យ៉ូសែប ស៊្មីធ

ក្នុងនិទាឃរដូវឆ្នាំ ១៨២០ ក្នុងវ័យ ១៤ឆ្នាំ យ៉ូសែប ស្ម៊ីធ បានស្វែងរកសាសនាចក្រព្រះយេស៊ូវគ្រីស្ទដ៏ពិត ជាពេលដែលលោកបានអានវគ្គបទគម្ពីរនៅក្នុងព្រះគម្ពីរប៊ីប ៖ « តែបើអ្នករាល់គ្នាណាមួយខ្វះប្រាជ្ញា មានតែសូមដល់ព្រះ ដែលទ្រង់ប្រទានដល់មនុស្សទាំងអស់ដោយសទ្ធា ឥតបន្ទោសផង នោះទ្រង់នឹងប្រទានឲ្យ » ( យ៉ាកុប ១:៥, សូមមើលផងដែរ យ៉ូសែប ស្ម៊ីធ—ប្រវត្តិ ១:១១–១២ ) ។ ដោយមានសេចក្ដីជំនឿសាមញ្ញ មិនងាករេ នោះយុវជន យ៉ូសែប បានធ្វើតាមដំបូន្មាននៅក្នុងវគ្គបទគម្ពីរនេះ ។ លោកបានដើរចូលក្នុងព្រៃតែឯង ជាកន្លែងដែលលោកបានអធិស្ឋានដើម្បីដឹងថាសាសនាចក្រណាមួយដែលលោកគួរតែចូលរួម ។ នៅក្នុងចម្លើយចំពោះការអធិស្ឋានរបស់លោក ព្រះជាព្រះវរបិតា និងព្រះរាជបុត្រាទ្រង់ ព្រះយេស៊ូវគ្រីស្ទ បានយាងមកជួបលោក ។ ក្នុងចំណោមសេចក្ដីទាំងអម្បាលម៉ាន ទ្រង់ទាំងពីរអង្គក៏បានមានព្រះបន្ទូលទៅកាន់លោកថា លោកមិនគួរចូលរួមសាសនាចក្រណាមួយឡើយ ។ ( សូមមើល យ៉ូសែប ស្ម៊ីធ—ប្រវត្តិ ១:១៣–២០ ) ។

នៅពេល យ៉ូសែប ស៊្មីធ បានបង្ហាញឲ្យឃើញថាលោកមានភាពសក្ដិសម នោះលោកបានទទួលបេសកកម្មដ៏ទេវភាពមួយដើម្បីធ្វើជាព្យាការីរបស់ព្រះ ។ តាមរយៈរូបលោក ព្រះអម្ចាស់បានសម្រេចកិច្ចការដ៏មហិមា និងអស្ចារ្យ រួមមានការនាំមកនូវព្រះគម្ពីរមរមន ការស្ដារបព្វជិតភាពឡើងវិញ ការបើកសម្ដែងសេចក្ដីពិតនៃដំណឹងល្អឡើងវិញ ការរៀបចំសាសនាចក្រនៃព្រះយេស៊ូវគ្រីស្ទដ៏ពិត និង ការស្ថាបនាកិច្ចការព្រះវិហារបរិសុទ្ធ ។ នៅថ្ងៃទី ២៧ ខែ មិថុនា ឆ្នាំ ១៨៤៤ យ៉ូសែប ស្ម៊ីធ និង បងប្រុសរបស់លោកគឺ ហៃរុម ត្រូវបានគេធ្វើឃាតនៅក្នុងការវាយប្រហារមួយដោយក្រុមចោរប្រដាប់អាវុធមួយក្រុម ។ ពួកលោកបានបញ្ចប់ទីបន្ទាល់ជាមួយនឹងលោហិតរបស់ពួកលោក ។

ដើម្បីឲ្យទីបន្ទាល់របស់អ្នកអំពីដំណឹងល្អដែលបានស្ដារឡើងវិញមានភាពពេញលេញ វាត្រូវតែបញ្ចូលទីបន្ទាល់មួយអំពីបេសកកម្មដ៏ទេវភាពរបស់ យ៉ូសែប ស៊្មីធ ។ ភាពពេញលេញរបស់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយឈរនៅលើភាពពេញលេញនៃការនិមិត្តដំបូង និង វិវរណៈដទៃទៀតដែលព្រះអម្ចាស់បានប្រទានដល់ព្យាការី យ៉ូសែប ។ ប្រធាន យ៉ូហាន ថេលើរ ជាប្រធានទីបីនៃសាសនាចក្របានសរសេរថា « យ៉ូសែប ស៊្មីធ ដែលជាព្យាការី និង អ្នកមើលឆុតរបស់ព្រះអម្ចាស់បានធ្វើកិច្ចការជាច្រើន ដើម្បីនាំឲ្យមានសេចក្ដីសង្គ្រោះដល់មនុស្សជាងនរណាៗទាំងអស់ដែលធ្លាប់រស់នៅលើផែនដីនេះ លើកលែងតែព្រះយេស៊ូវគ្រីស្ទប៉ុណ្ណោះ » ( គ. និង ស. ១៣៥:៣ ) ។