Lēsoni 39
Maʻake 9:1–29
Talateú
Naʻe liliu ʻa Sīsū ʻi he ʻao ʻo Pita, Sēmisi, mo Sioné. Naʻá Ne akoʻi leva kinautolu fekauʻaki mo e fatongia ʻo Sione Papitaisó ko ha [ʻIlaiase] ʻa ia naʻá ne teuteu ʻa e halá ki he Mīsaiá. Hili e foki ʻa Sīsū ki Heʻene kau ākonga kehé, naʻe kole ange ʻe ha tangata ke Ne kapusi ki tuʻa ha laumālie ʻuli mei hono fohá. Naʻe kapusi ʻe Sīsū ʻa e laumālie ʻulí ki tuʻa pea akoʻi ʻEne kau ākongá fekauʻaki mo e fie maʻu ke lotu mo ʻaukaí.
Ngaahi Fokotuʻu ki hono Akoʻí
Maʻake 9:1–13
Ko hono liliu ʻa Sīsū ʻi he ʻao ʻo Pita, Sēmisi, mo Sioné pea akoʻi fekauʻaki mo [ʻIlaiase]
Fakaafeʻi ha kau fie tokoni ke haʻu ki muʻa ʻi he kalasí pea fakaʻaliʻali nounou ha ʻekitivitī ʻokú ne fakalahi ʻa e mālohi fakatuʻasinó.
-
Ko e hā ka fie maʻu ai ʻe ha taha ke fakalahi hono mālohi fakatuʻasinó?
-
ʻE lava fēfē ʻa e mālohi fakatuʻasinó ʻo fakatatau ki he mālohi fakalaumālié, pe ko e tui kia Sīsū Kalaisí?
-
Ko e hā ha ngaahi tūkunga ʻe lava ke ʻahiʻahiʻi ai ʻetau tui kia Sīsū Kalaisí pea fie maʻu makehe ke fakamālohia? (Hiki e tali ʻa e kau akó ʻi he palakipoé.)
Fakaafeʻi e kau akó ʻi heʻenau ako e Maʻake 9:1–29 ke kumi ʻa e ngaahi moʻoni ʻe tokoni ke fakamālohia ʻenau tui kia Sīsū Kalaisí.
Fakamatalaʻi fakanounou e Maʻake 9:1–13 ʻaki hano fakamatalaʻi ange ʻoku ʻi ai ha fakamatala ʻo e liliu ʻa Sīsū ʻi he ʻao ʻo Pita, Sēmisi, mo Sioné ʻi he Moʻunga ʻo e Liliú. ʻOku fakamatala foki ʻa e potufolofola ko ʻení naʻe akoʻi ʻe Sīsū e Kau ʻAposetolo ko ʻení kuo fakahoko ʻe Sione Papitaiso ʻa e fatongia ʻo ha [ʻIlaiase] naʻe kikiteʻí, pe ko e tokotaha ʻokú ne teuteu ʻa e hala ki he hāʻele mai ʻa e Fakamoʻuí (vakai, Joseph Smith Translation, Mark 9:10).
Maʻake 9:14–29
Ko e kapusi ʻe Sīsū ha laumālie ʻuli mei he foha ʻo ha tangata
Fakaafeʻi ha tokotaha ako ke lau leʻolahi e Maʻake 9:14–15. Kole ki he kalasí ke muimuiʻi hono laú, ʻo kumi e meʻa naʻe fetaulaki mo e Fakamoʻuí ʻi Heʻene foki mai mei he moʻungá ki Heʻene kau ākonga kehé. Kole ki he kau akó ke lipooti e meʻa ʻoku nau maʻú.
Fakaafeʻi ha tokotaha ako ke lau e ngaahi lea ʻa e Fakamoʻuí pea mo ha tokotaha ako ʻe taha ke lau ʻa e ngaahi lea ʻa e tamaí ʻi he fakamatala hoko ʻi he Maʻake 9:16–24 (mahalo te ke vahe ʻa e ngaahi konga ko ʻení kimuʻa e kalasí pea fakaafeʻi e kau ako ko ʻení ke kumi ʻenau ngaahi lainé). Fakakaukau ke fakahoko e fatongia ʻo e tokotaha fakamatalá pe ko hono fakaafeʻi ha tokotaha ako hono tolu ke fai ia. Kole ki he kau ako kuo vahé ke lau leʻolahi ʻenau kongá ʻi he Maʻake 9:16–18. Kole ki he kalasí ke muimuiʻi hono laú, ʻo kumi e meʻa naʻe fekumi ki ai e tamaí mei he kau ākonga ʻa e Fakamoʻuí.
