Naʻe tohi ʻa Paula ʻo kau ki he ngaahi meʻafoaki lahi ʻo e Laumālié. Naʻá ne fakafehoanaki ʻa e Siasí ki ha sino fakamatelie pea fakamatala ʻe hangē pē ko hono fie maʻu ʻe he sinó ke ngāue ʻa e kupu kotoa pē, mo e lava ke fakaʻaongaʻi ʻe he mēmipa kotoa pē ʻo e Siasí ʻa e ngaahi meʻafoaki ʻo e Laumālié ke tokoni mo fakamālohia e Siasí.
Ko e akonaki ʻa Paula fekauʻaki mo e ngaahi meʻafoaki fakalaumālié
Fakaʻaliʻali ha fakatātā ʻo e maka ko ʻení:
ʻĪmisi
stone, whate’er thou art act well thy part
Fakaafeʻi ha tokotaha ako ke lau leʻolahi ʻa e tohi ʻi ʻolunga ʻi he foʻi maká. Fakamatalaʻi ange lolotonga e ngāue fakafaifekau ʻa Palesiteni Tēvita O. Makei ʻi Sikotilaní, naʻá ne mamata ki he maká ni ʻi ʻolunga ʻi he matapā ʻo ha fale ofi ki he Stirling Castle pea naʻe ueʻi ia ʻe hono pōpoakí (vakai, Francis M. Gibbons, David O. McKay: Apostle to the World, Prophet of God [1986], 45).
Fakamatalaʻi ange ʻoku fakafofongaʻi ʻe he fakaʻilonga takitaha ʻi he tapafā ʻe hiva ʻo e maká ni ha mahuʻinga fakamataʻifika. Kole ki he kau akó ke nau kumi e mahuʻinga fakamataʻifika ʻo e fuo takitaha. (Mei toʻohema ki toʻomataʻu, ʻoku fakafofongaʻi ʻe he ngaahi fakaʻilongá ʻa e 5, 10, mo e 3 ʻi he ʻotu taupotu ki ʻolungá; 4, 6, mo e 8 ʻi he ʻotu ʻi lotó; mo e 9, 2, pea mo e 7 ʻi he ʻotu ʻi laló.)
ʻOku fiha fakakātoa hono tānaki ʻo e mataʻifika ʻe tolu ʻokú ne fakafofongaʻi ʻa e ʻotu ki ʻolungá? ʻotu ʻi lotó? ʻotu ʻi laló?
Fakamatalaʻi ange ʻoku tānaki ʻa e mataʻi fika kotoa pē ʻokú ne fakafofongaʻi ha faʻahinga ʻotu pē, kōlomu, pe laine fakaheihei ki he 18. Ko e ʻuhinga ʻe taha naʻe fokotuʻutuʻu fakataha ai ʻa e ngaahi fuó ni mo e konga lea “Tatau Ai Pē pe Ko e Hā Koe Fai Ho Lelei Tahá” koeʻuhí kapau ʻe toe fokotuʻutuʻu ʻa e ngaahi fuó ni pe liliu honau ngaahi mataʻifiká, he ʻikai toe tānaki ki he 18 ʻa e ngaahi ʻotú pe kōlomú ʻi ha faʻahinga huʻunga pē.
Fakaafeʻi ʻa e kau akó ʻi heʻenau ako ʻa e 1 Kolinitō 12 ke fakakaukau ki he founga ʻoku tau tatau ai ʻi heʻetau hoko ko e mēmipa ʻo e Siasí ko e ngaahi fuo ʻi he maká.
Fakamatalaʻi fakanounou ʻa e 1 Kolinitō 12:1–2 ʻaki haʻo fakamatalaʻi ange naʻe fie maʻu ʻe Paula ke akoʻi e kau mēmipa ʻo e Siasí ʻi Kolinitoó fekauʻaki mo e ngaahi meʻafoaki fakalaumālié, ʻa ia naʻe maʻu hala ʻe ha niʻihi ʻo e Kāingalotú. Naʻe fakamanatu ange ʻe Paula kiate kinautolu kimuʻa honau fakauluí, naʻe takihalaʻi kinautolu ʻe he tauhi tamapuá.
