Juan 16

Pasiuna

Human makapangaon sa Pagpalabay, gipadayon ni Jesukristo ang pagtudlo sa Iyang mga disipulo. Giingnan Niya sila nga sa dili madugay moadto na Siya sa Iyang Amahan ug ang Espiritu Santo, o ang Maghuhupay, moanhi ug mogiya kanila sa tanang kamatuoran. Gipanagna ni Jesus ang Iyang kaugalingong kamatayon ug Pagkabanhaw ug mipahayag nga Iyang nabuntog ang kalibutan.

Mga Sugyot alang sa Pagtudlo

Juan 16:1–15

Gipasabut ni Jesus ang tahas sa Espiritu Santo

Dapita ang usa ka estudyante sa pagduol sa atubangan sa kwarto. Ihigot ang taptap [blindfold] libut sa ulo sa estudyante, nga matabunan ang mata aron ang estudyante dili makakita. Human mataptapan ang estudyante, dapita ang ubang mga estudyante nga ibutang ang ilang mga kasulatan bisan asa nga dapit sa kwarto. Dayon pangutan-a ang estudyante kon unsa kaha kalisud ang pagpangita sa mga kasulatan diha sa kwarto ug ukbon kini ngadto sa usa ka piho nga pahina. Pangutan-a ang estudyante kon makatabang ba kon dunay andam nga mogiya niya ngadto sa mga basahon.

Dapita ang gitaptapan nga estudyante sa pagpili og laing estudyante nga maoy mogiya. Dayon pagiyahe sa napilian nga estudyante ang gitaptapan nga estudyante ngadto sa mga kasulatan ug tabangan siya nga makit-an ang usa ka piho nga pahina. Human makompleto kini nga tahas, Ipasabut nga sa dihang si Kristo dinhi pa sa yuta, Iyang gigiyahan ug gitudloan ang Iyang mga disipulo. Personal Niya silang gigiyahan aron makasabut sa mga kamatuoran nga Iyang gitudlo.

I-summarize ang Juan 16:1–4 pinaagi sa pagpasabut nga human makakaon si Jesus sa pagkaon sa Pagpalabay uban sa Iyang mga disipulo, Iya silang giingnan nga moabut ang panahon nga kayugtan sila sa mga tawo ug kining mga tawhana magtuo nga giserbisyuhan nila ang Dios pinaagi sa pagpatay kanila.

Dapita ang usa ka estudyante sa pagbasa og kusog sa Juan 16:5–6 . Hangyoa ang klase sa pagsunod, nga mangita kon unsay gisulti ni Jesus sa Iyang mga disipulo ug unsay gibati nila mahitungod niini.

Unsa ang pagbati sa mga disipulo mahitungod sa balita nga si Jesus mopalayo na ug sila pagalutuson?

Palingkura og balik sa iyang lingkuranan ang nagsilbi nga giya sa gitaptapan nga estudyante. Pangutan-a ang gitaptapan nga estudyante:

Unsa ang pagbati nga nag-inusara na pud ka nga walay higala nga motabang nimo?

Pagkuha og lingkuranan para sa gitaptapan nga estudyante, ug palingkura siya (apan ayaw tangtanga ang taptap).

Dapita ang usa ka estudyante sa pagbasa og kusog sa Juan 16:7 . Hangyoa ang klase sa pagsunod, nga mangita kon kinsa ang gisaad ni Jesus nga Iyang ipadala human sa Iyang pagbiya.

Kinsa ang gisaad ni Jesus nga moabut human nga Siya mobiya? (Ipadala ni Jesus ang Maghuhupay, o ang Espiritu Santo.)

Ipasabut nga ang pulong nga maayo, diha sa bersikulo 7 nagpasabut nga makatabang o mapuslanon. Ipasabut nga “ang Espiritu Santo wala mahatag sa hingpit ngadto sa mga Judeo atol sa mga katuigan sa mortal nga panaw ni Jesus (Juan 7:39; 16:7)” (Ang Giya ngadto sa mga Kasulatan, “Espiritu Santo”). Aron matabangan ang mga estudyante nga makasabut nganong ang Espiritu Santo wala molihok sa hingpit, basaha og kusog ang mosunod nga pamahayag ni Bruce R. McConkie sa Korum sa Napulog Duha ka mga Apostoles:

“Samtang personal pang kauban si Jesus sa mga disipulo, dili pa hingpit ang ilang panginahanglan sa kanunay nga pakig-uban sa Espiritu kay sa human sa pagbiya ni Jesus” (Doctrinal New Testament Commentary, 3 vols. [1965–73], 753).

