Sēmisi 2–1 Pita 5 (ʻIuniti 29)

Nāunau ʻOku Teuteu maʻá e Faiako Ako ʻi ʻApí

Fakanounou ʻo e Lēsoni Ako ʻi ʻApi Fakaʻahó

ʻOku ʻikai fakataumuʻa ʻa e fakamatala fakanounou ia ʻo e ngaahi meʻa naʻe hokó, tokāteliné, mo e ngaahi tefitoʻi moʻoni naʻe ako ʻe hoʻo kau akó ʻi heʻenau ako ʻa e Sēmisi 2– 1 Pita 5 (ʻiuniti 29) ke akoʻi ko ha konga hoʻo lēsoní. ʻOku nofotaha e lēsoni ʻokú ke akoʻí ʻi he niʻihi pē ʻo e ngaahi tokāteline mo e tefitoʻi moʻoni ko ʻení. Muimui ki he ngaahi ueʻi ʻa e Laumālie Māʻoniʻoní ʻi hoʻo fakakaukauʻi e ngaahi fie maʻu hoʻo kau akó.

ʻAho 1 (Sēmisi 2–3)

Naʻe ako ʻe he kau akó mei he ngaahi akonaki ʻa Sēmisi ʻi he ngaahi vahe ko ʻení, naʻe ʻofa e kau ākonga faivelenga ʻa Sīsū Kalaisí ʻʻi he kakai kotoa pē neongo honau ngaahi tūkungá pea kapau te tau fai ha angahala ʻe taha, te tau halaia ʻi he ʻao ʻo e ʻOtuá. Naʻa nau toe ʻilo foki ʻoku fakahaaʻi ʻe heʻetau ngaahi ngāue māʻoniʻoní ʻa e tui moʻoni kia Sīsū Kalaisí. Naʻe ʻilo ʻe he kau akó ʻi heʻenau ako e ngaahi akonaki ʻa Sēmisi kau ki hono mapuleʻi ʻetau ngaahi leá, ʻoku maʻu ʻe he mapuleʻi ʻo e meʻa ʻoku tau lea ʻakí ha mālohi lahi ki heʻetau moʻuí pea ʻoku feinga e kau muimui ʻa e ʻOtuá ke fakaʻaongaʻi ʻenau leá ki ha ngaahi taumuʻa māʻoniʻoni, kae ʻikai ko hono fakamafola atu e koví.

ʻAho 2 (Sēmisi 4–5)

Naʻe ako ʻe he kau akó ʻi heʻenau ako e ngaahi vahe ko ʻeni ʻia Sēmisí ʻa e ngaahi moʻoni ko ʻení: ʻI heʻetau ʻunuʻunu ke ofi ki he ʻOtuá, te Ne ʻunuʻunu ke ofi mai kiate kitautolu. Kapau ʻoku tau ʻilo e fili ʻoku leleí kae ʻikai ke tau fili ki ai, ʻoku tau fai angahala. ʻE lava ke fakamoʻui ʻa e mahakí ʻo fakafou he lotu ʻi he tuí mo e mālohi ʻo e lakanga fakataulaʻeikí.

ʻAho 3 (1 Pita 1–2)

Naʻe ʻilo ʻe he kau akó ʻa e ngaahi moʻoni ko ʻení ʻi heʻenau ako e ngaahi akonaki ʻa Pitá: Neongo ʻoku tau aʻusia ʻa e ngaahi ʻahiʻahí, ʻe lava ke tau fiefia ʻi he Fakalelei ʻa Sīsū Kalaisí pea ʻi he ngaahi tāpuaki kuo talaʻofa ʻe he ʻOtuá ke foaki mai kiate kitautolú. ʻOku ʻahiʻahiʻi pea siviʻi ʻetau tui kia Sīsū Kalaisí ʻi heʻetau kātakiʻi e ngaahi faingataʻá ʻi he faivelenga. ʻOku huhuʻi kitautolu ʻi he taʻataʻa ʻo Sīsū Kalaisí. Koeʻuhí naʻe moʻui taʻeangahala ʻa Sīsū Kalaisi, te Ne lava ʻo foaki Ia ko ha feilaulau haohaoa maʻatautolu. Naʻe tomuʻa fakanofo ʻa Sīsū Kalaisi ke hoko ko hotau Huhuʻí. ʻOku ui ʻe he ʻOtuá Hono Kāingalotú ke nau mavahe pea fakamakehekeheʻi kinautolu mei he māmaní koeʻuhí ke lava e niʻihi kehé ʻo mamata ki heʻenau sīpingá pea fakalāngilangiʻi Ia. ʻE lava ke tau muimui he sīpinga ʻa e Fakamoʻuí ʻi hono kātakiʻi e ngaahi ʻahíʻahí ʻi he faʻa kātaki.

