Talateu ki he Ongoongoleleí ʻo Fakatatau ki he tohi ʻa Mātiú
Ko e hā hono ‘uhinga ʻoku ako ai e tohí ni?
ʻOku maʻu ʻa e niʻihi ʻo e ngaahi potufolofola manakoa taha ʻo e Tohi Tapú ʻi he tohi ʻa Mātiú, ʻo kau ai ʻa e Malanga he Moʻungá pea mo e lahi taha ʻo e ngaahi talanoa fakatātaá, ngaahi akonaki, mo e ngaahi mana ʻa Sīsū Kalaisí. ʻE lava ke tokoniʻi ʻe hono ako ʻo e tohi ko ʻení ʻa e kau akó ke nau maheni mo e ngāue fakafaifekau mo e ngaahi folofola ʻa Sīsū Kalaisí pea lava ke fakamālohia ʻenau fakamoʻoni kia Sīsū Kalaisi ko e Fakamoʻui ʻo e māmaní pea mo e Mīsaia ne Talaʻofa Mai ʻe he kotoa ʻo e kau palōfita māʻoniʻoní.
Ko hai naʻá ne tohi ʻa e tohí ni?
Ko Mātiu, ʻa ia ne toe ʻiloa ko Līvai, ko e foha ʻo ʻAlefiusí ʻa e tangata naʻá ne hiki ʻa e tohí ni. Kimuʻa pea liliu ʻene moʻuí ʻo taʻe ngata ʻi heʻene tali ʻa e fakaafe ʻa Sīsū Kalaisi ke muimui ʻiate Iá, naʻá ne hoko ko ha taha tānaki tukuhau. (Vakai, Mātiu 9:9; Maʻake 2:14; Luke 5:27–28; Fakahinohino ki he Folofolá, “Mātiu.”) Hili ʻene uluí, ne hoko ʻa Mātiu ko ha taha ʻo e Kau ʻAposetolo ʻe Toko Hongofulu Mā Ua ʻa e Fakamoʻuí (vakai, Mātiu 10:2–4). ʻI heʻene hoko ko ha ʻAposetoló, naʻe hoko ʻa Mātiu ko ha fakamoʻoni ki he ngaahi meʻa lahi ne hoko ʻa ia naʻá ne fakamatalaʻi ʻi heʻene lekōtí. ʻOku poupouʻi ʻeni ʻe he hingoa naʻe foaki ki heʻene Ongoongoleleí ʻi he Liliu ʻa Siosefa Sāmitá: “Ko e Fakamoʻoni ʻa e Māʻoniʻoni ko Mātiú.”
Ko e fē ʻa e taimi mo e feituʻu ne tohi aí?
ʻOku ʻikai ke tau ʻilo fakapapau ʻa e taimi naʻe hiki ai e tohi ʻa Mātiú, ka ʻoku ngalingali naʻe tohi ia ʻi he konga kimui ʻo e senituli ʻuluakí K.M. ʻOku ʻikai ke tau ʻilo pe naʻe hiki ʻe Mātiu ʻa e tohí ni ʻi fē.
Ko hai naʻe fakataumuʻa ki ai hono hikí pea ko e hā hono ʻuhingá?
ʻOku hangē ne tohi ʻa Mātiú ki he kau Siú ke fakahaaʻi naʻe fakahoko ʻe Sīsū Kalaisi ʻa e ngaahi kikite ʻo e Fukava Motuʻá kau ki he Mīsaiá (vakai, Fakahinohino ki he Folofolá, “Mātiu”). ʻI hono toe fakamatalaʻi ʻe Mātiu ki he moʻui, folofola mo e ngaahi ngāue ʻa Sīsū Kalaisí, naʻá ne faʻa fakamatala ki he ngaahi kikite ʻi he Fuakava Motuʻá mo fakaʻaongaʻi ʻa e kupuʻi lea “koeʻuhí ke fakamoʻoni” (hangē ko ʻení, vakai, Mātiu 4:14; 8:17; 13:35; 21:4).
