2 Pita 2–3

Talateú

Naʻe fakatokanga ʻa Pita ʻoku tataki ʻe he kau palōfita mo e kau akonaki loí e kakaí ke nau hē. Naʻá ne kikiteʻi ʻe manukiʻi ʻe he kau faiangahalá ʻa e kau māʻoniʻoní ʻi he ngaahi ʻaho fakaʻosí, ʻi heʻenau tui ʻe foki mai ʻa Sīsū Kalaisí. Naʻe poupouʻi ʻe Pita e Kāingalotú ke teuteu faivelenga ki he Hāʻele ʻAnga Ua Mai ʻa e Fakamoʻuí.

Ngaahi Fokotuʻu ki hono Akoʻí

2 Pita 2

Ko e fakatokanga ʻa Pita fekauʻaki mo hono kākaaʻi ʻe he kau akonaki loí

Hiki ʻa e fehuʻi ko ʻení ʻi he palakipoé: Ko e hā ka fili ai e kakaí ke faiangahala neongo ʻenau ʻiloʻi ʻoku hala e meʻa ʻoku nau faí?

Fakaafeʻi e kau akó ke fakalaulauloto ki he fehuʻi ko ʻení, pea kole ange ki ha niʻihi ke lipooti ʻenau ngaahi talí.

Fakamatalaʻi ange ʻoku tau lau ʻi he 2 Pita 2 naʻe fakatokanga e ʻAposetolo ko Pitá ki he Kāingalotú fekauʻaki mo e kakai ʻoku feinga ke kākaaʻi kinautolú. Fakaafeʻi e kau akó ke kumi e ngaahi moʻoní ʻi heʻenau ako ʻa e 2 Pita 2 ʻe lava ʻo tokoni ke nau ʻilo mo fakaʻehiʻehí mei he ngaahi kākā ʻoku iku ki he faiangahalá.

Fakaafeʻi ha tokotaha ako ke lau leʻolahi e 2 Pita 2:1–3. Kole ki he kalasí ke muimui ki ai, ʻo kumi e fakatokanga ʻa Pita fekauʻaki mo kinautolu ʻe feinga ke kākaaʻi e Kāingalotú.

Ko hai naʻe fakatokanga ki ai ʻa Pita ki he Kāingalotú?
Ko e hā ʻoku akoʻi ʻe he kau palōfita mo e kau akonaki loi ko ʻení? (Fakamatalaʻi ange ko e “hē fakamalaʻiá” [veesi 1] ko ha ngaahi akonaki loi mo fakatupu ʻauha ia.)
Ko e hā e moʻoni ʻe lava ke tau ako meia Pita fekauʻaki mo e meʻa ʻoku feinga ʻa e kau akonaki loí ke fai kiate kitautolú? (Tokoniʻi e kau akó ke nau ʻilo ha foʻi moʻoni hangē ko ʻení: ʻOku feinga ʻa e kau akonaki loí ke kākaaʻi kitautolu. Tohi ʻa e moʻoni ko ʻení ʻi he palakipoé.)

Fakaafeʻi ha tokotaha ako ke lau leʻolahi e fakamatala ko ʻeni ʻa ʻEletā M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá. Kole ki he kalasí ke fakafanongo ki he ngaahi meʻa ʻoku akoʻi ʻe he kau akonaki loi ʻo e ʻaho ní ke kākaaʻi ʻaki kitautolu.

“Ko e kau palōfita loí mo e kau akonaki loí ʻa kinautolu ʻoku nau fakahā ko e tokotaha loi mo kākā ʻa e Palōfita ko Siosefa Sāmitá; ʻoku nau fakafepakiʻi ʻa e ʻUluaki Mata-Meʻa-Hā ʻo pehē ne ʻikai ke hoko. ʻOku nau fakamatala ko e Tohi ʻa Molomoná mo e ngaahi ngāue fakafolofola kehé ʻoku ʻikai ko ha lēkooti folofola mei onoʻahó. ʻOku nau toe feinga foki ke toe fakaʻuhingaʻi ʻa e natula ʻo e Toluʻi ʻOtuá, pea ʻoku nau fakaʻikaiʻi ʻa e pehē naʻe ʻomai pea ʻoku hokohoko atu hono ʻomai ʻe he ʻOtuá ha ngaahi fakahā he ʻahó ni ki Heʻene kau palōfita kuo fakanofo pea hikinimaʻí. …