Fakaafeʻi ha tokotaha ako ke lau leʻolahi ʻa e 1 Kolinitō 12:3, pea kole ki he kalasí ke nau kumi e founga ʻe lava ke tau ʻilo ai ko Sīsū ʻa e ʻEikí mo e Fakamoʻuí. Fakamatalaʻi ange naʻe akoʻi ʻe Siosefa Sāmita ʻoku totonu ke mahino ʻa e foʻi lea ko e pehē ʻi he veesi 3 ko e ʻilo (ʻi he History of the Church, 4:602–3).
Fakatatau ki he 1 Kolinitō 12:3, ʻe lava fēfē ke tau maʻu ha fakamoʻoni fakatāutaha kia Sīsū Kalaisí? (Hili e tali ʻa e kau akó, hiki ʻa e moʻoni ko ʻení ʻi he palakipoé: Ko e Laumālie Māʻoniʻoní pē ʻe lava ke tau maʻu ai ha fakamoʻoni fakafoʻituitui ko Sīsū Kalaisi hotau Fakamoʻuí. (Mahalo te ke fie maʻu ke fakamatalaʻi ange ʻoku fakaʻaongaʻi ʻa e tefitoʻi moʻoni tatau ki hono maʻu ʻo ha fakamoʻoni fakatāutaha kia Siosefa Sāmita pe Tohi ʻa Molomoná).
Ke tokoni ke mahino ange ki he kau akó e foʻi moʻoni ko ʻení, kole ki ha tokotaha ako ke lau leʻolahi e lea ko ʻeni ʻa Palesiteni Tieta F. ʻUkitofa ʻo e Kau Palesitenisī ʻUluakí:
ʻĪmisi
President Dieter F. Uchtdorf
“Ko e fakamoʻoní ko ha koloa mahuʻinga ʻoku tau maʻu koeʻuhí ʻoku ʻikai maʻu ia ʻi he fakakaukaú pe ʻuhingá ʻataʻatā pē, he ʻikai lava ke fakatau mai ia ʻaki ʻa e ngaahi koloa fakaemāmaní, pea he ʻikai lava ke foaki ia ko ha meʻaʻofa, pe maʻu mei heʻetau ngaahi kuí. He ʻikai lava ke tau fakafalala ki he fakamoʻoni ʻa e kakai kehé. ʻOku fie maʻu ke tau ʻiloʻi ʻiate kitautolu pē. Naʻe pehē ʻe Palesiteni Kōtoni B. Hingikelī, ‘ʻOku maʻu ʻe he mēmipa Siasi kotoa pē ha fatongia ke ne ʻiloʻi ʻiate ia pē ʻi he tui taʻe-veiveiua ko Sīsuú ko e ʻAlo toetuʻu mo moʻui ʻo e ʻOtua moʻuí’ (‘Fear Not to Do Good,” Ensign, May 1983, 80). …
“ʻOku tau maʻu ʻa e fakamoʻoni ko ʻení ʻi he taimi ʻoku lea ai ʻa e Laumālie Māʻoniʻoní ki hotau laumālié. Te tau maʻu ha nonga mo ha fakapapau ʻoku taʻe toe veiveiua, ʻa ia ʻe hoko ko e maʻuʻanga ʻo ʻetau fakamoʻoní mo ʻetau loto fakapapaú” (“The Power of a Personal Testimony,” Ensign pe Liahona, Nov. 2006, 38).
Ko e hā ʻoku mahuʻinga ai ke mahino ʻoku toki maʻu pē ha fakamoʻoni kia Sīsū Kalaisí ʻi he Laumālie Māʻoniʻoní?
Ko e hā te tau lava ʻo fai ke fakaafeʻi ʻa e Laumālie Māʻoniʻoní ki heʻetau moʻuí?
