ពិធីបរិសុទ្ធ

នៅក្នុងសាសនាចក្រ ពិធីបរិសុទ្ធគឺជាពិធីដ៏ពិសិដ្ឋ ជាផ្លូវការមួយ ដែលត្រូវបានធ្វើឡើងដោយសិទ្ធិអំណាចនៃបព្វជិតភាព ។ ពិធីបរិសុទ្ធខ្លះគឺចំាបាច់ចំពោះភាពលើកតម្កើងរបស់យើង ។ ពិធីបរិសុទ្ធទាំងនេះត្រូវបានហៅថា ពិធីបរិសុទ្ធនៃសេចក្ដីសង្គ្រោះ ។ វារួមមាននូវពិធីបុណ្យជ្រមុជទឹក ពិធីបញ្ជាក់ ការតែងតាំងដល់បព្វជិតភាពមិលគីស្សាដែក ( សម្រាប់បុរស ) អំណោយទានពិសិដ្ឋក្នុងព្រះវិហារបរិសុទ្ធ និង ពិធីផ្សារភ្ជាប់អាពាហ៍ពិពាហ៍ ។ ជាមួយនឹងពិធីបរិសុទ្ធនីមួយៗនៃពិធីបរិសុទ្ធទាំងនេះ យើងចូលទៅក្នុងសេចក្ដីសញ្ញាដ៏មុតមាំជាមួយព្រះអម្ចាស់ ។

ពិធីបរិសុទ្ធផ្សេងៗទៀតមានដូចជា ការដាក់ឈ្មោះ និងការប្រសិទ្ធពរទារក ការឧទ្ទិសប្រេង ហើយការព្យាបាលអ្នកឈឺ និងមានទុក្ខលំបាកក៏ត្រូវបានធ្វើឡើងដោយសិទ្ធិអំណាចបព្វជិតភាពដែរ ។ ទោះជាពិធីបរិសុទ្ធទាំងនោះពុំមានភាពចាំបាច់ក្នុងសេចក្ដីសង្គ្រោះរបស់យើងក្ដី ក៏ពិធីបរិសុទ្ធទាំងនោះមានសារៈសំខាន់ចំពោះការលួងលោមចិត្ត ការដឹកនាំ និងការលើកទឹកចិត្តដែរ ។

ពិធីបរិសុទ្ធ និងសេចក្ដីសញ្ញាទាំងឡាយជួយយើងឲ្យចងចាំថាតើយើងជានរណា ។ វារំឭកអំពីកាតព្វកិច្ចរបស់យើងដែលមានចំពោះព្រះ ។ ព្រះអម្ចាស់បានប្រទានពិធីបរិសុទ្ធទាំងនេះ ដើម្បីជួយយើងឲ្យមករកទ្រង់ ហើយទទួលបានជីវិតដ៏នៅអស់កល្បជានិច្ច ។ នៅពេលយើងឲ្យតម្លៃពិធីបរិសុទ្ធទាំងនោះ ទ្រង់នឹងពង្រឹងយើង ។

អ្នកអាចនឹងទទួលបានឱកាសដើម្បីចូលរួមក្នុងពិធីបរិសុទ្ធបព្វជិតភាពនានា ។ នៅពេលដែលអ្នកមានឱកាសដូចនេះ ចូរធ្វើឲ្យអស់ពីសមត្ថភាពដើម្បីរៀបចំខ្លួនអ្នក ទោះជាអ្នកធ្វើ ឬទទួលពិធីបរិសុទ្ធនេះក្ដី ។ អ្នកអាចរៀបចំខ្លួនតាមរយៈការអធិស្ឋាន ការតមអាហារ ការប្រឹក្សាជាមួយថ្នាក់ដឹកនាំបព្វជិតភាព ព្រមទាំងការសិក្សាព្រះគម្ពីរ និងប្រសាសន៍របស់ពួកព្យាការីថ្ងៃចុងក្រោយ ។ ប្រសិនបើអ្នកគឺជាអ្នកកាន់បព្វជិតភាព អ្នកគួរតែត្រៀមខ្លួនខាងវិញ្ញាណជានិច្ចដើម្បីធ្វើពិធីបរិសុទ្ធ ។ ចូររស់នៅក្នុងជីវិតស្អាតស្អំ សក្ដិសម និងព្យាយាមទទួលបានភាពជាដៃគូជាប់លាប់ជាមួយព្រះវិញ្ញាណបរិសុទ្ធ ។