Leksyon 71
Juan 11
Pasiuna
Si Maria ug si Marta mipahibalo kang Jesus nga ang ilang igsoon nga si Lazaro nasakit. Nalangay si Jesus sa Iyang biyahe ug miabut upat ka adlaw na human namatay si Lazaro. Uban sa gugma ug kapuangod, gibuhi ni Jesus si Lazaro gikan sa pagkamatay. Kini nga mahinuklugong pagpakita sa balaang gahum naghatag og emphasis nga si Jesus mao ang pinili mga Mesiyas ug dunay gahum batok sa kamatayon. Human mahibalo bahin niini nga milagro, ang punoang mga pari nagplano nga patyon si Jesus ug si Lazaro.
Mga Sugyot alang sa Pagtudlo
Juan 11:1–46
Si Jesus Mibuhi ni Lazaro gikan sa pagkamatay
Hatagi ang matag estudyante og gagmayng papel. Dapita ang mga estudyante nga sulatan nila ang papel og usa ka pagsulay nga ilang nasinati o nasinati sa usa ka tawo nga ilang nailhan. Samtang magsulat ang mga estudyante, pahibaloa sila nga ang ilang gisulat ipakigbahin ngadto sa klase nga dili ipahibalo kang kinsa kini gikan, mao nga kinahanglang dili nila sulatan og ngalan ang ilang papel. Kolektaha ang mga papel, ug basaha og kusog ang ubang mga pagsulay. (Aron malikayan ang posibilidad nga mailhan nga iya sa usa ka estudyante ang pagsulay, kon diyutay ra ang imong estudyante, hangyoa ang klase sa pagsulat og daghang pagsulay nga nakita nila nga nasinati sa uban.)
-
Unsa ang pipila ka paagi nga ang pagtuo sa mga tawo kang Jesukristo maapektuhan dihang nagsinati sila og mga pagsulay?
Dapita ang mga estudyante sa pagpangita sa mga kamatuoran samtang magtuon sila sa Juan 11 nga makatabang nato nga molambo ang atong pagtuo kang Jesukristo samtang nagsinati kita og mga pagsulay.
Dapita ang usa ka estudyante sa pagbasa og kusog sa Juan 11:1–3 . Hangyoa ang klase sa pagsunod, nga mangita og usa ka pagsulay nga nasinati sa pipila ka mga higala ni Jesus.
-
Sumala sa bersikulo 1, unsa nga pagsulay ang nasinati ni Lazaro? Sa unsang paagi usab nga kini usa ka pagsulay para ni Maria ug ni Marta?
-
Unsa ang gibuhat ni Maria ug ni Marta tungod sa sakit ni Lazaro? Unsa man ang gipakita niini kon unsa sila?
Ipasabut nga si Jesus didto sa Bethabara sa Perea (tan-awa sa Juan 1:28; 10:40), diin gibanabana nga mokabat og usa ka adlaw ang biyahe gikan sa Betania. Mao nga, mikabat og pinakaminos usa ka adlaw aron ipahibalo sa usa ka tawo kini nga mensahe ngadto ni Jesus ug laing adlaw sa pagbiyahe ni Jesus ngadto sa Betania.
Dapita ang usa ka estudyante sa pagbasa og kusog sa Juan 11:4–7 . Hangyoa ang klase sa pagsunod, nga mangita sa unsang paagi misanong si Jesus human nadungog ang pagkasakit ni Lazaro.
-
Nahibalo nga pinangga ni Jesus si Marta, Maria, ug Lazaro, unsa kaha ang gilauman sa mga disipulo nga buhaton ni Jesus diha-diha dayon dihang nadungog Niya nga nasakit si Lazaro? (Mibiyahe dayon sa Betania ug ayuhon si Lazaro, o tingali mamulong ug ayuhon siya gikan sa layo, sama sa gibuhat ni Jesus ngadto sa anak sa usa ka opisyal [tan-awa sa Juan 4:46–53].)
