Leksyon 79: Juan 20

Leksyon 79

Juan 20

Pasiuna

Sa pagka-Dominggo human sa Paglansang, nadiskubrihan ni Maria Magdalena ang wala nay sulod nga lubnganan ug gipahibalo si Juan ug Pedro, kinsa dayon nanagan ngadto sa walay sulod nga lubnganan. Ang nabanhaw nga Kristo mipakita ni Maria Magdalena ug sa wala madugay sa Iyang mga disipulo.

Mga Sugyot alang sa Pagtudlo

Juan 20:1–10

Nadiskubrihan ni Maria Magdalena ang wala nay sulod nga lubnganan ug gipahibalo si Juan ug Pedro, kinsa dayon nanagan ngadto sa walay sulod nga lubnganan

Aron maandam ang mga estudyante sa pagtuon sa Juan 20, dapita sila sa paghunahuna mahitungod sa usa ka panahon dihang usa ka minahal o minahal sa ubang tawo nga ilang kaila namatay.

Unsa nga pagbati ang tingali atong masinati kon usa sa atong gimahal mamatay?

Aron matabangan ang mga estudyante nga makasabut sa kinatibuk-ang kahulugan sa Juan 20, pahinumdumi sila nga human sa pagkamatay ni Jesus mga alas 3:00 sa hapon sa Biyernes, sa pagkahapon na kaayo gibutang ang Iyang lawas sa lubnganan ug usa ka dakong bato ang giali sa ganghaan sa lubnganan. Dayon ang Igpapahulay nagsugod sa pagkasalop sa adlaw. (Mahimo nimong ipasabut nga sa wala pa ang Pagkabanhaw ni Jesukristo, ang mga tawo sa pakigsaad sa Ginoo mibalaan sa Igpapahulay gikan sa pagsalop sa adlaw sa Biyernes hangtud sa pagsalop sa adlaw sa Sabado.)

Dapita ang usa ka estudyante sa pagbasa og kusog sa mosunod nga pamahayag ni Elder Joseph B. Wirthlin sa Korum sa Napulog Duha ka mga Apostoles. Hangyoa ang klase sa pag-imagine sa unsay gibati sa mga disipulo ni Jesus nianang subo kaayo nga Biyernes.

“Gihunahuna nako unsa ka itom kadto nga Biyernesa dihang si Kristo gilansang sa krus.

“Nianang labihan kasubo nga Biyernes mitay-og ang kalibutan ug mingit-ngit. Makalilisang nga mga unos mitadlas kalibutan.

“Kadtong mga dautan nga katawhan kinsa nagtinguha sa Iyang kinabuhi nangalipay. Karon nga si Jesus wala na, sa pakatinuod kadtong misunod Kaniya matibulaag. Niana nga adlaw, mibarug sila nga madaugon.

“Nianang adlawa, ang bilo sa templo nangapikas.

“Si Maria Magdalena ug si Maria, nga inahan ni Jesus, pulos gisanapan sa kasubo. Ang talagsaon nga tawo nga ilang gimahal ug gipasidunggan patay na nga nagbitay sa krus.

“Niana nga Biyernes, ang mga Apostoles nangahugno. Si Jesus, ilang Manluluwas—ang tawo nga milakaw sa tubig ug mibuhi sa patay—Siya mismo, tungod sa mga tawong dautan. Nagbantay sila nga wala nay mahimo samtang Siya gidaug sa Iyang mga kaaway.

“Niana nga Biyernes, ang Manluluwas sa katawhan gipanamastamasan ug gisamaran, giabuso ug gibugalbugalan.

“Usa kadto ka Biyernes nga puno sa makapagun-ob, makapahugno nga kasubo nga mikutkot sa mga kalag niadtong naghigugma ug nagtamud sa Anak sa Dios.

“Nagtuo ako nga ang tanang adlaw sukad sa sinugdanan sa kasaysayan sa kalibutan, kadto nga Biyernes mao ang pinakangitngit” (“Ang Dominggo Moabut,” Ensign o Liahona, Nob. 2006, 29–30).

Kon usa pa mo niadtong mga disipulo nga didto niadtong adlaw nga Biyernes, unsa kaha ang inyong mahunahuna o mga pagbati?

Human makatubag ang mga estudyante, basaha og kusog ang mosunod nga dugang nga pamahayag ni Elder Joseph B. Wirthlin:

“Apan ang kalaglagan nianang adlawa wala mohangtud” (“Ang Dominggo Moabut,” 30).

