សហស្សវត្សរ៍

សហស្សវត្សរ៍គឺជារយៈពេល ១០០០ ឆ្នាំ ។ នៅពេលយើងនិយាយអំពី « សហស្សវត្សរ៍ » យើងសំដៅទៅលើរយៈពេល ១០០០ ឆ្នាំ បន្ទាប់ពីការយាងមកជាលើកទីពីររបស់ព្រះអង្គសង្គ្រោះ ( សូមមើល វិវរណៈ ២០:៤, គ. និង ស. ២៩:១១ ) ។ អំឡុងពេលសហស្សវត្សរ៍ « ព្រះគ្រីស្ទនឹងគ្រងរាជ្យនៅលើផែនដីផ្ទាល់ » ( មាត្រានៃសេចក្តីជំនឿ ១:១០ ) ។

សហស្សវត្សរ៍នឹងជាពេលមួយនៃសេចក្ដីសុចរិត និង សេចក្ដីសុខសាន្ដនៅលើផែនដីនេះ ។ ព្រះអម្ចាស់បានត្រាស់សម្ដែងថា « នៅថ្ងៃនោះ សេចក្ដីខ្មាំងនៃមនុស្ស និងសេចក្ដីខ្មាំងនៃសត្វទាំងឡាយ មែនហើយ គឺសេចក្ដីខ្មាំងនៃអស់ទាំងសាច់ឈាមនឹងឈប់មាន » ( គ. និង ស. ១០១:២៦, សូមមើលផងដែរ អេសាយ ១១:៦–៩ ) ។ អារក្សសាតាំងនឹងត្រូវបាន « ចង ប្រយោជន៍កុំឲ្យវាមានកន្លែងនៅក្នុងដួងចិត្តនៃកូនចៅមនុស្សឡើយ » ( គ. និង ស. ៤៥:៥៥. សូមមើលផងដែរ វិវរណៈ ២០:១–៣ ) ។

អំឡុងពេលសហស្សវត្សរ៍ មនុស្សទាំងអស់នៅលើផែនដីនឹងក្លាយជាមនុស្សល្អ និង ត្រឹមត្រូវ ប៉ុន្ដែមនុស្សជាច្រើននឹងពុំទាន់បានទទួលភាពពេញលេញនៃដំណឹងល្អឡើយ ។ ជាលទ្ធផល សមាជិកទាំងឡាយនៃសាសនាចក្រនឹងចូលរួមនៅក្នុងកិច្ចការផ្សព្វផ្សាយសាសនា ។

សមាជិកទាំងឡាយនៃសាសនាចក្រក៏នឹងចូលរួមនៅក្នុងកិច្ចការព្រះវិហារបរិសុទ្ធ អំឡុងពេលសហស្សវត្សរ៍ដែរ ។ ពួកបរិសុទ្ធទាំងឡាយនឹងបន្ដកសាងព្រះវិហារបរិសុទ្ធ និង ទទួលពិធីបរិសុទ្ធជំនួសឲ្យមរណញាតិរបស់ពួកគេ ។ ដោយបានណែនាំដោយវិវរណៈ ពួកគេនឹងរៀបចំកំណត់ត្រានៃបុព្វបុរសរបស់ពួកគេរហូតដល់ជំនាន់អ័ដាម និង អេវ៉ា ។

សេចក្ដីសុចរិត និង សេចក្ដីសុខសាន្ដពេញលេញនឹងបន្ដ រហូតដល់ចុងបញ្ចប់នៃ ១០០០ ឆ្នាំ ជាពេលដែលសាតាំង « ត្រូវបានស្រាយមួយរដូវខ្លី ប្រយោជន៍ឲ្យវាអាចប្រមូលពលទ័ពទាំងឡាយរបស់វា » ។ ពលទ័ពរបស់អារក្សសាតាំងនឹងឡើងមកច្បាំងនឹងពលទ័ពនៃស្ថានសួគ៌ ដែលនឹងដឹកនាំដោយមីកែល ឬ អ័ដាម ។ សាតាំង និងអ្នកដើរតាមវានឹងចាញ់ ហើយត្រូវបណ្ដេញចេញជារៀងរហូត ។ ( សូមមើល គ. និង ស. ៨៨:១១១–១១៥ ) ។