-
Apan unsa man hinoon ang gihimo ni Jesus?
-
Sumala sa bersikulo 4, unsa ang gisulti ni Jesus nga angayang matuman gumikan sa sakit ni Lazaro?
Pahinumdumi ang mga estudyante nga ang Betania dili kaabut og duha ka milyas gikan sa Jerusalem sa yuta sa Judea (tan-awa sa Juan 11:18). I-summarize ang Juan 11:8–10 pinaagi sa pagpasabut nga ang ubang mga disipulo mitambag ni Jesus nga dili mobalik sa Judea kay ang mga lider sa mga Judeo niana nga rehiyon nagtinguha sa pagpatay Kaniya (tan-awa sa Juan 10:31–39 ug ang Joseph Smith Translation, Juan 11:16 nga “Ug si Tomas nga ginganlag Kaluha, miingon sa iyang mga masigkatinun-an, Mangadto usab kita aron mamatay kita uban kaniya; kay nangahadlok sila basin og ilang dad-on si Jesus ug patyon, kay wala pa nila masabti ang gahum sa Dios.” Mitubag si Jesus pinaagi sa pag-ingon nga Iyang gamiton ang nahibilin nga panahon sa Iyang kinabuhi sa paghimo sa Iyang buluhaton nga walay pagkasayop.
Dapita ang usa ka estudyante sa pagbasa og kusog sa Juan 11:11–15 . Hangyoa ang klase sa pagsunod, nga mangita kon unsay gisulti ni Jesus mahitungod sa kahimtang ni Lazaro.
-
Unsa ang sayop nga pagtuo sa mga disipulo bahin sa gisulti ni Jesus mahitungod sa kahimtang ni Lazaro?
-
Sumala sa bersikulo 15, nganong nalipay man si Jesus nga wala Siya didto aron sa pag-ayo sa sakit ni Lazaro? (Dapita ang mga estudyante sa pagkonsiderar nga markahan ang pamahayag nga “aron managpanuo kamo” sa ilang mga kasulatan.)
Ipasabut nga ang Manluluwas nag-ingon nga kon unsa ang Iyang buhaton sa Betania makatabang sa Iyang mga disipulo nga molambo ang ilang pagtuo Kaniya.
I-summarize ang Juan 11:16 pinaagi sa pagpasabut nga si Apostol Tomas miawhag sa iyang isigka-disipulo nga mokuyog niya uban ni Jesus ngadto sa Judea bisan og nagpasabut kini nga mamatay uban Kaniya.
Dapita ang mga estudyante sa pagbasa og hilum sa Juan 11:17, nga mangita kon unsa na kadugayon ang pagkamatay ni Lazaro dihang miabut si Jesus sa Betania. Hangyoa ang mga estudyante sa pagreport sa ilang nakit-an.
Dapita ang usa ka estudyante sa pagbasa og kusog sa mosunod nga pamahayag ni Elder Bruce R. McConkie sa Korum sa Napulog Duha ka mga Apostoles. Hangyoa ang klase nga paminawon ang kahulugan sa kamatayon ni Lazaro nga upat ka adlaw nang patay.
“Ang pagkadunot haduol na; ang kamatayon dugay nang nahibaloan isip usa ka labing siguro nga moabut. … Para sa mga Judeo ang gidugayon nga upat ka adlaw may espesyal nga kahulugan; usa kadto ka nailhan nga gituohan sa mga Judeo nga sa ikaupat nga adlaw ang espiritu sa katapusan ug sa hangtud mobiya na sa nahimutangan sa patay nga lawas” (Doctrinal New Testament Commentary, 3 vols. [1965–73], 1:533).
-
Para sa mga Judeo, unsa man ang kahulugan sa tawo nga upat ka adlaw nang patay?
-
Kon kamo pa si Marta o si Maria, unsa kaha ang inyong mahunahuna o pagbati nga si Jesus wala moabut hangtud nga upat ka adlaw nang patay si Lazaro?
