ពាក្យសម្តីនៃប្រាជ្ញាវាងវៃ

ពាក្យសម្ដីនៃប្រាជ្ញាវាងវៃគឺជាច្បាប់សុខភាព ដែលបានត្រាស់សម្ដែងដោយព្រះអម្ចាស់ សម្រាប់ជាប្រយោជន៍ខាងសាច់ឈាម និងខាងវិញ្ញាណដល់យើង ។ នៅក្នុងវិវរណៈនេះដែលត្រូវបានកត់ត្រានៅក្នុង កណ្ឌទី ៨៩ នៃគោលលទ្ធិ និង សេចក្ដីសញ្ញា ព្រះអម្ចាស់មានបន្ទូលប្រាប់យើង អំពីអាហារដែលល្អដើម្បីបរិភោគ និងសារធាតុដែលមិនល្អសម្រាប់រូបកាយ ។ ទ្រង់មានបន្ទូលសន្យាថានឹងប្រទានពរខាងវិញ្ញាណ និងខាងសាច់ឈាម ដល់ការគោរពតាមពាក្យសម្ដីនៃប្រាជ្ញាវាងវៃ ។

នៅក្នុងពាក្យសម្ដីនៃប្រាជ្ញាវាងវៃ ព្រះអម្ចាស់បានត្រាស់បង្គាប់យើងមិនឲ្យទទួលទានសារធាតុខាងក្រោមនេះចូលទៅក្នុងខ្លួនរបស់យើងឡើយ ៖

គ្រឿងស្រវឹង ( សូមមើល គ. និង ស. ៨៩:៥–៧ ) ។
ថ្នាំជក់ ( សូមមើល គ. និង ស. ៨៩:៨ ) ។
តែ និង កាហ្វេ ( សូមមើល គ. និង ស. ៨៩:៩ ពួកព្យាការីថ្ងៃចុងក្រោយបានបង្រៀនថា ពាក្យ « ភេសជ្ជ:ក្ដៅ » សំដៅទៅលើតែ និងកាហ្វេ ) ។

អ្វីក៏ដោយដែលធ្វើឲ្យអន្តរាយ ដែលមនុស្សទទួលទានដោយចេតនា នោះមិនស្របទៅនឹងពាក្យសម្ដីនៃប្រាជ្ញាវាងវៃឡើយ ។ ការណ៍នេះពិតជាពិសេសចំពោះឱសថមិនស្របច្បាប់ ដែលអាចបំផ្លាញដល់អស់អ្នកដែលញៀននឹងឱសថនេះ ។ ចូរនៅឲ្យឆ្ងាយពីសារធាតុទាំងនោះទាំងស្រុង ។ ចូរកុំចង់សាកល្បងជាមួយនឹងសារធាតុទាំងនោះ ។ ការល្មើសនឹងវេជ្ជបញ្ជាឱសថក៏ដឹកនាំទៅរកការញៀនដ៏អន្តរាយដែរ ។

ព្រះអម្ចាស់បានមានបន្ទូលប្រកាសថា ចំណីអាហារខាងក្រោមនេះល្អចំពោះរូបកាយរបស់យើង ៖

បន្លែ និងផ្លែឈើទាំងឡាយ ដែលគួរតែប្រើប្រាស់ « ដោយការប្រុងប្រយ័ត្ន និងអំណរអរ » ( សូមមើល គ. និង ស. ៨៩:១០–១១ ) ។
សាច់ « សត្វជើងបួន និងពីសត្វហើរលើអាកាស » ដែលត្រូវបាន « ប្រើប្រាស់ដោយសំចៃ » ( សូមមើល គ. និង ស. ៨៩:១២–១៣ ) ។
គ្រាប់ធញ្ញជាតិមានដូចជា ស្រូវសាលី អង្ករ និងស្រូវគ្រប់ប្រភេទ ដែលជា « អាហារនៃជីវិត » ( សូមមើល គ. និង ស. ៨៩:១៤–១៧ ) ។

ពរជ័យទាំងឡាយនៃពាក្យសម្តីនៃប្រាជ្ញាវាងវៃ

ព្រះអម្ចាស់មានបន្ទូលសន្យាដល់អស់អ្នកដែលរក្សាពាក្យសម្ដីនៃប្រាជ្ញាវាងវៃដូចនេះ ៖

« ពួកបរិសុទ្ធទាំងអស់ដែលនឹកចាំកាន់តាម ហើយប្រព្រឹត្តតាមពាក្យសម្ដីទាំងនេះ ដោយដើរក្នុងការគោរពដល់ព្រះបញ្ញត្តិទាំងឡាយ នោះនឹងបានទទួលសេចក្ដីសុខស្រួលដល់ផ្ចិតពួកគេ ហើយជាខួរដល់ឆ្អឹងពួកគេ

ហើយនឹងរកឃើញប្រាជ្ញា និងផលថ្លៃវិសេសនៃចំណេះវិជ្ជា គឺជាសម្បត្តិដែលលាក់ទុក

ហើយនឹងរត់ទៅឥតដែលហត់ ហើយនឹងដើរឥតដែលល្វើយឡើយ។

ហើយយើងជាព្រះអម្ចាស់ប្រទានដល់ពួកគេនូវសេចក្ដីសន្យាមួយថា ទេវតាដែលបំផ្លាញនឹងបង្ហួសពួកគេ ដូចជាកូនចៅអ៊ីស្រាអែលដែរ ហើយមិនប្រហារពួកគេឡើយ » ( គ. និង ស. ៨៩:១៨–២១ ) ។

ការយកឈ្នះលើការញៀន

មធ្យោបាយដ៏ល្អបំផុតគឺត្រូវចៀសវាងឲ្យបានទាំងស្រុងពីសារធាតុទាំងឡាយ ដែលព្រះអម្ចាស់បានហាមឃាត់នៅក្នុងពាក្យសម្ដីនៃប្រាជ្ញាវាងវៃ ។ ប៉ុន្តែទោះបីជាអ្នកបានញៀននឹងសារធាតុណាមួយហើយ អ្នកនៅតែអាចរួចផុតពីការញៀនបាននោះបាន ។ អ្នកអាចយកឈ្នះលើការញៀនតាមរយៈកិច្ចប្រឹងប្រែងផ្ទាល់ខ្លួន ជាព្រះចេស្តាដែលអាចសម្រេចទៅបានមកពីព្រះគុណនៃព្រះអម្ចាស់ តាមរយៈការជួយជ្រោមជ្រែងពីសមាជិកគ្រួសារ និងមិត្តភក្តិ និងការដឹកនាំពីថ្នាក់ដឹកនាំសាសនាចក្រ ។

ចូរអធិស្ឋានទូលសូមជំនួយ រួចខិតខំដោយអស់ពីសមត្ថភាពដើម្បីទប់ទល់នឹងការល្បួងកើតឡើងដោយសារការញៀន ។ ព្រះវរបិតាសួគ៌របស់អ្នកសព្វព្រះទ័យឲ្យអ្នកទទួលបានពរជ័យ ដែលបានមកពីការគោរពតាម ពាក្យសម្ដីនៃប្រាជ្ញាវាងវៃ ហើយទ្រង់នឹងពង្រឹងកិច្ចខិតខំដ៏ស្មោះរបស់អ្នកដើម្បីធ្វើដូចនោះកាន់តែច្រើន ។