ព្រះគុណ

ពាក្យ ព្រះគុណ ដូចដែលបានប្រើនៅក្នុងព្រះគម្ពីរសំដៅជាចម្បងទៅលើជំនួយ និងកម្លាំងមកពីព្រះដែលយើងទទួលបានតាមរយៈដង្វាយធួនរបស់ព្រះអម្ចាស់យេស៊ូវគ្រីស្ទ ។ សាវកពេត្រុសបានបង្រៀនថា យើងគួរតែ « ចម្រើនឡើងក្នុងព្រះគុណ ហើយក្នុងការស្គាល់ដល់ព្រះយេស៊ូវគ្រីស្ទជាព្រះអម្ចាស់ ជាព្រះអង្គសង្គ្រោះនៃយើងរាល់គ្នា » ( ពេត្រុស ទី២ ៣:១៨ ) ។

សេចក្តីសង្គ្រោះដោយសារព្រះគុណ

ដោយសារតែការធ្លាក់ នោះយើងទាំងអស់គ្នានឹងទទួលបទពិសោធន៍នៃការស្លាប់ខាងសាច់ឈាម ។ តាមរយៈព្រះគុណដែលអាចមានតាមរយៈពលិកម្មដ៏ធួនរបស់ព្រះអង្គសង្គ្រោះ នោះមនុស្សទាំងអស់នឹងបានរស់ឡើងវិញ ហើយទទួលបានជីវិតអមតៈ ( សូមមើល នីហ្វៃទី ២ ៩:៦–១៣ ) ។ ប៉ុន្តែការរស់ឡើងវិញតែម៉្យាង ពុំមានលក្ខណៈសម្បត្តិគ្រប់គ្រាន់ សម្រាប់ជីវិតអស់កល្បជានិច្ចនៅក្នុងវត្តមានរបស់ព្រះបានឡើយ ។ អំពើបាបរបស់យើងធ្វើឲ្យយើងមិនស្អាតស្អំ និងមិនសក្តិសមស្ថិតនៅក្នុងវត្តមានរបស់ព្រះបានទេ ហើយយើងត្រូវការព្រះគុណរបស់ទ្រង់ ដើម្បីយើងអាចបានបរិសុទ្ធ និងល្អឥតខ្ចោះ « បន្ទាប់ពីអ្វីៗទាំងអស់ដែលយើងអាចធ្វើបាន » ( នីហ្វៃទី ២ ២៥:២៣ ) ។

ឃ្លា « បន្ទាប់ពីអ្វីៗទាំងអស់ដែលយើងអាចធ្វើបាន » បង្រៀនថា កិច្ចខិតខំគឺតម្រូវឲ្យមានក្នុងចំណែករបស់យើង ដើម្បីទទួលបានភាពពេញលេញនៃព្រះគុណរបស់ព្រះអម្ចាស់ ហើយធ្វើឲ្យមានភាពសក្តិសមដើម្បីរស់នៅជាមួយទ្រង់ ។ ព្រះអម្ចាស់បានត្រាស់បង្គាប់ឲ្យយើងគោរពប្រតិបត្តិតាមដំណឹងល្អរបស់ទ្រង់ ដែលរួមបញ្ចូលទាំងសេចក្តីជំនឿលើទ្រង់ ការប្រែចិត្តពីអំពើបាបរបស់យើង ការទទួលពិធីបុណ្យជ្រមុជទឹក ការទទួលអំណោយទានជាព្រះវិញ្ញាណបរិសុទ្ធ និងការកាន់ខ្ជាប់ដរាបដល់ទីបំផុត ( សូមមើល យ៉ូហាន ៣:៣–៥, នីហ្វៃទី ៣ ២៧:១៦–២០, មាត្រានៃសេចក្ដីជំនឿ ១:៣–៤ ) ។ ព្យាការីមរ៉ូណៃបានសរសេរអំពីព្រះគុណ ដែលយើងទទួលបាននៅពេលដែលយើងមករកព្រះអង្គសង្គ្រោះ ហើយគោរពតាមការបង្រៀនរបស់ទ្រង់ដូចនេះ ៖

« ចូរមករកព្រះគ្រីស្ទ ហើយឲ្យបានល្អឥតខ្ចោះនៅក្នុងទ្រង់ ហើយចូរលះបង់ចោលនូវអស់ទាំងអំពើដ៏ឥតបរិសុទ្ធចុះ ហើយបើសិនជាអ្នករាល់គ្នានឹងលះបង់ចោលនូវអស់ទាំងអំពើដ៏ឥតបរិសុទ្ធ ហើយស្រឡាញ់ព្រះឲ្យអស់ពីសមត្ថភាព អស់ពីគំនិត និងអស់ពីកម្លាំងរបស់អ្នក នោះព្រះគុណរបស់ទ្រង់ល្មមដល់អ្នកហើយ ដោយសារព្រះគុណនៃព្រះ នោះអ្នករាល់គ្នាអាចបានល្អឥតខ្ចោះនៅក្នុងព្រះគ្រីស្ទ ហើយបើសិនជាដោយសារព្រះគុណនៃព្រះ ដែលអ្នករាល់គ្នាបានល្អឥតខ្ចោះនៅក្នុងព្រះគ្រីស្ទ នោះអ្នករាល់គ្នានឹងពុំអាចបដិសេធព្រះចេស្ដានៃព្រះបានឡើយ ។