Dapita ang pipila ka mga estudyante nga magpuli-puli sa pagbasa og kusog sa Juan 11:18–27 . Hangyoa ang klase sa pagpangita kon unsay gisulti ni Marta ngadto ni Jesus bahin niini nga pagsulay.
Imbis nga hangyoon ang mga estudyante sa pagbasa, mahimo nimong patan-awon sila sa gihimo nga paghulagway niini nga pagsultihanay sa Manluluwas ug ni Marta sa video nga “Lazarus Is Raised from the Dead” gikan sa The Life of Jesus Christ Bible Videos [time code 2:02–3:35]. Kini nga video anaa sa LDS.org.
-
Asa nga pamahayag diha sa mga bersikulo 21–27 ang nag-ingon nga gipili ni Marta nga gamiton ang iyang pagtuo kang Jesukristo atol niini nga pagsulay? (Kon gipatan-aw nimo ang video, mahimong hatagan nimo ang mga estudyante og usa ka minuto sa pagribyu niini nga mga bersikulo.)
-
Asa sa mga pamahayag ni Marta ang nakahatag kaninyo og dakong importansya? Ngano?
-
Unsa ang atong makat-unan gikan sa ehemplo ni Marta mahitungod sa unsay atong mabuhat atol sa mga pagsulay nga atong nasinati? (Mahimo nga mahibaloan sa mga estudyante ang usa ka baruganan sama sa mosunod: Mahimo nga pilion nato ang paggamit sa atong pagtuo kang Jesukristo atol sa atong mga pagsulay.)
Idirekta ang atensyon sa mga estudyante ngadto sa Juan 11:25–26. Ipasabut nga ang mga pulong nga “dili na gayud mamatay” (Juan 11:26) nagpasabut sa ikaduha o espirituhanong kamatayon, o pagkabulag gikan sa presensya ug gingharian sa Dios.
-
Unsa nga mga kamatuoran ang atong makat-unan gikan sa pahayag sa Manluluwas ngadto kang Marta? (Ang mga estudyante kinahanglang mahibalo sa kamatuoran susama sa mosunod: Si Jesukristo mao ang Pagkabanhaw ug ang Kinabuhi. Kon motuo kita ni Jesukristo, makabaton kita og kinabuhing dayon.)
Dapita ang pipila ka mga estudyante nga magpuli-puli sa pagbasa og kusog sa Juan 11:28–36 . Hangyoa ang klase sa pagpangita kon unsay gisulti ni Maria ngadto kang Jesus ug giunsa ni Jesus sa pagtubag. Mahimo nga kinahanglan nimong ipasabut nga ang “miluom” dinhi niini nga mga bersikulo nagpasabut nga nasubo o nasakitan.
Imbis nga pabasahon nimo ang mga estudyante, mahimo nimong ipasalida ang gihimo nga paghulagway niini nga mga bersikulo diha sa video nga “Lazarus Is Raised from the Dead” [time code 3:36–4:50].
-
Sa unsang paagi ang pamahayag ni Maria diha sa bersikulo 32 nagpakita sa iyang pagtuo sa Manluluwas?
-
Giunsa ni Jesus sa pagtubag dihang nakita Niya ang pagbakho ni Maria ug sa iyang mga kauban?
-
Ngano kaha nga si Jesus mibakho man?
Dapita ang mga estudyante sa pagbasa og hilum sa Juan 11:37, nga mangita kon unsa ang gikalibgan sa mga tawo kon unsa kaha unta ang mahimo ni Jesus kang Lazaro. Hangyoa ang mga estudyante sa pagreport sa ilang nakit-an.
Dapita ang pipila ka mga estudyante nga magpuli-puli sa pagbasa og kusog sa Juan 11:38–46 . Hangyoa ang klase sa pagpangita kon unsay sunod nga gihimo sa Manluluwas.
