សេចក្តីសញ្ញា

សេចក្តីសញ្ញាគឺជាសេចក្តីព្រមព្រៀងរវាងព្រះ និងមនុស្សម្នាក់ ឬមនុស្សមួយក្រុម ។ ព្រះបានដាក់លក្ខខណ្ឌជាក់លាក់ៗ ហើយទ្រង់មានបន្ទូលសន្យាថានឹងប្រទានពរដល់យើង នៅពេលយើងគោរពតាមលក្ខខណ្ឌទាំងនោះ ។ នៅពេលយើងជ្រើសរើសមិនរក្សាសេចក្តីសញ្ញានានា នោះយើងមិនអាចទទួលបានពរជ័យទេ ហើយក្នុងករណីខ្លះ យើងនឹងទទួលរងទារុណកម្ម ជាលទ្ធផលមកពីការមិនគោរពប្រតិបត្តិរបស់យើង ។

រាល់ពិធីបរិសុទ្ធនៃការសង្គ្រោះនៃបព្វជិតភាព គឺមានរួមបញ្ចូលទាំងសេចក្តីសញ្ញា ។ ឧទាហរណ៍ អ្នកបានធ្វើសេចក្តីសញ្ញាមួយពេលអ្នកទទួលពិធីបុណ្យជ្រមុជទឹក ហើយអ្នករំឭកសេចក្តីសញ្ញានោះជារៀងរាល់ពេលដែលអ្នកទទួលទានសាក្រាម៉ង់ ( សូមមើល ម៉ូសាយ ១៨:៨–១០, គ. និង ស. ២០:៣៧, ៧៧, ៧៩ ) ។ ប្រសិនបើអ្នកបានទទួលបព្វជិតភាពមិលគីស្សាដែកហើយ នោះអ្នកបានចូលទៅក្នុងសម្បថ និង សេចក្តីសញ្ញានៃបព្វជិតភាព ( សូមមើល គ. និង ស. ៨៤:៣៣–៤៤ ) ។ អំណោយទានពិសិដ្ឋក្នុងព្រះវិហារបរិសុទ្ធ និងពិធីបរិសុទ្ធនៃការផ្សារភ្ជាប់ ក៏មានរួមបញ្ជូលទាំងសេចក្តីសញ្ញាពិសិដ្ឋៗដែរ ។

ចូរចងចាំជានិច្ច និងផ្តល់ការគោរពចំពោះសេចក្តីសញ្ញានានា ដែលអ្នកបានធ្វើជាមួយព្រះអម្ចាស់ ។ បន្ទាប់មក អ្នកនឹងមិនត្រូវការឲ្យគេបញ្ជាលើអ្វីៗទាំងអស់ដែលអ្នកត្រូវធ្វើនោះទេ ( សូមមើល គ. និង ស. ៥៨:២៦–២៨ ) ។ អ្នកនឹងទទួលបានការបំផុសគំនិតពីព្រះវិញ្ញាណបរិសុទ្ធ និងការដឹកនាំដូចព្រះគ្រីស្ទ ដែលនឹងក្លាយជាផ្នែកមួយនៃនិស្ស័យរបស់អ្នក ។ ដូចព្រះអម្ចាស់បានមានបន្ទូលសន្យាថា អ្នកនឹង « បានទទួលវិវរណៈថែមទៅលើវិវរណៈ តម្រិះថែមទៅលើតម្រិះ ដើម្បីឲ្យអ្នកអាចបានស្គាល់សេចក្ដីអាថ៌កំបាំងទាំងឡាយ និងរបស់ទាំងឡាយដ៏ប្រកបដោយសេចក្ដីសុខសាន្ត—ដែលនឹងនាំឲ្យមានសេចក្ដីអំណរ ជាអ្វីដែលនាំឲ្យមានជីវិតដ៏នៅអស់កល្បជានិច្ច » ( គ. និង ស. ៤២:៦១ ) ។ សេចក្តីសង្ឃឹមដ៏ធំបំផុតរបស់អ្នក គួរតែជាការអរសប្បាយជាមួយនឹងការបន្សុទ្ធ ដែលបានមកពីការដឹកនាំដ៏ទេវភាព រីឯសេចក្តីភ័យខ្លាចដ៏ធំបំផុតរបស់អ្នកគួរតែជាការបាត់ពរជ័យទាំងនេះទៅវិញ ។