Talateu ki he ʻUluaki Tohi ʻa Paula ki he Kakai Tesaloniká
Ko e hā hono ʻuhinga ʻoku ako ai e tohí ni?
ʻOku pehē ko e ʻUluaki Tohi ʻa Paula ki he Kakai Tesaloniká ʻa e fuofua tohi ʻa Paulá pea mahalo ko e tohi motuʻa taha ia ʻi he Fuakava Foʻoú. ʻOku meimei nofotaha e ngaahi akonaki ʻa Paula ʻi he tohí ni ʻi he Hāʻele ʻAngaua Mai ʻa Sīsū Kalaisí, kau ai ʻa e ngaahi faingataʻa ʻe fehangahangai mo e kau muimui ʻo Sīsū Kalaisí kimuʻa ʻi Heʻene foki maí (vakai, 1 Tesalonika 3:3), ko e Toetuʻu ʻo e kau Kalisitiané ʻi he Hāʻele ʻAngaua Maí (vakai, 1 Tesalonika 4:13–14), pea mo e taimi ʻo e Hāʻele ʻAngaua Mai ʻa Sīsū Kalaisí (vakai, 1 Tesalonika 5:1–2). ʻE ʻilo ʻe he kau akó ʻi heʻenau ako e tohí ni, ʻo kau ki he Hāʻele ʻAngaua Maí mo maʻu ha fakalotolahi ke kei tui faivelenga ki he ʻEikí.
Ko hai naʻá ne tohi ʻa e tohí ni?
Naʻe tohi ʻe Paula ʻa e 1 Tesaloniká (vakai, 1 Tesalonika 1:1; vakai foki, 2:18).
Ko e fē e taimi mo e feituʻu ne tohi aí?
“Naʻe fai ʻe Paula ʻa e tohi ki he kau Tesaloniká mei Kolinitō lolotonga ʻene fononga fakafaifekau hono uá,” ʻi he A.D. 50–51 (Fakahinohino ki he Ngaahi Folofolá, “Ngaahi Tohi ʻa Paulá,” scriptures.lds.org).
Ko hai naʻe fakataumuʻa ki ai hono hikí pea ko e hā hono ʻuhingá?
Naʻe tohi ʻe Paula ʻa e 1 Tesaloniká ki he kāingalotu ʻo e Siasí ʻi Tesaloniká. Ko Tesalonika ʻa e kolo tokolahi mo tuʻumālie taha ʻi he puleʻanga faka-Kalisi ʻo Masitōnia he kuonga muʻá koeʻuhí ko ha ongo meʻa mahuʻinga: naʻe langa ʻa e koló ʻi he taulanga fakanatula lelei taha ʻi he Tahi ʻAkeiá, pea naʻe tuʻu ia ʻi he hala lahi naʻá ne fakafehokotaki ʻa Loma mo ʻĒsiá.
Lolotonga e fononga fakafaifekau hono ua ʻa Paulá, naʻe tataki ʻe he Laumālié ʻa Paula mo hono ngaahi hoá—Sailosi, Tīmote, mo Luke—ke fononga ʻi he Tahi ʻAkeiá ki Masitōnia (vakai, Ngāue 16:6–12). Naʻe kamataʻi heni hono malangaʻi ʻo e ongoongoleleí ʻi ʻIulopé. Hili e malanga ʻi Filipaí (vakai, Ngāue 16:12–40), naʻe fononga ʻa Paula mo Sailosi ki Tesalonika.
Naʻe ngāue fakataha ʻa Paula mo Sailosi ʻi Tesalonika, ka naʻe tuli fakamālohiʻi kinautolu mei he koló ʻe he kau taki ʻo e kau Siú (vakai, Ngāue 17:1–9). Naʻe lipooti ʻe Tīmote kia Paula kimui ange naʻe kei faivelenga pē e Kāingalotu ʻi Tesaloniká neongo ʻa e fakatangá, pea naʻe mafola honau ivi tākiekina angatonú (vakai, Ngāue 18:5; 1 Tesalonika 1:7–8; 3:6–8).
Ko e kau ului ʻi Tesaloniká ʻa e niʻihi ʻo e kau fuofua ʻIulope ke tali e ongoongoleleí, pea ko hono olá ne nau fehangahangai mo e fakatangá. Ne ʻi ai foki hanau ngaahi fehuʻi lahi fekauʻaki mo e Hāʻele ʻAngaua Maí. Ko ia ai, naʻe tohi ʻe Paula ʻi heʻene tohi ki he kakai Tesaloniká, ha ngaahi lea fakalotolahi mo mālohi pea lea ʻo kau ki heʻenau ngaahi fehuʻi fekauʻaki mo e Hāʻele ʻAngaua Mai ʻa Sīsū Kalaisí.
Ko e hā ha ngaahi fakaʻilonga ʻoku hā mahino mai ʻi he tohí ni?
Ko e taha ʻo e ngaahi tefitoʻi kaveinga ʻa Paula ʻi heʻene ʻUluaki Tohi ki he Kakai Tesaloniká ko e Hāʻele ʻAngaua Maí. Naʻá ne nofotaha ʻi he kau mai ʻa e kau māʻoniʻoní ʻi he ngaahi meʻa ʻe hoko ʻi he Hāʻele ʻAngaua Maí, tautautefito ki he Kāingalotu kuo nau mate kimuʻá (vakai, 1 Tesalonika 2:19; 3:13; 4:13–17; 5:1–10). ʻOku ʻikai maʻu ʻi he 1 Tesaloniká ha ngaahi valoki lalahi ka ko ha fakamālō pē mo e houngaʻia ki he Kāingalotu ʻi Tesaloniká, ʻo ʻikai hangē ko e ngaahi tohi lahi kehe ʻa Paulá.
Fokotuʻutuʻú
1 Tesalonika 1–3 Ko e fakahaaʻi ʻe Paula ha houngaʻia lahi ki he Kāingalotu ʻi Tesaloniká. ʻOkú ne fakamanatu ki heʻene kau laukongá ʻene ngāue angaʻofa ʻi honau lotolotongá mo fakahaaʻi ʻa e fiefia ʻi heʻenau faivelengá. ʻOkú ne poupouʻi e Kāingalotú ke tupulaki ʻi he feʻofaʻaki ʻiate kinautolú pea ki he kakai kotoa pē.
1 Tesalonika 4–5 Ko e talaange ʻe Paula ki he Kāingalotú ke nau hoko ʻo māʻoniʻoni, pea ke fakamāʻoniʻoniʻi ʻa kinautolu. ʻOkú ne fakamatalaʻi ko e taimi ʻe toe hāʻele mai ai ʻa e ʻEikí, ʻe toe tuʻu ʻa e Kāingalotu kuo faivelenga ʻi heʻenau fakamoʻoni kia Kalaisí, ʻa kinautolu kuo pekiá mo kinautolu ʻoku kei moʻuí fakatouʻosi, pea fakafeʻiloaki ki he ʻEikí. ʻOku fakamanatu ʻe he ʻAposetoló ki he kāingalotu ʻo e Siasí ke teuteu pea tokanga ki he ʻaho ʻo e hāʻele mai ʻa Kalaisí.