Mga Buhat 1–5 (Unit 17)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga summary sa mga panghitabo, mga doktrina, ug mga baruganan nga nakat-unan sa imong mga estudyante samtang sila nagtuon sa Mga Buhat 1–5 (unit 17) dili tuyo nga itudlo isip kabahin sa imong leksyon. Ang leksyon nga imong itudlo mosentro lamang diha sa pipila niini nga mga doktrina ug mga baruganan. Sunda ang mga pag-aghat sa Espiritu Santo samtang imong ikonsiderar ang mga panginahanglan sa imong mga estudyante.

Day 1 (Mga Buhat 1:1-8)

Ang mga estudyante misugod sa ilang pagtuon sa basahon sa Mga Buhat pinaagi sa pagkat-on nga si Jesukristo nagdumala sa Iyang Simbahan pinaagi sa pagpadayag sa Iyang kabubut-on ngadto sa Iyang mga Apostoles pinaagi sa Espiritu Santo ug nga ang mga Apostoles mga saksi ni Jesukristo ug nagpamatuod Kaniya sa tibuok yuta. Niana ang mga estudyante mikat-on nga pinaagi sa gahum sa Espiritu Santo, mahimo usab kita nga mga saksi ni Jesukristo. Ang materyal niini nga leksyon mihatag usab sa mga estudyante og kinatibuk-ang pagpasabut sa ikaduhang katunga sa Bag-ong Tugon.

Day 2 (Mga Buhat 1:9-26)

Samtang gitun-an sa mga estudyante ang istorya sa Pagsaka sa Langit ni Jesukristo, ilang nakat-unan nga sa Iyang Ikaduhang Pag-anhi, ang Manluluwas manaog gikan sa langit diha sa himaya. Samtang ilang basahon ang mahitungod sa unsa nga paagi gipili sa mga Apostoles ang mopuli ni Judas, ang mga estudyante nakat-on nga ang mga Apostoles ni Jesukristo gitawag sa Ginoo pinaagi sa pagpadayag.

Day 3 (Mga Buhat 2)

Samtang gitun-an sa mga estudyante ang mga panghitabo sa adlaw sa Pentecostes, ilang nadiskobrehan ang mosunod nga mga kamatuoran: Samtang kita napuno sa Espiritu Santo, Siya motabang kanato sa pagtudlo ug sa pagpamatuod ngadto sa uban. Samtang atong madawat ang pulong sa Dios pinaagi sa gahum sa Espiritu Santo, ang atong mga kasingkasing mausab ug kita makabig ngadto ni Jesukristo. Kon kita adunay hugot nga pagtuo diha ni Jesukristo, naghinulsol, ug nagpabunyag, naandam kita sa pagdawat sa gasa sa Espiritu Santo.

Day 4 (Mga Buhat 3–5)

Sa dihang giayo ni Pedro ug Juan ang usa ka tawo nga bakol didto sa templo, ang mga estudyante nakat-on nga ang Langitnong Amahan tingali dili motubag sa atong mga pag-ampo sa mga paagi nga atong gusto o gipaabut nga buhaton Niya, apan ang Iyang mga tubag kanunay alang sa atong mas dakong kaayohan. Ang ubang mga baruganan nga nakat-unan niini nga leksyon naglakip sa mosunod: Ang mga sulugoon ni Jesukristo makahimo og mga milagro pinaagi sa hugot nga pagtuo diha sa Iyang ngalan. Ang mga propeta sa tanang mga panahon nanagna sa ulahing adlaw nga Pagpahiuli sa ebanghelyo. Kon kita mamakak ngadto sa mga sulugoon sa Dios, kini sama nga namakak ngadto Kaniya.

Pasiuna

Kini nga leksyon makatabang sa mga estudyante nga mahibalo kon sa unsa nga paagi sila makatubag uban ang walay kahadlok kon sila adunay mga oportunidad sa pagpakigbahin o pagdepensa sa ebanghelyo.

