Leksyon 41: Marcos 10

Leksyon 41

Marcos 10

Pasiuna

Sa hapit na mahuman ang Iyang mortal nga pagpangalagad, ang Manluluwas nangalagad niadtong anaa sa Perea. Samtang naa didto, Siya mitudlo sa doktrina sa kaminyoon ug midapit sa gagmayng mga bata sa pagduol ngadto Kaniya. Ang Manluluwas mitambag usab sa usa ka dato nga batan-ong punoan [ruler] nga ibaligya ang tanan niyang kabtangan ug mosunod Kaniya. Sa dihang ang Manluluwas mibiya sa Perea ug mipadulong sa Jerusalem sa katapusang higayon sa mortalidad, Iyang gipanagna ang Iyang kamatayon ug Pagkabanhaw ug mitambag sa Iyang mga Apostoles sa pagserbisyo sa uban. Siya usab miayo og usa ka buta nga tawo sa Jerico.

Mga Sugyot alang sa Pagtudlo

Marcos 10:1–16

Si Jesus nagtudlo sa doktrina sa kaminyoon ug nagdapit sa mga bata sa pagduol ngadto Kaniya

Pakit-a ang mga estudyante og pipila ka mga litrato sa mga bata.

Unsa nga mga kalidad o mga kinaiya ang inyong nagustohan mahitungod sa inyong mga manghud o ubang mga bata nga inyong kaila? (Ilista sa pisara ang mga tubag sa mga estudyante.)

Dapita ang mga estudyante sa pagpangita og usa ka kamatuoran samtang sila nagtuon sa Marcos 10:1–16 nga nagtudlo kanato nganong kinahanglan kita nga mamahimong sama sa gagmay nga mga bata.

Ipasabut nga sa hapit na mahuman ang pagpangalagad sa Manluluwas, Siya mibiya sa Galilea ug miadto sa usa ka dapit nga gitawag og Perea. (Mahimo nimong ipapangita sa mga estudyante ang Perea diha sa handout “Ang Mortal nga Kinabuhi ni Jesukristo sa usa ka Pagtan-aw” [tan-awa ang leksyon 5] o sa mga Mapa sa Biblia, nu. 11, “Ang Balaan nga Yuta sa Kapanahonan sa Bag-ong Tugon.”) I-summarize ang Marcos 10:1-12 pinaagi sa pagpasabut nga samtang didto sa Perea, ang Manluluwas mitudlo sa mga tawo mahitungod sa importansya sa kaminyoon.

Dapita ang usa ka estudyante sa pagbasa og kusog sa Marcos 10:13–14. Hangyoa ang klase sa pagsunod, nga mangita kon unsay nahitabo samtang ang Manluluwas didto sa Perea.

Unsay reaksyon sa mga disipulo sa dihang ang mga tawo midala og gagmayng mga bata ngadto sa Manluluwas? (Ipasabut nga ang pulong gibadlong sa bersikulo 13 nagpasabut nga ang mga disipulo misulti sa mga tawo nga nasayop sila sa pagdala sa ilang mga anak ngadto sa Manluluwas.)
Giunsa man pagtubag sa Manluluwas sa mga disipulo?

Dapita ang usa ka estudyante sa pagbasa og kusog sa Marcos 10:15–16, ug hangyoa ang klase sa pagpangita kon unsay gitudlo sa Manluluwas sa Iyang mga disipulo samtang ang gagmay nga mga bata miduol Kaniya. Ipasabut nga ang mga pulong “magadawat sa gingharian sa Dios” diha sa bersikulo 15 nagpasabut sa pagdawat sa ebanghelyo.