I-summarize ang Juan 16:8–12 pinaagi sa pagpasabut nga usa sa mga tahas sa Espiritu Santo mao ang pagpahimatngon sa makasasala nga kalibutan.

Dapita ang usa ka estudyante sa pagbasa og kusog sa Juan 16:13, ug hangyoa ang klase sa pagpangita sa ubang mga tahas nga tumanon sa Maghuhupay diha sa kinabuhi sa mga disipulo human mibiya si Jesus.

Unsang mga tahas ang tumanon sa Espiritu Santo diha sa kinabuhi sa mga disipulo sa Ginoo human Siya mibiya? Sa unsang paagi kaha makabenipisyo ang mga disipulo gikan sa tabang ug giya nga ihatag sa Espiritu Santo?
Sumala sa bersikulo 13, unsa usab ang mahimo sa Espiritu Santo ngari kanato sa atong panahon? (Human makatubag ang mga estudyante, isulat sa pisara ang mosunod nga kamatuoran: Ang Espiritu Santo makagiya kanato ngadto sa tanang kamatuoran ug mopakita ngari nato sa tanang butang nga umaabut.)
Unsa ang pipila ka paagi nga kita giyahan sa Espiritu Santo sa kamatuoran?
Sa unsang mga paagi nga ang Espiritu Santo mopakita kanato sa mga butang nga umaabut? (Kon gikinahanglan, ipasabut nga pinaagi sa Espiritu Santo, ang Dios makahatag og kasiguroan, paglaum, panan-awon, pasidaan, ug giya para sa atong umaabut.)

Ibutang ang usa ka item (usa ka ganti) nganha sa kabinet o lingkuranan o sa bisan asang dapit sa kwarto. Dapita ang gitaptapan nga estudyante sa pagpangita sa mao nga butang. Dapita ang laing estudyante nga mohunghong sa gitaptapan nga estudyante aron matabangan siya asa mapangita ang ganti. Human nga makit-an kini sa estudyante, ipatangtang na ang taptap. Dayon pabalika sila sa ilang mga lingkuranan. Pangutan-a ang klase:

Kanus-a kamo mibati nga ang Espiritu Santo naggiya kaninyo sa kamatuoran? Sa unsang paagi ninyo nahibaloan nga ang Espiritu Santo ang naggiya kaninyo?

Mahimo ka nga mopakigbahin og usa ka kasinatian dihang gigiyahan ka sa Espiritu Santo sa imong kinabuhi. Aron matabangan ang mga estudyante nga magamit kini nga kamatuoran nga ilang nakat-unan, awhaga sila sa pagpakabuhi sa mga paagi nga makadapit sa giya sa Espiritu Santo sa ilang kinabuhi.

Ipasabut nga ang Juan 16:13 nag-ingon nga ang Espiritu Santo, kansang tahas mao ang pagsaksi sa Amahan ug sa Anak, “dili magasulti sa iyang kinaugalingong pagbulot-an, hinonoa ang iyang madungog mao ang iyang igasulti.” Dapita ang usa ka estudyante sa pagbasa og kusog sa Juan 16:14–15, ug hangyoa ang klase sa pagpangita kon kang kinsa gikan ang mensahe nga ipamulong sa Espiritu Santo ngari kanato.

Kang kinsa gikan ang mensahe nga ihatag kanato sa Espiritu Santo? (Human makatubag ang mga estudyante, isulat sa pisara ang mosunod nga kamatuoran: Ang Espiritu Santo mopadayag sa mga kamatuoran ug instruksyon nga moabut gikan sa Langitnong Amahan ug ni Jesukristo.)
Nganong makatabang ang pagkahibalo nga kon ang Espiritu mamulong ngari kanato, Siya namulong para sa Langitnong Amahan ug ni Jesukristo?