Imbis nga pabasahon nimo ang mga estudyante, mahimo nimong ipasalida ang gihimo nga paghulagway niini nga mga bersikulo diha sa video nga “Lazarus Is Raised from the Dead” [time code 4:51–7:51].
-
Sa bersikulo 40, unsa ang gipahinumdom ni Jesus kang Marta human nagduda siya nga tangtangon ang ali nga bato sa gilubngan ni Lazaro?
-
Sa unsang paagi nga natuman kini nga saad? (Mahimo nimong ipasabut nga si Lazaro wala mabanhaw gikan sa pagkamatay ug dili siya imortal; ang iyang espiritu nga lawas mibalik sa iyang pisikal nga lawas, apan ang iyang pisikal nga lawas mortal sa gihapon.)
Dapita ang usa ka estudyante sa pagbasa og kusog sa mosunod nga pamahayag ni Elder Bruce R. McConkie. Hangyoa ang klase sa pagpaminaw sa importanting katuyoan nga natuman sa Manluluwas pinaagi sa pagbuhi ni Lazaro gikan sa pagkamatay.
“Gipahiluna niya ang sitwasyon, aron mahulagway sa tanang kapanahunan, ang usa sa pinakamahinungdanon niyang mga pagtulun-an: Nga siya mao ang pagkabanhaw ug ang kinabuhi, nga ang imortalidad ug ang kinabuhing dayon miabut tungod kaniya, ug kadtong motuo ug mosunod sa iyang mga pulong dili gayud mamatay sa espirituhanong paagi” (Doctrinal New Testament Commentary, 3 vols. [1965–73], 1:531).
-
Sa unsang paagi kini nga milagro usa ka pasiunang paghulagway sa Pagkabanhaw sa Manluluwas?
-
Sa unsang paagi kini nga milagro nagpakita sa gahum nga Siya makahatag og imortalidad ug kinabuhing dayon?
-
Sa unsang paagi kita mapanalanginan pinaagi sa pagkasabut sa gahum sa Manluluwas nga makahatag og imortalidad ug kinabuhing dayon?
Pahinumdumi ang klase nga si Marta ug Maria sa sinugdanan mipakita na og pagtuo kang Jesukristo pinaagi sa pagpahibalo Kaniya nga nasakit si Lazaro ug padayon nga mituo ug misalig Kaniya bisan human sa pagkamatay ni Lazaro. Isulat sa pisara ang mosunod nga dili kompleto nga pamahayag: Kon pilion nato ang paggamit sa hugot nga pagtuo kang Jesukristo atol sa atong mga pagsulay, niana …
-
Unsaon ninyo sa pagkompleto kini nga baruganan basi sa atong nakat-unan sa Juan 11? (Human makatubag ang mga estudyante, kompletuha ang pamahayag diha sa pisara aron mabasa kini sama sa mosunod: Kon pilion nato nga mogamit sa hugot nga pagtuo kang Jesukristo atol sa atong mga pagsulay, niana ang atong pagtuo Kaniya mapamatud-an ug molambo.)
Pahinumdumi ang mga estudyante nga ang ubang mga tawo naghunahuna kon napugngan ba kaha unta ni Jesus ang pagkamatay ni Lazaro (tan-awa sa bersikulo 37), gani si Jesus naghulat pa nga moabut sa Betania hangtud nga namatay si Lazaro sulod na sa upat ka adlaw (tan-awa sa bersikulo 17).
-
Sa unsang paagi kaha ang pagbuhi ni Lazaro human siya namatay sulod sa upat ka adlaw nagpamatuod ug mipalambo sa pagtuo sa mga disipulo, ug ni Marta ug Maria diha sa Manluluwas? (Sa pagbuhi kang Lazaro gikan sa pagkamatay human sa upat ka adlaw, gipakita ni Jesus nga Siya dunay gahum labaw sa kamatayon sa paagi nga dili ikalimud o dili masaypan sa pagsabut sa mga Judeo.)
