Lēsoni 118
Kalētia 1–4
Talateú
Naʻe valokiʻi ʻe he ʻAposetolo ko Paulá ʻa e Kāingalotu Kalētiá ko ʻenau muimui he ngaahi akonaki halá pea akoʻi te nau lava ʻo hoko ko e kau ʻea-hoko ʻo e ʻOtuá ʻi he tui mo e muimui kia Sīsū Kalaisí.
Ngaahi Fokotuʻu ki hono Akoʻí
Kalētia 1–2
Ko e valokiʻi ʻe Paula ʻa e Kāingalotú ʻi heʻenau muimui ki he kau akonaki loí pea poupouʻi kinautolu ke foki ki he ongoongoleleí
Fakaafeʻi e kau akó ke fakakaukauloto kuo fakahaaʻi ʻe ha taha ʻo honau ngaahi tokouá pe kaungāmeʻá, ʻoku ʻikai ke ne toe fakapapauʻi ʻoku moʻoni ʻa e ngaahi akonaki ʻo e Siasí. Kuo tupu ai e ʻikai toe maʻulotu ʻa e tokotahá ni pea ʻikai ke ne toe moʻui ʻaki e ongoongoleleí. Kole ki he kau akó ke hiki ʻi heʻenau pepa ki he kalasí pe tohinoa ako folofolá ʻa e meʻa te nau talaange ki he tokoua pe tuongaʻane pe kaungāmeʻa ko ʻení ke tokoniʻi ke ne ʻilo ʻoku moʻoni ʻa e ngaahi akonaki ʻo e Siasí.
Fakaafeʻi e kau akó ke kumi ha foʻi moʻoni ʻi heʻenau ako e Kalētia 1 ʻe tokoni ke nau ʻilo e founga ke fakatokangaʻi ai e ngaahi akonaki moʻoní.
Fakamatalaʻi ange ko Kalētiá ko ha feituʻu ia ʻi he tokelau-lotoloto ʻo ʻĒsia Maina (Asia Minor) naʻe kau ʻi he ngaahi kolo lahi naʻe ʻaʻahi ki ai ʻa Paula lolotonga ʻene fononga fakafaifekau hono uá mo e tolú (vakai, Ngāue 16:6; 18:23). (Mahalo te ke fie fakaafeʻi e kau akó ke kumi ʻa Kalētia ʻi he Ngaahi Mape ʻo e Tohi Tapú, fika 13, “The Ngaahi Fononga Fakafaifekau ʻa e ʻAposetolo ko Paulá.”) Fakaafeʻi ha tokotaha ako ke lau leʻolahi e Kalētia 1:6–7. Kole ki he kalasí ke muimui ki ai, ʻo kumi ha palopalema naʻe hoko ʻi he lotolotonga ʻo e Kāingalotu Kalētiá.
-
Ko e hā naʻe hē ai e tokolahi ʻo e Kāingalotu Kalētiá mei he ongoongolelei moʻoní?
Fakamatalaʻi ange naʻe fakatupu ʻe kinautolu ne nau fakahohaʻasi e kau Kalētiá mo fakahalaʻi e ngaahi akonaki ʻo e ongoongoleleí ha veiveiua (vakai, Kalētia 1:7) fekauʻaki mo e akonaki ʻa Paula ʻoku maʻu pē e fakamoʻuí ʻo fakafou ʻia Sīsū Kalaisi. Ko e kau akonaki loi ko ʻení ko e kau Kalisitiane Siu ne nau pehē naʻe pau ke kamu e Kāingalotu Kalētiá (vakai, Bible Dictionary ʻi he tatau faka-Pilitānia ʻo e Tohi Tapu ʻa e Siasí, “Circumcision”) mo tauhi e ngaahi ouau ʻo e fono ʻa Mōsesé kae lava ke fakamoʻui kinautolu.
Fakaafeʻi ha tokotaha ako ke lau leʻolahi e Kalētia 1:8–9. Kole ki he kalasí ke muimui ki ai, ʻo kumi e meʻa naʻe lea ʻaki ʻe Paula fekauʻaki mo kinautolu ʻoku nau malangaʻi ha ongoongolelei ʻoku fehangahangai mo e meʻa naʻá ne malanga ʻaki ko ha ʻAposetolo ʻa e ʻEikí. Kole ki he kau akó ke lipooti e meʻa ʻoku nau maʻú.
Fakaafeʻi ha tokotaha ako ke lau leʻolahi e Kalētia 1:10–12. Kole ki he kalasí ke muimui ki ai, ʻo kumi pe ko hai ne maʻu mei ai e ngaahi akonaki ʻa Paulá.
