ភាពសមរម្យ

ភាពសមរម្យគឺជាឥរិយាបថនៃភាពរាបសា និងសុជីវធម៌ក្នុងការស្លៀកពាក់ ការតុបតែងខ្លួន ពាក្យសម្ដី និងឥរិយាបថ ។ ប្រសិនបើអ្នកមានភាពសមរម្យ នោះអ្នកនឹងពុំមានការចាប់អារម្មណ៍តែលើខ្លួនអ្នកច្រើនពេកទេ ។ ផ្ទុយទៅវិញ អ្នកព្យាយាម « តម្កើងព្រះនៅក្នុងរូបកាយ ហើយក្នុងវិញ្ញាណនៃអ្នករាល់គ្នា ដែលជារបស់ផងទ្រង់ » ( កូរិនថូស ទី១ ៦:២០, សូមមើលផងដែរ ខទី ១៩ ) ។

ប្រសិនបើអ្នកមិនប្រាកដអំពីថាតើការស្លៀកពាក់ ឬការតុបតែងខ្លួនរបស់អ្នកសមរម្យឬទេ នោះសូមសួរខ្លួនអ្នកថា « តើខ្ញុំមានអារម្មណ៍ទុកចិត្តអំពីខ្លួនរបស់ខ្ញុំឬទេ ប្រសិនបើខ្ញុំស្ថិតនៅក្នុងវត្តមានរបស់ព្រះអម្ចាស់ ? » អ្នកអាចសួរខ្លួនរបស់អ្នកនូវសំណួរស្រដៀងគ្នានេះដែរអំពីពាក្យសម្ដី និងឥរិយាបថរបស់អ្នកថា « តើខ្ញុំនឹងនិយាយពាក្យទាំងនេះ ឬចូលរួមក្នុងសកម្មភាពទាំងនេះឬទេ ប្រសិនបើព្រះអម្ចាស់មានវត្តមាននៅទីនេះ ? » ចម្លើយស្មោះត្រង់របស់អ្នកចំពោះ សំណួរទាំងនេះអាចដឹកនាំអ្នកឲ្យមានការផ្លាស់ប្ដូរសំខាន់ក្នុងជីវិតរបស់អ្នក ។ ចំណុចខាងក្រោមនេះនឹងជួយអ្នកក្នុងកិច្ចខិតខំដើម្បីមានភាពសមរម្យ ។

ការស្លៀកពាក់ និងការតុបតែងខ្លួន

ពួកព្យាការីតែងតែផ្ដល់ដំបូន្មានឲ្យយើងស្លៀកពាក់សមរម្យ ។ ដំបូន្មាននេះត្រូវបានរកឃើញក្នុងសេចក្តីពិតដែលថា រូបកាយរបស់មនុស្សគឺជាការបង្កបង្កើតដ៏ពិសិដ្ឋរបស់ព្រះ ។ ចូរគោរពដល់រូបកាយរបស់អ្នកទុកជាអំណោយមកពីព្រះ ។ តាមរយៈការស្លៀកពាក់ និង អាការៈខាងក្រៅរបស់អ្នក នោះអ្នកអាចបង្ហាញដល់ព្រះអម្ចាស់ថា អ្នកដឹងពីតម្លៃដ៏មហិមានៃរូបកាយរបស់អ្នក ។

ការស្លៀកពាក់របស់អ្នកបង្ហាញថាអ្នកជានរណា ។ វាបង្ហាញសារមួយប្រាប់អំពីអ្នក ហើយវាមានឥទ្ធិពលលើរបៀបដែលអ្នក និងមនុស្សដទៃប្រព្រឹត្ត ។ នៅពេលដែលអ្នកតុបតែងខ្លួន និង ស្លៀកពាក់សមរម្យ នោះអ្នកអញ្ជើញភាពជាដៃគូពីព្រះវិញ្ញាណបរិសុទ្ធ ហើយអ្នកអាចជះឥទ្ធិពលល្អលើមនុស្សជុំវិញខ្លួនអ្នក ។