“Ko e kau palōfita loí mo e kau akonaki loí ʻa kinautolu foki ʻoku nau feinga ke liliu ʻa e ngaahi tokāteline fakalaumālie mei he ʻOtuá, ʻa ia ʻoku nau maluʻi ai ʻa e toputapu ʻo e nofo-malí, natula fakalangi ʻo e fāmilí, mo e tokāteline mahuʻinga ʻo e angamaʻa fakatāutahá. ʻOku nau poupouʻi hono toe fakaʻuhingaʻi ʻo e moʻui fakamatelié ke fakatonuhiaʻi ʻa e tonó, feʻauakí mo e ngaahi vā fetuʻutaki fakahomosekisualé” (“Beware of False Prophets and False Teachers,” Ensign, Nov. 1999, 63, 64).

Fakaafeʻi e kau akó ke fakakaukau ki he ngaahi taimi ne nau maʻu ai ha ngaahi akonaki pe pōpoaki hala mei he kau akonaki loí.

Ko e hā ʻoku tokoni ai ke tau ʻilo ʻa e ngaahi pōpoaki mo e ngaahi akonaki ʻa e kau akonaki loí?

Fakamatalaʻi fakanounou ʻa e 2 Pita 2:4–17 ʻaki hano fakamatalaʻi ange naʻe ʻoange ʻe Pita ha ngaahi sīpinga ʻo e meʻa naʻe hoko ki he kakai ne muimui he kau akonaki loí ʻi he kuohilí. Naʻe ʻoange foki ʻe Pita ha sīpinga ʻo ha niʻihi fakafoʻituitui naʻe ʻikai ke takiekina ʻe he kau akonaki loí. Naʻe fakamatalaʻi leva ʻe Pita e ʻulungaanga kovi ʻo e kau akonaki loí.

Fakaʻaliʻali ha meʻa taumātaʻu mo ha ngaahi mounu, pe fakaʻaliʻali pe tā ha fakatātā ʻo e ngaahi meʻá ni ʻi he palakipoé. (Kapau ʻoku ʻi ai ha founga ʻe taha hono taumātaʻu e iká ʻoku maheni ange mo e kau akó, fakaʻaongaʻi ha ngaahi meʻa pe fakatātā ʻo e founga ko iá.)

Fakamatalaʻi ange ko e founga ʻe taha ʻoku puke ʻaki ʻe he tangata toutaí e iká ko hono fakaʻaongaʻi e mounú ke fakataueleʻi ʻaki e iká ki ha tauhele pe ke ne uʻu e mātaʻú. Fakaafeʻi e kau akó ke nau fakakaukau ki he founga ʻoku tatau ai e ngaahi taukei ʻa e tangata toutaí mo e kau akonaki loí.

Fakaafeʻi ha tokotaha ako ke lau leʻolahi ʻa e Pita 2:18–19. Kole ki he kalasí ke muimui ki ai, ʻo kumi e founga ʻoku tauheleʻi ʻaki ʻe he kau akonaki loí e Kāingalotú ke muimui ʻi heʻenau ngaahi akonakí.

ʻOku tauheleʻi mo kākaaʻi fēfē ʻe he kau akonaki loí e kāingalotu ʻo e Siasí? (Fakamahinoʻi ange ʻoku ʻi ai ha kau akonaki loi ʻe niʻihi ʻoku fakamātoato ka ʻoku nau kākā pē kinautolu.)
ʻOku founga fēfē e tatau ʻa e ngaahi akonaki ʻa e kau palōfita mo e kau akonaki loí mo ha mounu taumātaʻu pe lango?
Fakatatau ki he veesi 19, ko e hā ʻoku talaʻofa ʻe he kau akonaki loi ko ʻení? (“Tauʻatāiná.” ʻI hono fakalea ʻe tahá, ʻoku nau akoʻi ʻoku tauʻatāina lahi ange ʻa e faiangahalá, ʻi he talangofua ki he ngaahi fekaú.)