-
Fakatatau ki he veesi 12, ko hai ne maʻu mei ai e ngaahi akonaki ʻa Paulá?
-
Ko e hā e moʻoni te tau lava ʻo ako mei he ngaahi lea ʻa Paula ʻi he veesi 10–12 fekauʻaki mo e tokāteline moʻoní? (Mahalo ʻe fakaʻaongaʻi ʻe he kau akó ha ngaahi lea kehe, kae fakapapauʻi ʻoku nau ʻiloʻi e moʻoni ko ʻení: ʻOku fakahā ʻe Sīsū Kalaisi ʻa e tokāteline moʻoní ki Heʻene kau palōfitá.)
-
ʻOku tokoni fēfē ʻa hono manatuʻi e foʻi moʻoni ko ʻení ʻi he taimi ʻoku ʻi ai haʻatau ngaahi fehuʻi fekauʻaki mo e ngaahi akonaki ʻa e kau palōfitá?
Fakamatalaʻi ange koeʻuhí ʻoku fakahā ʻe Sīsū Kalaisi ʻa e tokāteline moʻoní ki Heʻene kau palōfitá, te Ne lava foki ʻo fakahā mai ʻa hono moʻoni ʻo e ngaahi akonaki ʻa ha palōfita.
-
Ko e hā te tau lava ʻo fai ke maʻu ai ha fakahā mei he ʻEikí kae lava ke tau ʻiloʻi ʻiate kitautolu pē ʻoku moʻoni ʻa e ngaahi akonaki ʻa e kau palōfitá?
Fakamanatu ange ki he kau akó ʻa e tūkunga naʻá ke fakamatalaʻi ʻi he kamataʻanga ʻo e lēsoní. Fakaafeʻi ha kau ako tokosiʻi ke fakamatalaʻi ki he kalasí ʻa e founga te nau fakaʻaongaʻi ai e moʻoni kuo nau toki ʻiloʻi fekauʻaki mo e fakahaá ke fai ha tali ki he tokotaha ʻokú ne fehuʻia e ngaahi akonaki ʻa e Siasí.
Fakamoʻoni ange te tau lava ʻo ʻilo ʻa e tokāteline moʻoní ʻi heʻetau ako e ngaahi akonaki ʻa e kau palōfitá pea fekumi ki ha fakahā mei he ʻEikí.
Fakamatalaʻi fakanounou ʻa e Kalētia 1:13–2:21 ʻaki hono fakamatalaʻi ange naʻe fakamatala ʻa Paula kau ki heʻene uluí mo e ngaahi fuofua fononga fakafaifekaú. Naʻá ne fakamatala foki ko e fakamoʻuí ʻoku ʻikai maʻu ʻi he fono ʻa Mōsesé, ka ʻoku lava ʻo fakamolemoleʻi, pe fakatonuhiaʻi kitautolu, ʻi he tui kia Sīsū Kalaisí.
Kalētia 3–4
ʻOku fakaafeʻi ʻe Paula ʻa e kau Kalētiá ke maʻu ʻa e ngaahi tāpuaki kotoa kuo talaʻofa kia ʻĒpalahamé ʻo fakafou ʻia Sīsū Kalaisi
Lau leʻolahi ʻa e ngaahi tūkunga ko ʻení: Hili hono lau e tūkunga takitaha, kole ki he kau akó ke fakamatalaʻi e ʻuhinga ʻe ala ongoʻi taʻetaau ai e tokotaha fakafoʻituitui ʻi he tūkungá, ke maʻu kotoa e ngaahi tāpuaki ʻa e ʻEikí ʻo fakafehoanaki ki he niʻihi kehe ʻi he Siasí kuo nau faivelenga ʻi he ongoongoleleí talu mei heʻenau kei īkí.
-
Naʻe tupu hake ha talavou ʻi ha fāmili māmālohi pea naʻe ʻikai akoʻi kiate ia ʻa e ongoongoleleí ʻi heʻene kei siʻí. Kuo foki mai ʻeni hono fāmilí ʻo mālohi ʻi he Siasí pea kamata ke ako mo moʻui ʻaki e ongoongoleleí.
-
Naʻe taʻu lahi hono fakaangaʻi ʻe ha fefine ʻa e Siasí. Naʻá ne aʻusia kimuí ni ha liliu ʻo e lotó pea naʻe papitaiso.