គំនិតសំខាន់នៃការត្រាស់បង្គាប់ឲ្យមានភាពសមរម្យ គឺជាការយល់ដឹងពីអំណាចពិសិដ្ឋនៃការបង្កើតកូនចៅ ដែលជាសមត្ថភាពអាចនាំកូនចៅមកកាន់ពិភពលោក ។ អំណាចនេះត្រូវបានប្រើតែរវាងស្វាមី និងភរិយាតែប៉ុណ្ណោះ ។ ការស្លៀកពាក់មិនសមរម្យដែលរួមមាន ខោ និងសំពត់ខ្លីៗ សំលៀកបំពាក់រឹប អាវខ្លីចេញផ្ចិត អាចជំរុញឲ្យមានបំណងប្រាថ្នា និងសកម្មភាពល្មើសនឹងច្បាប់ព្រហ្មចារីភាពរបស់ព្រះអម្ចាស់ ។

បន្ថែមពីលើការចៀសវាងពីការស្លៀកពាក់មិនសមរម្យ អ្នកគួរតែចៀសវាងពីភាពជ្រុលនិយមទៅលើសម្លៀកបំពាក់ អាការៈខាងក្រៅ និងម៉ូដសក់ ។ ការស្លៀកពាក់ ការតុបតែងខ្លួន និងឥរិយាបទ ត្រូវតែស្អាតស្អំ និងស្អាតបាត មិនត្រូវមានសភាពមិនយកចិត្តទុកដាក់ ឬមិនសមរម្យនោះឡើយ ។ កុំបំផ្លាញរូបកាយរបស់អ្នកដោយការចាក់សាក់ ឬចោះលើរូបកាយឡើយ ។ ប្រសិនបើអ្នកជាស្ត្រី ឬយុវនារីចង់ចោះត្រចៀក ចូរពាក់ក្រវិលដែលសមរម្យមួយគូបានហើយ ។

ចូររក្សាបទដ្ឋានដ៏ខ្ពស់នៃភាពសមរម្យនៅក្នុងគ្រប់ឱកាសទាំងអស់ ។ ចូរកុំបន្ទាបបទដ្ឋានរបស់អ្នកដើម្បីទទួលបានចំណាប់អារម្មណ៍លើរូបកាយ ឬដើម្បីទទួលបានការពេញចិត្តពីមនុស្សដទៃឡើយ ។ សិស្សដ៏ពិតប្រាកដរបស់ព្រះយេស៊ូវគ្រីស្ទរក្សាបទដ្ឋានរបស់ព្រះអម្ចាស់ ទោះជាមានភាពទាន់សម័យ ឬសម្ពាធពីមនុស្សដទៃក៏ដោយ ។

ការនិយាយស្ដី និងឫកពារ

ក៏ដូចជាការស្លៀកពាក់ និងការតុបតែងខ្លួនដែរ នោះការនិយាយស្តី និងឫកពារ បង្ហាញពីលក្ខណៈសម្បត្តិរបស់អ្នក ។ ពាក្យសម្ដី និងទង្វើរបស់អ្នកអាចមានឥទ្ធិពលដ៏ខ្លាំងមួយចំពោះខ្លួនអ្នក និងមនុស្សដទៃ ។ ចូរសម្ដែងពីខ្លួនអ្នកតាមរយៈភាសា និងសកម្មភាពស្អាតស្អំ វិជ្ជមាន និងលើកតម្កើង ដែលនាំសុភមង្គលទៅដល់មនុស្សជុំវិញខ្លួនអ្នក ។ កិច្ចខិតខំដើម្បីមានភាពសមរម្យរបស់អ្នក ទាំងខាងពាក្យសម្ដី និងទង្វើ នាំឲ្យមានការណែនាំ និងការលួងលោមចិត្តមកពីព្រះវិញ្ញាណបរិសុទ្ធកាន់តែខ្លាំងឡើង ។

ចូរចៀសវាងពីការនិយាយស្ដីដែលកខ្វក់ និងគ្មានគិតពិចារណា ប្រើព្រះនាមព្រះដោយមិនគោរពកោតខ្លាច ដែលជារឿងទូទៅក្នុងពិភពលោក ។ ចូរតតាំងនឹងការល្បួងទាំងឡាយ ដែលនាំឲ្យចូលរួមនៅក្នុងឥរិយាបថជ្រុលនិយម ឬមិនសមរម្យ ។ ការមិនគោរពកោតខ្លាចនៅក្នុងការនិយាយស្ដី និងក្នុងឥរិយាបថធ្វើឲ្យសមត្ថភាពរបស់អ្នកចុះខ្សោយពីការទទួលបានការបំផុសគំនិតដ៏ទន់ភ្លន់ពីព្រះវិញ្ញាណបរិសុទ្ធ ។