Sa inyong hunahuna unsa ang buot ipasabut sa pagdawat sa ebanghelyo “ingon sa dinawatan sa gamayng bata”? (bersikulo 15). (Isulat sa pisara ang mga tubag sa mga estudyante, ug itandi kini sa nakalista na diha sa pisara.)
Unsa nga baruganan ang atong makat-unan gikan niini nga mga bersikulo mahitungod sa unsay mahitabo samtang kita modawat sa ebanghelyo sama sa gagmayng mga bata? (Ang mga estudyante mahimong mo-ila og daghang mga kamatuoran, apan siguroha sa pagklaro nga samtang kita modawat sa ebanghelyo sama sa gagmayng mga bata, maandam kita sa pagsulod sa gingharian sa Dios.)
Sa unsang paagi nga ang pagdawat sa ebanghelyo sama sa gagmayng mga bata nag-andam kanato sa pagsulod sa gingharian sa Dios? (Aron sa pagtabang sa mga estudyante nga makatubag niini nga pangutana, mahimo nimong i-refer sila ngadto sa Mosiah 3:19.)

Marcos 10:17–34

Ang Manluluwas mipahimangno sa usa ka dato nga batan-ong punoan [ruler] nga ibaligya ang iyang mga kabtangan ug mosunod Kaniya

Dapita ang usa ka estudyante sa pagbasa og kusog sa Marcos 10:17–20, ug hangyoa ang klase sa pagpangita kon unsay nahitabo human gipanalanginan sa Manluluwas ang gagmay nga mga bata.

Unsaon ninyo paghulagway ang tawo nga miduol kang Jesus? Ngano man?
Unsay gipangutana sa tawo ngadto sa Manluluwas? Giunsa pagtubag ni Jesus?

Ipasabut nga ang Mateo 19 naglangkob usab sa istorya niini nga tawo nga miduol sa Manluluwas. Dapita ang usa ka estudyante sa pagbasa og kusog sa Mateo 19:20, ug hangyoa ang klase sa pagpaminaw giunsa pagtubag sa tawo human gisulti sa Manluluwas ang pipila sa mga sugo.

Human gisulti nga siya nagsunod sa tanang mga sugo, unsa ang gipangutana sa batan-ong lalaki ngadto sa Manluluwas? (Mahimo nimong isugyot nga markahan sa mga estudyante ang pangutana sa batan-ong lalaki.)

Isulat sa pisara ang mosunod nga pangutana: Unsa pa ang akong kulang?

Dapita ang mga estudyante sa pagbasa sa Marcos 10:21 sa hilum nga paagi, nga mangita kon giunsa pagtubag sa Manluluwas ang batan-ong lalaki .

Unsa ang gisulti sa Manluluwas sa batan-ong lalaki nga kulang pa niya?

Itudlo ang mga pulong “Si Jesus, sa nagsud-ong siya kaniya, nahigugma kaniya” diha sa bersikulo 21. Mahimo nimong isugyot nga markahan sa mga estudyante kini nga mga pulong diha sa ilang mga kasulatan.

Ngano kaha nga importanteng masayud nga si Jesus nahigugma niining batan-ong lalaki sa wala pa Siya misulti kaniya kon unsay iyang kulang?
Unsa nga mga baruganan ang atong makat-unan gikan niini nga istorya? (Ang mga estudyante mahimong moila og pipila ka mga baruganan, lakip ang mosunod: Tungod kay Siya nahigugma kanato, ang Ginoo motabang kanato nga masayud kon unsay atong kulang sa atong mga paningkamot sa pagsunod Kaniya. Kon kita mohangyo sa Ginoo, Siya motudlo kanato kon unsay gikinahanglan natong buhaton aron makapanunod sa kinabuhing dayon.)

Dapita ang mga estudyante sa pagbasa sa Marcos 10:22 sa hilum nga paagi, nga mangita kon unsay reaksyon sa batan-ong lalaki sa dihang ang Manluluwas mitambag kaniya sa pagbaligya sa tanan nga anaa kaniya.

Unsa ang reaksyon sa batan-ong lalaki?
Sumala sa bersikulo 22, nganong ingon ana man ang iyang reaksyon?