Tānaki atu ki he foʻi moʻoni ʻi he palakipoé ke hangē ko ʻení: ʻOku feinga e kau akonaki loí ke kākaaʻi kitautolu ke tau tui ʻoku fakaiku e angahalá ki ha tauʻatāina ʻoku lahi ange.

Fakaafeʻi e kau akó ke toe lau fakalongolongo ʻa e veesi 19, ʻo kumi e meʻa ʻoku hoko ki he kakai ʻoku ikunaʻi ʻe he ngaahi akonaki halá mo e angahalá.

Ko e hā ʻoku hoko ki he kakai ʻoku ikunaʻi ʻe he ngaahi akonaki halá mo e angahalá? (ʻOku nau pōpula ki ai.)
Ko e hā e ngaahi akonaki hala ʻe niʻihi ʻokú ne poupouʻi e tauʻatāiná ka ko hono moʻoní ʻoku iku ia ki he nofo pōpula?

Fakaafeʻi ha tokotaha ako ke lau leʻolahi ʻa e 2 Pita 2:20–22. Kole ki he kalasí ke muimui ki ai, ʻo kumi e meʻa naʻe akoʻi ʻe Pita fekauʻaki mo kinautolu ʻoku foki ki he angahalá hili ʻenau mavahe mei aí.

ʻOkú ke pehē ko e hā ʻoku ʻahiʻahiʻi ai ʻa kinautolu ʻoku “hao mei he ngaahi ʻuli ʻo e māmaní [ʻia]… Sīsū Kalaisi ”(veesi 20) ke nau foki ki heʻenau ngaahi founga angahalá?
Ko e hā ha faleʻi te ke fai ke tokoni ki ha taha ke kei faivelenga kia Sīsū Kalaisi mo ʻEne ongoongoleleí kae ʻikai toe foki ki he ngaahi angahala kimuʻá?

2 Pita 3

Ko e fakamoʻoniʻi ʻe Pita ʻa e Hāʻele ʻAngaua Maí

Fakamatalaʻi ange naʻe fakamanatuʻi ʻe Pita ki he Kāingalotú ʻi he fakaʻosinga ʻene tohí e Hāʻele ʻAngaua Mai ʻa Sīsū Kalaisí pea akoʻi kinautolu e founga ke teuteu ki aí. Fakamatalaʻi fakanounou ʻa e 2 Pita 3:1–9 ʻaki hono fakamatalaʻi ange naʻe akoʻi ʻe Pita ʻe fakalumolumaʻi mo manukiʻi ʻe he kakai ʻe niʻihi ʻa kinautolu ʻoku tui ki he Hāʻele ʻAngaua Mai ʻi he ngaahi ʻaho fakaʻosí.

Kole ki ha kau ako ʻe niʻihi ke fakamatalaʻi e ʻuhinga ʻoku nau tui ai ki he Hāʻele ʻAngaua Maí, neongo ʻoku ʻikai tui ki ai ha kakai tokolahi.

Fakaafeʻi ha tokotaha ako ke lau leʻolahi ʻa e 2 Pita 3:10–14. Kole ki he kalasí ke muimui ki ai, ʻo kumi e meʻa naʻe akoʻi ʻe Pita fekauʻaki mo e Hāʻele ʻAngaua Maí. Explain that conversation in verse 11 means conduct (see 1 Timothy 4:12, footnote c) and “hasting unto” in verse 12 means awaiting something eagerly.

Fakatatau ki he veesi 10, ko e hā naʻe akoʻi ʻe Pita fekauʻaki mo e Hāʻele ʻAngaua Maí?
Fakatatau ki he veesi 11–14, ko e hā e faleʻi naʻe fai ʻe Pita ki he Kāingalotú ke teuteuʻi kinautolu ki he Hāʻele ʻAngaua Maí? Ke nau māʻoniʻoni mo anga faka-ʻOtua, tokanga mo tatali ki he Hāʻele ʻAngaua Maí, pea feinga fakamātoato ke “taʻe-ha-mele mo taʻehalaia” [veesi 14].)

Fakamatalaʻi ange ʻoku ʻuhinga e kupuʻi lea “taʻe-ha-mele mo taʻehalaiá” (veesi 14) ki he maʻa mei he angahalá. Kuo ʻosi fakaleleiʻi ʻa kinautolu ʻoku taʻehalaiá ki he ʻOtuá pea te nau maʻu ʻa e melinó mo e Fakamoʻuí ʻi Heʻene hāʻele maí.

