Leksyon 77
Juan 17
Pasiuna
Sa wala pa mag-antus ang Manluluwas sa Getsemani, gihalad Niya ang Iyang talagsaong Pag-ampo alang sa Iyang mga Disipulo [Intercessory Prayer]. Giampo Niya nga ang Iyang mga disipulo ug ang tanan nga misunod Kaniya makaila sa Langitnong Amahan ug makaangkon og kinabuhing dayon, ug Iyang giampo nga unta sila mahiusa Kaniya ug sa Iyang Amahan.
Mga Sugyot alang sa Pagtudlo
Juan 17:1–8
Si Jesukristo nakigsulti sa Langitnong Amahan pinaagi sa pag-ampo
Dapita ang mga estudyante sa pagngalan og mga inila nga mga tawo nga ilang nailhan. Dayon hangyoa sila sa pagngalan og mga tawo nga ilang nailhan nga mga pinakamaayo.
-
Unsa ang kalainan tali sa pagkaila mahitungod sa usa ka tawo ug sa tinud-anay nga pagkaila nianang tawhana?
-
Unsa diay gayud ang gikinahanglan aron makaila sa usa ka tawo?
-
Kinsa ang mga tawo nga inyong gibati nga para ninyo importante nga mas mailhan? Ngano man?
Ipasabut nga ang Manluluwas mitudlo mahitungod sa kaimportante sa pagkaila sa Langitnong Amahan ug Kaniya. Ipapangita sa mga estudyante ang mga kamatuoran samtang tun-an nila ang Juan 17 nga makatabang nila nga makaila sa Langitnong Amahan ug ni Jesukristo.
Aron matabangan ang mga estudyante nga masabtan ang kinatibuk-ang kahulugan sa Juan 17, ipasabut nga sa pipila ka punto tali sa panahon dihang ang Manluluwas ug ang Iyang mga disipulo mikaon sa Katapusang Panihapon ug dihang misulod sila sa Tanaman sa Getsemani, mihalad si Jesus ug usa ka pag-ampo nga nailhan nga Pag-ampo alang sa Iyang mga Disipulo [Intercessory Prayer]. Ang usa ka kahulugan sa pulong nga intercede mao ang pagpakigsulti ngadto sa usa ka tawo alang sa laing tawo. Niini nga sitwasyon, nakigsulti si Jesukristo sa Langitnong Amahan alang sa Iyang mga disipulo, nangamuyo nga sila unta makadawat og kinabuhing dayon.
Dapita ang usa ka estudyante sa pagbasa og kusog sa Juan 17:1–3 . Hangyoa ang klase sa pagsunod, nga mangita kon giunsa sa paghulagway sa Manluluwas ang kinabuhing dayon.
-
Giunsa sa paghulagway sa Manluluwas ang kinabuhing dayon?
-
Basi sa bersikulo 3, unsaon ninyo sa pagsulti ang usa ka baruganan nga nagtudlo unsay angay natong buhaton aron makadawat og kinabuhing dayon? (Ang mga estudyante mahimong mogamit og lainlaing mga pulong, apan siguroha nga maklaro nga aron makadawat og kinabuhing dayon, kinahanglang makaila kita sa Langitnong Amahan ug sa Iyang Anak, si Jesukristo.)
