Fakahā 12–22 (ʻIuniti 32)

Nāunau ʻOku Teuteu maʻá e Faiako Ako ʻi ʻApí

Fakamatala Fakanounou ʻo e Ngaahi Lēsoni Ako ʻi ʻApi Fakaʻahó

ʻOku ʻikai fakataumuʻa ʻa e fakamatala fakanounou ko ʻeni ʻo e ngaahi meʻa naʻe hokó, ngaahi tokāteliné mo e ngaahi tefitoʻi moʻoni naʻe ako ʻe he kau akó ʻi heʻenau ako e Fakahā 12–22 (ʻiuniti 31) ke akoʻi ko ha konga hoʻo lēsoní. ʻOku nofotaha e lēsoni ʻokú ke akoʻí ʻi he niʻihi pē ʻo e ngaahi tokāteline mo e tefitoʻi moʻoni ko ʻení. Muimui ki he ngaahi ueʻi ʻa e Laumālie Māʻoniʻoní ʻi hoʻo fakakaukauʻi e ngaahi fie maʻu hoʻo kau akó.

ʻAho 1 (Fakahā 12–13)

ʻI hono ako ʻe he kau akó e mata meʻa-hā-mai ʻa Sione ʻo e fuʻu talākoní mo e fefiné mo e tamasiʻí, naʻa nau ʻilo ai ʻoku feinga ʻa Sētane, naʻe fakafofongaʻi ʻe he talākoní, ke fakaʻauha ʻa e Siasí mo e puleʻanga ʻo e Tamai Hēvaní mo Sīsū Kalaisí. Naʻe kamata ʻa e tau ko ʻení ʻi he maama fakalaumālié. Naʻe ako ʻe he kau akó te tau lava ʻo ikunaʻi e ngaahi ivi tākiekina ʻo Sētané ʻi he Fakalelei ʻa e Fakamoʻuí pea ʻi he kei tuʻu maʻu ʻi heʻetau fakamoʻoni ki he ongoongoleleí.

ʻAho 2 (Fakahā 14–16)

Naʻe ako ʻe he kau akó mei he mata meʻa-hā-mai ʻa Sione ʻo e mamata ki ha ʻāngelo ʻoku foki mai ki he māmaní ʻi he ngaahi ʻaho kimui ní, ko e ʻuhinga ʻe taha naʻe fakafoki mai ai ʻe he ʻOtuá e ongoongolelei ʻo Sīsū Kalaisí ke teuteuʻi e kakai ʻo e māmaní ki he Hāʻele ʻAnga Ua Mai ʻa Sīsū Kalaisí. Naʻa nau toe ako foki e meʻá ni: Kapau te tau moʻui māʻoniʻoni, ʻe tāpuekina leva kitautolu ʻi heʻetau ngaahi ngāué pea mālōlō mei heʻetau ngaahi ngāué hili ʻetau maté. Kapau ʻoku tau tokanga mo mateuteu fakalaumālie, te tau mateuteu leva ki he Hāʻele ʻAnga Ua Mai ʻa Sīsū Kalaisí.

ʻAho 3 (Fakahā 17–19)

Naʻe ako ʻe he kau akó ʻe ikunaʻi ʻe Sīsū Kalaisi ʻi he ngaahi ʻaho fakaʻosí ʻa e faiangahala ʻa e māmaní. Naʻa nau toe ako foki ʻe lava ke tokoni hono fakamavaheʻi kitautolu mei he kovi ʻo e māmaní ke tau fakaʻehiʻehi mei he angahalá mo e ngaahi tautea ʻe hoko ki he kau faiangahalá ʻi he ngaahi ʻaho fakaʻosí. ʻI he fakafehoanaki ʻe he kau akó ʻa e nofo-malí ki he Hāʻele ʻAnga Ua Maí, naʻa nau ʻilo ai kapau ʻoku tau maʻa mo māʻoniʻoni, te tau mateuteu leva ki he hāʻele mai ʻa e ʻEiki ko Sīsū Kalaisí.

ʻAho 4 (Fakahā 20–22)

Naʻe ako ʻe he kau akó mei he ngaahi vahe fakaʻosi ʻo e mata meʻa-hā-mai ʻa Sioné ʻa e ngaahi moʻoni ko ʻení: ʻE fakamāuʻi kitautolu ʻe he ʻOtuá mei he ngaahi tohi ko ia kuo tohi ʻo fakatatau ki heʻetau ngaahi ngāué. ʻE nofo fakataha e ʻOtuá mo fakafiemālieʻi Hono kakaí, pea he ʻikai ke nau toe aʻusia e maté pe mamahí. Kapau ʻoku tau tauhi e ngaahi fekau ʻa e ʻEikí, te tau lava leva ʻo maʻu e ngaahi tāpuaki kotoa ʻo e Fakalelei ʻa Sīsū Kalaisí mo hū ki he puleʻanga fakasilesitialé.