Fakaafeʻi e kau akó ke kumi ha foʻi moʻoni ʻi heʻenau ako e Kalētia 3–4 ʻe lava ʻo tokoni ke mahino kiate kitautolu ʻa e ngaahi tāpuaki ʻoku lava ke maʻu ʻe he tokotaha kotoa pē, neongo pe ko e hā hono tūkungá mo e ngaahi fili he kuohilí.
Fakamatalaʻi ange ko e tokolahi ʻo e Kāingalotu Kalētiá ko e kau Senitaile ne nau ului ki he tui faka-Kalisitiané, pea naʻe ʻikai ko ha hako totonu kinautolu ʻo ʻĒpalahame, ʻa ia naʻe talaʻofa ki ai e ngaahi tāpuaki kotoa ʻa e ʻOtuá. Fakaafeʻi ha tokotaha ako ke lau leʻolahi e Kalētia 3:7–9. Kole ki he kalasí ke muimui ki ai, ʻo kumi e meʻa naʻe akoʻi ʻe Paula fekauʻaki mo kinautolu “ʻoku ʻi he tuí” (veesi 7), pe ʻoku nau tui kia Sīsū Kalaisí.
-
Ko e hā naʻe akoʻi ʻe Paula fekauʻaki mo kinautolu ʻoku tui kia Sīsū Kalaisí?
-
Fakatatau ki he veesi 8, ko e hā naʻe talaʻofa ʻe he ʻEikí kia ʻĒpalahamé?
-
Fakatatau ki he veesi 9, ko e hā ʻe hoko kiate kinautolu ʻoku tui kia Sīsū Kalaisí?
Fakamatalaʻi ange ʻoku ʻuhinga ʻa e “tāpuekina fakataha mo ʻĒpalahame angatonú” ke maʻu e ngaahi lelei ʻo e fuakava naʻe fai ʻe he ʻOtuá mo ʻĒpalahamé, ʻa ia ʻe lava ke fiefia ʻa e kakai kotoa pē ʻi he ngaahi tāpuaki ʻo e ongoongoleleí, ʻo fakafou ʻiate ia (vakai, ʻĒpalahame 2:11).
Fakamatalaʻi fakanounou ʻa e Kalētia 3:10–25 ʻaki hono fakamatalaʻi ange naʻe akoʻi ʻe Paula naʻe fakataumuʻa ʻa e fono ʻa Mōsesé ke tokoni ki he kau ʻIsilelí ke nau haʻu kia Sīsū Kalaisi pea fakatonuhiaʻi kinautolu ʻi he tui kiate Iá.
Fakaafeʻi ha tokotaha ako ke lau leʻolahi e Kalētia 3:26–27. Kole ki he kalasí ke muimui ki ai, ʻo kumi e meʻa kuo pau ke tau fai ke maʻu ai ʻa e ngaahi tāpuaki kuo talaʻofa kia ʻĒpalahamé.
-
Ko e hā kuo pau ke tau fai ke maʻu ai e ngaahi tāpuaki kuo talaʻofa kia ʻĒpalahamé?
Hiki ʻa e fakamatala taʻe kakato ko ʻení ʻi he palakipoé: Ko kinautolu kotoa ʻoku ngāue ʻaki e tui kia Sīsū Kalaisí mo fakahoko e fuakava ʻo e ongoongoleleí te nau hoko …
Fakaafeʻi ha tokotaha ako ke lau leʻolahi e Kalētia 3:28–29. Kole ki he kalasí ke muimui ki ai, ʻo kumi e ngaahi foʻi lea pe kupuʻi lea te nau lava ʻo fakaʻaongaʻi ke fakakakato ʻaki ʻa e tefitoʻi moʻoni taʻe kakato ʻi he palakipoé.
-
Fakatatau ki he veesi 28, ko e hā ʻoku hoko ki ai ha niʻihi fakafoʻituitui kehekehe ʻi heʻenau fakahoko e fuakava ʻo e ongoongoleleí?
-
Fakatatau ki he veesi 29, ko e hā ʻoku hoko foki ki ai ʻa kinautolu ʻoku lau fakataha mo e hako ʻo ʻĒpalahamé ʻia Sīsū Kalaisí?
Fakamatalaʻi ange ko ha ʻea-hokó ko ha taha ia ʻoku ʻi ai ʻene totonu fakalao ke maʻu ʻa e ngaahi koloa ʻa ha taha kehe.
Fakaafeʻi ha tokotaha ako ke lau leʻolahi e Kalētia 4:7. Kole ki he kalasí ke muimui ki ai, ʻo kumi pe te tau lava ʻo hoko ko e kau ʻea-hoko kia hai.
