រាត្រីជួបជុំក្រុមគ្រួសារ

គេហដ្ឋានគឺជាកន្លែងដ៏សំខាន់បំផុតសម្រាប់ការរៀនអំពីដំណឹងល្អ ។ គ្មានអង្គការណាផ្សេងទៀត ដែលអាចជំនួសឲ្យក្រុមគ្រួសារបានឡើយ ។ ពួកព្យាការីថ្ងៃចុងក្រោយបានអំពាវនាវដល់ឪពុកម្តាយម្តងហើយម្តងទៀតឲ្យចិញ្ចឹមបីបាច់កូនរបស់ខ្លួនដោយនូវសេចក្តីស្រឡាញ់ និងការបង្រៀនដំណឹងល្អ ។

ក្នុងឆ្នាំ ១៩១៥ ប្រធាន យ៉ូសែប អេហ្វ ស្ម៊ីធ ព្រមទាំងទីប្រឹក្សារបស់លោកក្នុងគណៈប្រធានទីមួយ បានចាប់ផ្ដើមកិច្ចខិតខំទូទាំងសាសនាចក្រមួយដើម្បីពង្រឹងក្រុមគ្រួសារ ។ ពួកលោកបានអំពាវនាវដល់ឪពុកម្តាយទាំងអស់នៅក្នុងសាសនាចក្រ ឲ្យប្រមូលកូនៗរបស់ពួកគេមួយសប្តាហ៍ម្តងដើម្បីធ្វើ « រាត្រីជួបជុំក្រុមគ្រួសារ » ។ ក្រុមគ្រួសារត្រូវចំណាយពេលអធិស្ឋាន និងច្រៀងជាមួយគ្នា អានព្រះគម្ពីរ បង្រៀនដំណឹងល្អដល់គ្នាទៅវិញទៅមក និងចូលរួមសកម្មភាពផ្សេងៗ ដែលអាចសាងសាមគ្គីភាពក្នុងក្រុមគ្រួសារ ។

នៅឆ្នាំ ១៩៧០ ប្រធាន យ៉ូសែប ហ្វីលឌីង ស៊្មីធ ជាមួយទីប្រឹក្សារបស់លោកក្នុងគណៈប្រធានទីមួយ បានចាត់តាំងរាត្រីថ្ងៃចន្ទ ជាពេលវេលាសម្រាប់រាត្រីជួបជុំក្រុមគ្រួសារ ។ ចាប់តាំងពីមានសេចក្តីប្រកាសនោះមក សាសនាចក្របានរក្សារាត្រីថ្ងៃចន្ទឲ្យទំនេរពីកម្មវិធីសាសនាចក្រ ដើម្បីឲ្យក្រុមគ្រួសារអាចមានពេលនេះជាមួយគ្នា ។

ពួកព្យាការីថ្ងៃចុងក្រោយបន្តជំរុញសមាជិកសាសនាចក្រឲ្យផ្តល់អាទិភាពខ្ពស់បំផុតដល់រាត្រីជួបជុំក្រុមគ្រួសារ ។ ពួកលោកបានសន្យាថា ការលះបង់របស់ពួកយើងចំពោះកម្មវិធីនេះនឹងជួយការពារក្រុមគ្រួសារយើង ឲ្យប្រឆាំងនឹងអារក្សនៅក្នុងជំនាន់របស់យើង ហើយនាំមកឲ្យយើងនូវអំណរដ៏លើសលប់ក្នុងពេលឥឡូវនេះ និងពេញមួយភាពអស់កល្បជានិច្ច ។

សមាជិកទាំងអស់នៃសាសនាចក្រគួរតែធ្វើឲ្យពេលរាត្រីថ្ងៃចន្ទ ជាពេលវេលាដ៏ពិសិដ្ឋមួយ ដោយរក្សាទុកសម្រាប់រាត្រីជួបជុំក្រុមគ្រួសារ ។ ប្រសិនបើអ្នករៀបការ ចូរធ្វើរាត្រីជួបជុំក្រុមគ្រួសារជាមួយស្វាមី/ភរិយារបស់អ្នក ។ នៅពេលអ្នកមានកូន ចូរឲ្យពួកគេចូលរួមក្នុងរាត្រីជួបជុំក្រុមគ្រួសារ ។ ចូរកែប្រែកម្មវិធីឲ្យត្រូវទៅនឹងសេចក្តីត្រូវការ និងចំណាប់អារម្មណ៍របស់ពួកគេ ហើយអនុញ្ញាតឲ្យពួកគេចូលរួមដែរ ។ បន្ទាប់ពីកូនៗរបស់អ្នកធំ ហើយផ្លាស់ទីលំនៅថ្មី ចូរបន្តធ្វើរាត្រីជួបជុំក្រុមគ្រួសារជាមួយស្វាមី/ភរិយារបស់អ្នក ។

ប្រសិនបើអ្នកនៅលីវ ចូរពិចារណាដល់ការស្នើប៊ីស្សព ឬប្រធានសាខារបស់អ្នកដើម្បីរៀបចំរាត្រីជួបជុំក្រុមគ្រួសារជាក្រុមសម្រាប់អ្នក ព្រមទាំងអ្នកនៅលីវដទៃទៀតក្នុងវួដ ឬសាខារបស់អ្នក ។ គាត់ប្រហែលជាហៅនរណាម្នាក់ឲ្យធ្វើជាអ្នកដឹកនាំរាត្រីជួបជុំក្រុមគ្រួសារ ជាអ្នកទទួលខុសត្រូវរៀបចំកម្មវិធីនេះ ហើយពិនិត្យមើលថាកម្មវិធីនេះត្រូវបានធ្វើឡើងជាទៀងទាត់ ។

យោបល់អំពីគម្រោងសម្រាប់រាត្រីជួបជុំក្រុមគ្រួសារមានដូចខាងក្រោម ៖

ចម្រៀងបើក
ការអធិស្ឋានបើក
ការអានព្រះគម្ពីរ
មេរៀន
សកម្មភាព
ចម្រៀងបិទ
ការអធិស្ឋានបិទ
អាហារ

នៅពេលអ្នករៀបចំមេរៀនសម្រាប់រាត្រីជួបជុំក្រុមគ្រួសារ ចូរចាំថាមេរៀនទាំងនោះផ្អែកលើព្រះគម្ពីរ ការបង្រៀនរបស់ពួកព្យាការីថ្ងៃចុងក្រោយ ព្រមទាំងបទពិសោធន៍ និង ទីបន្ទាល់ផ្ទាល់ខ្លួន ។ សៀវភៅនេះអាចជួយអ្នកឲ្យជ្រើសរើសប្រធានបទដើម្បីបង្រៀន ។ បន្ថែមពីលើនេះទៀត អ្នកអាចយោងទៅឯកសារបោះពុម្ពផ្សេងទៀតរបស់សាសនាចក្រមានដូចជា Family Home Evening Resource Book ( លេខកូដ ៣១១០៦ ) គោលការណ៍ទាំងឡាយនៃដំណឹងល្អ ( ០៦១៩៥ ) សៀវភៅណែនាំក្នុងគ្រួសារ (31180) និងទស្សនាវដ្ដីសាសនាចក្រ ។