Talateú

Naʻe mamata e ʻAposetolo ko Sioné ʻi ha mata meʻa-hā-mai ki he ngaahi meʻa ʻe hoko he taimi ko iá kimuʻa pea ʻi he lolotonga e pule ʻa Sīsū Kalaisi ʻi he nofotuʻí. Naʻá ne fakamoʻoniʻi foki ʻa e tau fakaʻosi ʻa Sētane mo e ngaahi mālohi ʻo e ʻOtuá ʻi he fakaʻosinga ʻo e Nofo Tuʻí pea mamata ki he Fakamaau Fakaʻosí, lolotonga ia ʻe fakamāuʻi ʻe he ʻOtuá e tokotaha kotoa pē mei he ngaahi tohi kuo tohí.

Ngaahi Fokotuʻu ki hono Akoʻí

Fakahā 20:1–6

Ko e mamata ʻa Sione ʻi ha mata meʻa-hā-mai ki he meʻa ʻe hoko he taimi pē ko iá kimuʻa pea lolotonga e nofotuʻi ʻa Sīsū Kalaisí

Kole ki he kau akó ke fakakaukau ki ha feʻauhi (hangē ko ha meʻa fakaʻaati pe fakasipoti) naʻa nau kau ai neongo naʻa nau tui te nau foʻi. Hili iá pea kole ange ke nau fakakaukau ki ha taimi naʻa nau kau ai ʻi ha feʻauhi naʻa nau tui ai te nau mālohi.

Ko e hā e founga ʻe ala liliu ai ʻe hoʻo ngaahi fie maʻu fekauʻaki mo e ola ʻo ha feʻauhi ʻa e founga hoʻo fakahoko ʻakí?
Ko e hā nai ʻe foʻi ai e kakaí ʻi heʻenau fakakaukau te nau foʻí? Ko e fē ha taimi naʻá ke fakakaukau ai te ke foʻi pea faifai peá ke ikuna?

Fakamatalaʻi ange ki he kau akó ʻi heʻenau ako e Fakahā 20 te nau ako lahi ange fekauʻaki mo e tau ʻi he vahaʻa ʻo e leleí mo e koví pea mo e ikuʻanga fakaʻosi ʻo e taú. Fakaafeʻi kinautolu ke kumi ha ngaahi moʻoni ʻi heʻenau ako e Fakahā 20 te ne lava ʻo fakaʻaiʻai kinautolu ke kei faivelenga ki he Fakamoʻuí lolotonga e tau ko ʻení.

Fakaafeʻi ha tokotaha ako ke lau leʻolahi e Fakahā 20:1–3. Kole ki he kalasí ke muimui ki ai, ʻo kumi e meʻa ʻe hoko kia Sētane lolotonga e Nofo Tuʻí.

Ko e hā ʻe hoko kia Sētane lolotonga e Nofo Tuʻí?
Fakatatau ki he veesi 3, ko e hā he ʻikai lava ʻe Sētane ke fai koeʻuhí ko hono haʻi iá?

Fakaafeʻi ha tokotaha ako ke lau leʻolahi e Fakahā 20:4–6. Kole ki he kalasí ke muimui ki ai, ʻo kumi pe ko hai naʻe mamata ki ai ʻa Sione ne fakamāuʻí.

Fakatatau ki he veesi 4, ko hai naʻe mamata ʻa Sione naʻe fakamāuʻí?
Ko e hā e totongi naʻe maʻu ʻe he kakai ko ʻení koeʻuhí ko ʻenau faivelengá?
Ko e hā te nau kau ai lolotonga e Nofo Tuʻí? (Ko e ʻUluaki Toetuʻú.)
Ko e hā e tefitoʻi moʻoni te tau lava ʻo ako mei he Fakahā 20:4–6 fekauʻaki mo e ngaahi tāpuaki te tau lava ʻo maʻu ʻo kapau ʻoku tau faivelenga kia Sīsū Kalaisi? (Mahalo ʻe fakaʻaongaʻi ʻe he kau akó ha ngaahi lea kehe ka ʻoku totonu ke ʻiloʻi ha tefitoʻi moʻoni tatau mo ʻení: Kapau ʻoku tau faivelenga kia Sīsū Kalaisi, te tau kau ʻi he ʻUluaki Toetuʻú pea pule mo Kalaisi lolotonga e Nofo Tuʻí.)