Ipasabut nga samtang kita dili sugoon sa pagtugyan sa dagkong katigayunan sa pagsunod sa Ginoo, nagsugo Siya kanato sa paghimo og laing mga sakripisyo sa pagserbisyo Kaniya ug pagsunod sa Iyang mga sugo.

Unsa ang pipila ka mga sakripisyo nga gihangyo sa Ginoo kanato nga mahimong lisud buhaton?
Unsa nga mga panalangin nga tingali mapakyas kita sa pagdawat kon kita mopili sa dili pagsunod sa Ginoo sa tanan nga mga butang?

Dapita ang usa ka estudyante sa pagbasa og kusog sa Marcos 10:23–27. Dapita ang usa ka estudyante sa pagbasa og kusog sa Hubad ni Joseph Smith sa Marcos 10:26: “Ug si Jesus misud-ong kanila og miingon, Sa mga tawo nga nagsalig sa katigayunan, dili gayud kini mahimo, apan mahimo kini sa mga tawo nga nagsalig sa Dios ug misalikway sa tanan alang kanako, kay sa ingon kining tanan nga mga butang mahimo.” Hangyoa ang klase sa pagpaminaw kon unsa ang gitudlo ni Jesus kabahin sa pagsalikway sa tanan alang Kaniya.

Ngano kaha nga lisud kaayo alang niadtong kinsa nagsalig sa mga katigayunan o uban pang kalibutanong mga butang nga makasulod sa gingharian sa Dios?
Sa inyong hunahuna unsa kaha ang gipasabut nga ang tanan nga mga butang posible alang niadtong kinsa mosalig sa Dios?

Dapita ang usa ka estudyante sa pagbasa og kusog sa Marcos 10:28–31. Hangyoa ang usa ka estudyante sa pagbasa og kusog sa Hubad ni Joseph Smith sa Marcos 10:31: “Apan daghan ang nag-una sa ilang mga kaugalingon, nga unya mangulahi, ug ang nangulahi manag-una. Kini iyang gisulti, nagbadlong kang Pedro …” Hangyoa ang klase sa pagsunod, nga mangita sa unsay gisulti ni Pedro human ang Manluluwas mitudlo nga kinahanglang andam kita nga motugyan sa bisan unsa nga Iyang gikinahanglan kanato.

Sumala sa bersikulo 28, unsay gisulti ni Pedro?
Unsa ang gisaad sa Manluluwas niadtong andam nga ihatag ang tanan sa pagsunod Kaniya?
Unsa nga baruganan ang atong makat-unan gikan sa mga pagtulun-an sa Manluluwas mahitungod sa unsay angay natong buhaton aron makadawat og kinabuhing dayon? (Ang mga estudyante mahimong mogamit og lain-laing mga pulong, apan siguroa nga mahibalo sila sa mosunod nga baruganan: Aron makadawat og kinabuhing dayon, kinahanglang andam kita nga motugyan sa bisan unsa nga gikinahanglan sa Ginoo kanato. Isulat kini nga baruganan diha sa pisara.)
Nganong ang kinabuhing dayon takus man sa bisan unsang sakripisyo nga ipabuhat kanato dinhi sa yuta? (Mahimo nimong pahinumduman ang mga estudyante nga ang kinabuhing dayon naglakip sa pagpuyo hangtud sa kahangturan diha sa presensya sa Dios uban sa atong matarung nga mga sakop sa pamilya.)

I-summarize ang Marcos 10:32–34 pinaagi sa pagpasabut nga ang Ginoo misulti sa Iyang mga disipulo nga human sila nangabut sa Jerusalem Siya pagabiay-biayon, latigohon, lud-an, ug pagapatyon ug nga Siya mobangon pag-usab sa ikatulo nga adlaw.

Sa unsang paagi nga ang Manluluwas usa ka hingpit nga ehemplo sa kaandam sa paghatag sa bisan unsa nga gikinahanglan sa Dios?

