Pasiuna sa Sulat ni Pablo ngadto kang Tito
Ngano nga kinahanglang tun-an kini nga basahon?
Ang sulat ni Pablo kang Tito, sama sa iyang mga sulat ngadto kang Timoteo, naglangkob sa walay paghupas nga tambag gikan ni Apostol Pablo ngadto sa usa ka lokal nga lider sa Simbahan. Gisulat ni Pablo nga ang “paglaum alang sa dayong kinabuhi” sa una gisaad sa Dios didto sa kinabuhi sa wala pa dinhi sa yuta “sa wala pa ang kapanahunan” (Tito 1:2). Gitudlo niya nga ang mga Santos kinahanglang maglantaw nianang “bulahan nga paglaum” sa kahimayaan ug sa Ikaduhang Pag-anhi (Tito 2:13). Misulat si Pablo kang Tito mahitungod sa “paghugas sa pagkatawo pag-usab” ug sa “pagkabag-o diha sa Espiritu Santo,” nga naghisgot sa ordinansa sa bunyag ug sa makaputli nga epekto sa pagdawat sa Espiritu Santo, kining duha mga pagpangandam aron “mahimong mga manununod sa kinabuhing dayon sumala sa ginalauman” (Tito 3:5, 7). Pinaagi sa pagtuon sa dinasig nga tambag ngadto kang Tito, ang mga estudyante makapalig-on sa ilang pagtuo nga ang mga doktrina ug mga ordinansa sa ebanghelyo naghatag og paglaum para sa kinabuhing dayon.
Kinsa ang nagsulat niini nga basahon?
Ang Basahon ni Tito gisulat ni Pablo (tan-awa sa Tito 1:1).
Kanus-a ug diin kini gisulat?
Maingon og gihimo ni Pablo kini nga Sulat kang Tito dihang gisulat niya ang 1 ug 2 Timoteo sa tuig mga A.D. 64–65 (tan-awa sa Giya ngadto sa mga Kasulatan, “Epistola ni Pablo, Mga,” scriptures.lds.org). Gihimo ni Pablo ang Sulat ngadto ni Tito human sa unang pagkabilanggo ni Pablo sa Roma. Wala isulat ni Pablo kon asa siya dihang gihimo niya ang Sulat ngadto kang Tito.
Para kang kinsa kini gisulat ug ngano?
Kini nga epistola gisulat ni Pablo para kang Tito, kinsa gi-refer ni Pablo nga “akong tinuod nga anak diha sa tinuohan natong tanan” (Tito 1:4). Si Tito usa ka Gresyanhon (Mga Taga-Galacia 2:3) ug nakabig sa ebanghelyo ni Pablo mismo (tan-awa sa Giya ngadto sa mga Kasulatan, “Tito”). Human sa iyang pagkakabig, si Tito mitrabaho uban ni Pablo sa pagsangyaw sa ebanghelyo ug pag-organisar sa Simbahan (tan-awa sa Giya ngadto sa mga Kasulatan, “Tito”). Mitabang siya sa pagpundok sa mga donasyon para sa mga kabus sa Jerusalem (tan-awa sa 2 Mga Taga-Corinto 8:6, 16–23) ug usab mikuyog ni Pablo ngadto sa konseho sa Jerusalem (tan-awa sa Mga Taga-Galacea 2:1). Gisalig ni Pablo kang Tito ang pagdala ngadto sa Corinto sa unang sulat ni Pablo ngadto sa mga Santos nga namuyo didto (tan-awa sa 2 Mga Taga-Corinto 7:5–15). Misulat si Pablo kang Tito aron malig-on siya sa iyang assignment sa pagpangulo ug pag-atiman sa branch sa Simbahan sa Creta bisan sa oposisyon (tan-awa sa Tito 1:5, 10–11; 2:15; 3:10).
Unsa ang pipila ka mga butang nga nakalahi niini nga basahon?
Kini nga sulat usa sa pastoral nga mga Sulat (para sa usa ka pastor, o lider, sa Simbahan), kauban sa 1 ug 2 Timoteo (tan-awa sa Giya ngadto sa mga Kasulatan, “Epistola ni Pablo, Mga”). Ang sulat ni Tito naghatag sa pinakaunang ebidensya nga ang Simbahan naestablisar na sa isla sa Gresya didto sa Creta sa Dagat sa Mediterranea (tan-awa sa Tito 1:5). Si Tito dunay responsibilidad sa pagtawag og bag-ong mga bishop niana nga isla. Gilista ni Pablo ang pipila ka espiritwal nga mga kwalipikasyon para sa mga bishop (tan-awa sa Tito 1:6–9). Agig dugang, mihatag si Pablo og piho nga tambag ngadto sa mga lalaki, babaye, ug mga sulugoon bahin sa maayong mga kinaiya para sa mga Santos (tan-awa sa Tito 2:2–10).
Outline
Tito 1 Gisugo ni Pablo si Tito sa pag-orden og mga lider sa Simbahan ug sa paglista sa pipila ka mga kwalipikasyon para sa pagka-bishop. Gisugo niya si Tito sa pagkorihir sa mga pagtulun-an nga supak ug pagbadlong sa mini nga mga magtutudlo kinsa “magapahayag nga sila nanagpakaila sa Dios; apan … ginapanghimakak siya pinaagi sa ilang mga binuhatan” (Tito 1:16).
Tito 2 Giawhag ni Pablo si Tito nga tudloan ang mga tigulang na nga mga miyembro sa Simbahan sa pagkahimong ehemplo para sa mas batan-ong mga Santos. Gihangyo sab niya si Tito nga tudloan ang mga sulugoon sa pagsuporta sa ilang mga agalon. Gipasabut ni Pablo ang angayang pamaagi diin ang mga disipulo magpakabuhi samtang mangandam sila sa pagbalik sa Ginoo. Gihulagway niya ang pagtubos nga gihimo ni Jesukristo.
Tito 3 Gitudlo ni Pablo nga ang mga miyembro sa Simbahan kinahanglang mamaayo nga mga lungsuranon ug matarung nga mga sumusunod ni Jesukristo. Pinaagi sa bunyag, makadawat kita og kinabuhing dayon gumikan sa grasya sa Ginoo.