Fakamatalaʻi ange naʻe kamata e ʻUluaki Toetuʻú ʻaki e Toetuʻu ʻa Sīsū Kalaisí pea naʻe kau ai e kau māʻoniʻoni naʻe mate kimuʻa ʻi he Toetuʻu ʻa Kalaisí (vakai, Mōsaia 15:21–25; ʻAlamā 40:16–20). Ko e lahi taha ʻo e kau māʻoniʻoni naʻe mate hili e Toetuʻu ʻa Kalaisí te nau toetuʻu ʻi he fakafehokotaki mo e Hāʻele ʻAnga Ua Mai ʻa Sīsū Kalaisí (vakai, Bruce R. McConkie, Mormon Doctrine, 2nd ed. [1966], 639; James E. Talmage, The Articles of Faith, 12th ed. [1924], 385). Ko kinautolu ʻe tuʻu hake ʻi he ʻUluaki Toetuʻú ʻe kau ai e “kau palōfita kotoa pē, pea mo kinautolu kotoa pē naʻa nau tui ki heʻenau ngaahi leá” (Mōsaia 15:22), ko kinautolu kuo pekia ʻi he taʻeʻiló ʻo teʻeki ke “fakahā ʻa e fakamoʻuí kiate kinautolu” (Mōsaia 15:24; vakai foki, T&F 45:54), pea mo e fānau iiki kuo mate kimuʻa pea ʻekea meiate kinautolu ʻenau ngaahi ngāué (vakai, Mōsaia 15:25; Molonai 8:4–24). He ʻikai toetuʻu e kau faiangahalá mo e taʻe fakatomalá kae ʻoua kuo hokosia e Toetuʻu hono Uá, ʻa ia ʻe hoko ʻi he fakaʻosinga ʻo e Nofo Tuʻí (vakai, T&F 76:85).

Ko e hā e founga ʻe lava ke tokoni atu ai hono ʻiloʻi te ke lava ʻo kau ʻi he ʻUluaki Toetuʻú pea pule mo Sīsū Kalaisi lolotonga e Nofo Tuʻí, ke ke faivelenga he taimí ni ʻi he fepaki mo e koví?

Fakamoʻoni ange ko kinautolu ʻoku kei faivelengá te nau kau ʻi he ʻUluaki Toetuʻú pea pule mo e Fakamoʻuí lolotonga e Nofo Tuʻí.

Fakahā 20:7–11

Ko e mamata ʻa Sione ki he tau fakaʻosi ʻa Sētane mo e kau tau ʻa e ʻOtuá ʻi he fakaʻosinga ʻo e Nofo Tuʻí

Hiki e fakamatala taʻekakato ko ʻení ʻi he palakipoé: ʻI he fakaʻosinga ʻo e Nofo Tuʻí …

Fakaafeʻi ha tokotaha ako ke lau leʻolahi e Fakahā 20:7–10. Kole ki he kalasí ke muimui ki ai, ʻo kumi e ngaahi meʻa naʻe hoko ne fakamatalaʻi ʻe Sione ʻe hoko ʻi he fakaʻosinga ʻo e Nofo Tuʻí.

Fakaafeʻi ha kau ako tokosiʻi ke haʻu ki he palakipoé pea tohi e meʻa kuo nau maʻú. Pea ʻeke ange leva e ngaahi fehuʻi ko ʻení:

Ko e hā e ngaahi meʻa naʻe hoko ne fakamatalaʻi ʻe Sioné? (Fakamatalaʻi ange ʻoku ʻuhinga e ngaahi hingoa Koki mo e Mēkokí ʻi he veesi 8 ki he ngaahi mālohi ʻe fakaʻaongaʻi ʻe Sētane ʻi he fakaʻosinga ʻo e Nofo Tuʻí ke tauʻi fakaʻosi e kakaí ʻa e ʻEikí [vakai, T&F 88:110–114].)
Hili e tau ko ʻení, ko e hā ʻe hoko ki he tēvoló mo hono kau muimuí? (Hili e tali ʻa e kau akó, fakakakato e fakamatala ʻi he palakipoé koeʻuhí ke peheni: ʻI he fakaʻosinga ʻo e Nofo Tuʻí, ʻe ikunaʻi ʻe he kau tau ʻo e ʻOtuá ʻa Sētane mo hono kau muimuí.)
Ko e hā ʻoku mahuʻinga ai ke mahino kiate kitautolu ʻa e ola fakaʻosi ʻo e tau ʻi he vahaʻa ʻo e ʻOtuá mo Sētané?

Fakahā 20:12–15

Ko e mamata ʻa Sione ki he Fakamaau Fakaʻosí

Fakamatalaʻi ange ko ha konga ʻo e palani ʻa e fakamoʻui ʻo e Tamai Hēvaní, ʻe tuʻu ʻa e tokotaha kotoa pē kuo moʻui ʻi he māmaní ʻi he ʻao ʻo e ʻOtuá ke fakamāuʻi. Kole ki he kau akó ke fakakaukauloto pe ʻoku nau pehē ʻe fēfē ʻa e Fakamaau Fakaʻosí.