ʻAho 4 (1 Pita 3–5)

Naʻe ako ʻe he kau akó mei he fakalotolahi ʻa Pita ki he Kāingalotu ʻo hono kuongá, ʻI heʻetau hoko ko e kau muimui ʻo Sīsū Kalaisí, ʻoku totonu ke tau feinga ke tau mateuteu maʻu pē ke vahevahe mo taukaveʻi ʻetau tui fakalotú ʻi he angamalū mo loto-ʻapasia. Naʻe ʻilo foki ʻe he kau akó ʻoku malangaʻi ʻa e ongoongoleleí ki he kakai kuo pekiá koeʻuhí ke nau maʻu ʻa e ngaahi faingamālie tatau mo kinautolu kuo fanongo ki he ongoongoleleí ʻi he moʻui fakamatelié. Naʻe akoʻi ʻe Pita e kau taki ʻo e Siasí ke nau fatongia ʻaki hono tokangaʻi e kāingalotu ʻa e ʻOtuá ʻi he ʻofa pea mo e sīpinga.

Talateú

Naʻe fakamahinoʻi ʻe he ʻAposetolo ko Sēmisi ha fetaʻemahinoʻaki ʻi he lotolotonga ʻo e Kāingalotú fekauʻaki mo e ʻuhinga ʻo e tui moʻoní. Naʻá ne akoʻi foki e vā fetuʻutaki ʻi he vahaʻa ʻo e tuí mo e ngāué.

Ngaahi Fokotuʻu ki hono Akoʻí

Sēmisi 2:14–26

Ko e akoʻi ʻe Sēmisi e fatongia ʻo e tuí mo e ngāué ʻi hotau fakamoʻuí

Fakaafeʻi e kau akó ke fakakaukau kuo ʻiloʻi ʻe ha talavou kuó ne faiangahala. ʻOkú ne tui ki he Fakalelei ʻa Sīsū Kalaisí pea mo e malava ʻa e Fakamoʻuí ke fakahaofi iá. ʻOkú ne pehē ko e meʻa pē te ne faí ko e tui pea ʻe fakamolemoleʻi ia ʻe he ʻEikí, taʻe-toe ʻi ai ha ngāue kehe ke ne fai.

Kole ki he kau akó ke fakakaukau pe ʻoku feʻunga nai e tui ʻa e talavoú ni ke fakamolemoleʻi ai ʻene ngaahi angahalá.

Fakaafeʻi ha tokotaha ako ke lau leʻolahi ʻa e Sēmisi 2:14. Kole ki he kalasí ke muimui ki ai, ʻo kumi e meʻa naʻe fehuʻi ʻe Sēmisi ki he Kāingalotú fekauʻaki mo e tuí.

Ko e hā naʻe fehuʻi ʻe Sēmisi ki he Kāingalotú fekauʻaki mo e tuí?
ʻOkú ke pehē ko e hā e faʻahinga ngāue naʻe ʻuhinga ki ai ʻa Sēmisí?

Fakamanatu ki he kau akó ʻi heʻenau ako ʻa e lēsoní ʻi he Sēmisi 2 ne nau ʻilo ai naʻe fakatonutonu ʻe he ʻAposetolo ko Sēmisí ha fakakaukau hala fekauʻaki mo e tuí. Naʻe ʻi ai ha kakai ʻe niʻihi ne nau maʻu hala ko e tuí ko ha fakahā ngutu pē ʻo e tuí. ʻI he tūkunga ʻo e Sēmisi 2:14, naʻe kehe hono fakaʻaongaʻi ʻe Sēmisi e foʻi lea ngāué mei hono fakaʻaongaʻi ʻe he ʻAposetolo ko Paulá. ʻI hono fakaʻaongaʻi ʻe Paula e foʻi leangaahi ngāué, naʻá ne ʻuhinga ki he ngaahi ngāue ʻo e fono ʻa Mōsesé. ʻI hono fakaʻaongaʻi ʻe Sēmisi e lea ngaahi ngāué, naʻá ne ʻuhinga ki he ngaahi ngāue mateakí pe ngaahi ngāue ʻo e māʻoniʻoní.