Aron matabangan ang mga estudyante nga masabtan unsay gipasabut nga makaila sa Dios, dapita ang sa usa ka estudyante sa pagbasa og kusog sa mosunod nga pamahayag ni Elder Bruce R. McConkie sa Korum sa Napulog Duha ka mga Apostoles:
“Usa ka importanting butang ang pagkaila mahitungod sa Dios ug sa pagkaila kaniya. Nailhan na nato ang mahitungod kaniya dihang atong nakat-unan nga usa siya ka personal nga binuhat kansang hulagway gilalang ang usa ka tawo; dihang atong nakat-unan nga ang Anak mao ang tukma nga hulagway sa kinaiya sa iyang Amahan; dihang atong nakat-unan nga ang Amahan ug ang Anak nagbaton og piho nga mga hiyas ug mga gahum. Apan kita nakaila kanila, sa pagbati nga maangkon ang kinabuhing dayon, kon kita makatagamtam ug makasinati sa samang mga butang nga ilang gibuhat. Ang pagkaila sa Dios mao ang paghunahuna kon unsay iyang gihunahuna, sa pagbati kon unsay iyang gibati, sa pagbaton og gahum nga iyang gibatunan, sa pagsabut sa mga kamatuoran nga iyang nasabtan, ug pagbuhat sa unsay iyang gibuhat. Kadtong makaila sa Dios mamahimong sama kaniya, ug maangkon ang sama nga matang sa iyang kinabuhi, nga mao ang kinabuhing dayon” (Doctrinal New Testament Commentary, 3 vols. [1965–73], 1:762).
-
Sa unsang paagi ang pagkaila sa Amahan ug sa Anak lahi kay sa basta lang makaila mahitungod Kanila?
-
Ngano nga ang usa ka tawo dili man makaangkon og kinabuhing dayon kon dili sila makaila sa Dios nga Amahan ug ni Jesukristo?
-
Unsa ang pipila ka paagi nga kita makaila sa Amahan ug sa Anak?
I-summarize ang Juan 17:4–5 pinaagi sa pagpasabut nga ang Manluluwas mireport ngadto sa Iyang Amahan nga Iyang natuman ang buhat nga gitugyan sa Iyang Amahan. Gihangyo niya ang Iyang Amahan sa pagpasidungog Kaniya uban sa samang kadungganan nga Iyang gihuptan didto sa premortal nga kinabuhi.
Dapita ang usa ka estudyante sa pagbasa og kusog sa Juan 17:6–8 . Hangyoa ang klase sa pagsunod, nga mangita kon unsay nahimo sa Iyang mga disipulo aron makaila sa Manluluwas.
-
Unsa man ang nahimo sa mga Apostoles aron makaila sa Manluluwas? (Mahimo nimong awhagon nga pamarkahan sa mga estudyante ang mga pulong nga “ilang gidawat” “nahibalo sila,” ug “nagatuo” diha sa bersikulo 8.)
Juan 17:9–19
Ang Manluluwas nag-ampo alang sa Iyang mga disipulo
Dapita ang usa ka estudyante sa pagbasa og kusog sa Juan 17:9 . Hangyoa ang klase sa pagsunod, nga mangita kon si kinsa ang piho nga giampo sa Manluluwas.
-
Kinsa ang giampo sa Manluluwas dihang hapit na Niya sugdi ang pagtuman sa Pag-ula?
-
Ngano kaha nga ang mga Apostoles nakabenipisyo gikan sa pagkadungog sa pangamuyo sa Manluluwas alang kanila?
Isulat sa pisara ang Juan 17:11–18. Ipares-pares ang mga estudyante. Dapita sila nga tun-an kini nga mga bersikulo uban sa ilang mga kapares, nga mangita kon unsay gipangamuyo ni Jesus para ug alang sa Iyang mga disipulo. Mahimo nimong pamarkahan sa mga estudyante ang ilang nakit-an. Human sa igo nga panahon, dapita ang pipila ka estudyante sa pagreport ngadto sa klase sa ilang nakit-an.
Ipasabut nga ang Manluluwas nag-ingon nga ang Iyang mga disipulo magpadayon sa pagpuyo sa kalibutan nga dautan ug nagdumot kanila.
-
Unsa nga kamatuoran ang atong makat-unan gikan niini nga mga bersikulo 14–16 mahitungod sa pagpuyo sa kalibutan isip mga disipulo ni Jesukristo? (Human makatubag ang mga estudyante, isulat sa pisara ang mosunod nga kamatuoran: Isip mga disipulo ni Jesukristo, ania kita sa kalibutan apan dili iya sa kalibutan.)
