អាពាហ៍ពិពាហ៍

នៅក្នុងពិភពលោកសព្វថ្ងៃនេះ មានមនុស្សជាច្រើនបំភ្លេចចោល និងសើចចំអកដល់អាពាហ៍ពិពាហ៍ និងក្រុមគ្រួសារ ។ នៅក្នុងចំណោមគំនិតដ៏ភាន់ច្រឡំ និងដ៏មហន្តរាយនេះ គណៈប្រធានទីមួយ និងកូរ៉ុមនៃពួកសាវកដប់ពីរនាក់បានផ្តល់នូវគំនិតនៃសេចក្ដីពិតដ៏មិនផ្លាស់ប្ដូរមួយ ។ ពួកលោក « បានប្រកាសដោយឧឡារិកថា អាពាហ៍ពិពាហ៍រវាងបុរស និង ស្ត្រីគឺត្រូវបានតែងតាំងឡើងដោយព្រះ ហើយថាគ្រួសារជាផ្នែកដ៏សំខាន់មួយនៅក្នុងផែនការរបស់ព្រះដ៏បង្កបង្កើតសម្រាប់គោលដៅដ៏នៅអស់កល្បជានិច្ចនៃកូនចៅរបស់ទ្រង់ » ( សូមមើល « ក្រុមគ្រួសារ ៖ ការប្រកាសដល់ពិភពលោក ទំព័រ ៥៩ នៅក្នុងសៀវភៅនេះ ) ។

អំណរធំជាងគេបំផុតនៅក្នុងជីវិតកើតមាននៅក្នុងក្រុមគ្រួសារ ។ ទំនាក់់ទំនងគ្រួសារដ៏រឹងមាំមួយតម្រូវឲ្យមានកិច្ចខិតខំ ហើយកិច្ចខិតខំបែបនោះនាំមកនូវសុភមង្គលដ៏អស្ចារ្យនៅក្នុងជីវិតនេះ និងជីវិតដ៏នៅអស់កល្បជានិច្ច ។ ទោះបីជាអ្នកគ្មានក្រុមគ្រួសារដែលសប្បាយរីករាយនៅអតីតកាលក៏ដោយ ក៏អ្នកអាចស្វែងរកអាពាហ៍ពិពាហ៍ដ៏នៅអស់កល្បជានិច្ច និងដ៏រីករាយមួយ ព្រមទាំងទំនាក់ទំនងនៃក្ដីស្រឡាញ់ជាមួយសមាជិកគ្រួសារបានដែរ ។

សេចក្តីសញ្ញាថ្មី ហើយអស់កល្បអស់កាលជានិច្ចនៃអាពាហ៍ពិពាហ៍

នៅក្នុងផែនការនៃសុភមង្គលរបស់ព្រះវរបិតាសួគ៌របស់យើង បុរស និងស្ត្រីអាចផ្សារភ្ជាប់ជាមួយគ្នាសម្រាប់ភាពអស់កល្បជានិច្ច ។ អ្នកទាំងឡាយណាដែលបានផ្សារភ្ជាប់នៅក្នុងព្រះវិហារបរិសុទ្ធ មានការធានាអះអាងថា ទំនាក់ទំនងរបស់ពួកគេនឹងបន្តជារៀងរហូត ប្រសិនបើពួកគេស្មោះត្រង់ចំពោះសេចក្តីសញ្ញារបស់ពួកគេ ។ ពួកគេដឹងថា គ្មានអ្វីណាមួយ សូម្បីតែសេចក្ដីស្លាប់ក្ដីក៏មិនអាចបំបែកពួកគេចេញពីគ្នាជារៀងរហូតបានឡើយ ។

