ការរំលោភបំពាន

ការរំលោភបំពានគឺជាការប្រព្រឹត្តចំពោះអ្នកដទៃ ឬខ្លួនឯងតាមវិធីមួយ ដែលបង្កឲ្យមានរបួសស្នាម ឬការអាក់អន់ចិត្ត ។ វាធ្វើឲ្យខូចដល់គំនិត និងវិញ្ញាណ ហើយជាញឹកញាប់ធ្វើឲ្យមានរបួសស្នាមលើរាងកាយ ។ វាអាចបណ្ដាលឲ្យមានការភាន់ច្រឡំ មន្ទិលសង្ស័យ បាត់ទំនុកចិត្ត និង ការភ័យខ្លាច ។ វាគឺជាការរំលោភបំពានលើច្បាប់សង្គម ហើយជារឿងផ្ទុយស្រឡះពីការបង្រៀនរបស់ព្រះអង្គសង្គ្រោះ ។ ព្រះអម្ចាស់ដាក់ទោសដល់អាកប្បកិរិយារំលោភបំំពានគ្រប់រូបភាពទាំងអស់—ទោះខាងសាច់ឈាម ខាងផ្លូវភេទ ខាងពាក្យសម្ដី ឬខាងអារម្មណ៏ក្ដី ។ អាកប្បកិរិយារំលោភបំពានអាចឈានទៅរកការដាក់វិន័យរបស់សាសនាចក្រ ។

ការប្រឹក្សាសម្រាប់អ្នករំលោភបំពាន

ប្រសិនបើអ្នកបានរំលោភបំពានក្នុងទំនាក់ទំនងណាមួយ អ្នកត្រូវតែប្រែចិត្តពីអំពើបាបរបស់អ្នក ។ ចូរទូលអង្វរដល់ព្រះអម្ចាស់ឲ្យអភ័យទោសដល់អ្នក ។ ចូរសូមការអភ័យទោសពីមនុស្សទាំងឡាយ ដែលអ្នកបានធ្វើឲ្យឈឺចាប់ ។ ចូរពិភាក្សាជាមួយប៊ីស្សព ឬប្រធានសាខា ដើម្បីគាត់អាចជួយអ្នកតាមរយៈដំណើរការនៃការប្រែចិត្ត ហើយប្រសិនបើចាំបាច់នោះ គាត់អាចជួយអ្នកឲ្យទទួលការប្រឹក្សាបន្ថែម ឬទទួលជំនួយផ្សេងៗទៀត ។

ប្រសិនបើអារម្មណ៍ក្រេវក្រោធបានឆេះឡើងក្នុងខ្លួនអ្នក ចូររៀនគ្រប់គ្រងកំហឹង ។ ចូរឆ្ពោះទៅរកព្រះអម្ចាស់ដោយការអធិស្ឋាន ហើយទូលសូមឲ្យទ្រង់ជួយដល់អ្នក ។ ដោយមានទស្សនវិស័យដ៏នៅអស់កល្បជានិច្ច នោះអ្នកនឹងឃើញថា ស្ទើរតែគ្រប់កំហឹងទាំងអស់តែងតែឆ្លើយតបទៅនឹងរឿងទាំងឡាយណាដែលមិនសំខាន់ជានិច្ច ។

ប្រសិនបើអ្នកមានទោសកំហុសក្នុងការំលោភបំពានខាងផ្លូវភេទ ចូរដាក់វិន័យក្នុងគំនិតរបស់អ្នក ។ ចូរចងចាំថា គំនិតរបស់អ្នកមានឥទ្ធិពលដ៏មានអានុភាពក្នុងជីវិតរបស់អ្នក—« ដ្បិត [ មនុស្សម្នាក់ ] គិតក្នុងចិត្តយ៉ាងណា គេក៏យ៉ាងនោះដែរ » ( សុភាសិត ២៣:៧ ) ។ ចូរនៅឲ្យឆ្ងាយពីការណ៍អាសគ្រាម និងអ្វីផ្សេងទៀតដែលអាចដាស់ចំណង់ផ្លូវភេទ ។ ចូរអធិស្ឋានសូមលទ្ធភាពដើម្បី « សូមឲ្យគុណធម៌តុបតែងគំនិតអ្នកដោយឥតឈប់ឈរ » ( គ. និង ស. ១២១:៤៥ ) ។