-
Ko e hā naʻe fekumi ki ai e tamai ko ʻení maʻa hono fohá? (Mahalo ʻe fie maʻu ke ke fakamatalaʻi ange naʻe uluisino ha laumālie ʻuli ʻi he fohá, ʻo tupu ai ʻene noa, tuli [vakai, Maʻake 9:17, 25], mo e ngaahi palopalema kehe. Ko e taimi kotoa pē ʻe maʻu ai ʻe he laumālie ʻulí ʻa e fohá, ʻe tete ʻa e fohá, koa e ngutú, fengaiʻitaki hono nifó, pea fakafefeka.)
Kole ki he kau akó ke fakakaukauloto ko kinautolu ʻa e tamai ko ʻení pea ke fakalaulauloto ki he founga naʻe mei uesia ai ʻenau tui ki he Fakamoʻuí mo Hono mālohí ʻi he ʻikai lava e kau ākongá ʻo fakamoʻui honau fohá.
Fakaafeʻi e kau ako ne vahé ke hokohoko atu hono lau leʻolahi ʻenau ngaahi kongá ʻi he Maʻake 9:19–22. Kole ki he kalasí ke muimuiʻi hono laú, ʻo fakakaukauloto ki he anga e ongoʻi ʻa e tamai ko ʻení ʻi heʻene fetalanoaʻaki mo e Fakamoʻuí.
-
ʻOkú ke pehē ko e hā naʻe ongoʻi ʻe he tamai ko ʻení ʻi heʻene fetalanoaʻaki mo e Fakamoʻuí?
Fakaafeʻi ha tokotaha ako ke lau leʻolahi ʻa e lea ko ʻeni naʻe fai ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá. Kole ki he kalasí ke fakafanongo ki he meʻa ʻoku tānaki mai ʻe ʻEletā Hōlani ke mahino kiate kitautolu e ngaahi ongo mo e tautapa ʻa e tamai ko ʻení.
“ʻI he ʻikai ha toe ʻamanakí, ʻoku fakahaaʻi ʻe he tamaí ni ʻa e tui ʻokú ne maʻú pea kole ai ki he Fakamoʻui ʻo e māmaní, ‘Kapau te ke faʻa fai ha meʻa, ke ke ʻaloʻofa kiate kimautolu, ʻo tokoniʻi ʻa kimautolu’ [Maʻake 9:22; tānaki atu e mataʻitohi fakahihifí]. ʻOku ʻikai ke u faʻa lava ʻo lau ʻeni taʻe-tangi. ʻOku ʻi ai ha ʻuhinga pau ki hono fakaʻaongaʻi ʻo e tuʻunga tokolahi ʻo e taki-nauna kimautolú. Ko hono moʻoní ʻoku pehē ʻe he tangatá: ʻʻOku kole homau fāmilí kotoa. ʻOku ʻikai toe ngata ʻemau faingataʻaʻiá. Kuo mau ongosia. Kuo tō homa fohá ki he vaí. ʻOkú ne tō ki he afí. ʻOkú ne ʻi ha tuʻunga fakatuʻutāmaki maʻu pē, pea ʻoku mau tailiili maʻu pē. ʻOku ʻikai te mau toe ʻilo pe ko e hā e meʻa ʻe faí. Te ke lava nai ʻo tokoniʻi kimautolu? Te mau houngaʻia ʻi ha meʻa pē— ha konga pē ʻo ha tāpuaki, ha kihiʻi ʻamanaki, ke kiʻi fakamaʻamaʻa pē kavenga ʻoku fuesia ʻe he faʻē ʻa e tamasiʻí ni he ʻaho kotoa ʻene moʻuí’” (“ʻEiki, ʻOku ou Tui,” Ensign pe Liahona, Mē 2013, 93).
Fakaafeʻi ʻa e tokotaha ako naʻe vahe ki ai e konga ʻo e Fakamoʻuí ke lau leʻolahi e Maʻake 9:23. Kole ange ki he kalasí ke muimuiʻi hono laú, ʻo kumi e meʻa naʻe akoʻi ʻe he Fakamoʻuí ki he tamai ko ʻení.
-
Ko hai naʻe fie maʻu ke tui ki ai e tamai ko ʻení?