សេចក្តីសញ្ញានៃអាពាហ៍ពិពាហ៍អស់កល្បអស់កាលជានិច្ច មានភាពចាំបាច់ចំពោះភាពតម្កើងឡើង ។ ព្រះអម្ចាស់បានបើកសម្ដែងតាមរយៈ យ៉ូសែប ស៊្មីធ ថា « នៅក្នុងសិរីល្អខាងសេឡេស្ទាលនោះមានស្ថានសួគ៌ ឬលំដាប់បី ហើយដើម្បីឲ្យបានលំដាប់ខ្ពស់បំផុត នោះមនុស្សត្រូវចូលក្នុងរបៀបនៃបព្វជិតភាពនេះ [ មានន័យដល់សេចក្ដីសញ្ញាថ្មី ហើយអស់កល្បអស់កាលជានិច្ចខាងអាពាហ៍ពិពាហ៍ ] ហើយបើសិនជាគេពុំចូលទេ នោះគេពុំអាចបានលំដាប់នោះឡើយ ។ គេអាចចូលលំដាប់ផ្សេងទៀតបាន ប៉ុន្តែនោះហើយជាទីបញ្ចប់នៃនគររបស់គេ គេពុំអាចបានភាពចម្រើនឡើយ » ( គ. និង ស. ១៣១:១–៤ ) ។

បន្ទាប់ពីបានទទួលពិធីបរិសុទ្ធផ្សារភ្ជាប់ និងការធ្វើសេចក្តីសញ្ញាពិសិដ្ឋនៅក្នុងព្រះវិហារបរិសុទ្ធហើយ គូស្វាមីភរិយាត្រូវតែបន្តស្មោះត្រង់ ដើម្បីទទួលបានពរជ័យនៃអាពាហ៍ពិពាហ៍អស់កល្បអស់កាលជានិច្ច និងភាពតម្កើងឡើង ។ ព្រះអម្ចាស់បានមានព្រះបន្ទូលដូចនេះ ៖

« បើសិនជាបុរសណាមួយរៀបការប្រពន្ធ ដោយព្រះបន្ទូលយើង ដែលជាក្រឹត្យវិន័យរបស់យើង និងដោយសេចក្ដីសញ្ញាថ្មី និងដ៏នៅអស់កល្បអស់កាលជានិច្ច ហើយសេចក្ដីសញ្ញានោះបានភ្ជាប់ដល់ពួកគេ ដោយព្រះ វិញ្ញាណបរិសុទ្ធនៃសេចក្ដីសន្យា ដោយអ្នកណាដែលត្រូវបានលាប ដែលយើងបានតែងតាំងឡើងចំពោះអំណាចនេះ និងកូនសោទាំងឡាយនៃបព្វជិតភាពនេះ … ហើយបើសិនជា [ ពួកគេ ] នៅជាប់ក្នុងសេចក្ដីសញ្ញារបស់យើង … នោះនឹងបានសម្រេចដល់ពួកគេចំពោះគ្រប់ការណ៍ទាំងអស់ ដែលអ្នកបម្រើរបស់យើងបានភ្ជាប់ទៅលើពួកគេ ក្នុងកាលវេលា និងរហូតដល់អស់ទាំងភាពអស់កល្បជានិច្ចផង ហើយនឹងមានប្រសិទ្ធិភាពពេញលេញកាល ពួកគេចាកចេញពីលោកិយទៅ » ( គ. និង ស. ១៣២:១៩ ដើម្បីមើលការពន្យល់អំពីព្រះវិញ្ញាណបរិសុទ្ធនៃសេចក្ដីសន្យា សូមមើល ទំព័រ ៨២ ) ។

ការរៀបចំខ្លួនសម្រាប់អាពាហ៍ពិពាហ៍

ប្រសិនបើអ្នកនៅលីវ ចូររៀបចំខ្លួនរបស់អ្នកដោយប្រុងប្រយ័ត្នសម្រាប់អាពាហ៍ពិពាហ៍ ។ ចូរចងចាំថា គ្មានអ្វីជំនួសឲ្យការរៀបអាពាហ៍ពិពាហ៍នៅក្នុងព្រះវិហារបរិសុទ្ធបានទេ ។ ចូររៀបចំខ្លួនដើម្បីរៀបការជាមួយនឹងមនុស្សដែលសក្តិសមនឹងអ្នកក្នុងកន្លែងដែលសមរម្យ និងតាមពេលវេលាដ៏សក្ដិសម ។ ចូររស់នៅដោយមានភាពសក្តិសមឥឡូវនេះ តាមរបៀបនៃប្រភេទមនុស្ស ដែលអ្នកសង្ឃឹមថានឹងរៀបការជាមួយ ។

