Mateo 26:31–Marcos 3:35 (Unit 7)

Materyal sa Pagpangandam alang sa Magtutudlo sa Home-Study

Summary sa mga Leksyon sa Daily Home-Study

Ang mosunod nga summary sa mga panghitabo, doktrina, ug mga baruganan nga nakat-unan sa mga estudyante samtang sila nagtuon sa Mateo 26:31–Marcos 3 (unit 7) wala gitumong nga itudlo isip kabahin sa imong leksyon. Ang leksyon nga imong gitudlo nakatutok sa pipila lamang niini nga mga doktrina ug mga baruganan. Sunda ang mga aghat sa Espiritu Santo samtang ikonsiderar nimo ang mga panginahanglan sa imong mga estudyante.

Day 1 (Mateo 26:31–75)

Samtang ang mga estudyante nagtuon sa pag-antus ni Jesus didto sa Tanaman sa Getsemani, sila nakakat-on nga si Jesukristo mitugyan sa Iyang kabubut-on ngadto sa kabubut-on sa Amahan aron sa pagtuman sa Pag-ula ug nga kita nagsunod sa ehemplo ni Jesukristo kon kita mopili sa pagtugyan sa atong kabubut-on ngadto sa kabubut-on sa Langitnong Amahan. Gikan sa mga instruksyon sa Manluluwas ngadto sa mga Apostoles didto sa Getsemani, ang mga estudyante nakakat-on nga kon kita magbantay ug mag-ampo kanunay, kita makabaton og kalig-on sa pagbuntog sa tintasyon.

Day 2 (Mateo 27–28)

Gikan sa istorya sa Pagkalansang sa Krus sa Manluluwas, ang mga estudyante nakakat-on nga isip kabahin sa Pag-ula, si Jesukristo mibati sa pagbiya sa Espiritu sa Langitnong Amahan. Sila usab nakakat-on nga si Jesukristo nag-antus aron sa pagtuman sa kabubut-on sa Langitnong Amahan, sama sa Iyang gisaad sa Mateo 26. Ug samtang ang mga estudyante nagtuon sa istorya sa pagkagisi sa tabil sa templo sa pagkamatay sa Manluluwas, sila nakakat-on nga kini nagsimbolo sa kamatuoran nga tungod sa Pag-ula ni Jesukristo, kitang tanan makasulod ngadto sa presensya sa Dios kon kita maghinulsol ug motuman sa atong mga pakigsaad.

Day 3 (Marcos 1)

Gikan sa istorya ni Jesus nga mipagula sa dautan nga espiritu, ang mga estudyante nakakat-on nga ang Manluluwas adunay gahum batok sa yawa ug sa iyang mga sumusunod. Ang mga estudyante usab nakakat-on nga sama nga si Jesus adunay kalooy ug milimpyo sa sanlahon, kon kita mogamit sa hugot nga pagtuo ug moduol sa Manluluwas, Siya maluoy kanato ug molimpyo kanato gikan sa sala.

Day 4 (Marcos 2–3)

Samtang ang mga estudyante nagtuon sa pagpasaylo ug pagkaayo sa paralitiko nga tawo, sila nakakat-on nga si Jesukristo adunay gahum sa pag-ayo kanato sa espiritwal ug pisikal nga paagi. Samtang sila nagtuon mahitungod ni Jesus nga mikaon uban sa mga maniningil sa buhis ug mga makasasala, sila nakakat-on nga ang Manluluwas nagtinguha sa pagtabang kanato nga maghinulsol sa atong mga sala ug mamaayo. Samtang nagbasa sila mahitungod sa mga Pariseo nga nanghimaraut ni Jesus ug sa Iyang mga disipulo tungod sa pagsupak sa Igpapahulay, ang mga estudyante nakakat-on nga kita makabalaan sa adlaw nga Igpapahulay pinaagi sa paghimaya sa Dios ug sa paghimo og maayo nga mga buhat.

Pasiuna

Si Jesukristo nabanhaw ug mipakita ngadto sa daghang mga indibidwal, lakip na sa Iyang mga Apostoles. Iyang gisugo ang Iyang mga Apostoles sa pagdala sa ebanghelyo ngadto sa tanang kanasuran.

Mga Sugyot alang sa Pagtudlo

Mateo 28

Si Jesukristo nabanhaw ug mipakita ngadto sa kadaghanan

Hangyoa ang mga estudyante sa paghunahuna kon sila o ilang kaila adunay suod nga namatay. Dayon pangutan-a ang klase:

Nganong ang kamatayon sa usa ka minahal mahimong lisud alang kanato?