-
Ko e hā e tefitoʻi moʻoni naʻe akoʻi ʻe he Fakamoʻuí ki he tamai ko ʻení? (Mahalo ʻe fakaʻaongaʻi ʻe he kau akó ha ngaahi lea kehekehe, kae fakapapauʻi ʻoku nau ʻilo ʻa e foʻi moʻoni ko ʻení: Kapau ʻoku tau tui kia Sīsū Kalaisi, te tau malava ʻa e ngaahi meʻa kotoa pē. Mahalo te ke fie fokotuʻu ange ke fakaʻilongaʻi ʻe he kau akó ʻa e ngaahi lea ʻi he veesi 23 ʻokú ne akoʻi ʻa e tefitoʻi moʻoni ko ʻení.)
Fakamahinoʻi ange ʻoku fekauʻaki ʻa e “ngaahi meʻa kotoa pē” ki he ngaahi tāpuaki ʻoku fenāpasi mo e finangalo, ngaahi taumuʻa, mo e taimi ʻa e ʻOtuá.
-
ʻE tokoni fēfē ʻa e tui ki he tefitoʻi moʻoni ko ʻení ki ha taha ʻoku fehangahangai mo ha ngaahi faingataʻa ʻoku ngali taʻemalava ke ikunaʻi?
Fakaafeʻi e tokotaha ako ne vahe ki ai e konga ʻo e tamaí ke lau leʻolahi e Maʻake 9:24. Kole ki he kalasí ke muimuiʻi hono laú, ʻo kumi e tali ʻa e tamaí ki he tefitoʻi moʻoni naʻe akoʻi ʻe he Fakamoʻuí.
-
Te ke fakamatalaʻi fēfē ʻa e tui ʻa e tamai ko ʻení ʻi he momeniti ko iá?
Kole ki he kau akó ke fakaʻilongaʻi ʻa e konga ʻe ua ʻo e tali ʻa e tamai ko ʻení. Fakaafeʻi ha tokotaha ako ke lau leʻolahi ʻa e fakamatala ko ʻeni naʻe fai ʻe ʻEletā Sefilī R. Hōlani. Kole ki he kalasí ke fakafanongo ki he meʻa ʻoku fakahaaʻi mai ʻe he fakamatala ʻa e tamaí fekauʻaki mo e meʻa te tau lava ʻo fai ʻi he taimi ʻo e “taʻetuí”, pe veiveiuá pe manavaheé.
“Ko e taimi naʻe fehangahangai ai mo e pole ʻo e tuí, naʻe ʻuluaki fakamamafaʻi ʻe he tamaí hono mālohí hili ia peá ne toki tali e fakangatangata pē meʻa ʻokú ne lavá. ʻOku pau pea ʻikai momou ʻene ʻuluaki leá: ʻʻEiki, ʻoku ou tui.’ Te u pehē ki he taha kotoa ʻoku fie maʻu ha tui lahi angé, manatuʻi e tangata ko ʻení! ʻI he momeniti ʻo e ilifiá, veiveiuá pe taimi faingataʻá, tuʻu maʻu he tui kuó ke ʻosi maʻú, tatau ai pē kapau ko e tui ko iá ʻoku siʻisiʻi. ʻI he tupulaki ko ia kuo pau ke tau foua kotoa ʻi he moʻui fakamatelié, kuo pau ke tau foua ha meʻa ʻoku tatau fakalaumālie mo e faingataʻaʻia ʻa e kiʻi tamasiʻi ko ʻení pe ko e holiholi-vale ʻa e mātuʻa ko ʻení. ʻI he hoko mai ʻa e ngaahi taimi peheé pea hoko mo e palopalemá, pea ʻikai maʻu vave hano fakaleleiʻí, pīkitai ki he meʻa kuó ke ʻosi ʻiló pea tuʻu maʻu kae ʻoua kuo maʻu ha ʻilo lahi ange” (“ʻEiki, ʻOku ou Tui,” 93–94).
-
Ko e hā te tau lava ʻo ako mei he tamai ko ʻení fekauʻaki mo e meʻa te tau lava ʻo fai ʻi he taimi ʻo e taʻetuí? (Hili e tali ʻa e kau akó, hiki ʻa e fakamatala taʻe kakato ko ʻení he palakipoé: Kapau te tau pikitai ki he meʻa ʻoku tau tui ki aí …)
-
Ko e hā te tau lava ʻo ako fekauʻaki mo e fehangahangai mo e taʻetuí mei he konga ʻe taha ʻo e lea ʻa e tamai ko ʻení ʻi he veesi 24? (Hili e tali ʻa e kau akó, tānaki atu ʻa e kupuʻi lea ko ʻení ki he fakamatala he palakipoé: pea fekumi ki he tokoni ʻa e ʻEikí, …)
Fakaafeʻi ha tokotaha ako ke lau leʻolahi e Maʻake 9:25–27. Kole ki he kalasí ke muimuiʻi hono laú, ʻo kumi e meʻa naʻe fai ʻe he Fakamoʻuí ko e tali ki he kole ʻa e tamaí.
