Talateu ki he 1 Pitá
Ko e Hā ʻOku Ako Ai e Tohí Ni?
Ko ha kaveinga naʻe maʻu ʻi he ʻUluaki Tohi ʻa Pitá ʻa ia ʻe lava ke kātekina mo tali faivelenga ʻe he kau ākonga ʻo e Fakamoʻuí ʻa e faingataʻá mo e fakatangá ʻo fakafou ʻi he Fakalelei ʻa Sīsū Kalaisí. ʻOku fakamatala e vahe kotoa ʻo e 1 Pitá ki he ngaahi faingataʻá pe mamahí, pea naʻe akoʻi ʻe Pita “ʻoku mahuʻinga lahi ʻi he koulá” ʻa hono kātekina e ngaahi faingataʻá ʻi he faʻa kātakí pea ʻe tokoni ke maʻu ʻe he kakai tuí ʻa e “fakamoʻui ʻo [honau] laumālié” (1 Pita 1:7, 9). Naʻe fakamanatu foki ʻe Pita ki he Kāingalotú honau tuʻunga “ko e kakai kuo filí … ko e kau taulaʻeiki fakaʻeiʻeiki, ko e kakai māʻoniʻoni, ko e kakai kuo fakatau” (1 Pita 2:9). ʻI hono ako e faleʻi naʻe fai ʻe Pita ʻi he tohí ni, te ke lava ai ʻo maʻu e ʻamanaki lelei, poupou, mo e mālohi te ne lava ʻo tokoniʻi koe ʻi he ngaahi faingataʻa ʻokú ke fehangahangai mo iá.
Ko Hai Naʻá Ne Tohi ‘a e Tohí Ni?
Ko e tokotaha naʻá ne faʻu e tohí ni ko “Pita, ko e ʻaposetolo ʻa Sīsū Kalaisi” (1 Pita 1:1).
“Naʻe ʻuluaki ui ʻa Pita … ko Simione (2 pita 1:1), ko ha tangata toutai ia ʻi Petesaita naʻe nofo mo hono uaifí ʻi Kapaneume. … Naʻe ui ʻa Pita mo hono tokoua ko ʻAniteluú ke hoko ko ha ākonga ʻa Sīsū Kalaisi (Mātiu 4:18–22; Maʻake 1:16–18; Luke 5:1–11). …
“… Naʻe fili [ʻa Pita] ʻe he ʻEikí ke ne maʻu ʻa e ngaahi kī ʻo e puleʻanga ʻi he māmaní (Mātiu 16:13–18). …
“Ko Pita ʻa e ʻAposetolo pule ʻi hono taimí” (Fakahinohino ki he Folofolá, “Pita,” scriptures.lds.org).
ʻOku fakahaaʻi ʻe he ngaahi tohi ʻa Pitá ʻene tupulaki mei ha tangata toutaí ki ha ʻAposetolo maʻongoʻonga.
Ko e Fē ʻa e Taimi mo e Feituʻu ne Tohi Aí?
Ne ngalingali naʻe tohi ʻe Pita ʻene ʻuluaki tohi ko ʻení ʻi he vahaʻa ʻo e T.S. 62 mo e 64. Naʻá ne tohi mei “Pāpilone” (1 Pita 5:13), mahalo ko ha fakataipe ki Loma.
ʻOku meimei ke tali lahia naʻe pekia ʻa Pita lolotonga e pule ʻa e ʻemipola Loma ko Neló—meimei hili e T.S. 64, ʻi he taimi naʻe kamata ke fakatangaʻi ai ʻe Nelo ʻa e kau Kalisitiané (vakai, Fakahinohino ki he Folofolá, “Pita,”).
Ko Hai Naʻe Fakataumuʻa Ki Ai Hono Hikí Pea Ko e Hā Hono ʻUhingá?
Naʻe fakataumuʻa ʻe Pita e tohí ni ki he kāingalotu ʻo e Siasí ʻa ia ne nofo ʻi he ngaahi vahefonua Loma ʻe nima ʻo ʻĒsia Minó, ʻa ia ʻoku tuʻu ʻi Toake he ʻahó ni (vakai, 1 Pita 1:1). Naʻe fakakaukau ʻa Pita ko e kakai te nau lau ʻene tohí ko e kakai “fili” ʻa e ʻOtuá (1 Pita 1:2). Naʻá ne tohi ke fakamālohia mo poupouʻi e Kāingalotú ʻi he “ʻahiʻahiʻi ʻo [ʻenau] tuí” (1 Pita 1:7) pea ke teuteuʻi kinautolu ki ha kahaʻu “ʻahiʻahi vela” (1 Pita 4:12). Naʻe akoʻi foki kinautolu ʻe he pōpoaki ʻa Pitá ʻi he founga ke tali ʻaki e fakatangá (vakai, 1 Pita 2:19–23; 3:14–15; 4:13).
Naʻe taimi tonu ʻaupito e faleʻi ʻa Pitá koeʻuhí naʻe ʻamanaki ke aʻu e kāingalotu ʻo e Siasí ki ha vahaʻataimi ʻe fakalalahi ai e fakatangá. Naʻe tali ʻe he puleʻanga Lomá ʻa e tui faka-Kalisitiané kae ʻoua kuo aʻu ki he taʻu T.S. 64 nai, fakafuofua ki he taimi naʻe fai ai ʻe Pita e tohí ni. ʻI Siulai ʻo e taʻu ko iá, naʻe fakaʻauha ʻe ha vela lahi, ʻa Loma, pea naʻe sasala ʻo pehē ko ʻEmipola Nelo pē naʻá ne tuʻutuʻuni ke kamataʻi e tutú. ʻI ha feinga ke fakahehema e tukuakiʻi ki he fakatamakí, naʻe tukuakiʻi ʻe ha kakai Loma ʻiloa e kau Kalisitiané ki hono kamataʻi e tutú. Ne iku ʻeni ki hono fakatangaʻi lahi e kau Kalisitiané ʻi he kotoa ʻo e Puleʻanga Lomá. Naʻe fakahaaʻi ʻe Pita ko e taimi ʻoku “tautea [ai e Kāingalotú] ko [ʻenau] anga faka-Kalisitiané” (1 Pita 4:16), te nau lava ʻo ongoʻi fiefia ʻi hono ʻilo ʻoku nau molomolo muivaʻe ʻia Sīsū Kalaisí (vakai, 1 Pita 2:19–23; 3:15–18; 4:12–19).
Ko e Hā Ha Ngaahi Fakaʻilonga ʻOku Hā Mahino Mai ʻi he Tohí ni?
Lolotonga e faingataʻa mo e fakatanga ne fehangahangai mo e Kāingalotú ʻi hono kuongá, naʻe naʻinaʻi ʻa Pita kiate kinautolu ke fepoupouʻaki ʻi he ʻofa mo e manavaʻofa (vakai, 1 Pita 1:22; 3:8–9). ʻIkai ngata aí, ʻoku tau lau ʻi he 1 Pita 5 naʻe fakamatalaʻi ʻe Pita e founga ʻoku totonu ke fakamālohia ai ʻe he kau taki ʻo e Siasí honau kāingalotú.
ʻOku ʻi he tohí ni ʻa e ngaahi fakamoʻoni fakatohitapu mahino taha mahalo ki he maama tataliʻanga ʻo e ngaahi laumālié mo e ngāue ʻo e fakamoʻuí ʻoku fakahoko aí. Naʻe fakamatalaʻi nounou ʻe Pita naʻe ʻaʻahi ʻa Sīsū Kalaisi ki he maama tataliʻanga ʻo e ngaahi laumālié ke malanga ki he ngaahi laumālie talangataʻa ne nau moʻui ʻi he kuonga ʻo Noá (vakai, 1 Pita 3:18–20). Naʻá ne toe pehē naʻe malangaʻi e ongoongoleleí ki he kau pekiá ke foaki ki he niʻihi fakafoʻituitui kuo pekiá ʻa e faingamālie ke fakamāuʻi tatau ai kinautolu mo e kakai moʻuí (vakai, 1 Pita 4:5–6). Naʻe fifili ʻa Palesiteni Siosefa F. Sāmita ʻi hotau kuonga fakakosipelí, ki he ʻuhinga ʻo e 1 Pita 3:18–20 mo e 1 Pita 4:6 ʻi heʻene maʻu ha fakahā ʻo fakamahinoʻi ai e ngaahi tokāteline fekauʻaki mo e maama tataliʻanga ʻo e ngaahi laumālié (vakai, T&F 138).
Toʻo Kongokonga Lalahí
1 Pita 1:1–2:10. ʻOku tohi ʻa Pita ʻo kau ki he fie maʻu ke tupulaki fakalaumālie ʻa e Kāingalotú kae lava ke maʻu ʻa e pale taʻengatá. ʻOku malava ʻa e talaʻofa ʻo e fakamoʻuí ʻi he taʻataʻa mahuʻinga ʻo Sīsū Kalaisí. Ko e Kāingalotú ko e “kakai kuo fili …, ko e kau taulaʻeiki fakaʻeiʻeiki, ko e kakai māʻoniʻoni, ko e kakai kuo fakatau” (1 Pita 2:9) kuo nau maʻu e ʻaloʻofa ʻa e ʻOtuá.
1 Pita 2:11–3:12. ʻOku feinga e kau ākonga ʻa Sīsū Kalaisí ke fakaʻapaʻapaʻi ʻa e kakai kotoa pē mo talangofua ki he kau maʻu mafai fakapuleʻangá mo e ngaahi laó. ʻOku lea ʻa Pita ki ha ngaahi kulupu pau ʻo e Kāingalotú: kau tangataʻi fonua tauʻatāina, kau tamaioʻeiki, uaifi, mo e husepāniti.
1 Pita 3:13–5:14. Ko e taimi ʻoku fakatupu ai ʻe he fakatangá ke mamahi e Kāingalotú, ʻoku totonu ke nau manatu ki he sīpinga ʻa Sīsū Kalaisí, ʻa ia naʻe mamahi pea toki maʻu e hakeakiʻí. Naʻe malangaʻi ʻe Sīsū Kalaisi ʻa e ongoongoleleí ki he kau pekiá kae lava ke nau maʻu ha fakamaau totonu. ʻOku muimui e kau taki ʻo e Siasí ki he sīpinga ʻa Sīsū Kalaisí ʻi hono tokangaʻi e tākanga ʻa e ʻOtuá. ʻOku totonu ke loto fakatōkilalo ʻa e Kāingalotú pea tuku ki he ʻOtuá e ngaahi meʻa ʻoku nau tokanga ki aí.