Ipasabut sa mga estudyante nga ang komunikasyon sa Espiritu Santo “ngadto sa imong espiritu magdala og labaw pa nga kasiguroan kaysa bisan unsa nga komunikasyon nga imong madawat pinaagi sa imong natural nga mga pagbati” (Matinud-anon sa Tinuhoan [2004], 32). Nagpasabut kini nga ang Espiritu Santo mao ang mapuslanon natong giya sa pagkat-on sa kamatuoran; ang Iyang impluwensya mas mapuslanon kay sa pisikal nga pruweba, sa opinyon sa uban , o sa pangatarungan sa kalibutan. Sama nato, ang mga disipulo sa Manluluwas nagkinahanglan nga makakat-on sa pagsalig sa Espiritu Santo isip giya samtang wala ang Manluluwas.

Juan 16:16–33

Gihisgutan ni Jesus ang Iyang kaugalingong pagbiya sa mortalidad ug namahayag nga Iyang nabuntog ang kalibutan

Dapita ang mga estudyante sa pahunahuna og usa ka panahon dihang kinahanglan silang manamilit sa usa ka sakop sa pamilya o higala sa mubo nga panahon.

Unsay inyong gisulti aron sa paghupay sa usag usa dihang nanamilit kamo?

Dapita ang usa ka estudyante sa pagbasa og kusog sa Juan 16:16 . Hangyoa ang klase sa pagsunod, nga mangita kon unsa pay gisulti ni Jesus sa Iyang mga disipulo nga mihupay kanila samtang naghunahuna sila sa Iyang pagbiya. Hangyoa ang mga estudyante nga moreport sa unsay ilang nakit-an.

Ipasabut nga sa Juan 16:17–19, atong mabasa nga ang mga disipulo wala makasabut sa buot ipasabut ni Jesus dihang miingon Siya nga mobiya na Siya ug sila makakita Niya og balik.

Dapita ang usa ka estudyante sa pagbasa og kusog sa Juan 16:20–22 . Hangyoa ang klase sa pagsunod, nga mangita kon unsay gisulti ni Jesus nga bation sa Iyang mga disipulo sa Iyang pagbiya ug unsay ilang bation kon sila makakita Kaniya og balik. Mahimo nimong ipasabut nga ang mga pulong nga “inigbati sa babaye” nagpasabut sa manganakay nga inahan nga nagbati sa dili pa manganak.

Unsa ang pagbati sa mga disipulo dihang wala na si Jesus? Unsa ang gisaad Niya nga mahitabo human niana?

Ipasabut nga ang mga disipulo makakita ni Jesus og balik human Siya mabanhaw. Bisan og ang ilang kasubo tungod sa Iyang kamatayon nga hilabihan, ang kalipay nga ilang bation sa Iyang pagkabanhaw mahangturon.

I-summarize ang Juan 16:23–32 pinaagi sa pagpasabut nga gitudloan ni Jesus ang Iyang mga disipulo sa direkta nga pag-ampo ngadto sa Langitnong Amahan pinaagi sa Iyang (kang Kristo) pangalan ug gipaniguro kanila ang gugma sa Amahan alang nila ug Kaniya.

Dapita ang usa ka estudyante sa pagbasa og kusog sa Juan 16:33, ug hangyoa ang klase sa pagpangita sa mga pulong nga gigamit sa Manluluwas sa paghupay sa Iyang mga disipulo.

Unsa nga mga pulong ang gigamit sa Ginoo sa paghupay sa Iyang mga disipulo?
Sumala sa bersikulo 33, nganong aduna man kitay kalipay ug kalinaw bisan sa kalibutan nga puno sa kagul-anan ug kamatayon? (Human makatubag ang mga estudyante, isulat sa pisara ang mosunod nga baruganan: Tungod kay gibuntog ni Jesukristo ang kalibutan, mahimo kitang magmalipayon ug magmalinawon.)
Unsa sa inyong hunahuna ang ipasabut nga si Jesukristo mibuntog sa kalibutan?

Ipasabut nga isip Bugtong Anak sa Amahan, nagpakabuhi si Jesukristo og usa ka walay sala nga kinabuhi, mibuntog sa tanang kalibutanong mga tintasyon. Nasinati usab Niya ang tanang sakit ug balatian ug mitubos sa mga sala natong tanan. Pinaagi sa Iyang kinabuhi, Iyang pag-antus ug kamatayon, ug Iyang Pagkabanhaw, Iyang gibuntog ang tanang babag aron kita mamahimong limpyo, makakita og kalinaw, ug mabuhi pag-usab kauban sa atong Amahan sa Langit ug sa atong mga hinigugma.