Pagpamatuod sa mga kamatuoran nga gitudlo niini nga leksyon. Awhaga ang mga estudyante nga mainampoong mamalandong sa pangutana nga “Unsa pa may akong kulang?” ug mosunod sa mga aghat nga tingali ilang madawat kalabut sa mga sakripisyo nga gusto sa Ginoo nga ilang buhaton.

Marcos 10:35–52

Gipanagna sa Manluluwas ang Iyang kamatayon ug Pagkabanhaw ug nagtambag sa Iyang mga Apostoles sa pagserbisyo sa uban

Bahina ang mga estudyante ngadto sa gagmay nga mga grupo. Hatagi ang matag grupo og kopya sa mosunod nga handout, ug dapita sila sa pagkompleto niini:

Kinsa man ang Labing Dako [Maayo]?

Manwal sa Seminary Teacher sa Bag-ong Tugon—Leksyon 41

Kompletuha kini nga handout isip usa ka grupo, ug hisguti ang inyong mga tubag sa mga pangutana.

Ilista ang pipila ka mga kalihokan nga inyong ganahan:

Paghingalan og pipila ka mga indibidwal nga tinud-anay nga maayo kaayo sa pagbuhat sa mga kalihokan nga inyong gilista sa ibabaw. Unsa ang nakahimo kanila nga maayo?

Samtang kamo nagpadayon sa pagtuon sa mga pulong sa Manluluwas diha sa Marcos 10, pangitaa ang unsay Iyang gitudlo bahin sa usa ka tawo nga tinuoray nga dako [maayo].

Basaha ang Marcos 10:35–37, nga mangita kon unsa ang gihangyo ni Santiago ug Juan sa Manluluwas samtang mibiyahe sila paingon sa Jerusalem.

Ang hangyo ni Santiago ug Juan nga molingkod sa tuo ug wala sa Manluluwas nagpasabut nga gusto nila nga makadawat og mas labaw nga himaya ug dungog sa gingharian sa Dios kay sa madawat sa ubang mga Apostoles. Ang Marcos 10:38–40 nagrekord nga ang Manluluwas mipasabut ni Santiago ug Juan nga kini nga panalangin ihatag ngadto niadtong kinsa andam sa pagdawat niini.

Basaha ang Marcos 10:41, nga mangita kon unsay reaksyon sa ubang mga disipulo sa hangyo ni Santiago ug Juan.

Ngano kaha nga nasuko man ang ubang mga disipulo ngadto ni Santiago ug Juan?

Basaha ang Marcos 10:42–45, nga mangita alang sa unsay gitudlo sa Manluluwas sa Iyang mga disipulo mahitungod sa pagkadako [pagkamaayo].

Kompletuha ang mosunod nga pamahayag nga gibasi sa unsay gitudlo sa Manluluwas mahitungod sa tinuod nga pagkamaayo:

Aron mahimong tinud-anay nga maayo, kita kinahanglan nga .

Sa bersikulo 45, ang pulong nga pagpangalagad nagpasabut sa paghatag og pag-amuma, paghupay, tabang, ug suporta sa uban.

Ngano man nga ang tawo nga nagserbisyo ug nangalagad sa uban (sama sa Manluluwas) makonsiderar nga tinuoray nga maayo?
Kanus-a man nga adunay tawo nga miserbisyo ug nagpakabana kaninyo o sa inyong pamilya? Nganong makonsiderar mo man kanang tawhana nga tinuoray nga maayo?

Human makompleto sa mga estudyante ang handout, dapita ang pipila sa pag-report kon giunsa nila pagkompleto ang pamahayag basi sa Marcos 10:42–45. Ang mga estudyante mahimong mogamit og ubang mga pulong, apan kinahanglang mahibalo sila sa mosunod nga baruganan: Aron mahimong tinuoray nga maayo, kinahanglan gayud nga mosunod kita sa ehemplo sa Manluluwas pinaagi sa pagserbisyo sa uban.

