ពាក្យប្រមាថ

ពាក្យប្រមាថគឺជាការមិនគោរព ឬជាការមើលងាយចំពោះវត្ថុពិសិដ្ឋទាំងឡាយ ។ វារួមមានការប្រើពាក្យឥតព្រៀងទុក ឬពាក្យគ្មានគារវភាពចំពោះព្រះនាមណាមួយក្នុងចំណោមក្រុមព្រះ ។ វាក៏រួមបញ្ចូលផងដែរនូវពាក្យសម្ដីអាសគ្រាម ឬពាក្យសម្ដីមិនស្អាតស្អំ ឬឥរិយាបទមិនសមរម្យ ។

ចូរប្រើព្រះនាមរបស់ព្រះវរបិតាសួគ៌ ព្រះយេស៊ូវគ្រីស្ទ និងព្រះវិញ្ញាណបរិសុទ្ធដោយគារវភាព និងសេចក្តីគោរព ។ ការប្រើព្រះនាមរបស់ទ្រង់ខុសឆ្គង គឺជាអំពើបាប ។ ពាក្យសម្ដី ឬកាយវិការប្រមាថ ភាសាអាសគ្រាម ឬពាក្យសម្ដីគ្រោតគ្រាត ព្រមទាំងការលេងសើចអសីលធម៌ គឺជាការប្រមាថដល់ព្រះអម្ចាស់ និងមនុស្សដទៃ ។

ពាក្យសម្ដីមិនល្អធ្វើឲ្យស្មារតីរបស់អ្នកខូច ព្រមទាំងបន្ទាបតម្លៃរបស់អ្នក ។ ចូរកុំឲ្យមនុស្សដទៃមានឥទ្ធិពលមកលើអ្នក ដើម្បីប្រើប្រាស់ភាសាមិនល្អឡើយ ។ ផ្ទុយទៅវិញ សូមប្រើប្រាស់ភាសាដែលលើកស្ទួយ ហើយតម្កើងដល់មនុស្សដទៃ ។ ចូរជ្រើសរើសមិត្តភក្ដិដែលប្រើពាក្យសម្ដីល្អៗ ។ ចូរធ្វើជាគំរូដើម្បីលើកទឹកចិត្តដល់អ្នកដែលនៅជុំវិញខ្លួនឲ្យប្រើភាសាស្អាតស្អំ ។ ប្រសិនបើមិត្តភក្តិ និង អ្នកស្គាល់គ្នាប្រើពាក្យប្រមាថ ចូរលើកទឹកចិត្តពួកគេដោយសន្តានចិត្តល្អឲ្យជ្រើសរើសពាក្យផ្សេងមកនិយាយ ។ ប្រសិនបើពួកគេជំទាស់ ចូរដើរចេញដោយសុភាព ឬផ្លាស់ប្តូរប្រធានបទ ។

ប្រសិនបើអ្នកបានបណ្តុះទម្លាប់ពោលពាក្យជេរ អ្នកអាចលុបបំបាត់វាចោលបាន ។ ចូរចាប់ផ្តើមដោយធ្វើការសម្រេចចិត្តផ្លាស់ប្ដូរ ។ ចូរអធិស្ឋានទូលសូមជំនួយ ។ ប្រសិនបើអ្នកត្រូវបានល្បួងឲ្យប្រើពាក្យប្រមាថ ចូររក្សាភាពស្ងប់ស្ងៀម ឬនិយាយអ្វីដែលអ្នកត្រូវនិយាយក្នុងរបៀបមួយផ្សេង ។