Sa unsang mga paagi ang pagkahibalo nga si Jesukristo mibuntog sa kalibutan makatabang nato nga magmalipayon ug magmalinawon?

Hatagi ang mga estudyante og kopya sa mosunod nga pamahayag ni Presidente Thomas S. Monson. Dapita ang usa ka estudyante sa pagbasa og kusog sa pamahayag, ug hangyoa ang klase sa pagpangita sa usa ka pagpasabut kon nganong magmalipayon gihapon kita bisan sa mga pagsulay ug mga kalisdanan niining kalibutana.

“Magmaya kita samtang magpakabuhi kita. Bisan og nagpuyo kita sa makuyaw nga panahon, ang Ginoo nahigugma ug naghunahuna kanato. Anaa Siya sa atong kiliran kanunay kon mohimo kita sa matarung. Motabang Siya kanato sa panahon sa panginahanglan. … Mapuno usab sa kalipay ang atong kinabuhi kon mosunod kita sa mga pagtulun-an sa ebanghelyo ni Jesukristo.

“Ang Ginoo mipahayag, “Apan sumalig kamo; gidaug ko na ang kalibutan” [Juan 16:33]. Pagkadako sa kalipay ang ikahatag niini nga kahibalo diri kanato. Nagpakabuhi Siya alang nato ug nagpakamatay Siya alang nato. Iyang gibayran ang bili sa atong mga sala. Hinaut nga atong sundon ang Iyang ehemplo. Hinaut nga atong ipakita ang dakong pasalamat ngadto Niya pinaagi sa pagdawat sa Iyang sakripisyo ug pagpakabuhi nga makapabalik nato sa pagpuyo uban Kaniya” (“Ang Dios Magauban Kanimo,” Ensign o Liahona, Nob. 2012, 110–11).

Kanus-a nga ang kahibalo nga si Jesukristo mibuntog sa kalibutan nakatabang ninyo nga magmalipayon ug magmalinawon?

Dapita ang mga estudyante nga magmalipayon ug magsunod sa ebanghelyo ni Jesukristo. Ipamatuod nga kon himoon nila kini, bation nila ang kalinaw ug paglaum nga anaa pinaagi sa maulaong sakripisyo ug Pagkabanhaw sa Ginoo.

Komentaryo ug Background nga Impormasyon

Juan 16:33. “Pagmaya”

Atol sa Abril 2009 nga kinatibuk-ang komperensya, si Presidente Thomas S. Monson misugilon og usa ka istorya gikan ni Presidente Ezra Taft Benson ug ni Frederick W. Babbel, kinsa mibisita sa Europe pagkahuman sa Ikaduhang Gubat sa Kalibutan. Ang istorya mahitungod sa nabiyuda nga inahan nga may upat ka gagmayng anak nga naa sulod sa teritoryo sa kaaway. Bisan og mibiyahe siya og kapin sa 1,000 ka milyas aron maluwas, namatay ang kada usa niyang mga anak gumikan sa katugnaw ug kagutom, nagpabilin siyang matinud-anon sa iyang paglaum kang Jesukristo nga ang iyang pamilya magkauban human sa Pagkabanhaw.

Human sa istorya, si Presidente Monson misulti sa mosunod:

“Ako mopamatuod kaninyo nga ang atong mga panalangin nga gisaad walay sukod. Bisan og ang unos nga mga panganud magpundok, bisan og ang ulan mobundak kanato, ang atong kahibalo sa ebanghelyo ug ang atong gugma sa atong Langitnong Amahan ug sa atong Manluluwas mohupay ug molig-on kanato ug mohatag og kalipay sa atong mga kasingkasing samtang kita maglakaw sa matarung ug mosunod sa mga sugo. Walay butang niining kalibutana nga makapildi kanato.

“Minahal kong mga kaigsoonan, ayaw kahadlok. Pagmaya. Ang umaabut sama sa kahayag sa inyong hugot nga pagtuo” (“Pagmaya,” Ensign o Liahona, Mayo 2009, 91–92).