I-summarize ang Marcos 10:46–52 pinaagi sa pagpasabut nga samtang ang Manluluwas ug ang Iyang mga Apostoles mogikan na sa Jerico aron mobiyahe ngadto sa Jerusalem, usa ka buta nga tawo nga ginganlan og Bartimeo misinggit aron ayohon siya sa Manluluwas. Ang mga tawo mibadlong ni Bartimeo sa paghilom, apan siya mas mikusog og singgit. Ang Manluluwas nakadungog sa iyang pangamuyo, nalooy kaniya, ug miayo kaniya. (Pahinumdom: Ang istorya sa pagkaayo ni Bartimeo mas detalyadong itudlo sa leksyon alang sa Lucas 18.)

Sa unsang paagi nga ang Manluluwas usa ka hingpit nga ehemplo sa baruganan nga Iyang gitudlo kalabut sa pagpangalagad sa uban?

Ipakigbahin ang imong pagpamatuod nga ang Manluluwas tinuoray nga mahinungdanon tungod sa paagi nga nangalagad Siya sa mga anak sa Langitnong Amahan. Dapita ang mga estudyante sa paghunahuna kon unsay ilang mahimo sa pagserbisyo ug pag-amuma niadtong naglibut kanila. Awhaga sila sa paghimo og tumong nga makatabang kanila nga moserbisyo ug mangalagad sa uban.

Komentaryo ug Background nga Impormasyon

Marcos 10:17–22. Ang dato nga batan-ong punoan [ruler]

Si Elder Neal A. Maxwell sa Korum sa Napulog Duha ka mga Apostoles mitudlo nga kita kinahanglan nga aktibo sa pagbuhat og maayo kay sa molikay lamang sa pagpakasala aron mahimong maisugong mga disipulo sa Manluluwas:

“Kasagaran ang mga sala sa wala pagbuhat sa angayng buhaton mao ang magpugong kanato sa espirituhanon nga pagkahingpit tungod kay nagkulang pa kita sa piho nga mga butang. Hinumdumi ang dato, matarung nga batan-ong lalaki kinsa miduol kang Jesus nga nangutana, ‘Magtutudlo, unsa bay maayong buhaton ko aron makapanag-iya ako sa kinabuhing dayon?’ …

“Usa ka gipahiangay nga sugo ang gihatag alang niana nga tawo [tan-awa sa Mateo 19:21–22]. Usa kadto ka butang nga kinahanglan niya nga buhaton, dili usa ka butang nga kinahanglan niya nga hunongon sa pagbuhat, nga nakapugong kaniya sa pagkahingpit” (“The Pathway of Discipleship” [Brigham Young University fireside, Ene. 4, 1998], 4, speeches.byu.edu).

Si Elder Bruce R. McConkie sa Korum sa Napulog Duha ka mga Apostoles mitudlo nga ang dato nga batan-ong punoan nahikawan sa talagsaon nga mga panalangin tungod kay dili siya andam sa pagsunod sa Ginoo sa tanang mga butang:

“Tingali makapangutana kita, ‘Dili ba igo ang pagsunod sa mga sugo? Unsa pa man ang gilauman gikan kanato kay sa mahimong matinuuron ug matinud-anon ngadto sa matag pagsalig? Aduna pa bay labaw sa balaod sa pagkamasulundon?’

“Sa sitwasyon sa atong dato nga batan-ong higala adunay mas labaw pa. Siya gilauman nga mosunod sa balaod sa pagpahinungod, sa pagsakripisyo sa iyang kalibutanong mga kabtangan. …

“Sama sa inyong nahibaloan, ang batan-ong lalaki mipahawa nga masulub-on. … Ug kita makahunahuna na lamang kon unsa kaha nga mga pakigsandurot [pakigsuod] ang iya unta nga naambitan uban sa Anak sa Dios, unsa nga pakigdait ang iya unta nga natagamtam uban sa mga apostoles, unsa nga mga pagpadayag ug mga panan-awon nga iya unta nga nadawat, kon siya nakahimo sa pagsunod sa balaod sa celestial nga gingharian”(“Obedience, Consecration, and Sacrifice,” Ensign, Mayo 1975, 51).