Fakamatalaʻi ange naʻe fakaʻaongaʻi ʻe Sēmisi ha talanoa fakatātā ke tali ʻene fehuʻi ʻi he veesi 14.

Fakaafeʻi ha ongo tamaiki ako ke na haʻu ki muʻa. Kole ki ha taha ʻo e ongo tamaiki akó ke hoko ko ha tokotaha kolekole ʻoku kole ha meʻakai, vala, mo e maluʻi ʻokú ne fie maʻu ke moʻui aí. Fakaafeʻi e tokotaha ako ʻe tahá ke hoko ko ha tokotaha ʻe lava ʻo tokoni ki he tokotaha kolekolé. Fakaafeʻi ha tokotaha ako hono tolú ke lau leʻolahi ʻa e Sēmisi 2:15–16 lolotonga hono fakatātaaʻi ʻe he ongo tamaiki ako kehé e meʻa ʻoku fakamatalaʻi ʻi he ngaahi veesi ko ʻení.

Ko e hā ʻoku fehalaaki ʻi he tali naʻe ʻoange ki he tokotaha kolekolé?
ʻE feʻunga nai e tali ʻa e tokotaha ako ʻe tahá ke tokoniʻi e tokotaha kolekolé?

Fakaafeʻi e kalasí ke lau leʻolahi fakataha ʻa e Sēmisi 2:17–18, ʻo kumi e meʻa naʻe akoʻi ʻe Sēmisi fekauʻaki mo e tuí. Fakamanatu ange kiate kinautolu ko ha veesi fakataukei folofola ʻa e Sēmisi 2:17–18.

ʻOkú ke pehē ʻoku ʻuhinga ki he hā ʻa e kupuʻi lea “ ʻoku pehē foki ʻa e tuí, kapau ʻoku ʻikai ʻi ai ʻa e ngaahi ngāué, ʻoku mate ia, pea ʻoku tuʻu taha pē ia” (veesi 17)?
ʻOku tokoni fēfē ʻa e talanoa fakatātā ʻa Sēmisi ʻo e tokotaha kolekolé ke mahino kiate kitautolu e ʻuhinga ʻo e kupuʻi leá ni?
Fakatatau ki he veesi 17, ko e hā e foʻi moʻoni naʻe akoʻi ʻe Sēmisi fekauʻaki mo e tui moʻoni kia Sīsū Kalaisí? (ʻE ala fakaʻaongaʻi ʻe he kau akó ha ngaahi lea kehe ka ʻoku totonu ke nau ʻiloʻi ha foʻi moʻoni hangē ko ʻení: ʻOku fakahaaʻi ʻa e tui moʻoni kia Sīsū Kalaisí ʻe heʻetau ngaahi ngāue māʻoniʻoní. Tohi ʻa e moʻoni ko ʻení ʻi he palakipoé.)

Fakaafeʻi ha tokotaha ako ke lau leʻolahi ʻa e Sēmisi 2:19–20. Fakamatalaʻi ange ʻoku fakamahinoʻi mai ʻe he Liliu ʻa Siosefa Sāmitá ʻo e veesi 16: “Ko ia, ngata mei heni ʻoku ʻikai te mau moʻui ʻo fakatatau ki he kakanó; ʻio, neongo naʻa mau moʻui ʻi muʻa ʻo fakatatau ki he kakanó, ka ʻi he hili ʻemau ʻilo ʻa Kalaisí, pea ngata mei heni ʻo fai atu ʻoku ʻikai te mau kei moʻui ʻo fakatatau ki he kakanó. ). Kole ki he kalasí ke muimui ki ai, ʻo kumi e sīpinga naʻe fakaʻaongaʻi ʻe Sēmisi ke fakahaaʻi ʻoku ʻikai kau ʻi he tui ki he ʻOtuá hono maʻu ha tui ki he ʻOtuá.

Ko e hā e sīpinga naʻe fakaʻaongaʻi ʻe Sēmisi ke fakahaaʻi ʻoku ʻikai kau ʻi he tui ki he ʻOtuá ʻa hono maʻu ha tui ki he ʻOtuá?