Mga Sugyot alang sa Pagtudlo

Mga Buhat 4:1–31

Ang mga sakop sa Sanhedrin nagsugo ni Pedro ug ni Juan sa paghunong og pagpanudlo diha sa ngalan ni Jesus

Pangutan-a ang mga estudyante kon unsay ilang buhaton sa mosunod nga mga sitwasyon (konsideraha ang pagsulat niini nga mga sitwasyon diha sa pisara sa wala pa ang klase):

Usa ka higala nagbutang og dili tinuod mahitungod sa Simbahan diha sa social media.
Usa ka coach nag-iskedyul og dula nga nagkinahanglan sa imong team sa pagdula og Dominggo.
Ang imong mga higala nangayo sa imong opinyon mahitungod sa social issue nga sa kadaghanan popular ug gisuportahan apan supak sa mga pagtulun-an sa Simbahan.

Human nahatagan ang mga estudyante og igo nga panahon sa pagpamalandong, pangutana:

Unsa ang pipila sa ubang mga sitwasyon diin kita tingali nagkinahanglang mopakigbahin o modepensa sa atong tinuohan?

Dapita ang mga estudyante sa pagpangita og mga kamatuoran samtang sila magtuon sa Mga Buhat 4–5 nga makagiya kanila niining mga klaseng mga sitwasyon.

Sa pagtabang sa mga estudyante nga masabtan ang kinatibuk-ang kahulugan sa Mga Buhat 4, dapita sila sa pag-summarize unsay ilang nahinumduman mahitungod sa mga hitabo ug sa mga pagtulun-an diha sa Mga Buhat 3. (Diha sa templo, si Pedro ug si Juan miayo og usa ka tawo kinsa bakol sukad sa pagkatawo ug mitudlo mahitungod ni Jesus.)

I-summarize ang Mga Buhat 4:1–6 pinaagi sa pagpasabut nga si Pedro ug Juan gidakop tungod niini nga mga binuhatan ug gidala ngadto sa atubangan sa Sanhedrin, nga mao ang pamunoang konseho sa Judeo. Pahinumdumi ang mga estudyante nga daghang mga miyembro sa Sanhedrin nga sa una naapil sa pagpahinabo sa pagdakop ug Paglansang diha sa Krus sa Manluluwas.

Dapita ang usa ka estudyante sa pagbasa og kusog sa Mga Buhat 4:7. Hangyoa ang klase sa pagsunod, mangita sa pangutana nga gipangutana sa mga lider nga Judeo ni Pedro ug ni Juan.

Unsay gipangutana sa mga lider nga Judeo ni Pedro ug ni Juan?
Unsa kaha ang mahitabo ni Pedro ug ni Juan kon sila nagpaila nga sumusunod sila ni Jesukristo?

Hangyoa ang mga estudyante sa pagkonsiderar kon unsa kaha ang ilang bation kon sila ang diha sa dapit ni Pedro ug ni Juan ug unsa usab ang ilang isulti ngadto sa konseho.

Dapita ang daghang mga estudyante sa pagpuli-pulig basa og kusog gikan sa Mga Buhat 4:8–21. Hangyoa ang klase sa pagsunod, mangita sa unsay gipahayag ni Pedro sa konseho.

Kay sa pabasahon ang mga estudyante sa Mga Buhat 4:8–21, ikonsiderar ang pagsalida sa video nga “Peter and John Are Judged” (2:51) gikan sa The Life of Jesus Christ Bible Videos. Kini nga video nagpakita sa mga hitabo gikan sa Mga Buhat 4:8–21. Anaa kini sa LDS.org.

Sumala sa Mga Buhat 4:13, ngano nga ang konseho nahibulong diha ni Pedro ug ni Juan?

Dapita ang mga estudyante sa pagribyu sa hilum sa Mga Buhat 4:8, mangita sa unsay mi-impluwensya ni Pedro ug mitabang kaniya sa pagsulti nga walay kahadlok ngadto sa konseho.