Naʻe fakaʻaongaʻi tuʻo 12 ʻe Mātiu ʻi heʻene Kosipelí ʻa e foʻi lea ko e “ʻAlo ʻo Tēvita” ko e fakamoʻoni ko Sīsū Kalaisí ko e ʻea totonu ia ki he taloni ʻo e Tuʻi ko Tēvitá mo hono fakahoko ʻo e ngaahi kikite fakamīsaiá. ʻOku fakahaaʻi ʻe Mātiu ʻi heʻene tohihohoko ʻo Sīsū Kalaisí ko e hako ia ʻo Tēvita, Suta,mo ʻĒpalahame (vakai, Mātiu 1:1–3), ʻo fakahaaʻi ai ʻa e totonu ʻa Sīsū ke pulé pea mo Hono fatongia ʻi hono fakahoko e ngaahi talaʻofa ʻa e ʻOtuá ki ʻIsilelí.
Ko e hā ha ngaahi fōtunga makehe ʻo e tohí ni?
Neongo ʻoku lahi e ngaahi meʻa ʻi he tohi ʻa Mātiú ʻoku toe maʻu ʻi he tohi ʻa Maʻake mo Luké, ʻoku feʻunga nai mo ha pēseti ʻe 42 ʻo e Kosipeli ʻa Mātiú ʻoku makehe. Ko e taha e kaveinga mahuʻinga ʻi he tohi ʻa Mātiú ko e hāʻele mai ʻa Sīsū Kalaisí ke fokotuʻu Hono puleʻangá ʻi he māmaní. Naʻe tuʻo lahi e lea ʻa Mātiu kau ki he “puleʻanga ʻo e langí,” pea ko ia pē ʻi he kau faʻu Kosipelí naʻá ne fakakau ʻa e ngaahi akonaki ʻa Sīsū ʻoku hā ai ʻa e “siasí” (vakai, Mātiu 16:18; 18:17).
ʻOku tokoni foki ʻa e Kosipeli ʻa Mātiú ke tau vakai ki he ngaahi faitatau ʻi he ngaahi ngāue ʻa Mōsesé mo Sīsū Kalaisí. Hangē ko ʻení, naʻe fakahaofi fakatouʻosi kinaua ʻi heʻena kei valelvalé meí he feinga ʻa ha tuʻi ke tāmateʻi kinaua (vakai, ʻEkesōtosi 2:1–10; Mātiu 2:13–18), naʻá na omai loua mei ʻIsipite, peá na fakatou malangaʻi ʻa e fono ʻa e ʻOtuá ʻi ha moʻunga (vakai, ʻEkesōtosi 19–20; Mātiu 5–7), pea naʻá na omi fakatouʻosi ke fakahaofi hona kakaí.
Fokotuʻutuʻú
Mātiu 1–4 ʻOku ʻomi ʻe Mātiu ʻa e tohihohoko mo hono ʻaloʻi ʻo Sīsū Kalaisí. ʻOku fekumi ʻa e Kau Tangata Potó ki he Tuʻi ʻo e kau Siú. Naʻe ʻave ʻe Siosefa ʻa Mele mo e tamasiʻi ko Sīsuú ki ʻIsipite, pea kimui ai ki Nasaleti ʻi hono tataki ia ʻi ha misi. ʻOku malanga ʻaki ʻe Sione Papitaiso ʻa e ongoongolelei ʻo e fakatomalá pea papitaiso ʻa Sīsū Kalaisí. ʻOku ʻahiʻahiʻi e Fakamoʻuí ʻi he potu maomaonganoá. ʻOkú Ne kamata ʻEne ngāue fakafaifekau ʻi he matelié ʻaki e akoʻi mo e fakamoʻui.
Mātiu 5–7 ʻOku fakahoko ʻe Sīsū Kalaisi ʻa e Malanga ʻi he Moʻungá.
