‘Iuniti 30: ‘Aho 2
1 Sione
Talateú
Naʻe fakaafeʻi ʻe he ʻAposetolo ko Sioné ʻa e kāingalotu ʻo e Siasí ke nau feinga ke feohi mo e Tamaí pea mo Hono ʻAlo ko Sīsū Kalaisí. Naʻá ne fakamamafaʻi ʻa e fie maʻu ke tauhi e ngaahi fekau ʻa e ʻOtuá ke fakahā ʻetau ʻofa kiate Iá. Naʻe toe fakamanatu ʻe Sione ki he kāingalotu ʻo e Siasí ke nau ʻofa ki he niʻihi kehé.
1 Sione
Ko e fakamatalaʻi ʻe Sione ʻa e mahuʻinga ʻo hono tauhi e ngaahi fekaú mo feʻofaʻakí
-
Tohiʻi ʻi hoʻo tohinoa ako folofolá e foʻi lea hē mei he moʻoní mo hono fakaʻuhingá. Kapau ʻokú ke fie maʻu tokoni, fakaʻaongaʻi e Fakahinohino ki he Folofolá, pe ko e fakamatala ki he Ngaahi Tefitoʻi Tokāteliné ʻi he kamataʻanga ʻo e tohi fakahinohino ako ko ʻení.
Naʻe tohi ʻe he ʻAposetolo ko Sioné ʻa e tohi ní ʻi ha taimi ne tuʻu laveangofua ai ʻa e Siasí ʻi he hē mei he moʻoní. Naʻá ne fakatokanga ki he Kāingalotú fekauʻaki mo e ngaahi fili ʻo Kalaisí (vakai, 1 Sione 2:18–26; 4:3). Ko e fili ʻo Kalaisí ko “ha taha pe ko ha faʻahinga meʻa ʻokú ne fakakeheʻi ʻa e palani ʻo e fakamoʻui ʻo e ongoongolelei moʻoní pea ʻokú ne fakafepakiʻi fakahāhā pe fakafufū ʻa Kalaisi” pea mo e mafai mo e ngaahi akonaki ʻo ʻEne kau tamaioʻeiki kuo filí (Fakahinohino ki he Folofolá, “Fili ʻo Kalaisí,” scriptures.lds.org). Naʻe akoʻi ʻe he niʻihi ʻo e ngaahi fili ʻo Kalaisi ʻi he kuonga ʻo Sioné naʻe ʻikai maʻu ʻe Sīsū Kalaisi ha sino fakamatelie lolotonga ʻEne ʻi he māmaní ka naʻe hā mai pē ko ha tokotaha fakatuʻasino.
Lau ʻa e 1 Sione 1:1–4, ʻo kumi e meʻa naʻe fakamoʻoniʻi ʻe Sione ke fakafepakiʻi e akonaki hala ko ʻení. Fakatokangaʻi ange ʻoku ʻuhinga e “Folofola ʻo e moʻuí” ʻi he veesi 1 kia Sīsū Kalaisi.
Fakatokangaʻi ʻi he veesi 3–4 naʻe fie maʻu ʻe Sione e Kāingalotú ke feohi mo e kau taki ʻo e Siasí, ne nau feohi mo e Tamai Hēvaní mo Sīsū Kalaisí. Naʻá ne fie maʻu foki ke nau aʻusia ha fiefiia kakato. Ko ha tefitoʻi moʻoni ʻe taha te tau lava ʻo ako mei he ngaahi vēsí ni kapau te tau maʻu mo muimui ki he ngaahi akonaki ʻa e kau palōfitá mo e kau ʻaposetoló, te tau lava ʻo feohi mo e Tamaí pea mo e ʻAló.