Te ke fakamatalaʻi fakanounou fēfē ha tefitoʻi moʻoni naʻe akoʻi ʻe Pita fekauʻaki mo e founga ʻe lava ke tau teuteu ai ki he Hāʻele ʻAngaua Mai ʻa e Fakamoʻuí? Tokoni ke ʻilo ʻe he kau akó ha tefitoʻi moʻoni hangē ko ʻení: Te tau lava ʻo teuteu ki he Hāʻele ʻAngaua Mai ʻa e Fakamoʻuí ʻaki ʻetau maʻu ha moʻui ʻoku faka-ʻOtuá mo tokanga fakamātoato ki Heʻene Hāʻele Maí. Fakamatalaʻi ange ʻe lava ke ʻuhinga ʻa e “tokangá” ki heʻetau tatali loto vēkeveke ki he Hāʻele Mai ʻa e Fakamoʻuí.)
Ko e hā ha ngaahi meʻa te tau lava ʻo fai ke moʻui faka-ʻOtua ai ʻi heʻetau tokanga fakamātoato ki he Hāʻele ʻAnga Ua Maí?

Fakamatalaʻi fakanounou e 2 Pita 3:15–18 ʻaki hano fakamatalaʻi ange naʻe fakatokanga ʻa Pita fekauʻaki mo e tō ki he faiangahalá. Naʻá ne fakaafeʻi e Kāingalotú ke “tupulekina ʻi he ʻofa, pea mo e ʻilo ki [he] ʻEikí” (veesi 18).

Fakaʻosiʻaki haʻo fakamoʻoni ki he ngaahi moʻoni naʻe akoʻi he 2 Pita 2–3. Fakaafeʻi e kau akó ke feinga ke ʻiloʻi mo fakaʻehiʻehi mei he ngaahi akonaki halá pea ke teuteu fakamātoato ki he Hāʻele ʻAngaua Maí.

Ngaahi Fakamatala Fakamahino mo e Puipuituʻá

2 Pita 3:12. “Hoko mai ʻo e ʻaho ʻo e ʻOtuá”

Naʻe fakamoʻoni ʻa ʻEletā Niila L. ʻEnitasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ki he Hāʻele ʻAngaua Maí:

“[ʻI he Hāʻele ʻAngaua Maí] [ʻe hoko] ha meʻa naʻe hangē he ʻikai malavá: ʻOku folofola e ʻEikí ‘Pea ʻe mamata fakataha kiate au ʻa e kakano kotoa pē’ [T&F 101:23]. ʻE fēfē ʻene hokó? ʻOku ʻIkai ke tau ʻilo. Ka ʻoku ou fakamoʻoni kuo pau ke hoko—ʻo hangē tofu pē ko hono kikiteʻí. Te tau tūʻulutui ʻi he loto-ʻapasia, ‘pea ʻe fakaongo atu ʻe he ʻEikí ʻa Hono leʻó, pea ʻe fanongo ki ai ʻa e ngaahi ngataʻanga kotoa pē ʻo e māmaní’ [T&F 45:49]. ‘Pea ʻe … hangē ko e leʻo ʻo e ngaahi vai lahi, pea ʻe hangē ko e leʻo ʻo e mana lahi’ [T&F 133:22]. ‘Pea ko e ʻEikí, … ʻio ʻa e Fakamoʻuí, te Ne tuʻu ʻi he lotolotonga ʻo Hono kakaí’ [T&F 133:25]. …

ʻI he ʻaho ko iá, ʻe fakalongolongo e kau fakaangá, ‘heʻe ongoʻi ia ʻe he telinga kotoa pē … , pea ʻe peluki ʻa e tui kotoa pē, pea ʻe vete ʻe he ʻelelo kotoa pē’ [T&F 88:104] ko Sīsū ʻa e Kalaisí, ko e ʻAlo ʻo e ʻOtuá, ko e Fakamoʻui mo e Huhuʻi ʻo e māmaní” (“Ke Hoko Mai Ho Puleʻangá,” Ensign pe Liahona, Mē 2015, 122).