Fakamatalaʻi ange hangē ko ia ʻoku lekooti ʻi he 1 Kolinitō 12:4–6, naʻe akoʻi ʻe Paula ʻoku ʻi ai ha faʻahinga kehekehe ʻo e ngaahi meʻafoaki fakalaumālié ʻoku ngāue ʻi ha ngaahi founga kehekehe ka ʻoku haʻu kotoa ia mei he ʻOtuá ʻo fakafou ʻi he Laumālie Māʻoniʻoní. Mahalo te ke fie fakamatalaʻi ange ko e meʻafoaki ʻo e Laumālié ʻa e ngaahi tāpuaki pe ivi ʻoku foaki mai ʻo fakafou ʻi he Laumālie Māʻoniʻoní pea ʻoku foaki ʻe he ʻOtuá ha meʻafoaki ʻe taha ki he mēmipa kotoa ʻo e Siasí (vakai, T&F 46:11).
Fakaafeʻi ha tokotaha ako ke lau leʻolahi ʻa e 1 Kolinitō 12:7. Kole ki he kalasí ke muimui ki ai, ʻo kumi e ʻuhinga ʻoku foaki mai ai e ngaahi meʻafoaki ʻo e Laumālié kiate kitautolú. (Kapau ʻe fie maʻu, fakamatalaʻi ange ʻoku ʻuhinga ʻa e “ke feʻaongaʻaki” ki he lelei fakalūkufua ʻo e Kāingalotu kotoa pē.)
Ko e hā ha moʻoni ʻe lava ke tau ako meia Paula fekauʻaki mo e meʻafoaki ʻo e Laumālié ʻa ia ʻoku foaki ki he fānau ʻa e Tamai Hēvaní? (ʻOku totonu ke ʻilo ʻe he kau akó ha moʻoni hangē ko ʻení: ʻOku foaki ʻa e meʻafoaki ʻo e Laumālié ke ʻaonga ki he fānau kotoa pē ʻa e Tamai Hēvaní. Tohi ʻa e moʻoni ko ʻení ʻi he palakipoé.)
Ke tokoni ke mahino ki he kau akó e foʻi moʻoni ko ʻení, hiki ʻa e saati ko ʻení ʻi he palakipoé pea kole ki he kau akó ke hiki ia ki heʻenau pepa ki he kalasí pe tohinoa ako folofolá.
Ngaahi Meʻafoaki Fakalaumālié
Ko e Founga ʻOku ʻAonga ai ʻa e Ngaahi Meʻafoaki Fakalaumālie Ko ʻEni Ki he Fānau ʻa e ʻOtuá
Vahevahe e kalasí ki ha ngaahi kulupu tautau toko ua pe tolu. Fakaafeʻi e kulupu takitaha ke nau ako e 1 Kolinitō 12:8–11 pea muimui ki he ngaahi fakahinohino ʻoku ʻoatú. Mahalo te ke fie hiki ʻa e ngaahi fakahinohino ko ʻení ʻi he palakipoé pe tufa ange ʻi ha laʻipepa ke tufa:
Hiki ʻi he kōlomu ʻuluaki ʻo e sātí e ngaahi meʻafoaki fakalaumālie ʻoku lau ki ai ʻa e 1 Kolinitō 12:8–11.
Aleaʻi e ʻuhingá pe ʻomi ha fakatātā ʻo e ngaahi meʻafoaki fakalaumālie taki taha.
Fakaafeʻi e kulupu takitaha ke nau lipooti e ngaahi meʻafoaki fakalaumālie ne nau ʻiló pea mo e ʻuhinga ʻo e meʻafoaki taki taha. ʻO ka fie maʻu, fakamatalaʻi ange ʻoku ʻuhinga ʻa e “lea ʻo e potó” (veesi 8) ki he fakaʻutoʻuta leleí pea mo hono fakaʻaongaʻi totonu ʻo e ʻiló; ʻoku ʻuhinga ʻa e “lea ʻo e ʻiló” (veesi 8) ki ha ʻilo ki he ʻOtuá mo ʻEne ngaahi fonó; ʻoku ʻuhinga ʻa e “ʻilo ki he ngaahi laumālié” (veesi 10) ki hono ʻiloʻi e moʻoní mo e meʻa taʻemoʻoní mo hono ʻilo e lelei mo e kovi ʻi he niʻihi kehé; pea ʻoku ʻuhinga ʻa e “tokotaha hono fakamatala ʻo e ngaahi leá” (veesi 10) ki he malava ke lea ʻi ha ngaahi lea fakafonua muli pe ngaahi lea taʻeʻiloá.
