Talateu ki he Tohi ʻa Suté
Ko e hā hono ʻuhinga ʻoku ako ai e tohí ni?
ʻOku fakamatalaʻi ʻe he Tohi ʻa Suté e ngaahi mālohi ʻo e hē mei he moʻoní naʻe hoko he Siasi kimuʻá. ʻI hono ako ʻe he kau akó ʻa e tohi ní, te nau lava ai ʻo ako e founga ke ʻiloʻi ai ʻa kinautolu ʻoku feinga ke fakatafoki e kau ākonga ʻo Sīsū Kalaisí mei he tuí. ʻE lava foki ke ongoʻi ʻe he kau akó e mahuʻinga ʻo hono taukaveʻi fakamātoato e tuí pea kei tauhi moʻoni ki aí
Ko hai naʻá ne hiki e tohí ni?
ʻOku ui ʻe he tokotaha tohi ʻo e tohi ní ia ko “Sute, ko e tamaioʻeiki ʻa Sīsū Kalaisi, mo e tokoua ʻo Sēmisí” (Sute 1:1). Kuo mahino ko e tokotaha faʻu tohí ko Sute ko e tokoua ʻo Sīsū Kalaisí (vakai, Mātiu 13:55; Maʻake 6:3; Fakahinohino ki he Folofolá, “Sute”). Naʻe mahino ko Suté ko ha mēmipa ia ʻo e Siasí ne fakaʻapaʻapaʻi māʻolunga ʻi Selusalema, pea mahalo naʻá ne fononga holo ko ha faifekau (vakai, Ngāue 1:13–14; 1 Kolinitō 9:5). ʻOku ʻikai ha lau ki he lakanga ʻo e lakanga fakataulaʻeikí ne maʻu ʻe Suté, ka ʻoku fokotuʻu mai ʻe he tohí tonu naʻá ne maʻu ha tuʻunga ʻo e mafai naʻá ne fakafeʻungaʻi ia ke fai ha ngaahi tohi faleʻi.
Ko e fē taimi mo e feituʻu naʻe tohi aí?
ʻOku ʻikai ke tau ʻilo e feituʻu naʻe hiki ai e Tohi ʻa Suté. Kapau naʻe faʻu moʻoni e tohí ni ʻe Sute ko e tokoua ʻo Sīsuú, mahalo naʻe hiki ia ʻi he vahaʻa ʻo e T.S. 40 mo e 80.
Ko hai naʻe fakataumuʻa ki ai hono hikí pea ko e hā hono ʻuhingá?
Naʻe fakataumuʻa e Tohi ʻa Suté ki he kau Kalisitiane faivelengá—“kiate kinautolu kuo fakamāʻoniʻoniʻi ʻe he ʻOtua ko e Tamaí, pea kuo fakamoʻui ʻe Sīsū Kalaisi” (Sute 1:1). Ko e taumuʻa ʻa Sute ne fakamatalaʻí ke poupouʻi ʻene kau akó ke “fekuki fakamātoato koeʻuhí ko e tuí” mei he kau akonaki anga taʻefaka-ʻOtua ne nau hū mai ki he Siasí pea fakaʻaiʻai e ʻulungaanga ʻulí mo e ngaahi akonaki hala ne nau fakaʻikaiʻi e ʻEiki ko Sīsū Kalaisí (Sute 1:3).
Ko e hā e ngaahi fōtunga makehe ʻo e tohí ni?
Neongo ko e taha ia ʻo e ngaahi tohi nounou taha ʻi he Fuakava Foʻoú, ʻoku maʻu ʻi he Tohi ʻa Suté ha fakamatala ʻoku ʻikai maʻu ʻi ha feituʻu kehe he Tohi Tapú. Naʻe tohi ʻa Sute fekauʻaki mo e “kau ʻāngelo naʻe ʻikai ke tuʻu maʻu ʻi honau muʻaki ʻalungá” (veesi 6; vakai foki, ʻĒpalahame 3:26), ʻo ha fehangahangai ʻi he vahaʻa ʻo Maikeli mo Lusifaá ʻi he sino ʻo Mōsesé (veesi 9), pea mo ha kikite ʻa ʻĪnoke kau ki he Hāʻele ʻAnga Ua Mai ʻa e Fakamoʻuí (veesi 14–15; vakai foki, Mōsese 7:65–66).
Naʻe fakamatalaʻi ʻe ʻEletā Pulusi R. Makongikī ʻo e Kōlomu ʻo e Kau ʻAposetolo ʻe Toko Hongofulu Mā Uá ha niʻihi ʻo e ngaahi ʻulungaanga makehe ʻo e Tohi ʻa Suté:
“ʻI he kotoa ʻo e tohi Tapú, ko Sute pē ʻokú ne fakatolonga mai e fakakaukau ko ia ko e maama fakalaumālié hotau ʻuluaki tofiʻá pea naʻe ʻikai lavaʻi ʻe he kau ʻāngelo pau hono ngaahi siví.
“ʻOku tau tafoki kiate ia ki haʻatau kiʻi ʻilo ki he fakakikihi ʻi he vahaʻa ʻo Maikeli mo Lusifaá fekauʻaki mo e sino ʻo Mōsesé.
“ʻOkú ne lekooti pē e kikite nāunauʻia ʻa ʻĪnoke kau ki he Hāʻele ʻAnga Ua Mai ʻa e Foha ʻo e Tangatá” (Doctrinal New Testament Commentary, 3 vols. [1965–73], 3:415).
ʻOku fefeka e ngaahi lea ʻa Suté kiate kinautolu ʻoku nau fakafepakiʻi e ʻOtuá mo ʻEne kau tamaioʻeikí pea mo kinautolu ne nau fakahoko e lotu tamapua ʻulí mo pehē ʻoku fakaʻatā kinautolu mei he fie maʻu ke talangofua ki he ngaahi fekau ʻa e ʻOtuá, kau ai e fono ʻo e angamaʻá. Naʻe fakamatalaʻi ʻe Sute ha niʻihi ʻo e ngaahi ʻulungaanga ʻo e niʻihi fakafoʻituitui kovi ko ʻení.
Fokotuʻutuʻú
Sute 1 Ko e naʻinaʻi ʻa Sute ki he kāingalotu ʻo e Siasí ke “fekuki fakamātoato koeʻuhí ko e tuí” (Sute 1:3). ʻOkú ne fakamatalaʻi kuo hū fakafufū mai e kakai ʻi he lotolotonga ʻo e Kāingalotú pea fakamafola e tokāteline hala mo fakaʻaiʻai e ngaahi tōʻonga koví. ʻOku fakatokanga mai ʻa Sute ki he ngaahi tautea ʻe hoko kiate kinautolu ʻoku tafoki mei he ʻOtuá. ʻOku faleʻi e Sute e kāingalotu ʻo e Siasí ke langa hake ʻenau tuí mo “tauhi [kinautolu] ʻi he ʻofa ʻa e ʻOtuá” (Sute 1:21).