-
Te tau lava ʻo hoko ko e kau ʻea-hoko kia hai? (Fakakakato e tefitoʻi moʻoni ʻi he palakipoé ʻo fakaʻaongaʻi e ngaahi lea ʻa e kau akó, ke ne ʻomi ʻa e foʻi moʻoni ko ʻení: Ko kinautolu kotoa ʻoku tui kia Sīsū Kalaisi mo fakahoko e fuakava ʻo e ongoongoleleí, te nau hoko ʻo taha ʻia Kalaisi pea mo e kau ʻea-hoko ʻo e ʻOtuá.)
-
Ko e hā ʻoku mahuʻinga ai ke ʻiloʻi ʻoku talaʻofa ʻe he ʻOtuá ʻa e ngaahi tāpuakí ni ki he tokotaha kotoa pē ʻoku fai ʻa e fuakavá, neongo pe ko e hā hono ngaahi tūkungá?
Fakamoʻoni ange ko e ngaahi talaʻofa ʻa e Tamai Hēvaní ʻoku ʻatā ia ki ha taha pē ʻokú ne fakahoko e fuakava ʻo e ongoongoleleí. Poupouʻi e kau akó ke faivelenga ki he ngaahi fuakava kuo nau faí.
Fakamatalaʻi fakanounou e Kalētia 4:8–31 ʻaki hono fakamatalaʻi ange naʻe fakaafeʻi ʻe Paula e Kāingalotu Kalētiá ke toe foki kia Kalaisi ke nau hao mei he pōpula ʻoku hoko ʻi he talangofua ki he fono ʻa Mōsesé.
Ngaahi Fakamatala Fakamahino mo e Puipuituʻá
Kalētia 1:8–10. “[Ko] ha ʻāngelo mei he langí”
ʻOku faʻa fakaʻaongaʻi hala e ngaahi akonaki ʻa Paula ʻoku lekooti ʻi he Kalētia 1:8–10 ke fakafekiki ʻaki e ngaahi meʻa-hā-mai ʻa e kau ʻāngeló mo hono malanga ʻaki ha ongoongolelei kuo fakafoki maí. Ka neongo ia, naʻe ʻikai akoʻi ʻe Paula ke fakafisingaʻi e hā mai ʻo e kau ʻāngeló, he ʻoku fakahaaʻi ʻe he folofolá ko e moʻoni ʻe haʻu ʻa e kau ʻāngeló ʻi he ngaahi ʻaho fakaʻosí ke malangaʻi foʻou ʻa e ongoongoleleí (vakai, Fakahā 14:6). Ka, naʻe akoʻi ʻe Paula kapau ʻe haʻu ha ʻāngelo ke takihalaʻi ʻa e kakaí mei he ongoongolelei moʻoní, pea ʻoku totonu ke fakafisingaʻi e ʻāngelo ko iá (vakai foki, ʻAlamā 30:53). ʻOku fakahoko ʻa e ongoongolelei moʻoní he ʻahó ni, ʻo hangē ko e kuonga ʻo Paulá, ʻe he kau palōfita mo e kau ʻaposetolo kuo fakamafaiʻi (vakai, ʻEfesō 2:19–20; 4:11–14) pea fakatefito ʻi he “ʻofa ʻa Kalaisí” (Kalētia 1:6; vakai foki, 2 Nīfai 2:8; 10:24).
Kalētia 2:11–16. Ko e fehangahangai ʻa Paula mo Pitá
Ke maʻu ha fakamatala lahi ange fekauʻaki mo e fetaʻemahinoʻaki ʻa Paula mo Pita lolotonga e ʻaʻahi ʻa Pita ki he Kāingalotu ʻi ʻAnitioké, vakai New Testament Student Manual (Church Educational System manual, 2014), (00) 413.
