« ការបង្រៀនដំណឹងល្អ » ពិតចំពោះសេចក្តីជំនឿ ( ឆ្នាំ ២០០៤ ) ទំព័រ ១៦៨–១៧០
« ការបង្រៀនដំណឹងល្អ » ពិតចំពោះសេចក្តីជំនឿ ទំព័រ ១៦៨–១៧០
ការបង្រៀនដំណឹងល្អ
ព្រះអម្ចាស់បានមានព្រះបន្ទូលថា « យើងប្រទានដល់អ្នកនូវព្រះបញ្ញត្តិមួយថា អ្នកត្រូវបង្រៀនគ្នាទៅវិញទៅមកនូវគោលលទ្ធិនៃនគរ ។ ចូរអ្នករាល់គ្នាព្យាយាមបង្រៀន ហើយព្រះគុណរបស់យើងនឹងនៅជាមួយអ្នក ដើម្បីឲ្យអ្នកអាចត្រូវបានបង្គាប់ឲ្យបានល្អទៅទៀតអំពីទ្រឹស្ដី អំពីគោលការណ៍ អំពីគោលលទ្ធិ អំពីក្រឹត្យវិន័យនៃដំណឹងល្អ អំពីគ្រប់ទាំងអស់ដែលទាក់ទងទៅនឹងនគរព្រះ ដែលជាការចាំបាច់សម្រាប់ឲ្យអ្នកយល់ » ( គ. និង ស. ៨៨:៧៧–៧៨ ) ។
នៅពេលប្រទានព្រះបញ្ញត្តិនេះ ព្រះអម្ចាស់បានប្រទានការទទួលខុសត្រូវដ៏ពិសិដ្ឋមួយដល់យើង ។ ទ្រង់ក៏ដឹកនាំយើងទាំងអស់គ្នាឆ្ពោះទៅកាន់ឱកាសបម្រើដ៏មានខ្លឹមសារ ដែលពុំអាចគណនាបានដែរ ។ បទពិសោធន៍មួយចំនួនអាចប្រៀបធៀបទៅនឹងអំណរនៃការជួយមនុស្សដទៃឲ្យរៀន ហើយរស់នៅតាមដំណឹងល្អបាន ។
ព្រះបញ្ញត្តិដែលបង្គាប់ឲ្យបង្រៀននេះអនុវត្តចំពោះអ្នក ទោះបីជាពេលនេះអ្នកមិនទាន់មានមុខងារជាផ្លូវការជាគ្រូបង្រៀនក៏ដោយ ។ អ្នកមានឱកាសបង្រៀន ក្នុងនាមជាសមាជិកនៅក្នុងគ្រួសាររបស់អ្នក ឬក្នុងនាមជាគ្រូបង្រៀនតាមផ្ទះ ឬគ្រូបង្រៀនសួរសុខទុក្ខ និងព្រមទាំងជាអ្នកធ្វើការជាមួយគ្នា អ្នកជិតខាង និងជាមិត្តភក្តិ ។ ជួនកាល អ្នកបង្រៀនតាមពាក្យដែលអ្នកបានរៀបចំនិយាយ ។ ជួនកាលអ្នកអាចចាប់យកការបង្រៀនខ្លីៗ ការបង្រៀនដែលមិនបានរៀបចំមុន ដើម្បីឲ្យអ្នកអាចចែកចាយសេចក្ដីពិតនៃដំណឹងល្អ ។ ជាញឹកញាប់បំផុត អ្នកគួរតែបង្រៀនតាមរយៈគំរូ ។
ការបង្រៀនដូចព្រះអង្គសង្គ្រោះបានបង្រៀន
នៅក្នុងកិច្ចប្រឹងប្រែងរបស់អ្នកដើម្បីបង្រៀនដំណឹងល្អ ចូរមើលទៅព្រះយេស៊ូវគ្រីស្ទទុកជាគំរូរបស់អ្នក ។ ចូរសិក្សាដំណើររឿងទាំងឡាយនៃការងារបម្រើក្នុងជីវិតរមែងស្លាប់របស់ទ្រង់ រួចស្វែងរករបៀបបង្រៀនដូចទ្រង់បានបង្រៀន ។ ទ្រង់បានបង្ហាញសេចក្តីស្រឡាញ់ និងព្រះទ័យខ្វល់ខ្វាយ ដល់មនុស្សដែលទ្រង់បានបម្រើ ។ ទ្រង់បានពង្រឹងមនុស្សម្នាក់ៗ ដោយបង្រៀនគោលការណ៍ទាំងឡាយនៃដំណឹងល្អ តាមរបៀបមួយ ដែលបានជួយពួកគេបំពេញតាមសេចក្ដីត្រូវការជាក់លាក់ៗ ។ ទ្រង់បានដាស់បំណងរបស់មនុស្សមួយចំនួនឲ្យយល់ និងរស់នៅតាមដំណឹងល្អ ។ ពេលខ្លះ ទ្រង់បានសួរសំណួរ ដែលបានជួយពួកគេ ឲ្យអនុវត្តតាមសេចក្ដីដែលពួកគេបានរៀន ។ ទ្រង់បានបង្រៀនសេចក្តីពិតនៃការសង្គ្រោះនៃដំណឹងល្អ ដោយជួយអ្នកស្តាប់តាមទ្រង់ឲ្យយល់ពីអ្វីដែលពួកគេត្រូវដឹង ត្រូវធ្វើ និងដើម្បីទទួលបានអំណោយនៃជីវិតដ៏នៅអស់កល្បជានិច្ច ។
នៅពេលអ្នកធ្វើតាមគំរូរបស់ព្រះអង្គសង្គ្រោះ នោះការបង្រៀនរបស់អ្នកនឹងបីបាច់ ព្រមទាំងលើកស្ទួយមនុស្សដទៃ ស្ថាបនាសេចក្តីជំនឿរបស់ពួកគេ និងផ្តល់ឲ្យពួកគេនូវ ទំនុកចិត្តដើម្បីប្រឈមមុខនឹងឧបសគ្គនានាក្នុងជីវិត ។ ការធ្វើដូចនោះនឹងលើកទឹកចិត្តពួកគេ ឲ្យឈប់ប្រព្រឹត្តអំពើបាប ហើយគោរពប្រតិបត្តិតាមព្រះបញ្ញត្តិទាំងឡាយវិញ ។ វានឹងជួយពួកគេមករកព្រះគ្រីស្ទ និងរស់នៅក្នុងសេចក្តីស្រឡាញ់របស់ទ្រង់ ។
ការបង្រៀនដោយព្រះវិញ្ញាណ
ព្រះអម្ចាស់បានមានព្រះបន្ទូលថា « ព្រះវិញ្ញាណត្រូវបានប្រទានដល់អ្នក ដោយពាក្យអធិស្ឋាននៃសេចក្ដីជំនឿ ហើយបើសិនជាអ្នករាល់គ្នាមិនបានទទួលព្រះវិញ្ញាណទេ នោះអ្នករាល់គ្នានឹងមិនត្រូវបង្រៀនឡើយ » ( គ. និង ស. ៤២:១៤ ) ។ ព្រះវិញ្ញាណ ឬព្រះវិញ្ញាណបរិសុទ្ធ គឺជាសមាជិកក្នុងក្រុមព្រះ ។ គោលបំណងមួយរបស់ព្រះវិញ្ញាណគឺដើម្បី « សម្ដែងសេចក្ដីពិត … នៃគ្រប់ការណ៍ទាំងអស់ » ( មរ៉ូណៃ ១០:៤–៥ ) ។ មានតែតាមរយៈព្រះចេស្តានៃព្រះវិញ្ញាណតែប៉ុណ្ណោះ ទើបការបង្រៀនដំណឹងល្អអាចធ្វើទៅបានដោយការស្អាងឡើង និងប្រកបដោយការបំផុសគំនិត ។
ឯកសិទ្ធិរបស់អ្នកជាគ្រូបង្រៀនដំណឹងល្អ គឺត្រូវធ្វើជាឧបករណ៍មួយ ដែលតាមរយៈព្រះវិញ្ញាណបរិសុទ្ធ នោះអ្នកអាចថ្លែងទីបន្ទាល់ លួងលោមចិត្ត និងបំផុសគំនិត ។ ដូចព្យាការី នីហ្វៃបានបង្រៀនដែរថា « កាលណាមនុស្សមួយនិយាយដោយព្រះចេស្ដានៃព្រះវិញ្ញាណបរិសុទ្ធ នោះព្រះចេស្ដា នៃព្រះវិញ្ញាណបរិសុទ្ធ នឹងនាំពាក្យទាំងនោះចូលទៅក្នុងចិត្តនៃកូនចៅមនុស្ស » ( នីហ្វៃទី ២ ៣៣:១ ) ។