ជំនួយសម្រាប់ជនរងគ្រោះនៃការរំលោភបំពាន

ប្រសិនបើអ្នកជាជនរងគ្រោះដោយសារការរំលោភបំពាន ចូរស្វែងរកជំនួយជាបន្ទាន់ ។ ចូរពិភាក្សាជាមួយអ្នកដឹកនាំបព្វជិតភាពរបស់អ្នក ជាធម្មតា ប៊ីស្សព ឬប្រធានសាខារបស់អ្នក ប៉ុន្តែក្នុងពេលខ្លះ ចូរពិភាក្សាជាមួយសមាជិកម្នាក់នៃគណៈប្រធានស្តេក ឬមណ្ឌល ។ លោកអាចជួយអ្នកឲ្យដឹងពីអ្វីដែលត្រូវធ្វើ ។

សូមដឹងថា គេមិនបន្ទោសអ្នកចំពោះអាកប្បកិរិយាគ្រោះថ្នាក់ដែលមនុស្សដទៃធ្វើចំពោះអ្នកឡើយ ។ អ្នកមិនត្រូវទទួលអារម្មណ៍មានកំហុសឡើយ ។ ប្រសិនបើអ្នករងគ្រោះដោយការចាប់រំលោភ ឬការរំលោភបំំពានខាងផ្លូវភេទនោះ ទោះជាអ្នកត្រូវបានរំលោភដោយអ្នកស្គាល់គ្នា អ្នកមិនស្គាល់គ្នា ឬសូម្បីតែជាសមាជិកគ្រួសារក្ដី នោះអ្នកគ្មានកំហុសចំពោះអំពើបាបខាងផ្លូវភេទឡើយ ។ ចូរទទួលស្គាល់ថា អ្នកជាជនឥតទោស ហើយព្រះវរបិតាសួគ៌ទ្រង់ស្រឡាញ់អ្នក ។

ចូរអធិស្ឋានឲ្យមានសេចក្ដីសុខសាន្ត ដែលមានតាមរយៈព្រះយេស៊ូវគ្រីស្ទ និងដង្វាយធួនរបស់ទ្រង់តែម្យ៉ាងគត់ ( សូមមើល យ៉ូហាន ១៤:២៧, ១៦:៣៣ ) ។ ព្រះអង្គសង្គ្រោះបានទទួលបទពិសោធន៍រាល់ការឈឺចាប់ និងទុក្ខវេទនារបស់អ្នកទាំងអស់ ទោះជារឿងទាំងនោះបណ្ដាលមកពីមនុស្សដទៃក៏ដោយ ហើយទ្រង់ជ្រាបពីរបៀបជួយអ្នក ( សូមមើល អាលម៉ា ៧:១១–១២ ) ។ ប្រសើរជាងការព្យាយាមសងសឹក ចូរផ្ដោតលើរឿងទាំងឡាយដែលអ្នកគ្រប់គ្រងបានដូចជា ទស្សនវិស័យផ្ទាល់ខ្លួនរបស់អ្នកស្ដីពីជីវិត ។ ចូរអធិស្ឋានដើម្បីមានភាពរឹងមាំដើម្បីអភ័យទោសដល់អស់អ្នកដែលបានធ្វើឲ្យអ្នកឈឺចាប់ ។

ចូរបន្តស្វែងរកជំនួយពីអ្នកដឹកនាំបព្វជិតភាពរបស់អ្នក ដើម្បីឲ្យគាត់ដឹកនាំអ្នកតាមរយៈដំណើរការនៃការព្យាបាលខាងផ្លូវអារម្មណ៍ ។ តាមរយៈពរជ័យនៃដំណឹងល្អ នោះអ្នកអាចបញ្ឈប់វដ្ដនៃការរំលោភបំពាន ហើយរួចផុតពីការរងទុក្ខវេទនាដែលអ្នកបានជួប ។