Ko e hā ʻokú ke fakaʻamu ke fakakaukau ki ai mo ongoʻi ʻi hoʻo tuʻu ʻi he ʻao ʻo e ʻOtuá ke fakamāuʻí?

Fakaafeʻi ha tokotaha ako ke lau leʻolahi e Fakahā 20:12–13. Kole ki he kalasí ke muimui ki ai, ʻo kumi e founga ʻe fakamāuʻi ai kitautolu ʻe he ʻOtuá.

Ko e hā e moʻoni te tau lava ʻo ako mei he veesi 12 fekauʻaki mo e founga ʻe fakamāuʻi ai kitautolú? (Mahalo ʻe fakaʻaongaʻi ʻe he kau akó ha ngaahi lea kehe ka ʻoku totonu ke ʻiloʻi ʻa e moʻoni ko ʻení: ʻE fakamāuʻi kitautolu ʻe he ʻOtuá mei he ngaahi tohi kuo tohi ʻo fakatatau ki heʻetau ngaahi ngāué.)
Ko e hā e ngaahi tohi naʻe mamata ki ai ʻa Sioné? (Ko e folofolá, ngaahi lekooti ʻa e Siasí ʻoku lekooti ai e ngaahi ouau fakamoʻuí pea mahalo mo e ngaahi ngāue kehe, mo e tohi ʻo e moʻuí [vakai, 2 Nīfai 29:10–11; T&F 128:6–7; Fakahinohino ki he Folofolá, “Tohi ʻo e moʻuí”].)
Ko e hā ha meʻa kehe kuó ke ako fekauʻaki mo e Fakamaau Fakaʻosí? (Fakatokangaʻi ange: Naʻe maʻu ʻe he kau akó ʻi he ʻIuniti 32: ʻAho 4, ngāue fika 3, ha ngaahi potufolofola kehe ne akoʻi fekauʻaki mo e Fakamaau Fakaʻosí.)

Fakamahinoʻi ange naʻe fakahā ʻe he ʻEikí ki he Palōfita ko Siosefa Sāmitá ʻoku ʻikai ngata pē ʻi heʻetau ngaahi ngāué, ʻe fakamāuʻi kitautolu ʻo fakatatau mo e ngaahi holi ʻa hotau lotó (vakai, T&F 137:9; vakai foki, ʻAlamā 41:3–5).

ʻOku tākiekina fēfē ʻe he ʻiloʻi ʻe fakamaauʻi kitautolu fakatatau ki he ngaahi holi ʻo hotau lotó e ngaahi meʻa ʻoku tau loto ke faí?

Fakamoʻoni ki he tokāteline ko ʻení mo e founga ʻokú ne tākiekina ai hoʻo ngaahi filí.

Fakaafeʻi ha tokotaha ako ke lau leʻolahi e Fakahā 22:14. Kole ki he kalasí ke muimui ki ai pea manatuʻi e tefitoʻi moʻoni ne nau ako mei he veesi ko ʻení ʻi heʻenau ako ʻi ʻapí.

Ko e hā e tefitoʻi moʻoni naʻá ke ako mei he veesi ko ʻení? (Kapau ʻoku tau tauhi e ngaahi fekau ʻa e ʻEikí, te tau lava leva ʻo maʻu e ngaahi tāpuaki kotoa ʻo e Fakalelei ʻa Sīsū Kalaisí mo hū ki he puleʻanga fakasilesitialé. Tohi ʻa e tefitoʻi moʻoni ko ʻení ʻi he palakipoé.)
Ko e hā ʻoku hoko ai ʻeni ko ha moʻoni ke fakaʻosi ʻaki ʻetau ako ʻo e Fuakava Foʻoú?

Fakakaukau ke fakaafeʻi e kau akó ke vahevahe ha niʻihi ʻo e ngaahi moʻoni kuó ne tākiekina kinautolu lolotonga ʻenau ako ʻo e Fuakava Foʻoú he taʻu ní. Fakaafeʻi ha taha ʻoku loto holi ke vahevahe ʻenau ngaahi fakamoʻoni ki he ngaahi moʻoni ko ʻení pea mo e faka-ʻOtua ʻa e ʻEiki ko Sīsū Kalaisí.

Poupouʻi e kau akó ke hokohoko atu hono ako fakaʻaho e folofolá. Kapau te nau toe toʻo e seminelí he taʻu hono hokó, pe kapau ʻoku nau teuteu ki he ngāue fakafaifekaú, fakaafeʻi kinautolu ke kamata hono lau e Tohi ʻa Molomoná he ʻaho ni.