« ការពន្លូតកូន » ពិតចំពោះសេចក្ដីជំនឿ ( ឆ្នាំ ២០០៤ ) ទំព័រ ៤-៥
« ការពន្លូតកូន » ពិតចំពោះសេចក្ដីជំនឿ ទំព័រ ៤–៥
ការពន្លូតកូន
នៅក្នុងសង្គមសព្វថ្ងៃ ការពន្លូតកូនបានក្លាយទៅជាការអនុវត្តដ៏សាមញ្ញមួយ ដែលត្រូវបានការពារដោយសេចក្ដីអះអាងដែលយល់ខុស ។ ប្រសិនបើអ្នកប្រឈមមុខទៅនឹងសំណួរទាំងឡាយស្ដីពីបញ្ហានេះ អ្នកអាចមានសុវត្ថិភាពក្នុងការធ្វើតាមព្រះហឫទ័យរបស់ព្រះអម្ចាស់ដែលបានបើកសម្ដែង ។ ព្យាការីថ្ងៃចុងក្រោយបានប្រកាសមិនឯកភាពចំពោះការពន្លូតកូន ដោយយោងទៅតាមសេចក្ដីប្រកាសរបស់ព្រះអម្ចាស់ថា « អ្នកមិនត្រូវ … សម្លាប់ឲ្យសោះ ឬប្រព្រឹត្តអំពើអ្វីដូចនោះឲ្យសោះ » ( គ. និង ស. ៥៩:៦ ) ។ ដំបូន្មានស្ដីពីបញ្ហានេះមានភាពច្បាស់លាស់ថា ៖ សមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយមិនត្រូវចុះចូល ប្រព្រឹត្ត លើកទឹកចិត្ត បង់ថ្លៃ ឬ រៀបចំការពន្លូតឲ្យសោះ ។ ប្រសិនបើអ្នកលើកទឹកចិត្តឲ្យមានការរំលូតកូនតាមរបៀបណាមួយនោះ អាចទទួលរងនូវវិន័យរបស់សាសនាចក្រ ។
ថ្នាក់ដឹកនាំសាសនាចក្របានមានប្រសាសន៍ថា កាលៈទេសៈមួយចំនួនអាចធ្វើទៅបានសម្រាប់ការពន្លូតកូនមានដូចជា នៅពេលការមានផ្ទៃពោះដែលបណ្ដាលមកពីសហាយស្មន់ជាមួយញាតិសណ្ដាន ឬការចាប់រំលោភ នៅពេលដែលជីវិត ឬ សុខភាពរបស់ម្ដាយត្រូវបានពិនិត្យដោយគ្រូពេទ្យដ៏មានសមត្ថភាពឲ្យបានដឹងថា គភ៌មានភាពមិនពេញលក្ខណៈ ដែលនឹងមិនអាចឲ្យទារកមានជីវិតរស់នៅបានបន្ទាប់កើតមក ។ ប៉ុន្ដែទោះជាស្ថិតនៅក្នុងកាលៈទេសៈទាំងនេះក្ដី ក៏មិនត្រូវបានលើកលែងដោយស្វ័យប្រវត្តិចំពោះការរំលូតកូនដែរ ។ អស់អ្នកដែលប្រឈមមុខនឹងកាលៈទេសៈបែបនេះគួរតែពិចារណាអំពីការរំលូតកូន បន្ទាប់ពីបានប្រឹក្សាជាមួយអ្នកដឹកនាំសាសនាចក្ររបស់ខ្លួនក្នុងមូលដ្ឋាន ហើយទទួលការបញ្ជាក់មួយតាមរយៈការអធិស្ឋានដ៏ស្មោះត្រង់តែប៉ុណ្ណោះ ។
ពេលដែលកុមារម្នាក់ចាប់កំណើតមកនៅក្រៅចំណងអាពាហ៍ពិពាហ៍ ជម្រើសដ៏ល្អបំផុតសម្រាប់ឪពុកម្ដាយរបស់កុមារ គឺត្រូវរៀបការ ហើយខិតខំ ស្ថាបនាទំនាក់ទំនងក្រុមគ្រួសារដ៏នៅអស់កល្បជានិច្ចមួយ ។ ប្រសិនបើអាពាហ៍ពិពាហ៍មិនសង្ឃឹមថាមានជោគជ័យ ពួកគេគួរតែទុកកុមារឲ្យគេចិញ្ចឹមដោយសេចក្ដីពេញចិត្ត តាមរយៈ LDS Family Services ( សេវាគ្រួសារ ប.ថ.ក ) ( សូមមើល « ការពន្លូតកូន » ទំព័រ ៧–៨ ) ។