-
Kanus-a kamo mipili nga mogamit sa inyong pagtuo kang Jesukristo atol sa mga pagsulay ug napamatud-an o milambo ang inyong pagtuo Kaniya isip resulta?
Dapita ang mga estudyante nga isulat diha sa ilang mga class notebook o mga scripture study journal kon unsay ilang buhaton aron makapili sila sa paggamit og pagtuo kang Jesukristo atol sa mga pagsulay nga ilang nasinati o masinati.
Juan 11:47–57
Ang punoang mga pari ug mga Pariseo nagtigom sa pagsabut nga patyon si Jesus
Dapita ang usa ka estudyante sa pagbasa og kusog sa Juan 11:47–48 . Hangyoa ang klase sa pagsunod, nga mangita sa unsang paagi misanong ang punoang mga pari ug mga Pariseo sa mga report bahin sa pagbuhi ni Jesus kang Lazaro gikan sa pagkamatay. Hangyoa ang mga estudyante sa pagreport sa ilang nakit-an.
I-summarize ang Juan 11:49–57 pinaagi sa pagpasabut nga si Caifas, ang halangdong pari [high priest], mitambag nga kinahanglang patyon si Jesus aron mapugngan ang pagkalaglag sa ilang nasud pinaagi sa mga Romano. Siya usab wala masayud nga gipanagna ang mga epekto sa kamatayon ni Jesus ngadto sa mga anak sa Dios. Ang mga lider sa mga Judeo determinado nga ipapatay si Jesus ug misugo nga kadtong mga nahibalo kon asa Siya mopahibalo ngadto nila aron dakpon Siya.
Tapusa pinaagi sa pagpamatuod sa mga kamatuoran nga gitudlo niini nga leksyon.
Komentaryo ug Background nga Impormasyon
Juan 11:11. “Si Lazaro natulog”
Ang Manluluwas mipasabut sa kamatayon ni Lazaro nga usa ka pagkatulog. Ang pagkatulog usa ka tukma nga pagkumpara sa kamatayon kay ang tanang mortal kinahanglan mang matulog, ang katulog usa ka temporaryo nga kahimtang diin kita momata, ug human sa pagkatulog ang lawas mabag-o. Sa samang paagi, ang tanang mortal kinahanglang mamatay, ang kamatayon usa ka temporaryo nga kahimtang nga matapos kon kita mabanhaw na, ug diha sa Pagkabanhaw ang atong lawas mabag-o.
Ingon og si Lazaro patay na dihang gipahibalo si Jesus nga nasakit si Lazaro. Gibana-bana nga mokabat og usa ka adlaw nga biyahe gikan sa Betania ang pag-adto sa nahimutangan ni Jesus sa Perea (tan-awa sa Juan 10:40). Pinaagi sa pagpili nga maghulat una og duha ka adlaw sa wala pa mogikan ug dayon mibiyahe sulod sa usa ka adlaw, si Jesus miabut sa Betania human nga si Lazaro upat na ka adlaw nga patay.
Juan 11:43–44. Importante nga mga katuyoan nga natuman sa pagbuhi ni Lazaro gikan sa pagkamatay
“Ang pagbuhi ni Lazaro gikan sa pagkamatay usa sa pinakatalagsaong milagro sa kasaysayan. Sa wala pa mahitabo kini nga milagro, ang Manluluwas mibuhi na og duha ka tawo: ang anak ni Jairo (tan-awa sa Lucas 8:41–42, 49–56) ug ang anak sa biyuda nga si Nain (tan-awa sa Lucas 7:11–17). Hinoon, ang pagbuhi ni Lazaro lahi ra kay niini nga mga milagro ug dunay importanting mga katuyoan, sigon sa gipasabut ni Elder Bruce R McConkie (1915–85) sa Korum sa Napulog Duha ka mga Apostoles:
“‘Bahin “ni Lazaro nga atong higala” lahi kadto. … Duha ka piho nga rason ang mipatigbabaw. (1) Samtang ang atong Ginoo nagkaduol na sa iyang katapusang mortal nga pangalagad, nagpamatuod na usab siya, sa paagi nga dili malalis, sa iyang pagka-Mesiyas, sa iyang balaanong Pagkaanak, sa kamatuoran nga siya gayud ang literal nga Anak sa Dios; ug (2) Iyang gipahiluna ang sitwasyon, aron mapahigayon diha sa tanang kapanahunan, ang usa sa iyang pinakatalagsaon mga pagtulun-an: Nga siya mao ang pagkabanhaw ug ang kinabuhi, nga ang imortalidad ug ang kinabuhing dayon miabut tungod kaniya, ug kadtong motuo ug mosunod sa iyang mga pulong dili gayud mamatay sa espirituhanong paagi’ (Doctrinal New Testament Commentary, 3 vols. [1965–73], 1:530–31)” (New Testament Student Manual [manwal sa Church Educational System, 2014], 236).