Marcos 10:25. “Masayon pa sa kamelyo paglusot sa mata sa dagum kay sa usa ka dato pagsulod sa gingharian sa Dios”

“Adunay pipila nga miingon nga ang mata sa dagum mao ang usa ka gamay nga pultahan diha sa paril sa siyudad sa Jerusalem, nga nagkinahanglan sa usa ka kamelyo nga kuhaan sa gipas-an niini aron makasulod. Walay ebidensya nga adunay sama niana nga pultahan. Ang uban misugyot nga ang pag-usab sa usa ka letra sa Gresyanhon nga teksto mousab sa kasulatan aron masabut nga usa ka pisi, dili usa ka kamelyo, ang kinahanglan nga molusot sa mata sa dagum. Hinoon, sa dihang si Jesukristo mihisgut sa usa ka kamelyo nga molusot sa mata sa dagum, kadto tingali usa ka ehemplo sa pasulabi, tinuyo nga pagpasobra aron sa pagtudlo ‘nga igakalisud unya sa usa ka dato ang pagsulod sa gingharian sa langit’ (Mateo 19:23). Ang Hubad ni Joseph Smith nagdugang, ‘Sa mga tawo nga nagsalig sa katigayunan, dili gayud kini mahimo; apan mahimo kini sa mga tawo nga nagsalig sa Dios ug misalikway sa tanan alang kanako, kay sa ingon kining tanan nga mga butang mahimo’ (Hubad ni Joseph Smith, Marcos 10:26 ” (New Testament Student Manual [manwal sa Church Educational System, 2014], 63).

Marcos 10:38–39. “Makahimo ba kamo sa pag-inom sa kopa nga akong ginaimnan?”

“Si Elder Bruce R. McConkie mipasabut nga ang mga pulong nga ‘sa pag-inom sa kopa’ usa ka ‘pinasumbingay nga pagkasulti nga nagpasabut, “Sa pagbuhat sa mga butang nga gikinahanglan kanako sa akong kinabuhi.”’ Iyang gipasabut nga ang mga pulong nga ‘pagpabautismo sa bautismo nga ginabautismo kanako’ nagpasabut nga ‘mosunod sa akong dalan, mag-antus sa pagpanggukod, isalikway sa mga tawo, ug sa katapusan pagapatyon alang sa kamatuoran’ (Doctrinal New Testament Commentary, 1:566). Pinaagi sa pagpangutana, ‘Makahimo ba kamo sa pag-inom sa kopa nga akong ginaimnan o sa pagpabautismo sa bautismo nga ginabautismo kanako?’ (Marcos10:38), ang Manluluwas mipatumong pag-usab sa atensyon ni Santiago ug Juan ngadto sa pagbuhat sa kabubut-on sa Amahan, kay sa pagdawat sa himaya ug dungog” (New Testament Student Manual [manwal sa Church Educational System, 2014], 126).

Marcos 10:45. “Ang Anak sa tawo mianhi … sa pag-alagad”

Si Presidente Ezra Taft Benson mipamatuod nga Si Jesukristo mao ang hingpit nga ehemplo sa pagkamaayo:

“Ang lalaki [o babaye] kansang kinabuhi duol kaayo sa sumbanan ni Jesukristo mao ang labing maayo ug labing bulahan ug malipayon. Wala kini kalabutan sa yutan-ong katigayunan, gahum, o dungog. Ang bugtong tinud-anay nga sukdanan sa pagkamaayo, kabulahan, ug kamalipayon mao ang unsa ka duol ang kinabuhi nahisama sa Agalon, si Jesukristo”(“Jesus Christ: Gifts and Expectations,” Ensign, Dis. 1988, 2).