ការវិនិច្ឆ័យមនុស្សដទៃ

ពេលខ្លះមនុស្សមានអារម្មណ៍ថា វាខុសក្នុងការវិនិច្ឆ័យអ្នកដទៃ ទោះជាតាមវិធីណាក៏ដោយ ។ ខណៈវាត្រឹមត្រូវដែលអ្នកមិនគួរកាត់ទោសអ្នកដ៏ទៃ ឬវិនិច្ឆ័យពួកគេដោយអយុត្តិធម៌ នោះអ្នកនឹងត្រូវធ្វើការវិនិច្ឆ័យពីគំនិត ពីស្ថានភាព និង ពីមនុស្សពេញមួយឆាកជីវិតរបស់អ្នក ។ ព្រះអម្ចាស់បានប្រទានព្រះបញ្ញត្តិជាច្រើន ដែលអ្នកមិនអាចគោរពតាមបានទេ បើអ្នកមិនធ្វើការវិនិច្ឆ័យទេនោះ ។ ឧទាហរណ៍ ទ្រង់បានមានព្រះបន្ទូលថា « ចូរប្រយ័ត្ននឹងពួកគ្រូក្លែងក្លាយ ។ … អ្នករាល់គ្នានឹងស្គាល់គេបាន ដោយសារផលគេបង្កើត » ( ម៉ាថាយ ៧:១៥–១៦ ) និង « ចូរអ្នករាល់គ្នាចេញពីចំណោមពួកទុច្ចរិតទៅ » ( គ. និង ស. ៣៨:៤២ ) ។ អ្នកចាំបាច់ត្រូវធ្វើការវិនិច្ឆ័យលើមនុស្សនៅក្នុងការសម្រេចចិត្តសំខាន់ជាច្រើនដូចជា ការជ្រើសរើសមិត្តភក្ដិ ការបោះឆ្នោតជ្រើសរើសថ្នាក់ដឹកនាំរដ្ឋាភិបាល និងការជ្រើសរើសដៃគូដ៏នៅអស់កល្បជានិច្ច ។

ការវិនិច្ឆ័យគឺជាការប្រើសេរីភាពយ៉ាងសំខាន់របស់អ្នក ហើយតម្រូវឲ្យមានការយកចិត្តទុកដាក់យ៉ាងខ្លាំងក្លា ជាពិសេសពេលដែលអ្នកធ្វើការវិនិច្ឆ័យលើមនុស្សដទៃទៀត ។ ការវិនិច្ឆ័យទាំងអស់របស់អ្នកត្រូវតែបានដឹកនាំដោយបទដ្ឋានសុចរិត ។ ចូរចងចាំថា មានតែព្រះទ្រង់មួយអង្គគត់ដែលអាចជំនុំជម្រះដល់បុគ្គលទាំងអស់បាន ព្រោះទ្រង់ជ្រាបពីដួងចិត្តនៃបុគ្គលម្នាក់ៗ ( សូមមើល វិវរណៈ ២០:១២, នីហ្វៃទី ៣ ២៧:១៤, គ. និង ស. ១៣៧:៩ ) ។

ព្រះអម្ចាស់បានប្រទានការព្រមានមួយ ដើម្បីដឹកនាំយើងក្នុងការវិនិច្ឆ័យលើមនុស្សដទៃដូចនេះ ៖ « ដោយនូវការថ្កោលទោសណា ដែលអ្នករាល់គ្នាថ្កោលទោស នោះអ្នករាល់គ្នានឹងត្រូវថ្កោលទោសវិញយ៉ាងនោះដែរ ហើយដោយនូវរង្វាល់ណាដែលអ្នករាល់គ្នាវាល់ នោះនឹងត្រូវវាល់ឲ្យអ្នករាល់គ្នា វិញយ៉ាងនោះដែរ ។ ហើយហេតុអ្វីបានជាអ្នកមើលឃើញកម្ទេច ដែលនៅក្នុងភ្នែករបស់បងប្អូនអ្នក តែមិនឃើញធ្នឹមដែលនៅក្នុងភ្នែករបស់ខ្លួនសោះដូច្នេះ ? ឬធ្វើដូចម្ដេចឲ្យអ្នកនិយាយនឹងបងប្អូនថា ចូរឲ្យខ្ញុំយកកម្ទេចពីភ្នែកអ្នកចេញ—ប៉ុន្តែមើលចុះ មានធ្នឹមនៅក្នុងភ្នែកខ្លួនអ្នកវិញ ? អ្នកមានពុតអើយ ចូរយកធ្នឹមពីភ្នែករបស់ខ្លួនចេញជាមុនសិន នោះទើបនឹងបានឃើញច្បាស់ អាចនឹងយកកម្ទេចចេញពីភ្នែករបស់បងប្អូនអ្នកបានដែរ » ( នីហ្វៃទី ៣ ១៤:២–៥ ) ។

នៅក្នុងវគ្គបទគម្ពីរនេះ ព្រះអម្ចាស់ត្រាស់បង្រៀនថា ភាពខុសឆ្គងដែលយើងឃើញនៅក្នុងមនុស្សដទៃ ជាញឹកញាប់ គឺជាចំណុចដ៏តូចមួយនៅក្នុងភ្នែករបស់បុគ្គលនោះ បើប្រៀបធៀបមកកំហុសឆ្គងរបស់យើង វាជាចំណុចមួយដ៏ធំនៅក្នុងភ្នែករបស់យើង ។ ពេលខ្លះ យើងផ្ដោតអារម្មណ៍ទៅលើកំហុសឆ្គងរបស់មនុស្សដទៃ នៅពេលដែលយើងគួរតែខិតខំកែម្អខ្លួនឯងទៅវិញ ។

ការវិនិច្ឆ័យដ៏សុចរិតរបស់អ្នកលើមនុស្សដទៃអាចផ្ដល់នូវការដឹកនាំចាំបាច់ដល់ពួកគេ ក្នុងករណីខ្លះ ផ្ដល់នូវការការពារដល់អ្នក និងគ្រួសារអ្នក ។ ចូរធ្វើការវិនិច្ឆ័យនានាដោយចិត្តខ្វាយខ្វល់ និងការអាណិតអាសូរ ។ ចូរធ្វើឲ្យអស់ពីសមត្ថភាពរបស់អ្នក នៅពេលអ្នកវិនិច្ឆ័យលើស្ថានភាពរបស់មនុស្សជាជាងវិនិច្ឆ័យលើខ្លួនពួកគេ ។ ពេលណាដែលអាចធ្វើទៅបាន ចូរចៀសវាងពីការវិនិច្ឆ័យនានា លុះត្រាតែអ្នកមានចំណេះដឹងគ្រប់គ្រាន់ល្មមអំពីព្រឹត្តិការណ៍នោះជាមុនសិន ។ ចូររហ័សស្ដាប់តាមព្រះវិញ្ញាណបរិសុទ្ធ ជាអង្គដែលអាចដឹកនាំការសម្រេចចិត្តរបស់អ្នក ។ ចូរចងចាំអំពីដំបូន្មានរបស់អាលម៉ាទៅដល់កូនប្រុសរបស់លោកគឺ កូរីអានតុន « ចូរកូនមេត្តាករុណាដល់បងប្អូនរបស់កូនចុះ ចូររាប់រកគ្នាដោយយុត្តិធម៌ វិនិច្ឆ័យដោយសុចរិត ហើយធ្វើល្អជានិច្ច » ( អាលម៉ា ៤១:១៤ ) ។