Ang pagbuhi ni Lazaro gikan sa kamatayon usa ka ebidensya nga si Jesus sa pagkatinuod mao ang Anak sa Dios, usa ka tawag sa Judeo nga may kalabutan sa Mesiyas (tan-awa sa Salmo 2:7; Juan 11:41–42).
Juan 11:25. “Ako mao ang pagkabanhaw, ug ang kinabuhi”
Dihang miingon ang Manluluwas nga, “Ako ang pagkabanhaw, ug ang kinabuhi,” Gihimo Niya ang pahayag mahitungod sa Iyang balaanong pagkatawo ug sa gahum. Niini nga pahayag, gitudlo ni Jesus nga ang pagkabanhaw ug ang kinabuhing dayon girepresentaran Niya mismo. Siya ang tinubdan sa pagkabanhaw ug kinabuhing dayon ug maoy hinungdan nga nahimo kining posible para sa mga anak sa Langitnong Amahan. Sigun sa gipasabut ni Presidente Russell M. Nelson sa Korum sa Napulog Duha ka mga Apostoles, “ang mga yawe sa Pagkabanhaw anaa lamang sa atong Ginoo ug Agalon” (“Life after Life,” Ensign, Mayo 1987, 10).
Si Presidente Ezra Taft Benson mipasabut nganong ang gahum sa pagkabanhaw anaa sa Manluluwas.
“Siya ang Pagkabanhaw ug ang Kinabuhi. (Tan-awa sa Juan 11:25.)
“Kini nga gahum sa pagbuhi sa kaugalingon Niyang kinabuhi nahimong posible tungod kay si Jesukristo usa man ka Dios—gani ang Anak sa Dios. Kay Siya may gahum sa pagbuntog sa kamatayon, ang tanang tawo mabanhaw. ‘Tungod kay Ako Buhi, Kamo Usab Mabuhi’ (Juan 14:19.)” (“Jesus Christ: Our Savior and Redeemer,” Ensign, Nob. 1983, 7).
Mihatag si Jesukristo og kinabuhi pinaagi sa paghimo og usa ka espirituhanong pagpakatawo pag-usab (tan-awa sa Juan 3:3–5) ug sa paghatag og gahum sa uban nga magpakabuhi subay sa Iyang pamaagi sa pagpakabuhi, nga mao ang dalan padulong sa kinabuhing dayon (tan-awa sa Juan 14:6). Kadtong mga natawo pag-usab sa espirituhanong paagi ug matinud-anon nga mosunod sa Manluluwas makadawat og kapasayloan sa mga sala, ug ang ilang mga kasingkasing anam-anam nga mabalaan gikan sa sala. Kon padayon silang matinud-anon hangtud sa katapusan sa ilang kinabuhi, maabut nila ang “pagkabanhaw sa kinabuhi” (Juan 5:29), buot ipasabut maangkon nila ang kinabuhing dayon. Tanan kini nahimong posible gumikan sa Pag-ula ni Jesukristo.