ʻOku ʻuhinga ʻa e feohí ke fiefia ʻi ha vā ʻo e fefalalaʻaki, fakakaumeʻa, fengāueʻaki, mo uouangataha. Fakakaukau ki he kau tangata ʻoku nau ngāue ʻi he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá. ʻOku tokoni fēfē ʻa e muimui ki he ngaahi akonaki ʻa e kau palōfitá mo e kau ʻaposetoló ke tau feohi mo ʻetau Tamai Hēvaní mo Hono ʻAlo ko Sīsū Kalaisí?
Lau ʻa e 1 Sione 1:5–6, ʻo kumi e meʻa te ne lava ʻo taʻofi kitautolu mei heʻetau feohi mo ʻetau Tamai ʻi Hēvaní.
Ko e taha ʻo e ngaahi kaveinga mahuʻinga taha ʻo e tohi ʻa Sioné ʻoku hā ʻi he he 1 Sione 1:5—Ko Sīsū Kalaisi ʻa e Maama ʻo e Māmaní (vakai, Sione 1:4–9; 8:12; 9:1–5). Fakakaukau ki ha taimi naʻá ke lue ai ʻi ha fakapoʻuli. ʻOku ʻuhinga ʻa e foʻi lea fakapoʻuli ki he fakapoʻuli fakalaumālié.
ʻOkú ke pehē ʻoku ʻuhinga ki he hā ke ʻaʻeva ʻi he fakapoʻuli fakalaumālié?
Ako ʻa e 1 Sione 1:7–2:6,ʻo kumi e ngaahi moʻoni ne akoʻi ʻe Sione ʻe lava ʻo tokoni ke tau ʻiloʻi e founga ke ʻaʻeva ai ʻi he maama ʻo e ongoongoleleí. ʻOku ʻuhinga ʻa e lea ko e feilaulau totongi ʻi he 1 Sione 2:2 ki ha feilaulau fakalelei ke feau e fakamaau totonu ʻa e ʻOtuá.
-
-
ʻOkú ke pehē ko e hā ʻoku hoko ai ʻo haohaoa, pe kakato ange ʻetau ʻofa ki he ʻOtuá, ʻi heʻetau tauhi ʻEne ngaahi fekaú?
-
Ko e fē ha taimi kuó ke aʻusia ai ha ʻofa lahi ange ki he ʻOtuá ʻi hoʻo fāifeinga ke tauhi ʻEne ngaahi fekaú?
-
Lau ʻa e ngaahi fakamatala ko ʻení, ʻo kumi ha fekau tukupau ʻoku fāinga e ongo tamaiki kei talavoú ni ke talangofua ki aí:
-
ʻOku lau ʻe ha talavou ʻa e folofolá he ʻaho takitaha mo fakahoko faivelenga hono ngaahi fatongia lahi ʻi he lakanga fakataulaʻeikí, ka ʻoku faʻa taʻeʻofa ki hono tehiná.
-
ʻOku ʻalu maʻu pē ha finemui ki heʻene ngaahi fakataha ʻi he Siasí pea kuo maʻu hono Fakalāngilangi ʻo e Tuʻunga Fakafinemuí. Ka neongo ia, ʻokú ne faʻa tohi angakovi fekauʻaki mo ha niʻihi ʻo hono kaungā-akó mo e kau faiakó ʻi he mītia fakasōsialé.
Ko e hā e fekau ʻoku fāinga e ongo mēmipa kei talavoú ni ʻo e Siasí ke talangofua ki aí? (Toe vakai ki he veesi fakataukei folofola Mātiu 22:36–39 ke tokoni ʻi hono tali e fehuʻi ko ʻení.)
Fakakaukau ki ha ngaahi tūkunga ʻe malava ke faingataʻa ai ke ke fakahaaʻi ha ʻofa ki he niʻihi kehé.
-
-
Ko e fē ʻi he ngaahi akonaki ʻa Sione fekauʻaki mo e ʻofá ʻoku mahuʻingamālie kiate koé? Ko e hā hono ʻuhingá?