-
Sa inyong hunahuna unsa man ang ipasabut sa ania sa kalibutan apan dili iya sa kalibutan?
Dapita ang usa ka estudyante sa pagbasa og kusog sa pamahayag ni Elder M. Russell Ballard sa Korum sa Napulog Duha ka mga Apostoles:
“Sa Simbahan, sagad natong malitok kining magkauban nga pulong: ‘Maania sa kalibutan apan dili iya sa kalibutan.’ …
“Tingali malitok nato kining magkauban nga pulong… isip duha ka lahi nga mga pahimangno. Una, ‘Maania sa kalibutan.’ Mangilabut; makisayud. Tinguhaa ang pagkamasinabtanon ug kamauyunon ug pasalamatan ang mga panaglahi.” Paghimo og makahuluganong mga kontribusyon sa katilingban pinaagi sa pagserbisyo ug pagpangilabut. Ikaduha, ‘Dili iya sa kalibutan.’ Ayaw pagsubay sa sayop nga mga dalan o motuis aron matagad o madawat ang dili husto. …
“Ang mga miyembro sa Simbahan gikinahanglan nga makaimpluwensya og daghan kay sa kita ang maimpluwensyahan. Kinahanglan kitang molihok aron mahunong ang bul-og sa balud sa sala ug kadautan kay sa pasagdan lang nga mabanlas uban niini. Tanan kita kinahanglang motabang sa pagsulbad sa problema kay sa molikay o mobaliwala niini” (“The Effects of Television,” Ensign, Mayo 1989, 80).
-
Nganong gusto sa Ginoo nga magpabilin kita sa kalibutan samtang dili iya sa kalibutan?
Dapita ang mga estudyante nga makigtrabaho og usab sa ilang mga kapares ug maghunahuna og usa ka example kon sa unsang paagi ang usa ka tawo maanaa sa kalibutan apan dili iya sa kalibutan sa matag usa sa mosunod nga mga sitwasyon:
-
Sa eskwelahan
-
Kauban sa mga higala
-
Sa internet
Human sa igo nga panahon, dapita ang pipila ka estudyante sa pagreport ngadto sa klase sa mga example nga ilang nahunahunaan. Dapita ang pipila ka estudyante sa pagpakigbahin og mga kasinatian dihang sila, o ang tawo nga ilang nailhan, sa tukmang paagi mipakita nga anaa sa kalibutan apan dili iya sa kalibutan.
Dapita ang mga estudyante sa pagsulat diha sa ilang mga class notebook o mga scripture study journal ang usa ka pihong tumong nga ilang tinguhaon aron mas makasunod sa Manluluwas pinaagi sa pagkaanaa sa kalibutan ug dili iya sa kalibutan.
Juan 17:20–26
Giampo sa Manluluwas ang tanang tawo nga midawat sa Iyang ebanghelyo
Dapita ang usa ka estudyante sa pagduol sa atubangan sa klase ug pahimoa og usa ka tahas nga magkahugaw ang iyang mga kamot (sama sa pagtak-tak sa eraser sa pisara o pagkalot og butang gikan sa usa ka panaksan nga naay yuta). Awhaga ang estudyante nga sulayang limpyo kanunay ang iyang mga kamot samtang naghimo sa tahas.
Human makompleto sa estudyante ang tahas, hangyoa ang estudyante sa pagpakita sa iyang mga kamot ngadto sa klase.
-
Sa unsang paagi kini nga kalihokan susama sa atong mga paningkamot nga maania sa kalibutan apan dili iya sa kalibutan? (Bisan sa pinakamaayo natong mga paningkamot, dili kita magpabiling hingpit nga limpyo gikan sa mga sala ug sa kadautan nga nia sa kalibutan.)
-
Kon dili kita malimpyo sa atong mga sala, unsa nga mga sangputanan ang masinati nato sa kaulahian? Ngano man? (Mabulag kita gikan sa presensya sa Dios hangtud sa hangtud tungod kay walay mahugaw nga butang ang makapuyo sa Iyang presensya [tan-awa sa 1 Nephi 15:33–34].)
Pasalamati ang estudyante, ug palingkura.
Dapita ang usa ka estudyante sa pagbasa og kusog sa Juan 17:20–23 . Hangyoa ang klase sa pagsunod, nga mangita kon unsa ang giampo ni Jesukristo.
-
Alang sa unsa ang giampo ni Jesukristo? (Mahimo nimong isugyot nga markahan sa mga estudyante ang pulong nga usa ang tanan nga naa sa mga bersikulo 20–23.)
-
Unsa ang naghimong posible nga kita mahimong usa sa Amahan ug sa Anak? (Ang mga panalangin sa Pag-ula ni Jesukristo, nga atong nadawat pinaagi sa pagsunod sa Iyang mga sugo, ug ang gasa sa Espiritu Santo.)
Isulat sa pisara ang mosunod nga kamatuoran: Kon moduol kita kang Jesukristo ug modawat sa mga panalangin sa Iyang Pag-ula, mamahimo kitang usa sa Amahan ug sa Anak.
Dapita ang usa ka estudyante sa pagbasa og kusog sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:
“Ang literal nga kahulugan sa Iningles sa pulong nga Atonement [Pag-ula] maklaro nga: at-one-ment, sa pagtipon niining tanan nga gibulag-bulag o gilahi-lahi” (“The Atonement of Jesus Christ,” Ensign, Mar. 2008, 34–35).
-
Gikan sa unsay inyong nahibaloan bahin sa Langitnong Amahan ug ni Jesukristo, nganong kamo gusto nga mahimong usa Kanila?
Dapita ang usa ka estudyante sa pagbasa og kusog sa mosunod nga pamahayag ni Presidente James E. Faust sa Unang Kapangulohan. Hangyoa ang klase nga paminawon ang panalangin nga moabut niadtong kinsa magtinguha nga mahiusa sa Langitnong Amahan ug ni Jesukristo.
“Kinahanglang magtinguha kita dili lang sa pagkaila sa atong Agalon, apan maningkamot, sama sa Iyang pagdapit, nga mahiusa uban Kaniya (tan-awa sa Juan 17:21). …
“… Ang mga adlaw nga umaabut puno sa kasakit ug kalisdanan. Apan inubanan sa makapaniguro nga kahupayan sa usa ka personal nga relasyon sa Dios, mahatagan kita og makahupay nga kaisug” (“That We Might Know Thee,” Ensign, Ene. 1999, 2, 5).
Ipamatuod ang kaimportante sa pagkaila ni Jesukristo ug sa Langitnong Amahan ug pagtinguha nga mahiusa uban Kanila.
Dapita ang mga estudyante nga pamalandungan kon unsay ilang mahimo aron mas makaila sa Langitnong Amahan ug ni Jesukristo ug molig-on ang ilang relasyon uban Kanila.
Dapita ang mga estudyante sa pagrekord sa ilang mga hunahuna diha sa ilang mga scripture study journal o mga class notebook. Human sa igo nga panahon, dapita ang pipila ka estudyante kinsa andam mopakigbahin sa ilang mga hunahuna ug pagbati diha sa klase.
Scripture Mastery—Juan 17:3
Aron matabangan ang mga estudyante nga makamemorya sa Juan 17:3, dapita sila sa pagdala sa ilang scripture mastery card nga gisulatan niini nga tudling sa sunod nga semana. Awhaga sila nga ribyuhon ang tudling ug praktison ang pagsulti niini kon duna silay mga higayon. Mahimo nimong isugyot nga sulayan nila ang pag-recite niini diha sa ilang hunahuna ngadto sa usa ka sakop sa pamilya ug ipasabut ang kahulugan niini. Sa pagsugod sa klase sa sunod nga pipila ka adlaw, dapita ang mga estudyante sa pagreport sa ilang paglambo sa pagmemorya niini nga tudling.
Komentaryo ug Background nga Impormasyon
Juan 17:3. Aron makaila sa Dios nga Amahan ug kang Jesukristo
Aron makaila sa Amahan ug sa Anak kinahanglan nga duna kitay hustong panabut bahin Kanila. Daghang tawo ang nagtuo nga ang Dios ug ang Dios nga Kapangulohan dili masabtan, apan usa kini ka sayop nga doktrina.
Si Elder Bruce R. McConkie sa Korum sa Napulog Duha ka mga Apostoles mitudlo:
“Ang pinakatalagsaong kamatuoran nga nahibaloan sa tawo mao nga dunay Dios sa langit nga mahangturon ug walay katapusan; nga siya ang tiglalang, tigbayaw, ug tigpreserbar sa tanang butang; nga siya milalang kanato ug sa tanang anaa sa kalangitan ug miorden ug miestablisar og usa ka plano sa kaluwasan diin mahimo kitang motubo ug molambo ug mahimong sama kaniya. Ang kamatuoran mahitungod kaniya mao nga siya ang atong Amahan sa langit, nga siya dunay lawas nga unod ug bukog nga mahikap sama sa tawo, nga siya tinuod nga tawo, ug kon kita motuo ug mosunod sa iyang mga balaod maangkon nato ang kahimayaan nga iyang gibatunan. Karon mao kana ang pinakatalagsaong kamatuoran ug pinakamahimayaong konsepto nga nahibaloan sa tawhanong hunahuna” (“The Seven Deadly Heresies” [Brigham Young University fireside, June 1, 1980], 7, speeches.byu.edu).
Juan 17:12. “Tawo nga pagalaglagon”
Makita nga gigamit ni Jesukristo ang mga pulong nga “tawo nga pagalaglagon” nga nag-refer kang Judas Iscariote, kinsa niining puntoha mibiya ni Jesus ug sa ubang onse ka Apostoles aron budhian si Jesus ngadto sa dautang mga lider sa mga Judeo. Si Elder Bruce R. McConkie sa Korum sa Napulog Duha ka mga Apostoles misulat, “Si Judas … dili usa ka tawo nga pagalaglagon sumala sa pagsabut nga ang usa ipanghimaraot sa hangtud, apan sa pagsabut nga siya usa ka anak o sumusunod ni Satanas niining kinabuhia. (Tan-awa sa Mat. 26:21–25” (Doctrinal New Testament Commentary, 3 vols. [1965–73], 1:765).
Juan 17:20–23. “Kanila … sa mga mosalig kanako pinaagi sa ilang pulong”
Bisan og si Jesukristo misugod sa Iyang Pag-ampo alang sa Iyang mga disipulo [Intercessory Prayer] pinaagi sa pagpangamuyo alang sa mga disipulo nga Iyang gikauban, Iyang gipatas-an ang Iyang pag-ampo aron ilakip ang tanan nga mituo Kaniya “pinaagi sa ilang pulong.” Ang mga miyembro sa Simbahan makaila ni Jesukristo pinaagi sa pagsaksi ug sa mga pagtulun-an sa mga Apostoles. Nakatabang kini nga atong masabtan ang kaimportante sa pagtuon sa mga pagtulun-an sa Unang Kapangulohan ug sa Korum sa Napulog Duha ka mga Apostoles karon. Ang pulong nga kanila diha sa bersikulo 22 nag-refer sa mga Apostoles ug matinud-anong mga miyembro kinsa nagtuon sa ilang mga pagtulun-an ug sa paghiusa uban kanila sama nga sila gihiusa uban sa Anak sa Dios. Alang sa dugang nga impormasyon kon sa unsang paagi kita “mamahingpit nga usa” (Juan 17:23), tan-awa sa Doktrina ug mga Pakigsaad 76:69.