ចូរដើរលេងជាគូតែជាមួយអ្នកទាំងឡាយណា ដែលមានបទដ្ឋានសីលធម៌ខ្ពស់ និងនៅក្នុងក្រុម ដែលអ្នកអាចរក្សាបាននូវបទដ្ឋានរបស់អ្នកបាន ។ ចូរដាក់ផែនការធ្វើកម្មវិធីល្អៗ និងមានប្រយោជន៍ ដើម្បីកុំឲ្យអ្នក និងដៃគូដើរលេងរបស់អ្នក គ្មានការងារធ្វើ ហើយនៅតែពីរនាក់ ។ ចូរនៅទីកន្លែងណាដែលមានសុវត្ថិភាព ជាកន្លែងដែលអ្នកអាចគ្រប់គ្រងខ្លួនឯងបានយ៉ាងងាយ ។ ចូរកុំចូលរួមក្នុងកិច្ចសន្ទនា ឬសកម្មភាពទាំងឡាយ ដែលដាស់អារម្មណ៍ខាងផ្លូវភេទ ។

ចូរស្វែងរកដៃគូដែលមានសេចក្តីជំនឿដូចអ្នក ។ ចូរស្វែងរកនរណាម្នាក់ដែលជានិច្ចជាកាល អ្នកអាចផ្តល់នូវកិត្តិយស និងការគោរព ជាបុគ្គលដែលនឹងលើកស្ទួយអ្នកនៅក្នុងជីវិត ។ ពីមុនអ្នករៀបការ ចូរប្រាកដថា អ្នកបានរកឃើញនរណាម្នាក់ ដែលអ្នកអាចប្រគល់បេះដូងទាំងមូល សេចក្ដីស្រឡាញ់ទាំងស្រុង ភក្តីភាពទាំងអស់ និងភាពស្មោះត្រង់ទាំងអស់របស់អ្នក ។

ដំបូន្មានសម្រាប់អ្នកទាំងឡាយណាដែលមិនទាន់រៀបការ

សមាជិកខ្លះនៃសាសនាចក្រនៅតែបន្តនៅលីវដោយពួកគេគ្មានកំហុសសោះ ទោះបីជាពួកគេចង់រៀបការក៏ដោយ ។ ប្រសិនបើអ្នកឃើញខ្លួនអ្នកស្ថិតនៅក្នុងស្ថានភាពនេះ សូមប្រាកដថា « គ្រប់ការណ៍ទាំងអស់ផ្សំគ្នាសម្រាប់សេចក្តីល្អ ដល់ពួកអ្នកដែលស្រឡាញ់ព្រះ » ( រ៉ូម ៨:២៨ ) ។ នៅពេលអ្នកបន្ដមានភាពសក្ដិសម នោះនៅថ្ងៃណាមួយ នៅក្នុងជីវិតនេះ ឬជីវិតបន្ទាប់ អ្នកនឹងបានពរជ័យទាំងឡាយនៃទំនាក់ទំនងគ្រួសារដ៏អស់កល្ប ។ ព្រះអម្ចាស់បានប្រទានសេចក្តីសន្យានេះម្តងហើយម្តងទៀត តាមរយៈពួកព្យាការីថ្ងៃចុងក្រោយរបស់ទ្រង់ ។