Kole ki he kulupu takitaha ke fili ha meʻafoaki fakalaumālie ʻe ua naʻe ʻasi ʻi he veesi 8–10 pea hiki ʻi he kōlomu hono ua ʻo e sātí e founga ʻe lava ke ʻaonga ai ki he fānau ʻa e ʻOtuá. Hili hono ʻoange ha taimi feʻunga, fakaafeʻi ha niʻihi ʻo e kau akó ke nau fakamatalaʻi ha taha ʻo ʻenau ngaahi tali mei he kōlomu hono uá ki he kalasí.
Fakamahinoʻi ange ko e ngaahi meʻafoaki fakalaumālie naʻe fakamatala pau ki ai ʻi he folofolá ko ha niʻihi pē ia ʻo e ngaahi meʻafoaki lahi ʻe lava ke tau maʻu ʻo fakafou ʻi he Laumālié.
Ko e hā ha ngaahi foaki kehe ʻe lava ke tau maʻu ʻi he Laumālie Māʻoniʻoní?
Ko e hā ha ngaahi meʻafoaki fakalaumālie kuó ke fakatokangaʻi ʻi he kau mēmipa ho fāmilí, kaungāmeʻá, mo e kaungā-akó?
Ko e hā ʻe lava ke tau fai ke ʻiloʻi ʻetau ngaahi meʻafoaki fakalaumālié? (Fehuʻi ki he Tamai Hēvaní ʻi he lotu fekauʻaki mo kinautolu pea maʻu mo ako hotau ngaahi tāpuaki fakapēteliaké.)
Fakaafeʻi e kau akó ke nau fakalaulauloto ki he ngaahi meʻafoaki fakalaumālie kuo foaki ange kiate kinautolú pea mo e founga ʻe lava ke ʻaonga ai kiate kinautolu mo fakaʻaongaʻi ke ʻaonga ki he niʻihi kehé.
ʻOku foaki mai e ngaahi meʻafoaki ʻo e Laumālié ke tāpuakiʻi e kāingalotu kotoa ʻo e Siasí.
Fakaafeʻi ha kau ako ʻe toko fā ke omi ki he palakipoé. Vahe ki he tokotaha kotoa ʻo e kau akó ni ha taha ʻo e ngaahi foʻi lea ko ʻení kae ʻai ke ʻoua ʻe fanongo ki ai e toenga ʻo e kalasí: vaʻe, nima, telinga, pea mo mata. Fakahinohinoʻi e tokotaha ako kotoa pē ke nau tā ha fakatātā ʻo e foʻi lea ʻokú nau maʻú ʻi he palakipoé, pea kole ange ki he kalasí ke nau mateʻi pe ko e hā naʻe tā ʻe he tokotaha ako takitaha. Hili hono mateʻi ʻo tonu ʻe he kalasí e fakatātā takitaha, fakaafeʻi e kau akó ke nau foki ki honau nofoʻangá. Kole ki he kalasí ke fakakaukau pe ʻe founga fēfē e tokoni ʻa e vaʻé, nimá, telingá, mo e matá ki he ngāue ʻoku fai ʻe he sinó.
Kuó ke fakalaveaʻi nai ha kupu siʻi ʻo e sinó, hangē ko ha foʻi tuhu, nifo, pe vaʻe? Naʻe uesia fēfē nai ʻe he kiʻi lavea siʻisiʻi ko ʻení hoʻo ngaahi ngāue fakaʻahó?
Fakaafeʻi ha tokotaha ako ke lau leʻolahi ʻa e 1 Kolinitō 12:12–14. Kole ange ki he kalasí ke muimui ki ai, ʻo kumi e meʻa naʻe fakafehoanaki ki ai ʻe Paula ʻa e sinó mo hono ngaahi kupú.
Ko e hā naʻe fakafehoanaki ki ai ʻe Paula ʻa e sinó mo hono ngaahi kupú. (Siasi ʻo Sīsū Kalaisí mo hono kau mēmipá.)