-
Ko e hā naʻe fai ʻe he Fakamoʻuí ko e tali ki he kole ʻa e tamaí?
-
Te ke fakakakato fēfē ʻa e fakamatala ʻi he palakipoé, ʻo fakatefito ʻi he meʻa kuó ke ako mei he fakamatala ko ʻení? (Hili e tali ʻa e kau akó, fakakakato e sētesi he palakipoé ke ne fakahaaʻi ʻa e tefitoʻi moʻoni ko ʻení: Kapau te tau pīkitai ki he meʻa ʻoku tau tui ki aí, mo fekumi ki he tokoni ʻa e ʻEikí, te Ne tokoniʻi kitautolu ke fakamālohia ʻetau tuí.)
Vakai ki he ngaahi tūkunga ʻoku hiki he palakipoé, ʻa ia ne mou aleaʻi he kamataʻanga ʻo e lēsoní.
-
ʻE lava ke fakaʻaongaʻi fēfē e tefitoʻi moʻoni ko ʻení ʻi he ngaahi tūkunga peheé?
-
Ko e fē ha taimi kuó ke maʻu ai pe ko ha taha ʻokú ke ʻiloʻi, ʻa e tokoni ʻa e ʻEikí ʻi he pīkitai ki he tuí mo fekumi ki Heʻene tokoní ʻi ha taimi ʻo e taʻetuí? (Mahalo te ke fie vahevahe foki ha aʻusia.)
Poupouʻi e kau akó ke fakaʻaongaʻi ʻa e tefitoʻi moʻoni ko ʻení ʻi he taimi ʻo e taʻetuí.
Fakamanatu ange ki he kau akó ne ʻuluaki ʻomi ʻe he tamai ko ʻení hono fohá ki ha niʻihi ʻo e kau ākonga ʻa Sīsuú ke nau fakamoʻui. Fakaafeʻi e kau akó ke fakakaukauloto ko kinautolu ʻa e kau ākonga ko ʻení.
-
Ko e hā nai hoʻo fakakaukaú pe ongó hili ha ʻikai lava ke kapusi e laumālie ʻulí mei he kiʻi tamasiʻí?
Fakaafeʻi ha tokotaha ako ke lau leʻolahi e Maʻake 9:28, pea kole ki he kalasí ke kumi e fehuʻi naʻe fai ʻe he kau ākongá kia Sīsuú.
-
Ko e hā e fehuʻi naʻe fai ʻe he kau ākongá kia Sīsuú?
Kole ki he kau akó ke toe vakaiʻi e Maʻake 9:19, ʻo kumi e founga hono fakamatalaʻi ʻe he Fakamoʻuí e kakaí, kau ai ʻEne kau ākonga, naʻe ʻi aí. (Naʻa nau “taʻetui.”) Fakamatalaʻi ange ʻoku ʻuhinga ʻa e taʻetuí heni ki he siʻi ʻa e tui kia Sīsū Kalaisí. ʻOku fie maʻu ʻa e tui kia Sīsū Kalaisí kae lava ke ola lelei ʻa e ngaahi tāpuaki ʻo e lakanga fakataulaʻeikí.
Fakaafeʻi ha tokotaha ako ke lau leʻolahi e Maʻake 9:29. Kole ki he kalasí ke muimuiʻi hono laú, ʻo kumi e tali ʻa e ʻEikí ki he fehuʻi ʻEne kau ākongá.
-
Ko e hā naʻe akoʻi ʻe he Fakamoʻuí ki Heʻene kau ākongá?
-
ʻE lava fēfē ʻe he lotú mo e ʻaukaí ʻo tākiekina ha taha tui ʻa ha taha? (Hili e tali ʻa e kau akó, tokoni ke mahino kiate kinautolu ʻa e foʻi moʻoni ko ʻení: Te tau lava ʻo fakatupulaki ʻetau tui kia Sīsū Kalaisí ʻi he lotú mo e ʻaukaí.)
