Talateu kia 3 Sioné
Ko e hā ‘Oku Ako ai e Tohí Ni?
Ne fakahīkihikiʻi ʻi he tohi nounou ko ʻení ʻe he ʻAposetolo ko Sioné ʻa Keio, ko ha mēmipa ʻo e Siasí naʻe moʻui mateaki ʻi he taimi ʻo e fakafepaki ki he kau taki ʻo e Siasí. ʻE lava ke tokoniʻi koe ʻe he ngaahi akonaki ʻa Sioné ke toe mahino ange ʻa e hē mei he moʻoní naʻe hoko ʻi he Siasi he Fuakava Foʻoú, pea ʻe lava ke ueʻi ai koe ke ke kei faivelenga ki he kau taki ʻo e Siasí neongo e fakafepakí.
Ko Hai Naʻá Ne Hiki e Tohí Ni?
Naʻe fakahā ʻe he tokotaha faʻu tohí ko iá “ko e motuʻa” (3 Sione 1:1) pea mahino ʻi he tala tukufakaholó ko e ʻAposetolo ko Sioné.
Naʻe Tohi Ia ‘Anefē pea ‘i Fē?
ʻOku ʻikai ʻiloʻi pe naʻe tohi ʻa e 3 Sioné ʻanefē pea ʻi fē. Kapau ʻoku moʻoni ʻa e tala tukufakaholo ʻo e nofo fuoloa ʻa Sione ʻi ʻEfesoó, naʻe malava pē ke ne fai ʻa e tohí ni mei ai ʻi he vahaʻa ʻo e A.D. 70 mo 100.
Ko Hai Naʻe Fakataumuʻa Kiate Kinautolu Hono Hikí Pea Ko e Hā Hono ʻUhingá?
Naʻe fai ʻa e Tohi Hono Tolu ʻa Sioné kia Keio, ko ha mēmipa faivelenga ʻo e Siasí naʻe fakahīkihikiʻi ʻe Sione ʻi heʻene fakahaaʻi ʻa e līʻoa taʻe-siokita ʻi he ngāue ʻa Kalaisí ʻaki hono ʻoatu ha nofoʻanga maʻá e kau tamaioʻeiki ʻa e ʻOtuá ne fefonongaʻaki holó (vakai, 3 Sione 1:5–8).
Naʻe toe fakatokanga foki ʻa Sione kia Keio fekauʻaki mo ha taha ko hono hingoá ko Taiotifi, ʻa ia mahalo naʻe ʻi ai hono fatongia taki fakalotofonua ʻi he Siasí. ʻOku hā mahino ʻa e fakafepaki ʻa Taiotifi ki he ʻAposetolo ko Sioné pea mo e kau ngāue kehe ʻa e Siasí, pea aʻu pē ʻo taʻofi ʻa e kāingalotu fakalotofonua ʻo e Siasí naʻa nau fie tali kinautolú mei heʻenau kau atu ki he ngaahi houalotu ʻa e Siasí (vakai, 3 Sione 1:9–10). Ne poupouʻi ʻe Sione ʻa Keio ke hokohoko atu ʻene fai leleí mo pehē ʻokú ne ʻamanaki ke vavé ni pē haʻane ʻaʻahi kia Keio (vakai, 3 Sione 1:11–14).
Ko e Hā Ha Ngaahi Fōtunga Makehe ʻo e Tohí Ni?
ʻOku tau ʻiloʻi mei he 3 Sioné ʻa e tokanga ʻa Sione ki he ngaahi ivi tākiekina ʻo e hē mei he moʻoní ʻi he Siasí. ʻOku tau mamata foki ki heʻene ʻofa ki he niʻihi kehé pea mo e fiefia ko ia naʻá ne ongoʻi maʻanautolu ne nau fili ʻa e moʻui talangofuá (vakai, 3 Sione 1:4).
Fokotuʻutuʻú
3 Sione. ʻOku fakahīkihikiʻi ʻe Sione ʻa Keio ʻi heʻene faivelengá mo fakatokanga koeʻuhí ko ha taki naʻá ne fakafepakiʻi ʻa Sione mo e kau taki kehe ʻo e Siasí.