Sa inyong hunahuna sa unsa nga paagi nga ang pagkapuno og Espiritu Santo mi-impluwensya sa abilidad ni Pedro sa pagtudlo sa ebanghelyo nga walay kahadlok?
Unsa nga baruganan ang atong makat-unan gikan sa ehemplo ni Pedro ingon nga narekord diha sa mga bersikulo 8 ug 13? (Ang mga estudyante mahimong mogamit sa ilang kaugalingong mga pulong, apan siguroa nga ilang mailhan ang baruganan nga susama sa mosunod: Samtang kita napuno sa Espiritu Santo, makapaambit kita sa ebanghelyo sa walay kahadlok. Isulat kini nga baruganan diha sa pisara.)
Sumala sa Mga Buhat 4:18, unsa nga sugo ang gihatag sa konseho ngadto ni Pedro ug ni Juan?
Sumala sa mga bersikulo 19–20, sa unsa nga paagi si Pedro ug si Juan mitubag ngadto sa sugo sa konseho?

I-summarize ang Mga Buhat 4:23–30 pinaagi sa pagpasabut nga human gibuhian si Pedro ug si Juan, sila mipundok kauban sa ubang mga tumutuo ug nag-ampo uban kanila.

Dapita ang usa ka estudyante sa pagbasa og kusog sa Mga Buhat 4:31. Hangyoa ang klase sa pagsunod, mangita kon unsay nahitabo human sa ilang pag-ampo.

Unsay nahitabo human ang katawhan nag-ampo?
Gikan sa unsay atong nakat-unan niini nga bersikulo, unsay atong buhaton sa pagdapit sa Espiritu Santo nga motabang kanato sa pagsulti sa mga pulong sa Dios nga walay kahadlok?

Dangup ngadto sa pipila ka mga sitwasyon nga gihisgutan sa sinugdanan niini nga leksyon.

Sa unsa nga mga paagi kita mahimong walay kahadlok sa pagpakigbahin sa ebanghelyo sa mga sitwasyon sama niini samtang nagpabilin nga matinahuron ug maayog batasan? (Tan-awa sa Alma 38:12; mahimong imong ipasabut nga ang pagkawalay kahadlok sa pagpakigbahin sa ebanghelyo nagpasabut nga kita masaligong nakigbahin sa unsay atong nahibaloan nga tinuod, apan gihimo nato kini uban ang pagpaubos ug pagtahud alang sa uban kinsa mahimong mohunahuna o mobati og lahi.)
Kanus-a ka gitabangan sa Espiritu Santo sa pagsulti sa pulong sa Dios nga walay kahadlok?
Giunsa nimo pag-ila nga ang Espiritu Santo mitabang kanimo?

Mga Buhat 5:12–42

Gibilanggo ang mga Apostoles tungod sa pagpang-ayo diha sa ngalan ni Jesukristo

Hangyoa ang mga estudyante sa paghunahuna nga sila nagpuyo sa panahon ni Pedro ug ni Juan ug mga reporter alang sa Jerusalem Times. Ipasabut nga sila dapiton sa pagtuon sa mga bahin sa Mga Buhat 5:12–32 ug dayon pasulaton og ulohan sa balita nga nag-summarize kon unsa ang nahitabo. (Aron sa paghatag og kinatibuk-ang pagsabut niini nga mga tudling, pahinumdumi ang mga estudyante nga ang Sanhedrin misugo ni Pedro ug ni Juan sa paghunong og sulti diha sa ngalan ni Jesukristo.) Sunda ang mga panudlo nga gihatag sa matag hut-ong sa mga bersikulo.

Mga Buhat 5:12–16 (Basaha kini nga tudling isip usa ka klase, ug pagdungan og sulat sa ulohan sa balita.)
Mga Buhat 5:17–23 (Hangyoa ang mga estudyante sa pagbasa niini nga tudling nga may kauban ug pagsulat og ulohan sa balita. Dapita ang pipila ka mga paris sa pagpakigbahin sa ilang mga ulohan ngadto sa klase.)
Mga Buhat 5:24–32 (Hangyoa ang mga estudyante sa pagbasa og tinagsa-tagsa ug sa pagsulat og ulohan sa balita. Dapita ang pipila ka mga estudyante sa pagpakigbahin sa ilang mga ulohan sa balita uban sa klase.)