Hiki e ngaahi fakamoʻoni fakafolofola mo e fehuʻi ko ʻení ʻi he palakipoé.
Naʻe fakafehoanaki fēfē ʻe Paula e ngaahi kupu ʻo e sinó ki he Siasí?
Vahevahe ʻa e kau akó ki he ngaahi kulupu tatau pē ne ʻosi fakaʻaongaʻí. Kole ki he kulupu takitaha ke nau lau leʻolahi fakataha ʻa e 1 Kolinitō 12:15–22, 25–30, ʻo kumi e ngaahi founga naʻe fakafehoanaki ʻaki ʻe Paula e kau mēmipa ʻo e Siasí ki he ngaahi kupu ʻo e sinó. Mahalo te ke fie fokotuʻu ange ke kumi ʻe he kau akó e meʻa naʻe akoʻi ʻe Paula fekauʻaki mo e sinó mo hono ngaahi kupú kimuʻa pea kumi e founga naʻá ne fakatatau ai e ngaahi kupu ʻo e sinó ki he kau mēmipa ʻo e Siasí. Hili ha taimi feʻunga, kole ki he kau akó ke lipooti e ngaahi meʻa ne nau ʻiló.
ʻOkú ke pehē ko e hā e ʻuhinga naʻe aleaʻi ai ʻe Paula e ngaahi fatongia ʻo e kau mēmipa fakafoʻituitui ʻo e Siasí hili pē ʻene tohi fekauʻaki mo e ngaahi meʻafoaki fakalaumālié?
Ko e hā ha ngaahi hohaʻa ʻoku ala maʻu ʻe he kāingalotu ʻo e Siasí ʻi he kuongá ni ʻe lava ke fakaleleiʻi ʻaki e ngaahi akonaki ʻa Paula fekauʻaki mo e hangē ʻa e kau mēmipa ʻo e Siasí ko e ngaahi kupu ʻo e sinó?
Ko e hā e tefitoʻi moʻoni ʻe lava ke tau ako mei hono fakafehoanaki ʻe Paula e kau mēmipa ʻo e Siasí ki he ngaahi kupu ʻo e sinó? (Fakapapauʻi ʻoku ʻiloʻi ʻe he kau akó ʻa e tefitoʻi moʻoni ko ʻení: ʻE lava ke tau fakamālohia ʻa e Siasí, ʻi heʻetau fakaʻaongaʻi ʻetau ngaahi meʻafoaki fakalaumālie makehé ke tokoniʻi e niʻihi kehé. Tohi ʻa e tefitoʻi moʻoni ko ʻení ʻi he palakipoé.)
Fakaafeʻi ha tokotaha ako ke lau leʻolahi ʻa e lea ko ʻeni ʻa Palesiteni Kōtoni B. Hingikelií. Fakakaukau ke ʻoange ha tatau ʻo e leá ni ki he tokotaha ako takitaha.
ʻĪmisi
President Gordon B. Hinckley
“ʻOku tau kau kotoa ʻi he ngāue mahuʻinga ko ʻení. ʻOku tau ʻi hení ke tokoni ki heʻetau Tamaí ʻi Heʻene ngāué mo Hono nāunaú, ‘ke fakahoko ʻa e moʻui taʻe-faʻamate mo e moʻui taʻengata ʻa e tangatá’ (Mōsese 1:39). ʻOku mamafa tatau pē homou tufakanga ʻi homou fatongiá pea mo hoku tufakanga ʻi hoku fatongiá. ʻOku ʻikai ha uiuiʻi ʻi he siasí ni ʻoku siʻisiʻi pe taʻemahuʻinga. ʻOku tau ʻaonga kotoa pē ki he moʻui ʻa e niʻihi kehé ʻi heʻetau tulifua ki hotau fatongiá” (“This Is the Work of the Master,” Ensign, May 1995, 71).
Kuo tāpuekina fēfē e Siasí koeʻuhí ko e ngaahi meʻafoaki fakalaumālie kehekehe mo e ngaahi uiuiʻi ʻo e kau mēmipa fakafoʻituituí?