Mātiu 8–12 ʻOku fakamoʻui ʻe he Fakamoʻuí ha tangata kilia, lolomi ha matangi, kapusi ha fanga tevolo, fokotuʻu ʻa e ʻofefine ʻo Sailosí mei he maté, pea fakaʻā ʻa e kuí. Naʻe foaki ʻe Sīsū Kalaisi ki he Kau ʻAposetolo ʻe Toko Hongofulu Mā Uá ʻa e mafai ke fai ʻa ia naʻá Ne faí pea fekauʻi atu kinautolu ke malanga ʻaki ʻa e ongoongoleleí. ʻOku fakahaaʻi ʻe Sīsū ʻoku lahi hake ʻa Sione Papitaiso ʻi ha palōfita pē ʻOku faifakamoʻui ʻa e ʻEikí ʻi he ʻaho Sāpaté.
Mātiu 13–15 ʻOku akonaki ʻa Sīsū ʻo ngāue ʻaki e ngaahi talanoa fakatātaá. ʻOku tamateʻi ʻa Sione Papitaiso. Hili hono fafanga ʻo e toko nima afé, naʻe ʻaeva ʻa Sīsū mo Pita ʻi he Tahi Kālelí. Naʻe fakafehuʻi ʻa Sīsū ʻe he kau tangata tohí mo e kau Fālesí .
Mātiu 16–18 Hili hono fakamoʻoniʻi ʻe Pita ko Sīsū ʻa e Mīsaiá, naʻe pehē ʻe he Fakamoʻuí te Ne foaki ʻa e ngaahi kī ʻo e puleʻanga ʻo e ʻOtuá kia Pita mo e Toko Hongofulu Mā Uá. ʻOku liliu ʻa Sīsū ʻi he moʻunga, ʻa ia naʻe maʻu ai ʻe Pita, Sēmisi mo Sione ʻa e ngaahi kī ʻo e lakanga fakataulaʻeikí. ʻOku ʻoange ʻe Sīsū ʻa e ngaahi fakahinohino ki Heʻene kau ʻākongá ki he founga hono tataki ʻo e Siasí pea akoʻi he ʻikai fakamolemoleʻi kitautolu ʻe he ʻOtuá ʻo kapau he ʻikai ke tau fakamolemoleʻi ʻa e niʻihi kehé.
Mātiu 19–23 ʻOku akoʻi ʻe he Fakamoʻuí ʻo kau ki he natula taʻengata ʻo e nofo-malí. ʻOkú Ne hū ki Selusalema pea fakamaʻa ʻa e temipalé. ʻI hono fakaʻaongaʻi ʻo e ngaahi talafakatātaá, naʻe fakahā ʻe Sīsū ʻa e ngaahi taumuʻa kovi ʻa e kau taki Siu ʻoku nau fakafepakiʻi Iá. ʻOkú Ne tēngihia ʻa hono fakaʻauha ʻo Selusalema ʻi he kahaʻú.
Mātiu 24–25; Siosefa Sāmita—Mātiu ʻOku kikite ʻa Sīsū Kalaisi kau ki hono fakaʻauha ʻo Selusalemá. ʻOkú Ne akoʻi e founga ʻe lava ke teuteu ai ʻEne kau muimuí ki Heʻene toe hāʻele maí.
Mātiu 26–27 ʻOku maʻu ʻe Sīsū mo ʻEne kau ākongá ʻa e meʻatokoni ʻo e kātoanga ʻo e Laka Atú pea fakafeʻiloaki ʻa e sākalamēnití. Okú Ne faingataʻaʻia ʻi he Ngoue ko Ketisemaní pea lavakiʻi, puke pōpula, fakamāuʻi ʻi he ʻao ʻo e kau maʻu mafai faka-Siú mo faka-Lomá, pea tutuki Ia. ʻOkú Ne pekia pea naʻe telio.
Mātiu 28 ʻOku hā ʻa e Fakamoʻui kuo toetuʻú ki Heʻene kau ākongá. ʻOku fekauʻi ʻe Sīsū ʻa e Kau ʻAposetoló ke ʻave ʻEne ongoongoleleí ki he ngaahi puleʻanga kotoa pē.