Dapita ang mga estudyante sa pagpangita kon sa unsang paagi nga “ang kalaglagan nianang adlawa wala mohangtud” samtang magtuon sila sa Juan 20.

Hangyoa ang usa ka estudyante sa pagbasa og kusog sa Juan 20:1–2 . Dapita ang klase sa pagsunod, nga mangita sa unsay nadiskubrihan ni Maria Magdalena dihang miabut siya sa gilubngan ni Jesus sa sayo sa buntag sa unang adlaw sa semana, o Dominggo.

Unsa ang nadiskubrihan ni Maria?
Unsa ang gibuhat ni Maria dihang nadiskubrihan niya nga ang bato gikuha na gikan sa ganghaan sa lubnganan? Unsa man ang iyang nahunahuna?

Dapita ang pipila ka estudyante nga magpuli-puli sa pagbasa og kusog sa Juan 20:3–10 . Hangyoa ang klase sa pagsunod, nga mangita kon unsay gihimo ni Pedro ug ni Juan, kinsa gi-refer nga “usa nga tinun-an” (bersikulo 3), human madungog ang balita ni Maria.

Unsa ang gibuhat ni Pedro ug ni Juan human madungog ang balita ni Maria?
Sumala sa bersikulo 8, unsay reaksyon ni Juan dihang nakita ang lubnganan nga wala nay sulod? Unsay iyang gituohan?

Mahimo nimong ipasabut nga hangtud nga gitan-aw ni Juan ang wala nay sulod nga lubnganan, wala niya masabti sa hingpit ang mga pahayag sa Manluluwas nga Siya mobangon gikan sa pagkamatay sa ikatulo nga adlaw. Dihang nakita ni Juan ang wala nay sulod nga lubnganan, siya nahinumdom ug mituo (tan-awa sa Juan 20:8–9).

Juan 20:11–31

Ang nabanhaw nga Manluluwas mipakita kang Maria Magdalena ug sa wala madugay sa Iyang mga disipulo

Dapita ang usa ka estudyante sa pagbasa og kusog sa Juan 20:11–15 . Hangyoa ang klase sa pagsunod, nga mangita kon si kinsa ang nakigsulti ni Maria human si Pedro ug Juan mibiya sa lubnganan.

Sa mga bersikulo 12–13, kinsa ang nakigsulti ni Maria?
Kinsa ang nakigsulti ni Maria sa bersikulo 15? Kinsa sa pagtuo ni Maria si Jesus nga nakigsulti kaniya?

Dapita ang usa ka estudyante sa pagbasa og kusog sa Juan 20:16–18 . Hangyoa ang klase sa pagsunod, nga mangita kon unsay gisugo ni Jesus nga buhaton ni Maria dihang nailhan Siya ni Maria.

Aron matabangan ang mga estudyante nga makasabut sa mga pulong nga “ayaw na ako pagkupti” (bersikulo 17), dapita ang usa ka estudyante sa pagbasa og kusog sa mosunod nga pamahayag ni Elder Bruce R. McConkie sa Korum sa Napulog Duha ka mga Apostoles:

“Ang King James Version mikutlo sa giingon ni Jesus ‘Ayaw na ako pagkupti.’ Ang Hubad ni Joseph Smith mabasa nga ‘Ayaw ko guniti.’ Ang managlahi nga paghubad sa Gresyanhon nagpasabut sa tudling nga ‘Ayaw ko kapyuti’ o ‘Ayaw ko guniti.’ Ang uban mihatag og kahulugan nga ‘Ayaw na ko kapyuti,’ o ‘Ayaw na ko guniti.’ Ang uban moingon nga hunong na sa paggunit o pagkapyot kaniya, nagbilin og konklusyon nga si Maria naggunit na kaniya. Dunay balidong rason sa paghunahuna nga ang ideya nga gipasabut ngadto kang Maria sa Nabanhaw nga Ginoo maingon niini: ‘Dili ka makapugong nako dinhi, kay mosaka ko ngadto sa akong Amahan’” (The Mortal Messiah, 4 vols. [1979–81], 4:264).

Sumala sa bersikulo 17, unsay gisugo ni Jesus kang Maria nga buhaton?

Dapita ang mga estudyante sa pag-imagine nga usa sila sa mga disipulo nga nakadungog sa pagsaksi ni Maria. Hangyoa ang mga estudyante nga tubagon ang mosunod nga mga pangutana diha sa ilang mga class notebook o mga scripture study journal.

Sa inyong hunahuna unsa kaha ang inyong pagbati samtang naminaw mo ni Maria?
Motuo kaha mo niya? Ngano o nganong dili man?