ប្រសិនបើអ្នករៀបចំខ្លួនខាងព្រះវិញ្ញាណ នោះព្រះវិញ្ញាណបរិសុទ្ធនឹងជួយអ្នកឲ្យដឹងពីអ្វី ដែលអ្នកត្រូវធ្វើ និងត្រូវនិយាយនៅក្នុងការបង្រៀនរបស់អ្នក ។ អ្នកអាចរៀបចំខ្លួនអ្នក ដោយការអធិស្ឋានញឹកញាប់ សិក្សាព្រះគម្ពីរ រស់នៅតាមដំណឹងល្អ និងមានចិត្តរាបទាប ។
វិធីសាស្ត្របង្រៀន
ការបង្រៀនរបស់អ្នកនឹងមានប្រសិទ្ធភាពបំផុត នៅពេលអ្នកប្រើប្រាស់វិធីសាស្ត្រសមរម្យផ្សេងៗ ។ ឧទាហរណ៍ អ្នកអាចចែកចាយរឿង និងឧទាហរណ៍ទាំងឡាយ ដើម្បីធ្វើឲ្យមនុស្សដែលអ្នកបង្រៀនយកចិត្តទុកដាក់ ហើយបង្ហាញពីរបៀបដែលគោលការណ៍ទាំងឡាយនៃដំណឹងល្អអនុវត្តនៅក្នុងជីវិតប្រចាំថ្ងៃ ។ អ្នកអាចប្រើប្រាស់រូបភាព ឬវត្ថុផ្សេងៗដើម្បីពង្រឹងការយល់ដឹងអំពីដំណើររឿងទាំងឡាយនៅក្នុងព្រះគម្ពីរ និងគោលការណ៍ទាំងឡាយនៃដំណឹងល្អ ។ តាមរយៈតន្ត្រី អ្នក និងមនុស្សដែលអ្នកបង្រៀន អាចអញ្ជើញឲ្យមានអានុភាពមកពីព្រះវិញ្ញាណបរិសុទ្ធ ហើយបញ្ជាក់ប្រាប់តាមអារម្មណ៍ ដែលអាចជាការលំបាកដើម្បីបញ្ជាក់ប្រាប់តាមរបៀបផ្សេងទៀត ។ អ្នកអាចសួរសំណួរ ដើម្បីលើកទឹកចិត្តឲ្យមានការរៀនសូត្រ និងការពិភាក្សាដ៏ស៊ីជម្រៅ និងដើម្បីឲ្យមានការចែកចាយបទពិសោធន៍ផ្ទាល់ខ្លួន ។ ដោយមានសកម្មភាពសាមញ្ញៗ អ្នកអាចជួយអ្នករៀនឲ្យយកចិត្តទុកដាក់បាន ។
នៅពេលអ្នកពិចារណាលើការប្រើប្រាស់វិធីសាស្ត្របង្រៀនជាក់លាក់មួយ ចូរសួរខ្លួនឯងនូវសំណួរដូចនេះ ៖ តើវិធីសាស្ត្រនេះនឹងអញ្ជើញឲ្យមានអានុភាពមកពីព្រះវិញ្ញាណដែរឬទេ ? តើវាសក្ដិសមនឹងភាពពិសិដ្ឋនៃគោលការណ៍ទាំងឡាយ ដែលខ្ញុំបង្រៀនដែរឬទេ ? តើវានឹងស្អាង ហើយពង្រឹងដល់មនុស្សដែលខ្ញុំបង្រៀនដែរឬទេ ?
ចូរចាំថា ក្នុងនាមជាគ្រូបង្រៀនដំណឹងល្អ អ្នកតំណាងឲ្យព្រះអម្ចាស់ ។ ចូរធានាថា គ្រប់កិច្ចការដែលអ្នកធ្វើ និងនិយាយ ត្រូវមានគារវភាព និងស្របទៅតាមព្រះហឫទ័យរបស់ទ្រង់ ។
សម្រាប់ការណែនាំបន្ថែមស្ដីពីការបង្រៀនដំណឹងល្អ អ្នកអាចចង់សិក្សានៅក្នុង Teaching, No Greater Call ( ៣៦១២៣ ), the Teaching Guidebook ( ៣៤៥៩៥ ) និង « ការបង្រៀនដំណឹងល្អ » កណ្ឌ ៥.៥ នៅក្នុង ក្បួនខ្នាតភាគ ២ ៖ ការគ្រប់គ្រងសាសនាចក្រ ( ០៨៧០២ ) ។