ប្រសិនបើអ្នកនៅលីវ ហើយមានបំណងរៀបការ ចូរកុំបោះបង់ចោលសេចក្តីសង្ឃឹម ។ នៅគ្រានោះដែរ ចូរកុំបណ្តោយខ្លួនអ្នកជាប់រវល់ខ្លាំងពេកជាមួយនឹងគោលដៅរបស់អ្នក ។ ផ្ទុយទៅវិញ អ្នកត្រូវឧស្សាហ៍ចូលរួមនៅក្នុងសកម្មភាពដែលមានប្រយោជន៍វិញ ។ ចូរស្វែងរកវិធីដើម្បីបម្រើដល់សាច់ញាតិជិតឆ្ងាយរបស់អ្នក និងក្នុងសហគមន៍របស់អ្នក ។ ចូរទទួលយក ហើយតម្កើងការហៅបម្រើនៅក្នុងសាសនាចក្រ ។ ចូររក្សាខ្លួនអ្នកឲ្យបានស្អាតស្អំ ទាំងខាងសាច់ឈាម និងខាងវិញ្ញាណ ។ ចូរបន្តរៀន អភិវឌ្ឍ ហើយរីកចម្រើននៅក្នុងជីវិតផ្ទាល់ខ្លួន ។

ការសម្រេចបានអាពាហ៍ពិពាហ៍ដ៏រីករាយមួយ

ប្រសិនបើអ្នករៀបការរួចហើយ ចូរចងចាំថា មិត្តភាព និងសេចក្តីស្រឡាញ់រវាងអ្នក និងស្វាមី/ភរិយាអ្នក គួរតែជាទំនាក់ទំនង ជាទីថ្នាក់ថ្នមបំផុតលើផែនដី ។ ស្វាមី/ភរិយារបស់អ្នកគឺជាមនុស្សដែលក្រៅពីព្រះអម្ចាស់ ដែលអ្នកត្រូវបានត្រាស់បង្គាប់ឲ្យស្រឡាញ់អស់ពីដួងចិត្តរបស់អ្នក ( សូមមើល គ. និង ស. ៤២:២២ ) ។

ចូរចងចាំថា ក្នុងន័យដ៏ត្រឹមត្រូវបំផុត អាពាហ៍ពិពាហ៍គឺភាពជាដៃគូស្មើគ្នា ដោយគ្មាននរណាម្នាក់អនុវត្តអំណាចទៅលើនរណាម្នាក់ទៀតឡើយ ប៉ុន្តែជាការលើកទឹកចិត្ត ការលួងលោមចិត្ត និងការជួយគ្នាទៅវិញទៅមកវិញ ។

ដោយសារអាពាហ៍ពិពាហ៍គឺជាទំនាក់ទំនងសំខាន់ដល់ម៉្លេះនៅក្នុងជីវិត ទើបអាពាហ៍ពិពាហ៍ត្រូវការពេលវេលា ។ ចូរកុំដាក់អាទិភាពខ្ពស់ទៅការតាំងចិត្តដែលមិនសូវសំខាន់ ។ ចូរចំណាយពេលនិយាយជាមួយគ្នា ហើយស្តាប់គ្នាទៅវិញទៅមក ។ ចូរគិតគូរឲ្យបានវែងឆ្ងាយ និងគោរពគ្នា ។ ចូរបង្ហាញអារម្មណ៍ទន់ភ្លន់ និងសេចក្តីស្រឡាញ់ជាញឹកញាប់ ។

ចូរប្តេជ្ញាចិត្តកុំឲ្យមានអ្វីមកជ្រៀតជ្រែកអ្នក និងស្វាមី/ភរិយារបស់‏អ្នក ដើម្បីបង្អាក់អាពាហ៍ពិពាហ៍របស់អ្នកឡើយ ។ ចូរដោះស្រាយបញ្ហា ដើម្បីធ្វើឲ្យអាពាហ៍ពិពាហ៍របស់អ្នកបានជោគជ័យ ថ្វីបើមានឧបសគ្គអាចកើតមានឡើងក៏ដោយ ។

ចូរមានភាពស្មោះត្រង់ចំពោះគ្នាទៅវិញទៅមក ។ ចូរមានសេចក្តីស្មោះត្រង់ចំពោះសេចក្តីសញ្ញាអាពាហ៍ពិពាហ៍របស់អ្នកនៅក្នុងគំនិត ក្នុងពាក្យសម្ដី និងក្នុងទង្វើ ។ ចូរចងចាំបន្ទូលដែលព្រះអម្ចាស់បានមានព្រះបន្ទូលថា « អ្នកត្រូវស្រឡាញ់ប្រពន្ធរបស់ខ្លួន ឲ្យអស់អំពីចិត្ត ហើយត្រូវនៅជាប់នឹងនាង ហើយគ្មាននរណាទៀតឡើយ » ( គ. និង ស. ៤២:២២ ) ។ ឃ្លា « គ្មាននរណាទៀត » បង្រៀនថា គ្មានបុគ្គល សកម្មភាព ឬកម្មសិទ្ធណា ដែលនឹងមានអាទិភាពខ្លាំងជាងទំនាក់ទំនងជាមួយស្វាមី/ភរិយារបស់អ្នកឡើយ ។

