Talateu ki he Tohi ʻa Paula kia Filimoné
Ko e hā hono ʻuhinga ʻoku ako ai e tohí ni?
ʻOku ʻi he Tohi kia Filimoné ha faleʻi fakatāutaha meia Paula fekauʻaki mo ha tūkunga mo e pōpula ʻa Filimone ko ʻOnesimó. ʻI hono ako ʻe he kau akó ʻa e tohí ni, te nau lava ʻo ako ko e taimi ʻoku kau ai e kakaí ki he Siasi ʻo Sīsū Kalaisí, ʻoku nau hoko ko e kāinga ʻi he ongoongoleleí (vakai, Filimone 1:16). ʻE lava ke foki ke ongoʻi ʻe he kau akó ʻa e mahuʻinga ʻo e fatongia ʻoku maʻu ʻe he kau ākonga ʻa Sīsū Kalaisí ke ʻaloʻofa mo fakamolemoleʻi e niʻihi kehé (vakai, Filimone 1:16–17).
Ko hai naʻá ne tohi ʻa e tohí ni?
Naʻe fai ʻe Paula ʻa e Tohi kia Filimoné (vakai, Filimone 1:1).
Ko e fē e taimi mo e feituʻu ne tohi aí?
Naʻe teuteuʻi e Tohi kia Filimoné ʻe Paula lolotonga hono fuofua tuku pōpula e ʻAposetoló ʻi Lomá, ʻi he A.D. 60–62 (vakai, Filimone 1:1, 9; Ko e Fakahinohino ki he Ngaahi Folofolá, “Ngaahi Tohi ʻa Paulá,” scriptures.lds.org).
Ko hai naʻe fakataumuʻa ki ai hono hikí pea ko e hā hono ʻuhingá?
“Ko e tohi ko ʻení ko ha tohi fakatāutaha ia fekauʻaki mo ʻOnesimo, ko ha pōpula naʻe kaihaʻa mei hono ʻeiki, ko Filimoné, pea hola ki Loma” (Bible Dictionary ʻi he tatau faka-Pilitānia ʻo e Tohi Tapu ʻa e Siasí, “Pauline Epistles”). Mahalo ko ha papi ului Kalisi ʻa Filimone pea naʻe nofo ʻi Kolose (vakai, Kolose 4:9). Naʻá ne fakangofua ha fakatahaʻanga ʻa e Siasí ke fakataha ʻi hono ʻapí (vakai, Filimone 1:2, 5). Naʻe kau ʻa ʻOnesimo ki he Siasí hili ʻene holá, pea hoko ko “e tokoua ʻofeina … [ʻi he] ʻEikí” (Filimone 1:16; vakai, Filimone 1:10–12).
Naʻe tohi ʻa Paula kia Filimone ke poupouʻi ia ke tali ʻa ʻOnesimo ko ha tokoua ʻi he ongoongoleleí ʻo ʻikai ha ngaahi tautea mamafa ʻa ia ʻe faʻa fai ki he kau pōpula holá (vakai, Filimone 1:17). Naʻe fokotuʻu ange ʻe Paula ke ne totongi ha mole fakapaʻanga ne fakatupu ʻe ʻOnesimo ke faingataʻaʻia ai ʻa Filimone (vakai, Filimone 1:18–19).
Ko e hā ha ngaahi fōtunga makehe ʻo e tohí ni?
Ko e tohi ʻa Filimoné ʻa e tohi nounou taha pea mahalo ne mātuʻaki fakatāutaha ʻi he ngaahi tohi ʻa Paulá. Ko ha tohi ia naʻe fai ki ha taha fakafoʻituitui; ko ia, naʻe ʻikai kau ai ha kaveinga fakatokāteline lahi. Ka neongo iá, ne fakahaaʻi ʻe he tautapa ʻa Paula kia Filimone ke fakalelei mo e pōpula ko ʻOnesimó ʻa e founga ʻoku fakaʻaongaʻi ai e ngaahi tokāteline ʻo e ongoongoleleí ʻi he moʻui fakaʻahó—ʻi he meʻá ni, ʻoku fakahaaʻi ai ʻoku ʻomi ʻe hotau vā fetuʻutaki mo Sīsū Kalaisi ha vā fetuʻutaki fakafāmili mo e kotoa ʻo e kau muimui kehe ʻo Kalaisí mo fakaʻilongaʻi ʻa e mahuʻinga ʻo e ʻaloʻofá mo e fakamolemolé.
Fokotuʻutuʻú
Filimone 1 Ko e fakamālōʻia ʻe Paula ʻa Filimone ʻi he ʻofa kuó ne fakahaaʻi ki he Kāingalotú. ʻOku talaange ʻe Paula kia Filimone kuo ului ʻa ʻene pōpula hola ko ʻOnesimó, ki he ongoongoleleí. ʻOku kole ʻe Paula kia Filimone ke tali ʻa ʻOnesimo ke foki ange ko ha tokoua ki he ʻEikí. ʻOku fokotuʻu ange ʻe Paula ke ne totongi ha mole fakapaʻanga kuo fakatupu ʻe ʻOnesimo ke ne faingataʻaʻia ai.