Kuó ke mamata fēfē nai ki hono fakamālohia ho fāmilí, ha kalasi semineli, pe uōti pe kolo ʻoku ʻe he ngaahi meʻafoaki fakalaumālie ʻa hono kāingalotú?
Kole ki he kau akó ke fakalaulauloto ki he founga ʻe lava ke nau fakaʻaongaʻi ʻai honau ngaahi meʻafoaki fakalaumālié ke fakamālohia ʻa e Siasí mo faitāpuekina e moʻui ʻa e niʻihi kehé.
Fakaafeʻi e kau akó ke lau fakalongolongo e 1 Kolinitō 12:31, ʻo kumi e meʻa naʻe faleʻi ʻe Paula ke fai ʻe he Kāingalotu Kolinitoó.
Ko e hā naʻe faleʻi ʻe Paula e Kāingalotú ke nau faí? (Fakamatalaʻi ange ʻoku ʻuhinga ʻa e holi lahi ʻi he veesi ko ʻení ki he “fekumi fakamātoato”.)
Ko e hā ʻe lava ke tau fai ke tau fekumi fakamātoato ai ki he “foaki fungani lelei” ʻo e Laumālié (vakai foki T&F 46:8–9)?
Fakahaaʻi hoʻo fakamoʻoní mo e houngaʻia ʻi he ngaahi meʻafoaki fakalaumālié, pea poupouʻi e kau akó ke nau fekumi fakamātoato mo fakaʻaongaʻi e ngaahi meʻafoaki fakalaumālié ke tokoniʻi e niʻihi kehé pea fakamālohia ʻa e Siasí.
Ngaahi Fakamatala Fakamahino mo e Puipuituʻá
1 Kolinitō 12:3. “ʻOku ʻikai ha taha te ne faʻa pehē, ko e ʻEiki ʻa Sīsū, ka ʻi he Laumālie Māʻoniʻoní”
Naʻe fakamatalaʻi ʻe ʻEletā M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá e meʻa ʻe lava ke tau fai ke maʻu ha fakamoʻoni ki he ongoongolelei ʻo Sīsū Kalaisí ʻi he mālohi ʻo e Laumālie Māʻoniʻoní:
“ʻOku hoko e fakamoʻoni moʻoni ʻo e … ngaahi moʻoni mahuʻingá ko ha fakamoʻoni ʻi he Laumālie Māʻoniʻoní hili ha feinga fakamātoato mo faivelenga, kau ai e faiako ʻi ʻapí, lotú, ako folofolá, tokoniʻi e niʻihi kehé, mo talangofua faivelenga ki he ngaahi fekau ʻa e Tamai Hēvaní. He ʻikai ha mahuʻinga ʻe tatau mo e totongi ʻo hono maʻu mo pikitai ki ha fakamoʻoni ki he ngaahi moʻoni ʻo e ongoongoleleí ʻi he teuteu fakalaumālie ʻe ngali fie maʻu ke tau faí” (“Pure Testimony,” Ensign pe Liahona, Nov. 2004, 40).
ʻOku mahuʻinga fau e ngaahi meʻafoaki ʻo e Laumālié ki he ʻEikí he ʻoku akoʻi kinautolu ʻi ha ngaahi tohi ʻe tolu mei he ngaahi tohi ʻe fā ʻo ʻetau ngaahi folofolá (vakai, 1 Kolinitō 12, Molonai 10, mo e Tokāteline mo e ngaahi Fuakava 46).