ហើយម្យ៉ាងទៀត បើសិនជាដោយសារព្រះគុណនៃព្រះ ដែលអ្នករាល់គ្នាបានល្អឥតខ្ចោះនៅក្នុងព្រះគ្រីស្ទ ហើយពុំបានបដិសេធព្រះចេស្ដារបស់ទ្រង់ទេ នោះអ្នករាល់គ្នានឹងត្រូវបានញែកចេញជាបរិសុទ្ធនៅក្នុងព្រះគ្រីស្ទ ដោយសារព្រះគុណនៃព្រះ ដោយការច្រួច ព្រះលោហិតនៃព្រះគ្រីស្ទ ដែលមាននៅក្នុងសេចក្ដីសញ្ញានៃព្រះវរបិតា ចំពោះការផ្ដាច់បាបដល់អ្នករាល់គ្នា ដើម្បីឲ្យអ្នករាល់គ្នាបានបរិសុទ្ធដោយគ្មានប្រឡាក់អ្វីសោះឡើយ » ( មរ៉ូណៃ ១០:៣២–៣៣ ) ។

ការទទួលបានព្រះគុណពេញមួយជីវិតរបស់អ្នក

បន្ថែមពីលើសេចក្តីត្រូវការឲ្យមានព្រះគុណដើម្បីឲ្យមានសេចក្តីសង្គ្រោះដ៏គ្មានព្រំដែនរបស់អ្នក នោះអ្នកត្រូវការព្រះចេស្តាដ៏មានប្រសិទ្ធិភាពនេះ ជារៀងរាល់ថ្ងៃក្នុងជីវិតរបស់អ្នក ។ នៅពេលអ្នកខិតទៅជិតព្រះវរបិតាសួគ៌ដោយសេចក្តីឧស្សាហ៍ ភាពរាបសា និងឱនលំទោន នោះទ្រង់នឹងលើកអ្នកឡើង ព្រមទាំងពង្រឹងអ្នកតាមរយៈព្រះគុណរបស់ទ្រង់ ( សូមមើល សុភាសិត ៣:៣៤, ពេត្រុស ទី១ ៥:៥, គ. និង ស. ៨៨:៧៨, ១០៦:៧–៨ ) ។ ការពឹងផ្អែកលើព្រះគុណរបស់ទ្រង់អាចជួយអ្នកឲ្យរីកចម្រើន ហើយវិវឌ្ឍទៅមុខនៅក្នុងភាពសុចរិត ។ ព្រះយេស៊ូវទ្រង់ផ្ទាល់ « បានទទួលនូវភាពពោរពេញ ប៉ុន្តែបានព្រះគុណថែមលើព្រះគុណជាបន្តបន្ទាប់មក រហូតដល់ទ្រង់បានទទួលនូវភាពពោរពេញ » ( គ. និង ស. ៩៣:១៣ ) ។ ព្រះគុណអាចជួយយើងឲ្យសាងនគររបស់ព្រះ ជាការបម្រើមួយដែលអ្នកមិនអាចធ្វើបានដោយសារកម្លាំង ឬមធ្យោបាយរបស់អ្នកតែម្យ៉ាងបានឡើយ ( សូមមើល យ៉ូហាន ១៥:៥, ភីលីព ៤:១៣, ហេព្រើរ ១២:២៨, យ៉ាកុប ៤:៦–៧ ) ។

ប្រសិនបើអ្នកបាក់ទឹកចិត្ត ឬមានអារម្មណ៍ទន់ខ្សោយពេកក្នុងការបន្តរស់នៅតាមដំណឹងល្អ ចូរចងចាំពីកម្លាំងដែលអ្នកអាចទទួលបានតាមរយៈព្រះចេស្តានៃព្រះគុណ ។ អ្នកអាចស្វែងរកការលួងលោមចិត្ត និងការអះអាងនៅក្នុងព្រះបន្ទូលរបស់ព្រះអម្ចាស់ដែលថា « គុណរបស់យើងមានគ្រប់គ្រាន់សម្រាប់មនុស្សទាំងអស់ ដែលបន្ទាបខ្លួននៅចំពោះយើង ដ្បិតបើសិនជាពួកគេបន្ទាបខ្លួននៅចំពោះយើង ហើយមានសេចក្ដីជំនឿជឿដល់យើង លំដាប់នោះ យើងនឹងធ្វើឲ្យអ្វីដែលទន់ខ្សោយក្លាយទៅជាខ្លាំងពូកែចំពោះពួកគេវិញ » ( អេធើរ ១២:២៧ ) ។