Dapita ang mga estudyante sa pagpangita og mga kamatuoran samtang sila nagtuon sa Mateo 28 nga makatabang kanila sa pagkaplag og kahupayan kon ang usa ka minahal mamatay.

Ipasabut nga sayo pa sa unang adlaw sa semana—Dominggo—si Maria Magdalena ug ang laing babaye nga ginganlan og Maria miadto sa lubnganan diin gipahimutang ang lawas ni Jesus.

Dapita ang pipila ka estudyante nga magpuli-puli sa pagbasa og kusog gikan sa Mateo 28:1–6. Hangyoa ang klase sa pagsunod, nga mangita kon unsay nakita sa mga babaye sa pagduol nila sa pantiyon.

Unsa ang nakita sa mga babaye sa ilang pagduol sa pantiyon? (Ipasabut nga ang Hubad ni Joseph Smith alang niini nga mga bersikulo nagklaro nga ang mga babaye nakakita og duha ka mga anghel, dili usa [tan-awa usab sa Juan 20:12].)
Unsa kaha ang inyong reaksyon kon nakakita kamo og duha ka mga anghel?
Sumala sa bersikulo 4, unsa man ang reaksyon sa mga bantay?
Sumala sa bersikulo 5–6, unsay gisulti sa mga anghel ngadto sa mga babaye?
Unsa nga kamatuoran ang atong makat-unan gikan niini nga mga pulong? (Human makatubag ang mga estudyante, isulat sa pisara ang mosunod nga kamatuoran: Si Jesukristo nabanhaw gikan sa patay.)

Aron sa pagtabang sa mga estudyante nga makasabut sa doktrina sa Pagkabanhaw, grupoha sila sa tagduha o tagtulo ka mga estudyante ug dapita sila sa pagkompleto sa gilakip nga handout sa ilang mga grupo.

“Siya nabanhaw” (Matthew 28:6)

Manwal sa Seminary Teacher sa Bag-ong Tugon—Leksyon sa Home-Study (Unit 7)

Tun-i ang natala nga giulohan og “Pagkabanhaw” sa Giya ngadto sa mga Kasulatan. Dayon hisguti ang mga pangutana sa ubos ug i-rekord ang imong mga tubag sa mga luna nga giandam.

Unsa ang kalainan tali sa pagkabuhi gikan sa patay ug sa pagkabanhaw?
Unsay mahitabo sa tanang katawhan isip resulta sa Pagkabanhaw ni Jesukristo?
Sa unsang paagi ang pagsabut sa doktrina sa Pagkabanhaw makahatag og kahupayan alang niadtong nawad-an sa mga minahal?

Hangyoa ang pipila ka mga estudyante sa pagreport ngadto sa klase sa ilang nakat-unan pinaagi sa pagkompleto sa handout.

Dapita ang usa ka estudyante sa pagbasa og kusog sa mosunod nga pamahayag ni Presidente Gordon B. Hinckley:

“Ang milagro nianang buntag sa pagkabanhaw, ang unang Dominggo sa pasko sa Pagkabanhaw, mao ang milagro alang sa tanang katawhan. Mao kini ang milagro sa gahum sa Dios, kansang Hinigugmang Anak mihatag sa Iyang kinabuhi aron sa pagtubos sa mga sala sa tanan, usa ka sakripisyo sa gugma alang sa matag anak nga lalaki ug anak nga babaye sa Dios. Sa pagbuhat niini Siya mibugto sa mga silyo sa kamatayon. …

“Ug maingon nga Siya mibangon ug migula gikan sa lubnganan, maingon man usab nga kitang tanan makatagamtam sa pag-uban pag-usab sa lawas ug espiritu nga mahimong buhi nga mga kalag sa adlaw sa atong kaugalingon nga pagkabanhaw.

“Busa, kita magmalipayon sama sa kadaghanan, ug angay lang ang tanan nga mga katawhan, kon atong hinumduman ang labing mahimayaon, labing makahupay, ang labing mapasaligon sa tanang mga panghitabo sa tawhanong kasaysayan—ang kadaugan batok sa kamatayon” (“Ang Kadaugan batok sa Kamatayon,” Liahona, Abril 1997, 4).

Dapita ang usa ka estudyante sa pagbasa og kusog sa Mateo 28:7–10. Hangyoa ang klase sa pagsunod, nga mangita kon unsay gisulti ngadto sa mga babaye didto sa lubnganan ni Jesus.

Sumala sa bersikulo 7, unsay gisugo sa mga anghel nga buhaton sa mga babaye?
Ngano kaha nga ang mga babaye mibiya “uban sa kahadlok ug dakong kalipay”? (Mateo 28:8).
Unsay nahitabo sa mga babaye sa dihang nanugid sila sa ilang kasinatian ngadto sa mga disipulo?

I-summarize ang Mateo 28:11–15 pinaagi sa pagpasabut nga samtang ang mga babaye nagdali sa pagdala sa balita sa Pagkabanhaw ni Jesus ngadto sa mga disipulo, ang mga sacerdote nga punoan nakadungog sa nahitabo gikan sa mga sundalo nga mibantay sa lubnganan. Ang mga lider nga Judeo nangahadlok nga ang mga katawhan masayud sa kamatuoran, mao nga ilang gibayran ang mga bantay sa pagpakatap og mga bakak nga ang mga disipulo sa Manluluwas mikuha sa Iyang lawas gikan sa lubnganan samtang ang mga bantay nakatulog.

Hangyoa ang usa ka estudyante sa pagbasa og kusog sa Mateo 28:16–18. Dapita ang klase sa pagsunod, nga mangita sa panalangin nga miabut ngadto sa onse ka mga Apostoles samtang sila misunod sa mensahe nga gihatag kanila sa mga babaye ug miadto sa Galilea.

Unsa nga panalangin ang miabut ngadto sa onse ka mga Apostoles tungod sa ilang pagsunod sa mensahe nga moadto sa Galilea? (Sila nakakita sa nabanhaw nga Ginoo.)

Dapita ang mga estudyante sa pagbarug ug magdungan sa pagbasa og kusog sa Mateo 28:19–20. Pahinumdumi sila nga kini usa ka scripture mastery passage.

Hangyoa ang klase sa pagribyu sa mga bersikulo 19–20, nga mangita kon unsay gipabuhat sa Manluluwas ngadto sa Iyang mga Apostoles human sila makakita Kaniya.

Unsa man ang gisugo ngadto sa mga Apostoles nga ilang buhaton human sila makakita sa Manluluwas?
Unsa man ang atong makat-unan gikan sa ilang kasinatian kalabut sa atong responsibilidad samtang kita makaangkon og pagpamatuod kabahin ni Jesukristo? (Human makatubag ang mga estudyante, isulat sa pisara ang mosunod nga baruganan: Samtang kita makaangkon og pagpamatuod kabahin ni Jesukristo, kita adunay responsibilidad sa pagpamatuod Kaniya ngadto sa uban.)

Pahinumdumi ang mga estudyante nga isip kabahin sa ilang leksyon sa home-study sa Mateo 27–28, sila milista og mga paagi nga sila makapamatuod ni Jesukristo ngadto sa uban (buluhaton 3 diha sa Unit 7: Day 2 nga leksyon). Dapita ang mga estudyante sa pagpakigbahin unsay ilang gisulat ug sa pagpasabut ug paghatag og mga ehemplo sa ilang mga ideya. Mahimo nimong ilista ang ilang mga ideya diha sa pisara.

Sumala sa Mateo 28:20, unsa ang gisaad sa Manluluwas ngadto sa Iyang mga disipulo?
Sa unsang paagi nga ang Ginoo “magauban kaninyo,” o mitabang kaninyo, sa inyong mga paningkamot sa pagpakigbahin sa ebanghelyo?

Ikonsiderar ang pagdapit sa mga estudyante sa pagpakigbahin sa ilang mga pagpamatuod kabahin ni Jesukristo diha sa klase, sa ginagmay nga mga grupo, o magpares. Mahimo usab nimong ipakigbahin ang imong pagpamatuod kabahin ni Jesukristo diha sa klase. Pahinumdumi ang mga estudyante nga sila usab misulat og usa ka tumong sa ilang assignment sa scripture study journal kabahin sa paagi kon unsaon nila pagpamatuod ngadto sa uban kabahin ni Jesukristo. Pagdapit og pipila ka mga estudyante sa pagpakigbahin sa ilang mga tumong diha sa klase.

Sunod nga Unit (Marcos 4–9)

Pasabta ang mga estudyante nga sa sunod unit sila mas makakat-on pa mahitungod sa mga milagro nga gihimo ni Jesukristo, sama sa paglakaw ibabaw sa tubig, pagpagula sa mga yawa gikan sa usa ka tawo, ug pagbuhi sa usa ka batan-ong babaye gikan sa patay. Pangutan-a ang mga estudyante kon nakasinati na ba sila og grabeng unos ug unsay ilang gibati atol niini. Dapita sila sa pagkonsiderar kon mibati na ba sila nga daw adunay grabe nga mga unos o mga hagit sa ilang personal nga kinabuhi. Dapita sila, samtang nagtuon sila sa Marcos 4–9 sa mosunod nga semana, sa pagpangita og mga paagi sa pagkakaplag og kalinaw taliwala sa mahagitong panahon.