Human ang mga estudyante nakigbahin sa ilang mga ulohan sa balita, pangutana:

Sumala sa Mga Buhat 5:29, ngano nga si Pedro ug ang ubang mga Apostoles misulti nga sila mipadayon sa pagsangyaw diha sa ngalan ni Jesus bisan pa sa sugo gikan sa konseho?

Isulat ang mosunod nga dili kompleto nga pamahayag diha sa pisara: Kon kita mopili sa pagsunod sa Dios kay sa mga tawo, niana …

Gikan sa unsay imong nabasa diha sa Mga Buhat 4–5, unsa ang pipila ka mga paagi kita makakompleto niini nga pamahayag? (Human mitubag ang mga estudyante, kompletoha ang pamahayag diha sa pisara ingon sa mosunod: Kon kita mopili sa pagsunod sa Dios kay sa mga tawo, niana Siya magauban kanato.)
Sa unsang mga paagi ang Dios uban ni Pedro ug sa ubang mga Apostoles samtang sila nagmasulundon Kaniya kay sa konseho? (Ang Dios mipuno kanila sa Espiritu Santo [tan-awa sa Mga Buhat 4:8, 31], nakahimo kanila sa pagbuhat og mga milagro [tan-awa sa Mga Buhat 5:12–16], ug mipadala sa Iyang mga anghel sa pagluwas kanila gikan sa bilanggoan [tan-awa sa Mga Buhat 5:17–20].)
Kanus-a ka o ang usa ka tawo nga imong kaila mipili sa pagsunod sa Dios kay sa mga tawo? Sa unsa nga paagi ang Dios nagpakita nga Siya uban kanimo o niini nga tawo?

Dapita ang pipila ka mga estudyante sa pagpuli-pulig basa og kusog gikan sa Mga Buhat 5:33–42. Dapita ang klase sa pagsunod, mangita alang sa dugang nga mga ehemplo kon sa unsa nga paagi ang Ginoo nag-uban ni Pedro ug sa ubang mga Apostoles.

Kay sa pabasahon ang mga estudyante sa Mga Buhat 5:33–42, mahimong ikaw moribyu ug mo-summarize sa sulod sa Mga Buhat 5:12–42 pinaagi sa pagpakita sa video nga “Peter and John Continue Preaching the Gospel” (5:38). Kini nga video anaa sa LDS.org.

Ipasabut nga atong nakat-unan diha sa Mga Buhat 5:33 nga ang konseho naninguha sa pagpatay ni Pedro ug ni Juan.

Sumala sa mga bersikulo 41–42, sa unsa nga paagi ang mga Apostoles mipabilin nga matinud-anon ngadto sa Ginoo atubangan niini nga panghulga? Sa unsa nga paagi ang Ginoo uban kanila niini nga panahon?
Sa unsa nga paagi nga ang mga kamatuoran nga atong naila niini nga leksyon nagtabang kanato samtang kita naninguha sa pagsunod sa ebanghelyo ug nakigbahin niini ngadto sa naglibut kanato?

Pakigbahin sa imong pagpamatuod sa mga kamatuoran nga gitudlo karon, ug dapita ang mga estudyante sa paggamit niini nga mga kamatuoran diha sa ilang mga kinabuhi.

Sunod nga Unit (Mga Buhat 6–12)

Pangutana sa mga estudyante kon pila ka mga tawo ilang mahunahuna kinsa namatay isip usa ka martir alang sa ebanghelyo. Ipasabut nga samtang sila magtuon sa Mga Buhat 6–12 sulod sa umaabut nga semana, ilang makat-unan ang mahitungod sa duha ka maisug nga mga martir alang kang Jesukristo: ang usa Seventy, ug ang lain usa ka Apostol. Hangyoa ang mga estudyante sa pagkonsiderar sa mosunod nga mga pangutana: Ngano nga ang panan-awon ni Pedro kalabut ni Cornelius importante kaayo ngadto sa Simbahan? Unsa ang nahitabo ni Saulo (nailhan usab nga Pablo) nga miusab sa iyang kinabuhi? Sa unsa nga paagi nga siya nabuta ug kinsa ang gisugo sa Ginoo sa pagpahiuli sa iyang panan-aw?