Fakaafeʻi ha tokotaha ako ke lau leʻolahi e lea ko ʻeni mei he kiʻi tohi Tuʻu Maʻu ʻi he Tuí: Kole ki he kalasí ke fakafanongo ki he ngaahi tūkunga kehekehe ʻe lava ke fakaʻaongaʻi ai e moʻoni ko ʻení:
“ʻOku akoʻi ʻe he fakamatalá ni [ʻo hono kapusi ʻe Sīsū ha laumālie ʻuli mei ha foha ʻo ha tangatá] ʻe lava ʻe he lotú mo e ʻaukaí ʻo tānaki mai ha ivi kiate kinautolu ʻoku nau fakahoko mo maʻu ʻa e ngaahi tāpuaki ʻi he lakanga fakataulaʻeikí. ʻE toe lava pē foki ʻo fakaʻaongaʻi ʻa e fakamatalá ni ki hoʻomou ngaahi feinga fakafoʻituitui ke moʻui ʻaki ʻa e ongoongoleleí. Kapau ʻoku ʻi ai haʻo vaivaiʻanga pe angahala ʻokú ke fāifeinga ke ikunaʻi, te ke lava ʻo ʻaukai mo lotu ke maʻu ʻa e tokoni pe fakamolemole ʻokú ke fie maʻú. Mahalo ko ho faingataʻaʻiá ko e faʻahinga ia ʻe toki mavahe pē ki tuʻa ʻi he lotú mo e ʻaukaí, ʻo hangē tofu pē ko e laumālie ʻuli ne kapusi ki tuʻa ʻe Kalaisí” (Tuʻu Maʻu ʻi he Tuí: Ko Ha Huluhulu ki he Ongoongoleleí [2004], 218–219).
-
Fakatatau ki he fakamatala ko ʻení, ko e hā ha ngaahi tūkunga ʻe lava ke fakaʻaongaʻi ai e moʻoni ko ʻení?
-
Ko e fē ha taimi kuo tokoni ai e lotú mo e ʻaukaí ke fakatupulaki hoʻo tui kia Kalaisí pea fakaʻatā ke ke maʻu e ngaahi tāpuaki māʻoniʻoni ʻokú ke fekumi ki aí?
Kole ki he kau akó ke fakakaukau ki he ngaahi tāpuaki ʻoku nau kumi maʻanautolu pe niʻihi kehé ʻe lava ke maʻu ʻi hono fakatupulaki ʻenau tui kia Sīsū Kalaisí ʻi he lotú mo e ʻaukaí. Fakaafeʻi kinautolu ke tohi hifo ha taumuʻa ke lotu mo ʻaukai maʻá e ngaahi tāpuaki ko ʻení ʻi he Sāpate ʻaukai hono hokó.
Fakamanatu ʻo e Fakataukei Folofolá
Fakakaukau ke tomuʻa vakaiʻi ha niʻihi ʻo e veesi fakataukei folofola ʻoku teʻeki ai maheni mo e kau akó. Fakaafeʻi kinautolu ke lau pea fakaʻilongaʻi kinautolu. Te ke lava ʻo vahe ha veesi fakataukei folofola foʻou ki he tokotaha ako takitaha pe kau ako tautau toko ua pea kole ange ke nau tā ʻi ha ʻū laʻipepa ha ngaahi fakatātā ʻokú ne fakahaaʻi e ngaahi moʻoni ne akoʻi ʻi heʻenau potufolofolá. Fakaafeʻi kinautolu ke fakamatalaʻi ʻenau ngaahi fakatātaá ki he kalasí. Te ke lava ʻo fakaʻaliʻali e ngaahi fakatātaá ki ha fie maʻu ʻi he kahaʻú.
(Fakatokangaʻi ange: Te ke lava ʻo fakaʻaongaʻi e ʻekitivitī ko ʻení ʻi he kamataʻanga pe fakaʻosinga ʻo ha faʻahinga lēsoni, ʻi he lahi ʻa e taimí.)