Fakaafeʻi ha tokotaha ako ke lau ʻa e lea ko ʻeni naʻe fai ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá:

“ʻOku fakataumuʻa ʻa e tui moʻoní ki he ʻEiki ko Sīsū Kalaisí pea ʻoku iku maʻu pē ia ki he ngāue māʻoniʻoní … ʻOku ʻikai ko e tui ki he Fakamoʻuí ʻa e ngāue ʻataʻataá pē, ka ko e ngāue ʻo fakatatau mo e ngaahi tefitoʻi moʻoni totonú, ko e ʻēlito ia ʻo e tuí. Ko ia, ‘ko e tui taʻe ngāué ʻoku mate ia’ (Sēmisi 2:20)” (“Kole ʻi he Tui,” Ensign pe Liahona, Mē 2008, 95).

Fakatatau kia ʻEletā Petinā, ko e hā e ʻēlito ʻo e tuí”?
Ko e hā ʻoku mahuʻinga ai ke ʻilo ko e tui kia Sīsū Kalaisí ʻa e tui kiate Ia mo e ngāue ʻo fakatatau ki he ngaahi tefitoʻi moʻoni totonú?

Fakamanatu ange ki he kau akó ʻa e talavou ʻi he talanoa fakatātā he kamataʻanga ʻo e lēsoní.

ʻE tokoni fēfē hono maʻu ha mahino ʻoku kau ʻi he tuí ʻa e tuí mo e ngāué fakatouʻosi, ki ha taha ʻoku fekumi ki ha fakamolemole ʻo ʻene ngaahi angahalá?

Fakamatalaʻi fakanounou ʻa e Sēmisi 2:21–26 ʻaki hono fakamatalaʻi ange naʻe ui ʻe Sēmisi ʻa ʻĒpalahame mo Lēhapi ko ha ongo sīpinga ʻo e kakai naʻe hāsino ʻenau tui kia Sīsū Kalaisí ʻi heʻenau ngaahi ngāué. (ʻOku maʻu ʻa e talanoa ʻo e fefine loto-toʻa ko Lēhapí ʻi he Sosiua 2:1–22.)

Fakaafeʻi e kau akó ke fakaʻaongaʻi ʻenau pepa ki he kalasí pe tohinoa ako folofolá ke tohi fekauʻaki mo ha taimi ne nau fakahaaʻi ai ʻenau tui kia Sīsū Kalaisí ʻi heʻenau ngaahi ngāué mo e founga ne tāpuekina ai kinautolu ʻi hono fai iá. Poupouʻi e kau akó ke fakakau ai ʻenau fakamoʻoni ki he Fakamoʻuí pea mo e founga te nau fakahaaʻi ai e tui ko iá ʻi heʻenau ngaahi ngāué. Kole ki ha kau ako tokosiʻi ke vahevahe e meʻa ne nau tohí mo e kalasí.

Fakaafeʻi e kau akó ke fakakaukau ʻi he faʻa lotu ki he founga te nau lava ʻo ngāue ʻaki kakato ange ai ʻenau tui kia Sīsū Kalaisí ʻi he talangofua kiate Iá. Poupouʻi kinautolu ke muimui ki ha faʻahinga ueʻi pē ʻoku nau maʻu.

ʻIuniti Hoko (2 Pita–Sute)

Fehuʻi ki he kau akó e ʻuhinga ʻoku nau pehē ai ʻoku fili e kakaí ke faiangahala neongo ʻoku nau ʻilo ʻoku hala. Fakaafeʻi kinautolu ke kumi e ngaahi moʻoni ʻi heʻenau ako ʻa e 2 Pita ki he Sute ʻi he uike ka hoko maí, ʻe lava ʻo tokoni ke nau tali e ngaahi fehuʻi ko ʻení: ʻE lava fēfē ke tau fakaʻehiʻehi mei hano kākaaʻi kitautolu ʻe he tokāteline halá? Ko e hā naʻe pehē ʻe Sione te ne tekeʻi ki tuʻa ʻa e manavaheé? Ko e hā e founga ʻoku totonu ke tau fakahaaʻi ʻaki ʻetau ʻofa ki he ʻOtuá? Ko e hā e ngaahi ʻulungaanga faka-ʻOtua kuo pau ke tau fakatupulaki ke maʻu ʻa e moʻui taʻengatá? Ko e hā e fakatokanga naʻe fai mai fekauʻaki mo kinautolu ʻoku tau fili ke tau feohí?