Human sa igo nga panahon, dapita ang pipila ka estudyante sa pagpakigbahin sa ilang gisulat. Pahinumdumi sila nga ang ubang mga disipulo naglisud sa pagtuo sa nasaksihan ni Maria (tan-awa sa Marcos 16:11).

Dapita ang usa ka estudyante sa pagbasa og kusog sa Juan 20:19–20, ug hangyoa ang klase sa pagpangita kon unsay nahitabo nianang gabhiona.

Unsa ang nahitabo nianang gabhiona dihang nagkapundok ang mga disipulo?
Unsang importante nga doktrina ang nakat-unan ni Maria ug sa mga disipulo? (Ang mga estudyante mahimong mogamit og lain-laing mga pulong apan kinahanglang mahibalo sa mosunod nga doktrina: Gibuntog ni Jesukristo ang kamatayon pinaagi sa Iyang Pagkabanhaw.)
Sumala sa bersikulo 20, unsay gibati sa mga disipulo dihang nakita nila ang nabanhaw nga Ginoo?

Dapita ang usa ka estudyante sa pagbasa og kusog sa mosunod nga pamahayag ni Elder Joseph B. Wirthlin:

“Ug diha-diha ang mga mata nga puno sa walay paghunong nga luha nauga na. Ang mga ngabil nga mihunghong og pag-ampo sa kasagmuyo ug kagul-anan karon napuno sa kahanginan uban sa talagsaong pagdayeg, kay si Jesus nga Kristo, ang Anak sa buhi nga Dios, nagbarug sa ilang atubangan isip ang unang bunga sa Pagkanbanhaw, ang kamatuoran nga ang kamatayon mao lamang ang sinugdanan sa bag-o ug talagsaong kinabuhi” (“Ang Dominggo Moabut,” 30).

Sa unsang mga paagi ang pagkahibalo nga si Jesukristo nabanhaw makatabang nato samtang nagsubo kita kon dunay tawo nga atong gimahal mamatay? (Tungod kay si Jesukristo nabanhaw, ang tanan nga nagpuyo niini nga kalibutan mabanhaw usab [tan-awa sa 1 Mga Taga-Corinto 15:20–22].)

I-summarize ang Juan 20:21–23 pinaagi sa pagpasabut nga human gipakita ni Jesus sa Iyang mga disipulo ang mga samad sa Iyang mga kamot ug kilid, Iya silang gisugo sa paghimo sa Iyang buluhaton ug giingnan sila, “Dawata ninyo ang Espiritu Santo” (bersikulo 22).

Dapita ang usa ka estudyante sa pagbasa og kusog sa Juan 20:24–25 . Dapita ang mga estudyante sa pagsunod, nga mangita kon kinsa nga Apostol ang wala niana nga sagradong okasyon.

Kinsa nga Apostol ang wala dihang ang ubang mga disipulo nakakita sa nabanhaw nga Ginoo?
Sumala sa bersikulo 25, unsa ang giingon ni Tomas nga iyang gikinahanglan aron motuo?
Sa unsang paagi ang tubag ni Tomas nga narekord niini nga bersikulo lahi kay sa tubag ni Juan dihang nakita ni Juan ang wala nay sulod nga lubnganan sigun sa narekord sa Juan 20:8?
Ngano kaha nga lisud para ni Tomas nga motuo?

Dapita ang pipila ka estudyante nga magpuli-puli sa pagbasa og kusog sa Juan 20:26–29 . Hangyoa ang klase sa pagpangita sa unsay nasinati ni Tomas mga walo ka adlaw human siya miingon nga wala siya motuo nga si Jesus nabanhaw.

Imbis nga pabasahon ang mga estudyante, mahimo nimong ipasalida ang video “Blessed Are They That Have Not Seen, and Yet Have Believed” (2:29) gikan sa The Life of Jesus Christ Bible Videos aron matabangan ang mga estudyante nga makahulagway sa kasinatian ni Tomas sigun sa narekord dinhi niini nga mga bersikulo. Kini nga video anaa sa LDS.org.

Human nga gitugutan ni Jesus nga makahikap si Tomas sa Iyang mga kamot ug kilid, unsa nga pagpili ang gipahimo Niya kang Tomas? (Pagmatinuohon.)
Sumala sa bersikulo 29, unsay gusto ni Jesus nga masabtan ni Tomas?
Unsa nga baruganan ang atong makat-unan gikan sa mga pagtulun-an sa Manluluwas? (Human makatubag ang mga estudyante, isulat sa pisara ang mosunod nga baruganan: Mapanalanginan kita kon atong pilion nga motuo ni Jesukristo bisan og dili kita makakita Kaniya.)

Bahina ang mga estudyante ngadto mga grupo nga magtinagurha o tinagutlo, ug hatagi ang matag grupo og usa ka handout diin naa ang mosunod nga mga pangutana.

Mapanalanginan Kita kon Atong Pilion nga Motuo ni Jesukristo Bisan og Dili Kita Makakita Kaniya

Manwal sa Seminary Teacher sa Bag-ong Tugon—Leksyon 79

Nganong pilion man ninyo nga motuo ni Jesukristo bisan og wala ninyo Siya makita sa mortal ninyong mga mata?
Unsa ang atong mahimo aron atong ikapakita nga atong gipili nga motuo kang Jesukristo?
Sa unsang paagi kamo napanalanginan gumikan sa inyong pagpili nga motuo ni Jesukristo?

Dapita ang matag grupo sa paghisgot niini nga mga pangutana ug ipasulat ang ilang mga tubag diha sa handout o sa ilang mga scripture study journal. Human sa igo nga panahon, hangyoa ang pipila ka estudyante sa pagpakigbahin sa ilang mga tubag sa klase.

Ipasabut nga bisan og gitudlo ni Jesus nga mapanalanginan kita kon atong pilion nga motuo Kaniya bisan og dili nato Siya makita, naghatag Siya og mga saksi isip basihan sa atong gituohan.

Dapita ang usa ka estudyante sa pagbasa og kusog sa Juan 20:30–31 . Hangyoa ang klase sa pagsunod, nga mangita kon nganong girekord ni Juan kining mga panghitabo.

Nganong girekord man ni Juan kini nga mga panghitabo? (Mahimo nimong ipasabut nga ang pulong nga kinabuhi sa [bersikulo 31] nag-refer sa kinabuhing dayon.)
Unsa nga mga kamatuoran ang atong makat-unan gikan sa bersikulo 31 mahitungod sa mga pagpamatuod sa mga apostoles ug mga propeta? (Ang mga estudyante mahimong mogamit og lain-laing mga pulong apan kinahanglang mahibalo sa mga kamatuoran sama sa mosunod: Ang mga apostoles ug mga propeta nagpamatuod ni Jesukristo aron kita motuo nga Siya ang Anak sa Dios. Pinaagi sa pagpili nga motuo sa pagpamatuod ni Jesukristo nga gihatag sa mga apostoles ug mga propeta, makabaton kita og kinabuhing dayon. Kini nga pagtuo nagpasabut nga ang usa ka tawo maningkamot sa pagtuman sa Iyang mga sugo ug magpakabuhing matinuoron niana nga pagpamatuod.)
Sa unsang paagi ang mga pagpamatuod sa mga apostoles ug mga propeta nakalig-on sa inyong pagtuo kang Jesukristo?

Tapusa pinaagi sa pagpakigbahin sa imong pagpamatuod bahin ni Jesukristo. Awhaga ang mga estudyante nga gamiton ang mga kamatuoran nga ilang nahibaloan diha sa Juan 20 pinaagi sa pagtino kon unsaon nga ilang ikapakita nga mituo sila ni Jesukristo.

Komentaryo ug Background nga Impormasyon

Juan 20:11–18. Ang unang saksi sa nabanhaw nga Kristo

Si Presidente James E. Faust sa Korum sa Napulog Duha ka mga Apostoles mipasabut nga ang unang tawo diin si Jesus mipakita isip nabanhaw nga binuhat dunay dako kaayong kahulugan:

“Wala gayuy babaye nga makapangutana kon giunsa sa paghatag og bili sa Manluluwas ang pagkababaye. Ang nagsubo nga si Maria Magdalena maoy unang mibisita sa lubnganan human sa Paglansang, ug dihang nakita niya nga gikuha na ang bato ug ang lubnganan wala nay sulod, midagan siya sa pagsulti kang Pedro ug ni Juan. Miadto ang duha ka Apostoles aron sa pagsusi ug nanglakaw sila nga nanagsubo. Apan si Maria nagpabilin. Nagbarug siya duol sa krus [tan-awa sa Mateo 27:56; Marcos 15:40; Juan 19:25]. Didto siya sa paglubong [tan-awa sa Mateo 27:61; Marcos 15:47]. Ug karon nagbarug siyang nagbakho duol sa wala nay sulod nga lubnganan [tan-awa sa Juan 20:11]. Didto siya gipasidunggan nga maoy unang mortal nga nakakita sa nabanhaw nga Ginoo” (“Woman, Why Weepest Thou?” Ensign, Nob. 1996, 54).

Juan 20:16–20. “Dayon nangalipay ang mga disipulo, dihang nakita nila ang Ginoo”

Si Elder Joseph B. Wirthlin (1917–2008) sa Korum sa Napulog Duha Ka mga Apostoles mihulagway sa kasubo sa mga disipulo ni Jesukristo niadtong Biyernes nga Siya gilansang sa krus. Dayon midugang siya:

“Ang kasubo wala magdugay tungod kay sa pagka-Dominggo, ang nabanhaw nga Ginoo mibugto sa mga higot sa kamatayon. Mibangon Siya gikan sa lubnganan ug mipakita sa mahimayaong kadaugan isip Manluluwas sa katawhan. …

“Matag usa kanato adunay atong kaugalingon nga Biyernes—kadtong mga adlaw nga ang kalibutan mismo ingon og nabungkag ug ang mga tipak sa atong kalibutan nagkatag libut kanato nga piniraso. Kitang tanan makasinati niadtong mga nangabuak nga panahon nga mora og dili na mauli pa. Tanan kita adunay mga Biyernes.

“Apan akong ipamatuod kaninyo sa pangalan sa Usa kinsa mibuntog sa kamatayon—ang Dominggo moabut. Diha sa kangiub sa atong kasub-anan, ang Dominggo moabut.

“Bisan unsa man kita kawalay paglaum, ang Dominggo moabut. Dinhi niining kinabuhia o sa sunod, ang Dominggo moabut.

“Ako mopamatuod kaninyo nga ang Pagkabanhaw dili usa ka tumo-tumo nga sugilanon. Anaa kanato ang personal nga pagpamatuod niadtong mga nakakita Kaniya. Liboan sa Karaan ug Bag-ong mga Kalibutan nakasaksi sa nabanhaw nga Manluluwas. Nahikap nila ang mga samad sa Iyang mga kamot, tiil ug kilid. Mitulo ang ilang mga luha sa dili mapugngan nga kalipay dihang sila migakos Kaniya” (“Ang Dominggo Moabut,” Ensign o Liahona, Nob. 2006, 30).

Juan 20:22. “Gihuypan niya sila sa iyang gininhawa”

Si Presidente Harold B. Lee misulti sa mosunod nga pahayag:

“Iyang ‘gihuypan sila sa iyang gininhawa ug miingon kanila, Dawata ninyo ang Espiritu Santo,’ (Juan 20:22) diin sa tanang kalagmitan mao ang pagkumpirmar ug pagsugo nga makadawat sa Espiritu Santo, o bunyag sa Espiritu, pinaagi sa pagpandong sa mga kamot kay human niana mao kana ang pamaagi nga gisunod sa Iyang mga disipulo” (sa Conference Report, Abr. 1955, 18).

Si Elder Bruce R. McConkie sa Korum sa Napulog Duha ka mga Apostoles sa samang paagi misugyot nga ang mga pulong nga “Si Jesus ‘mihuyop kanila sa iyang gininhawa,’ … tingali nagpasabut nga Iyang gipatong ang Iyang mga kamot diha kanila samtang gilitok niya ang pamahayag: ‘Dawata ang Espiritu Santo.’” Padayon nga mitudlo si Elder McConkie nga kini nga hitabo naghulagway sa kalainan tali sa pagtugyan sa gasa sa Espiritu Santo ug sa aktwal nga pagtagamtam sa gasa: “Sa ingon sila nakadawat, apan niana gayud nga panahon wala pa makatagamtam, sa gasa sa Espiritu Santo. … Ang gasa sa Espiritu Santo mao ang katungod, basi sa kamatinud-anon, nga makadawat sa padayong pakig-uban niining sakop sa Dios nga Kapangulohan; ug kini nga gasa itugyan pinaagi sa pagpandong sa mga kamot human sa bunyag. Kini nga gasa nagtanyag og pihong mga panalangin kon dunay hingpit nga pagtuman sa balaod nga nalakip niini; ang tanan diin ang gasa gitugyan wala magpasabut nga makatagamtam o makaangkon sa gitanyag nga gasa. Sa sitwasyon sa mga apostoles ang aktwal nga pagtagamtam sa gasa nalangay hangtud sa kapanahunan sa Pentecostes. (Mga Buhat 2.)” (Doctrinal New Testament Commentary, 3 vols. [1965–73], 1:857).