Ngaahi Fakamatala Fakamahino mo e Puipuituʻá
Maʻake 9:36–24. Ko e pīkitai ki he meʻa ʻoku tau tui ki aí mo kumi tokoni ke fakamālohia ʻetau tuí
Naʻe fai ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e faleʻi ko ʻení fekauʻaki mo hono fakamālohia ʻetau tuí:
“Ko e taimi ʻoku hoko ai e palopalemá pea mo e ngaahi fehuʻí, ʻoua ʻe kamata hoʻo feinga ki he tuí ʻaki haʻo fakalau ʻa e lahi ʻo e meʻa ʻoku ʻikai ke ke maʻú, ʻo hangē leva ia ʻokú ke kamata ʻaki hoʻo ʻtaʻe-tuí.’ … ʻOku ʻikai ko ʻeku kole atú ke mou fakangalingali ʻi ha tui ʻoku ʻikai ke mou maʻu. Ko ʻeku kole atú ke mou tuʻu maʻu he tui ʻoku mou ʻosi maʻú. ʻOku tau ʻai he taimi ʻe niʻihi ke hangē tokua ko hono fakahaaʻi moʻoni ʻo e veiveiuá ko hano fakahaaʻi māʻolunga ange ia ʻo e toʻa fakaʻulungāngá kae ʻikai ko hano fakahaaʻi totonu ʻo e tuí. ʻOku ʻikai! Ko ia, tau manatuʻi kotoa muʻa ʻa e pōpoaki mahino he fakamatala fakafolofola ko ʻení: Lea totonu ʻaki hoʻo ngaahi fehuʻí; ʻoku lahi fau ia ʻi he moʻuí ʻi ha ngaahi kaveinga kehekehe. Ka, kapau ʻokú ke loto mo ho fāmilí ke fakamoʻui kimoutolu, ʻoua naʻa tuku e veiveiua ko iá ke ne taʻofi hono fakahoko ʻe he tuí ʻa e maná. …
“… Ka hoko ʻa e veiveiuá pe faingataʻá, ʻoua naʻa manavasiʻi ke kole tokoni. Kapau ʻoku tau fie maʻu ia ʻi he loto fakatōkilalo mo moʻoni ʻo hangē ko e tamai ko ʻení, te tau lava ʻo maʻu ia. ʻOku fakamatalaʻi ʻe he folofolá ʻa e holi fakamātoato ko ʻení ko e ‘loto moʻoni,’ ʻaki ʻa e ‘loto fakamātoato moʻoni, ʻo ʻikai fai ʻi he mālualoi pe ha fakakākā ʻi he ʻao ʻo e ʻOtuá’ [2 Nīfai 31:13]. ʻOku ou fakamoʻoni ko e tali ki he faʻahinga kole peheé, ʻe ʻomi maʻu pē ʻe he ʻOtuá ha tokoni mei he ongo tafaʻaki ʻo e veilí ke fakamālohia ʻetau tuí” (“ʻEiki, ʻOku ou Tui,” Ensign pe Liahona, Mē 2013, 94).
Kapau ʻoku fefaʻuhi ha taha ʻo hoʻo kau akó mo e veiveiuá pe tailiili ʻoku tupu mei he ngaahi fehuʻi fekauʻaki mo e tokāteline pe hisitōlia ʻo e Siasi ʻo e Fakamoʻuí, te ke lava ʻo fakaafeʻi kinautolu ke nau ako e ngaahi meʻa ne hiki mei he peesi Gospel Topics ʻa e Siasí (vakai, lds.org/topics).
Maʻake 9:28–29. Ko e ʻaukai fakataha mo e lotú
Naʻe akoʻi ʻe ʻEletā Siosefa B. Uefilini ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e meʻá ni:
“ʻOku tau ako ʻi he ngaahi folofolá, ʻoku faʻa meimei fehokotaki maʻu pē ʻa e ʻaukaí mo e lotú. Ka ʻikai e lotú, ʻoku ʻikai kakato e ʻaukaí; ko ha taʻe kai pē ia. Kapau ʻoku tau fie maʻu ke mahulu hake ʻetau ʻaukaí ʻi he taʻekaí pē, kuo pau ke tau ʻohake hotau lotó, ʻatamaí, pea mo e leʻó ʻi he fehokotaki mo ʻetau Tamai Hēvaní. ʻOku mālohi ʻa e ʻaukai fakataha mo e lotu tāumaʻú” (“The Law of the Fast,” Ensign, May 2001, 73).
Ke maʻu ha fakahinohino lahi ange fekauʻaki mo hono fakatahaʻi e ʻaukaí mo e lotú, kau ai hono ola ʻi hono ʻomi e mālohi fakalaumālie lahi ange ki heʻetau moʻuí, vakai, Elder Carl B. Pratt, “The Blessings of a Proper Fast,” Ensign pe Liahona, Nov. 2004, 47–49.