki māsila ki he kāingalotu ʻo e Siasí naʻe mavahé mo e kau akonaki loi ne nau taki halaʻi kinautolú fakatouʻosi. ʻOku ʻi he tohi Kalētiá ʻa e fuofua tohi fakamatala ʻa Paula ki he tokāteline ʻo e fakatonuhiá—ʻoku ʻikai fakatonuhiaʻi kitautolu ʻi he ngaahi ngāue ʻo e fono ʻa Mōsesé ka ʻi he tui kia Sīsū Kalaisí. ʻOku fakafaikehekeheʻi ʻe he tohí ʻa e “ngaahi ngāue ʻa e kakanó” mo e “fua ʻo e Laumālié” (Kalētia 5:16–25).

Fokotuʻutuʻú

Kalētia 1–2 Ko e tohi ʻa Paula ki he Kāingalotu Kalētiá koeʻuhí kuo nau mavahe mei he ʻEikí mo tali ʻa e ngaahi akonaki halá. ʻOkú ne taukaveʻi hono uiuiʻi ko ha ʻAposetoló ʻaki hono fakamatalaʻi ʻene ʻuluaki fakafepaki ki he Siasí mo ʻene uluí. ʻOkú ne fakamamafaʻi naʻá ne maʻu ha fakahā fakahangatonu mei he ʻOtuá pea fakamahinoʻi kuo ʻosi fakangofua ʻe he kau ʻAposetoló ʻene ngāue fakafaifekau ki he kau Senitailé. ʻOkú ne pehē, ne tuʻo taha ʻene taʻefelotoi mo Pita ʻo kau ki he Kāingalotu Senitailé. ʻOkú ne akoʻi ʻoku ʻikai fakatonuhiaʻi e kakaí ʻi he ngaahi ngāue ʻo e fono ʻa Mōsesé ka ʻi he tui kia Sīsū Kalaisí.

Kalētia 3–4 Ko e taukaveʻi ʻe Paula ʻa e pōpoaki ʻo e ongoongoleleí. ʻOkú ne akoʻi ko ʻĒpalahamé ko ha sīpinga ia ʻo ha tokotaha naʻe fakatonuhiaʻi ʻi he tuí kae ʻikai ko e ngaahi ngāue ʻo e fono ʻa Mōsesé. Naʻe huhuʻi ʻe Sīsū Kalaisi ʻi he Fakaleleí, ʻa e faʻahinga ʻo e tangatá mei he fakamalaʻia ʻo e fonó. Ko e taumuʻa ʻo e fono ʻa Mōsesé ke hoko ko ha “takiakiʻi ʻa e fonó kia Kalaisi.” ʻOku maʻu ʻe he Kāingalotú ʻi he tui mo papitaisó, ʻa e ngaahi tāpuaki ʻo e Fakaleleí, fakahoko e fuakava ʻo e ongoongoleleí, hoko ko e kau ʻea-hoko ʻo e ʻOtuá ʻia Kalaisi, pea ʻikai toe hoko ko ha kau tamaioʻeiki ka ko e fānau ʻa e ʻOtuá.

Kalētia 5–6 Ko e ui ʻa Paula ki he Kāingalotú ke tuʻu maʻu ʻi he fuakava ʻo e ongoongolelei naʻe ʻomi ʻe Kalaisí. ʻOku fakafaikehekeheʻi ʻe Paula ʻa e moʻui ʻa ha taha ʻoku kau ʻi he “ngaahi ngāue ʻa e kakanó” mo ha taha ʻoku fiefia ʻi he “fua ʻo e Laumālié.” ʻOkú ne akoʻi ʻoku totonu ke fefuaʻaki ʻe he Kāingalotú ʻenau ngaahi kavengá pea ʻoua naʻa fiu ʻi he fai leleí. Te tau utu e meʻa ʻoku tau tūtūʻí.