Naʻe akonaki ʻa ʻEletā Māvini A. ʻEsitoni ʻo e Kōlomu ʻo e Kau ʻAposetolo ʻe Toko Hongofulu Mā Uá fekauʻaki mo e ngaahi meʻafoaki fakalaumālie ʻoku ʻikai ʻasi pau ʻi he folofolá:
“Tuku muʻa ke u toʻotoʻo mai pē ha ngaahi meʻafoaki ʻe niʻihi ʻa ia ʻoku ʻikai ke faʻa fakatokangaʻi pe fakamahuʻingaʻi ka ʻoku nau fuʻu mahuʻinga ʻaupito. …
“Tuku ke tau toe vakaiʻi ha niʻihi ʻo e ngaahi meʻafoaki ʻoku ʻikai hā mahino ko ʻení: ʻa e meʻafoaki ʻo e kolé; ʻa e meʻafoaki ʻo e fakafanongó; ʻa e meʻafoaki ʻo e fanongo pea fakaʻaongaʻi ʻa e kihiʻi leʻo siʻí; ʻa e meʻafoaki ʻo e malava ke tangí; ʻa e meʻafoaki ʻo e fakaʻehiʻehi mei he fekeʻikeʻí; ʻa e meʻafoaki ʻo e lototahá; ʻa e meʻafoaki ʻo e fakaʻehiʻehi mei hono toutou fai ʻo ha meʻa taʻe ʻaongá; ʻa e meʻafoaki ʻo e fekumi ki he meʻa ʻoku māʻoniʻoní; ʻa e meʻafoaki ʻo e ʻikai ke fakamāú; ʻa e meʻafoaki ʻo e falala ʻe tataki koe ʻe he ʻOtuá; ʻa e meʻafoaki ʻo e hoko ko ha ākongá; ʻa e meʻafoaki ʻo e tokanga ki he niʻihi kehé; ʻa e meʻafoaki ʻo e malava ʻo fakalaulaulotó; ʻa e meʻafoaki ke lotú; ʻa e meʻafoaki ʻo hono fai ʻo ha fakamoʻoni mālohí; ʻa e meʻafoaki ʻo hono maʻu ʻo e Laumālie Māʻoniʻoní” (“There Are Many Gifts,” Ensign, Nov. 1987, 20).
1 Kolinitō 12:7. ʻE founga fēfē haʻaku ʻilo e meʻafoaki fakalaumālié ʻoku ou maʻú?
Naʻe akoʻi ʻe ʻEletā Lōpeti D. Heili ʻo e Kōlomu ʻo e Kau ʻAposetolo ʻe Toko Hongofulu Mā Uá e founga ʻe lava ke tau ʻilo ai e ngaahi meʻafoaki fakalaumālie kuo foaki mai kiate kitautolú:
“Kuo pau ke tau lotu mo ʻaukai ke ʻilo e ngaahi meʻafoaki kuo foaki mai maʻatautolú. ʻOku faʻa fakahā mai kiate kitautolu ʻe he ngaahi tāpuaki fakapeteliaké e ngaahi meʻafoaki kuo tau maʻú mo fakahā mai e ngaahi talaʻofa ʻo e ngaahi meʻafoaki ʻe lava ke tau maʻu kapau te tau fekumi kiate ai. ʻOku ou poupou atu kiate kimoutolu ke mou takitaha feinga ke ʻilo ʻa hoʻomou ngaahi meʻafoakí pea fekumi kiate kinautolu te nau ʻoatu ha fakahinohino ʻi hoʻo moʻuí pea te ne ʻunuaki ki muʻa ʻa e ngāue ʻa e langí” (“Gifts of the Spirit,” Ensign, Feb. 2002, 16).
1 Kolinitō 12:22. “Ko e ngaahi kupu ko ia ʻo e sinó, ʻa ia ʻoku matamata vaivaí, ʻoku lahi hake hono ʻaongá”
Naʻe akoʻi ʻe Palesiteni Tieta F. ʻUkitofa ʻo e Kau Palesitenisī ʻUluakí ʻo pehē:
“Mahalo te ke ongoʻi ʻoku ʻi ai ha niʻihi ia te nau mei malava ange ʻe kinautolu ʻo fakahoko pea nau taukei ange ke fua ho ngaahi fatongiá, ʻo lelei ange ia ʻiate koe, ka naʻe ʻi ai hono ʻuhinga ne ʻoatu ai ʻe he ʻEikí ho ngaahi fatongiá. Mahalo ʻoku ʻi ai ha kakai mo ha ngaahi loto, ko koe tokotaha pē te ke lava ʻo tokoniʻi mo tākiekiná. Mahalo he ʻikai toe lava ʻe ha taha kehe ia ʻo fakahoko tatau ia mo koe” (“Hikiʻi Hake ʻa e Feituʻu ʻOkú ke Tuʻu Aí” Ensign pe Liahona, Mē 2008, 56).