ចូរនៅឲ្យឆ្ងាយពីអ្វីដែលអាចដឹកនាំអ្នកមិនឲ្យមានសេចក្តីស្មោះត្រង់ ទោះជានៅក្នុងរបៀបណាក៏ដោយ ។ ការណ៍អាសគ្រាម គំនិតរវើរវាយមិនសមរម្យ ព្រមទាំងការចែចង់នឹងធ្វើឲ្យបុគ្គលិកលក្ខណៈខូចខាត និងបំផ្លាញបន្តិចម្តងៗ នូវគ្រឹះនៃអាពាហ៍ពិពាហ៍របស់អ្នក ។

ចូរធ្វើការជាមួយគ្នាដើម្បីគ្រប់គ្រងប្រាក់កាសរបស់អ្នក ។ ចូរពួតដៃគ្នាក្នុងការស្ថាបនា និងធ្វើតាមគម្រោងថវិកាដែលបានចាត់ចែងនោះ ។ ចូរមានវិន័យផ្ទាល់ខ្លួនក្នុងការចំណាយ និងចៀសវាងសេវកភាពនៃបំណុល ។ ការគ្រប់គ្រងប្រាក់ដ៏ឆ្លាតវៃ និងការមិនជាប់បំណុលនាំឲ្យមានសេចក្តីសុខសាន្តនៅក្នុងផ្ទះ ។

ចូរដាក់ខ្លួនរបស់អ្នកនៅត្រង់ចំណុចកណ្តាលដំណឹងល្អនៃព្រះយេស៊ូវគ្រីស្ទ ។ ចូរជួយគ្នាទៅវិញទៅមកឲ្យរក្សាសេចក្តីសញ្ញាដែលអ្នកបានធ្វើ ។ ចូរទៅព្រះវិហារ និងចូលព្រះវិហារបរិសុទ្ធជាមួយគ្នា ។ ចូរសិក្សាព្រះគម្ពីរជាមួយគ្នា ។ ចូរលុតជង្គង់ចុះក្នុងការអធិស្ឋាននៅពេលចាប់ផ្តើម និងនៅទីបញ្ចប់នៃថ្ងៃនីមួយៗ ដើម្បីថ្លែងអំណរគុណដល់ព្រះវរបិតាសួគ៌សម្រាប់គ្នាទៅវិញទៅមក និងសាមគ្គីភាពក្នុង ការទូលសូមពរជ័យពីទ្រង់នៅក្នុងជីវិតរបស់អ្នក គេហដ្ឋានរបស់អ្នក មនុស្សដែលអ្នកស្រឡាញ់ និងបំណងប្រាថ្នាដ៏សុចរិតរបស់អ្នក ។ បន្ទាប់មក ព្រះនឹងដឹកនាំអ្នក រីឯការសន្ទនាជារៀងរាល់ថ្ងៃជាមួយទ្រង់នឹងនាំមកនូវភាពសុខសាន្ត និងអំណរដែលគ្មានប្រភពណាផ្សេងទៀតអាចផ្ដល់បានឡើយ ។ ភាពជាស្វាមី/ភរិយារបស់អ្នកនឹងកាន់តែមានភាពផ្អែមល្ហែមឡើងឆ្លងកាត់រាប់ឆ្នាំ ហើយសេចក្ដីស្រឡាញ់របស់អ្នកនឹងមានកាន់តែច្រើន ។ អំណរគុណរបស់អ្នកចំពោះគ្នាទៅវិញទៅមកនឹងកើនឡើង ។