-
Ko e tefitoʻi moʻoni ʻe taha te tau lava ʻo ʻiloʻi mei he ngaahi vēsí ni ko e taimi ʻoku tau ʻofa ai ki he ʻOtuá, te tau ʻofa ki he niʻihi kehé. ʻOkú ke pehē ko e hā te tau fakahaaʻi ai ʻetau ʻofa ki he niʻihi kehé ʻi heʻetau ʻofa moʻoni ki he ʻOtuá?
-
Fakatokangaʻi ange naʻe fakamatala ʻa Sione kau ki he fehiʻa ki he niʻihi kehé ʻi he 1 Sione 4:20. ʻOku lahi ʻa e ngaahi founga te tau lava ai ʻo taʻofi ʻetau ʻofá pe angaʻofá mei he niʻihi kehé, makehe mei he tāufehiʻa kiate kinautolú. ʻOkú ke pehē ko e hā ha niʻihi ʻo e ngaahi founga ko iá?
Lau ʻa e 1 Sione 3:17–18, ʻo kumi e founga ʻoku totonu ke tau fakahaaʻi ai ʻetau ʻofa ki he niʻihi kehé.
ʻOkú ke pehē ko e hā ʻoku mahuʻinga ai ke tau fakahaaʻi ʻetau ʻofá ʻi heʻetau ngaahi ngāué kae ʻikai ʻi heʻetau ngaahi leá pē?
Ko hai ha taha ʻokú ke ʻilo ko ha sīpinga lelei ʻo hono fakahaaʻi e ʻofá ki he niʻihi kehé?
Kapau ʻe lava, mamataʻi e vitiō ko e “Mavahevahe Ha Ongo Tautehina” ʻoku maʻu ʻi he LDS.org. Lolotonga hoʻo sió, kumi e founga ne hoko ai e ongo tautehiná ni ko e sīpinga ʻo e tefitoʻi moʻoni ko ʻení mo hono ola ʻiate kinauá.
-
ʻI heʻetau fakahaaʻi ʻetau ʻofá ʻo fakafou ʻi heʻetau ngāué, ʻoku tau ʻaʻeva ai ʻo hangē ko Sīsuú, pe moʻui hangē ko ia naʻá Ne faí (vakai, 1 Sione 2:6; 3:1–3). ʻE tāpuakiʻi koe ʻe he ʻEikí ʻi hoʻo fakaʻaongaʻi ʻa e moʻoni ko ʻení ʻi hoʻo moʻuí.
Lau ʻa e 1 Sione 4:12, pea lau leva mo e Liliu ʻa Siosefa Sāmitá, 1 Sione 4:12 (ʻi he Fakahinohino ki he Folofolá scriptures.lds.org). Ko e hā ʻoku fakamahino mai ʻe he Liliu ʻa Siosefa Sāmitá fekauʻaki mo e lava ke mamata ki he ʻOtuá?
Naʻe akoʻi ʻe Sione ʻi he 1 Sione 5 ʻa e meʻa kuo pau ke tau fai ke fanauʻi foʻou ai kitautolú, ʻo ʻuhinga ki he “maʻu ʻo e Laumālie ʻo e ʻEikí ʻo fakatupu ha fuʻu liliu lahi ʻi he loto ʻo ha taha ʻo ʻikai ai te ne toe maʻu ʻa e holi ke faikovi, ka ko e holi pē ke fekumi ki he ngaahi meʻa ʻa e ʻOtuá” (Fakahinohino ki he Folofolá, “Fanauʻi Foʻoú, Fanauʻi ʻi he ʻOtuá,” scriptures.lds.org). Lau ʻa e ngaahi potufolofola ko ʻení, pea hiki ʻa e meʻa kuo pau ke tau fai ke fanauʻi foʻou ai kitautolú:
-
Kuó u ako ‘a e 1 Sione peá u fakakakato ‘a e lēsoni ko ‘ení ‘i he (ʻaho).
Ko e ngaahi fehuʻi, ngaahi fakakaukau, mo e ngaahi mahino makehe ‘oku ou fie vahevahe mo ʻeku faiakó: