Leksyon 94

Mga Buhat 17

Pasiuna

Human mibiya sa Filipos, si Pablo ug si Silas mitudlo sa ebanghelyo didto sa Tesalonica ug Berea. Ang pagpanggukod gikan sa dili mga tumutoo niini nga mga siyudad mipugos ni Pablo sa paglayas ngadto sa Atenas, diin, didto sa Bungtod sa Mars, gitudloan niya ang mga tawo mahitungod sa tinuod nga kinaiyahan sa Dios.

Mga Sugyot alang sa Pagtudlo

Mga Buhat 17:1–15

Ang pipila sa mga Judeo sa Tesalonica misulay sa paghunong ni Pablo gikan sa pagsangyaw sa ebanghelyo

Dapita ang mga estudyante sa pagpasabut kon unsa nga tambag ang ilang ihatag ngadto sa mga tawo sa mosunod nga mga sitwasyon:

1. Usa ka batan-ong lalaki kinsa usa ka miyembro sa Simbahan naminaw sa usa ka sakop sa Korum sa Napulog Duha ka mga Apostoles nga namulong mahitungod sa importansya sa kaminyoon ug pamilya diha sa plano sa Langitnong Amahan. Ang pipila ka mga higala sa batan-ong lalaki mipahayag sa ilang pagsupak sa mga pagtulun-an sa Apostoles. Ang batan-ong lalaki gusto nga mahibalo alang sa iyang kaugalingon kon ang mga pagtulun-an sa Apostoles mga tinuod.

2. Usa ka batan-ong babaye gipangutana ang importansya sa paghupot sa adlawng Igpapahulay nga balaan. Kasagaran sa iyang mga higala gigahin ang Dominggo sa pag-shopping ug pagkatulog ug wala silay pagpakabana sa pag-adto sa simbahan. Nagpasabut ang iyang inahan sa mga panalangin nga moabut gikan sa pagtahud sa Ginoo ma-Dominggo, apan ang batan-ong babaye nanlimbasog gihapon sa pagtuo nga ang pagbalaan sa adlawng Igpapahulay importante.

Dapita ang mga estudyante sa pagpangita sa mga baruganan samtang sila magtuon sa Mga Buhat 17 nga motabang kanila nga mahibalo alang sa ilang mga kaugalingon sa kamatuoran sa mga mensahe nga atong madawat gikan sa mga sulugoon sa Ginoo.

Ipasabut nga si Pablo ug si Silas mibiyahe ngadto sa Tesalonica, diin sila mitudlo diha sa sinagoga sa Judeo. (Mahimo nimong dapiton ang mga estudyante sa pagpangita sa Tesalonica diha sa Mga Mapa Ug Indeks Sa Mga Ngalan Sa Dapit, Mapa 6–8, “Ang Misyonaryong mga Panaw ni Apostol Pablo.”) Dapita ang usa ka estudyante sa pagbasa og kusog sa Mga Buhat 17:1–3. Hangyoa ang klase sa pagsunod, mangita kon unsay gigamit ni Pablo aron sa pagtudlo sa mga Judeo.

• Unsa ang gigamit ni Pablo aron sa pagtudlo sa mga Judeo?

Ipasabut nga ang nagpamatuod (bersikulo 3) nagpasabut sa pagpakita o pagpahayag. Migamit si Pablo og mga tudling sa kasulatan sa pagpahayag o pagpakita nga si Jesus mao ang Kristo.

Dapita ang usa ka estudyante sa pagbasa og kusog sa Mga Buhat 17:4–5, ug hangyoa ang klase sa pagpangita kon giunsa sa pagtubag sa mga tawo sa Tesalonica ang mga pagtudlo ni Pablo. Mahimo nimong ipasabut nga ang miipon nagpasabut nga nakigpundok kauban ni o mikuyog ug nga ang bugoy nagpasabut og dautan.

• Sa unsa nga paagi ang mga tubag sa mga tawo ngadto sa pagtudlo ni Pablo nagkalain-lain?

I-summarize ang Mga Buhat 17:6–9 pinaagi sa pagpasabut nga usa ka pundok sa mga manggugubot nga dili tumutoo naninguha sa pagpangita ni Pablo ug ni Silas. Sa dihang wala nila makit-i sila, ang pundok sa manggugubot miadto sa mga tigmando sa Tesalonica ug miangkon nga ang mga pagtudlo ni Pablo mibahad sa awtoridad ni Cesar.

Dapita ang usa ka estudyante sa pagbasa og kusog sa Mga Buhat 5:10–12. Hangyoa ang klase sa pagsunod, mangita kon diin miikyas si Pablo ug si Silas. Dapita ang mga estudyante sa pagreport unsa ang ilang nakit-an.

• Sumala sa bersikulo 12, sa unsa nga paagi ang mga Judeo sa Berea mitubag sa mga pagtudlo ni Pablo?

Kopyaha ang mosunod nga dili kompletong equation diha sa pisara:

__________________________ + _____________________________ = Pagtuo

• Sumala sa bersikulo 11, unsa ang unang gibuhat sa mga tawo nga migiya ngadto sa ilang pagtuo sa mga pagtulun-an ni Pablo? (Human sa tubag sa mga estudyante, isulat ang mosunod nga pamahayag diha sa pisara isip ang unang bahin sa equation: Ilang gidawat ang mga pulong ni Pablo uban sa bug-os nga pagkamasinabtanon.)

Aron sa pagtabang sa mga estudyante sa pagsabut kon unsa ang gipasabut sa “[pagdawat] sa pulong uban sa bug-os nga pagkamasinabtanon,” pagdala og bola diha sa klase ug dapita ang duha ka mga estudyante sa pag-anha sa atubangan sa klase. Hangyoa ang usa kanila sa pagpangandam og pagsalo sa bola, ug tudloi ang lain nga estudyante sa pag-itsa sa bola ngadto sa unang estudyante. Pagkahuman, pangutan-a ang klase kon unsaon nila pag-ila nga ang unang estudyante andam sa pagsalo sa bola.

Sunod, dapita ang unang estudyante nga ipakita ang dili pagkaandam sa pagsalo sa bola ug sa pagpabilin niana nga paagi samtang ang lain nga estudyante nag-itsa pag-usab sa bola. Hangyoa ang lain nga estudyante sa pag-itsa sa bola (magmatngon nga dili makahimo og kadaot). Pangutan-a ang klase kon unsaon nila pag-ila nga ang unang estudyante dili andam sa pagsalo sa bola. Dapita ang mga estudyante sa pagpabalik ngadto sa ilang mga lingkuranan.

Dapita ang klase sa pagpakita kon sama kaha sa unsa ang hitsura sa maandam sa pagdawat sa mga pulong sa mga sulugoon sa Dios. Dayon hangyoa sila sa pagpakita kon sama kaha sa unsa ang hitsura kon ang usa ka tawo dili andam sa pagdawat sa mga pulong sa mga sulugoon sa Dios. (Sama pananglit, ang mga esudyante mahimong motak-op sa ilang mga kasulatan, makigtabi sa tupad nga estudyante o mahimong nalinga pinaagi sa electronic nga gamit.)

• Gawas sa makita niya nga hitsura, unsa kaha nga hitabo ang anaa sa kasingkasing ug salabutan sa usa ka tawo kinsa andam sa pagdawat og usa ka mensahe sa ebanghelyo?

Dad-a ang atensyon sa mga estudyante ngadto sa ikaduhang blangko sa equation diha sa pisara.

• Sumala sa bersikulo 11, unsa pa ang gibuhat sa mga tawo nga migiya ngadto sa ilang pagtuo sa mga pagtudlo ni Pablo? (Human motubag ang mga estudyante, isulat ang mosunod nga pamahayag diha sa pisara isip ang ikaduhang bahin sa equation: Gisiksik nila ang mga kasulatan kada adlaw aron masabtan ang mga pulong ni Pedro.)

• Unsa nga baruganan ang atong makat-unan gikan sa Mga Buhat 17:10–12 nga makalig-on sa atong pagtuo diha sa mga pulong sa sulugoon sa Dios? (Ang mga estudyante mahimong mogamit og lain-laing mga pulong, apan siguroa nga ilang mailhan ang mosunod nga baruganan: Kon kita modawat sa mga pulong sa mga sulugoon sa Dios uban sa tanang bug-os nga pagkamasinabtanon ug mosiksik sa mga kasulatan matag adlaw, niana ang atong pagtuo diha sa ilang mga pulong malig-on.)

Ribyuha ang mga sitwasyon nga gihulagway diha sa sinugdanan sa leksyon.

• Sa unsa nga paagi kaha kini nga baruganan nagtabang sa mga tawo niini nga mga sitwasyon?

• Sa unsa nga paagi ang inadlaw nga pagtuon sa kasulatan makaimpluwensya sa atong abilidad sa pagtuo sa kamatuoran?

Dapita ang mga estudyante sa paghunahuna og mga panahon sa diha nga sila nakasaksi sa kamatuoran niini nga baruganan. Mahimong dapiton nimo ang pipila kanila sa pagpakigbahin sa ilang mga kasinatian.

Awhaga ang mga estudyante sa pagdawat sa mga pulong sa mga propeta, mga lider, mga magtutudlo, ug mga ginikanan uban ang “bug-os nga pagkamasinabtanon” ug sa pagbasa kada adlaw sa mga kasulatan.

I-summarize ang Mga Buhat 17:13–15 pinaagi sa pagpasabut nga sa dihang ang mga Judeo sa Tesalonica nakadungog nga si Pablo nagsangyaw sa Berea, miadto sila aron sa pagpalagot sa mga tawo sa Berea. Gikinahanglan na usab nga molayas si Pablo, busa mibiyahe siya ngadto sa Atenas.

Mga Buhat 7:16–34

Nagsangyaw si Pablo diha sa Bungtod sa Mars

Dapita ang mga estudyante sa pagpakli ngadto sa Mga Hulagway sa mga Dapit sa Kasulatan, “Atenas,” diha sa Ang Giya ngadto sa mga Kasulatan. Ipasabut nga kini nga litrato nagpakita og usa sa pipila ka mga templo sa Atenas nga gigamit sa pagsimba og dios-dios. Sa sulod sa mga templo mao ang mga hinimo sa tawo nga mga estatuwa niini nga mga dios. Sa gawas mao ang mga altar diha diin ang mga sakripisyo ngadto niini nga mga dios-dios gihalad.

I-summarize ang Mga Buhat 17:16–21 pinaagi sa pagpasabut nga si Pablo nabalaka kaayo mahitungod sa pagsimba og dios-dios sa Atenas, ug nagtudlo siya diha sa mga sinagoga ug sa mga taboanan didto. Ang mga batid sa pangatarungan dayon midapit ni Pablo sa pagpasabut sa iyang “bag-ong doktrina” (bersikulo 19) ngadto sa konseho sa maghuhukom, nga magkita didto sa Bungtod sa Mars.

Dapita ang usa ka estudyante sa pagbasa og kusog sa Mga Buhat 17:22–23. Hangyoa ang klase sa pagsunod, mangita sa unsay namatikdan ni Pablo sa usa sa mga altar sa Atenas.

• Unsay nakita ni Pablo diha sa usa sa mga altar sa Atenas?

Ipasabut nga ang bersikulo 22 nagrekord nga si Pablo mikomplimento sa mga taga Atenas pinaagi sa pagsulti nga sila “masimbahon gayud,” nangahulugan nga sila mao ang “labing relihiyoso” o“ mabinantayon sa balaang mga butang”. Ang altar “alang sa dios nga wala hiilhi” (bersikulo 23) mao ang pagsulay sa mga taga Atenas sa paghupay sa wala hiilhi nga dios o bisan kinsa nga dios kinsa wala mailhi pinaagi sa ngalan. Sa dayag sila dili buot nga mopasilo o mopasagad ni bisan kinsa nga dios.

Ipasabut ang katapusang sentence sa Mga Buhat 17:23, ug unya pangutana:

• Nganong nagpasabut si Pablo ngadto niini nga altar “alang sa dios nga wala hiilhi”? (Gigamit niya kini sa pagpaila sa ideya sa tinuod nga Dios, Langitnong Amahan, ang Dios nga wala nila hiilhi.)

Bahina ang klase ngadto sa mga paris o gagmay nga mga grupo. Dapita ang matag grupo sa pagsiksik sa Mga Buhat 17:24–31 kutob sa daghang mga kamatuoran nga ilang makita mahitungod sa Dios kinsa wala hiilhi ngadto sa mga tawo sa Atenas. Samtang ilang gitun-an, ilista ang matag numero sa bersikulo (24–31) diha sa pisara. Human sa igo nga panahon, dapita ang daghang mga estudyante sa pagduol ngadto sa pisara sa pagsulat og kamatuoran nga ilang nakit-an sunod sa numero sa bersikulo diin ilang nakit-an kini. (Aron pagtabang sa mga estudyante sa pag-ila og kamatuoran diha sa Mga Buhat 17:27, mahimo nimong ipasabut nga ang Hubad ni Joseph Smith niini nga bersikulo mabasa “Nga sila kinahanglan nga mosiksik sa Ginoo kon sila andam nga mangita kaniya, tungod kay Siya dili layo sa tanan kanato.”)

Tingali makasugyot ka usab nga markahan sa mga estudyante ang matag mga kamatuoran diha sa ilang mga kasulatan. Ang pipila sa mga kamatuoran nga ilang gilista diha sa pisara tingali nag-apil sa mosunod:

• Bersikulo 24: Gilalang sa Dios ang kalibutan.

• Bersikulo 25: Naghatag ang Dios og kinabuhi ngadto sa tanang mga butang.

• Bersikulo 26: Nagdumala ang Dios sa tanang kinabuhi.

• Bersikulo 27: Kon kita andam sa pagpangita sa Dios, atong mahibaloan nga Siya dili layo gikan kanato.

• Bersikulo 28: Kita kaliwat sa Dios.

• Bersikulo 29: Kita gilalang sa panagway sa Dios.

• Bersikulo 30: Nagsugo ang Dios sa tanan sa paghinulsol.

• Bersikulo 31: Pagahukman kita sa Dios; Pagabanhawon sa Dios ang tanang tawo gikan sa patay.

Dapita ang mga estudyante sa pagpili og usa ka kamatuoran diha sa pisara nga makahuluganon nganha kanila. Hangyoa ang pipila kanila sa pagpakigbahin kon hain nga kamatuoran ang ilang gipili ug nganong makahuluganon kini nganha kanila.

Magdesidir kon unsa ang itudlo

Samtang kamo nagdesidir kon hain nga mga doktrina ug mga baruganan ang hatagan og gibug-aton sa usa ka leksyon, pangayo og direksyon gikan sa Espiritu Santo, paninguhaa ang pagdeterminar sa tuyo sa gidasig nga tigsulat, palandonga kon hain nga mga kamatuoran ang sukaranan nga mga doktrina ug makakabig nga mga baruganan, ug paghunahuna sa mga panginahanglan sa mga estudyante.

Ipasabut ang doktrina “Kita kaliwat sa Dios.”

• Unsay ipasabut nga mahimong “kaliwat”sa Dios? (Kita mga espiritung anak Langitnong Amahan.)

• Nganong importante kini kaayo nga masabtan kini nga doktrina? (Kini makatabang kanato sa pag-ila sa atong mahangturong bili ngadto sa Langitnong Amahan ug sa atong potensyal nga mahimong sama Kaniya.)

• Unsa nga mga problema o kalibug ang moabut pinaagi sa dili pagsabut niini nga doktrina?

Hangyoa ang usa ka estudyante sa pagbasa og kusog sa mosunod nga pamahayag ni Elder Dallin H. Oaks sa Korum sa Napulog Duha ka mga Apostoles. Hangyoa ang klase sa pagpaminaw kon nganong kinahanglan gayud nga kita mahinumdom sa pagtan-aw sa atong mga kaugalingon og una ug labaw sa tanan isip nga mga anak a Dios.

“Pagmatngon kon giunsa nimo pagpaila ang imong kaugalingon. Ayaw ipaila o ipasabut ang imong kaugalingon pinaagi sa yutan-ong kalidad. Ang mao lamang nga nag-inusarang kalidad nga kinahanglang mopaila kanato mao nga kita mga anak sa Dios. Kana nga kamatuoran molabaw sa tanang uban nga mga kinaiya, lakip ang kaliwat, trabaho, pisikal nga mga kinaiya, mga kadungganan, o bisan ang relihiyosong pagkasakop” (“How to Define Yourself,” New Era, Hunyo 2013, 48).

• Nganong importanting mahinumdom nga kita una ug labaw sa tanan mga anak sa Dios?

Dangop ngadto sa baruganan “Kon kita andam sa pagpangita sa Dios, atong mahibaloan nga Siya dili layo gikan kanato.”

• Sa unsa nga mga paagi kita makapaningkamot aron mahibalo ug mas maduol ngadto sa Dios?

• Sa unsa nga paagi nga ang pagsabut sa atong relasyon ngadto sa Dios makaapekto sa atong tinguha sa pagpangita Kaniya?

• Kanus-a nimo nabati nga ang Langitnong Amahan duol kanimo?

Tabangi ang mga estudyante sa pagbati sa kamatuoran ug importansya sa mga doktrina ug mga baruganan

Human mailhan ug masabtan sa mga estudyante ang mga doktrina sa ebanghelyo ug mga baruganan diha sa mga kasulatan, ilang mabati ang kamatuoran ug importansya niini pinaagi sa Espiritu. Usa ka paagi sa pagtabang sa mga estudyante sa pagbuhat niini mao ang pag-awhag kanila sa pagpamalandong ug pagpakigbahin og personal nga mga kasinatian kalabut ngadto sa doktrina o baruganan.

I-summarize ang Mga Buhat 17:32–34 pinaagi sa pagpasabut nga ang mga taga Atenas adunay nagsagol nga mga reaksyon ngadto sa paghisgot ni Pablo sa “pagkabanhaw sa patay” (bersikulo 32). Ang pipila kanila mibiay-biay ni Pablo, ang uban buot nga maminaw pa, ug pipila ka mga tawo mituo.

Mahimong ikaw mopamatuod nga ang mga estudyante moabut nga makahibalo ug makasabut sa Dios, bisan tuod Siya wala hiilhi sa daghang mga tawo. Dapita ang mga estudyante sa pagsulat og Ngadto sa Maila nga Dios diha sa usa ka pirasong papel o kard ug sa paglista og mga paagi nga sila maninguha ug magpalambo og relasyon ngadto sa Dios. Awhaga sila sa pagbutang niini nga papel diin kini mopahinumdom kanila sa ilang mga tumong.

Komentaryo ug Background nga Impormasyon

Mga Buhat 17:18. Mga Epicureo ug mga Estoico

“Sa Atenas, gikaasdang ni Pablo ang mga pilosopo nga mga Epicureo ug mga Estoico (tan-awa sa Mga Buhat 17:18). Ang Epicureanismo gihingalan alang ni Epicurus (341–270 B.C.). Sumala sa iyang pilosopiya, ang kalibutan natawo pinaagi sa sulagma ug walay katuyoan o desinyo. Ang mga Epicureo mituo nga ang mga dios, kon sila buhi, wala moapil sa ilang mga kaugalingon diha sa mga kinabuhi sa mga tawo ug nga ang kalipay makaplagan diha sa pagkawalay kabalaka ug kasakit ug sa pagpahimulos og mga kalipay sa kasarang.

“Ang Estoico misugod sa mga pagtudlo sa usa ka tawo nga ginganlan og Zeno (333–264 B.C.). Ang Estoico naghupot nga ang tanang mga butang gilalang, gihan-ay, ug gipalihok pinaagi sa balaang katarungan. Mituo ang mga Estoico nga ang tawo gitugahan og abilidad sa pangatarungan ug kinahanglan nga mangita og panag-uyon sa balaang han-ay sa mga butang, mobuntog sa mainit nga mga pagbati, ug mopuyo og usa ka ligdong ug tarung nga kinabuhi” (New Testament Student Manual [manwal sa Church Educational System, 2014], 315–16; tan-awa usab sa Bible Dictionary sa English version sa Biblia, “Epicureans,” “Stoics”).

Mga Buhat 17:11. “Ilang gidawat ang mga pulong ni Pablo uban sa bug-os nga pagkamasibuton”

Si Presidente Dieter F. Uchtdorf, sa Unang Kapangulohan, mitudlo:

“Kon mas ipaduol nato ang atong kasingkasing ug hunahuna ngadto sa Dios, mas dugang nga langitnong kahayag ang ihatag kanato. Ug matag higayon nga kita andam ug mangita niana nga kahayag, gipakita nato sa Dios ang atong kaandam sa pagdawat og dugang nga kahayag. Anam-anam,ang mga butang nga kaniadto lubog, ngitngit, ug layo magkaklaro, magkahayag,ug mas mapamilyar ngarikanato” (“Pagdawat og usa ka Pagpamatuod sa Kahayag ug Kamatuoran,” Ensign o Liahona, Nob. 2014, 22).