Kalētia 3:10–14. “[Ko e] Malaʻia ʻo e fonó”
Hangē ko ia ʻoku lekooti ʻi he Kalētia 3:10, naʻe akoʻi ʻe Paula ko kinautolu ʻoku feinga ke fakatonuhiaʻi kinautolu ʻi he fono ʻa Mōsesé ʻoku nau haʻisia ke talangofua kotoa ki ai. Naʻe pehē ʻe Paula, “ʻOku malaʻia kotoa pē ʻoku ʻikai tuʻu maʻu ai pē ʻi he ngaahi meʻa kotoa pē kuo tohi ʻi he tohi ʻo e fonó ke fai ia.” ʻOku tuku foki ʻe he fie maʻu faingataʻa ko ʻení ʻa kinautolu kotoa pē ʻoku fekumi ke fakatonuhiaʻi ʻi he fonó ʻi he “malaʻia ʻo e fonó” (Kalētia 3:13). Naʻe toe fakamatalaʻi ʻe Paula naʻe mamahi ʻa Sīsū Kalaisi koeʻuhí ko e “malaʻia ʻo e fonó” ʻaki “ʻene hoko ko e malaʻia koeʻuhí ko kitautolu” ʻi Heʻene Fakaleleí (Kalētia 3:13). Te tau lava kotoa ʻo maʻu e ngaahi tāpuaki ʻo ʻĒpalahamé ʻo fakafou ʻi he Fakalelei ʻa Sīsū Kalaisí, ʻi hono ngāue ʻaki e tui kia Sīsū Kalaisí mo fakahoko e fuakava ʻo e ongoongoleleí.
Kalētia 3:24. “Ko hotau takiakiʻí ʻa e fonó”
Naʻe fakamatalaʻi ʻe ʻEletā Paula V. Sionisoni ʻo e Kau Fitungofulú naʻe maʻu hala ʻe ha kakai tokolahi ʻi he taimi ʻo e Fuakava Foʻoú ʻa e taumuʻa ʻo e fono ʻa Mōsesé:
“Ne tokolahi ha kau Siu, kau ai mo e kau Siu Kalisitiane naʻe, … ngalo ʻiate kinautolu e taumuʻa mo e tuʻunga totonu ʻo e fonó. Ko e taha e ngaahi ʻuhingá naʻe hanga ʻe hono fakalahi taʻe fakamafaiʻi ʻo e fie maʻu mo e tukufakaholo ki he fonó ʻo fakapuliki hono taumuʻa totonú. Naʻe ʻikai kei hoko e ngaahi fakalahi mo e tukufakaholo ko ʻení ko ha ‘[takiakiʻi ʻo e fonó] … [kia] Kalaisi’ (Kalētia 3:24), ‘takiakiʻi [hotau] laumālié kiate ia’ (Sēkope 4:5), ka naʻe fakakavenga mo fakaongosia pea tokolahi ha kau Siu ia ne nau tokanga ‘ki he meʻa naʻe ʻikai mahuʻingá’ (Sēkope 4:14) ʻo nau ʻai e fono kuo liliú ke ne fetongi e Tokotaha naʻá Ne Foaki mai e Fonó” (“Ko Hono Tali ʻo e Liliú ʻi he Founga Totonú” [lea ki he kau faiako ʻi he Potungāue Ako ʻo e Siasí, 8 Fēpueli, 2013] 2, si.lds.org).
Kalētia 3:28. “ʻOku mou taha pē kotoa pē ʻia Kalaisi Sīsū”
ʻOku faʻa momou e kakaí ke papitaiso pe kau kakato ki he Siasí koeʻuhí ʻoku nau hohaʻa ʻe fie maʻu ke nau tukuange honau ʻulungaanga fakafonuá pe te nau ongoʻi ʻoku ʻikai ke nau fengāueʻaki lelei mo e niʻihi kehé. Naʻe akoʻi ʻe Palesiteni Sēmisi E. Fausi ʻo e Kau Palesitenisī ʻUluakí ʻe lava ke kehekehe pea mo uouangataha fakatouʻosi e kāingalotu ʻo e Siasí:
“ʻOku ʻikai mole hotau tuʻunga fakatāutahá ʻi heʻetau hoko ko ha mēmipa ʻo e siasí ni. ʻOku tau hoko ko e kau ʻea-hoko ki he puleʻanga ʻo e ʻOtuá, ʻi he kau mo e sino ʻo Kalaisí pea tukuange fakalaumālie ha niʻihi ʻo hotau ngaahi faikehekehe fakatāutahá ke faaitaha ʻi ha taumuʻa fakalaumālie lahi ange. ʻOku mau pehē kiate kimoutolu kotoa pē kuo kau ki he Siasí, tauhi kotoa ʻa ia ʻoku fakaʻeiʻeiki, lelei mo langaki moʻui ʻi homou anga fakafonuá mo e tuʻunga fakatāutahá. Ka neongo ia, ʻi he malumalu ʻo e mafai mo e mālohi ʻo e ngaahi kī ʻo e lakanga fakataulaʻeikí, ʻoku tukulolo ʻa e ngaahi faikehekehe kotoa pē ʻi heʻetau feinga ke hoko ko e kau ʻea-hoko ki he puleʻanga ʻo e ʻOtuá” (“Heirs to the Kingdom of God,” Ensign, May 1995, 62).