Leksyon 160: Pinadayag 21–22

Leksyon 160

Pinadayag 21–22

Pasiuna

Nakita ni Juan ang bag-ong langit ug ang bag-ong yuta ug ang Bag-ong Jerusalem nga nanaog gikan sa langit. Nakita usab niya nga ang Dios makig-uban ug mohupay sa Iyang mga katawhan ug ang celestial nga siyudad sa Dios itukod dinhi sa yuta. Nakita ni Juan nga kadtong kinsa ang mga ngalan nahisulat sa basahon sa kinabuhi mosulod sa siyudad ug mopuyo sa himaya kauban sa Dios. Gitapos ni Juan ang iyang panan-awon uban sa hangyo nga ang Ginoo mobalik na sa yuta.

Mga Sugyot alang sa Pagtudlo

Pinadayag 21

Nakita ni Juan ang bag-ong langit ug ang bag-ong yuta ug ang celestial nga siyudad sa Dios

Dapita ang mga estudyante sa paghunahuna og mga panahon sa ilang kinabuhi dihang nasinati nila ang labihang kasubo o kasakit.

Unsa ang pipila ka mga butang sa kinabuhi nga maghatag kanato og labihang kasubo o kasakit? (Isulat sa pisara ang tubag sa mga estudyante.)

Dapita ang mga estudyante sa pagpangita og usa ka kamatuoran samtang sila nagtuon sa Pinadayag 21 nga makahatag kanila og kahupayan atol sa lisud nga mga panahon.

Ipasabut sa mga estudyante nga ang Pinadayag 21–22 usa ka sumpay sa panan-awon ni Juan sa mga panghitabo nga mahitabo human sa Ikaduhang Pag-anhi ni Jesukristo.

Dapita ang usa ka estudyante sa pagbasa og kusog sa Pinadayag 21:1–2. Hangyoa ang klase sa pagsunod, nga mangita kon unsay nakita ni Juan nga mahitabo.

Unsa ang nakita ni Juan nga mahitabo?

Dapita ang duha ka estudyante sa pagbasa og kusog sa mosunod nga mga pamahayag:

Pamahayag 1

Kon moanhi na si Jesukristo pag-usab ug ang Milenyum magsugod na, ang kalibutan mausab sa kahimtang niini sa wala pa ang Pagkapukan ni Adan ug ni Eva. Sa wala pa ang Pagkapukan, ang kalibutan anaa sa terrestrial, o paradisyakal, nga kahimtang (paraiso nga kahimtang). Human sa Milenyum, ang kalibutan mausab ngadto sa pagka-celestial nga estado nga giandam alang sa presensya sa Dios. Kini nga mga kausaban tingali mao ang nakita ni Juan nga nanghitabo dihang iyang “nakita ang bag-ong langit ug ang bag-ong yuta” (Pinadayag 21:2).

Pamahayag 2

Ang Bag-ong Jerusalem nga nakita ni Juan nga nanaog gikan sa langit mao ang celestial nga siyudad sa Dios. Kini nga siyudad tingali maglakip sa siyudad ni Enoch, nga giusab ug gidala ngadto sa langit. Kining “balaan nga siyudad” mopaubos ug motipon sa Bag-ong Jerusalem, o Zion, nga tukuron sa mga Santos dinhi sa yuta (tan-awa sa Moises 7:62–64).

Unsa kaha ang gibati ni Juan dihang nakita niya kining mga butanga samtang gipalayas siya tungod sa iyang pagtuo ni Jesukristo?

Dapita ang usa ka estudyante sa pagbasa og kusog sa Pinadayag 21:3–4. Hangyoa ang klase sa pagsunod, nga mangita kon unsay buhaton sa Dios sa Iyang mga katawhan.

Unsay buhaton sa Dios alang sa Iyang mga katawhan? (Mahimong mahibaloan sa mga estudyante ang mga kamatuoran nga sama sa mosunod: Ang Dios makig-uban ug mohupay sa Iyang mga katawhan, ug dili na sila makasinati pa og kamatayon, kasubo, o kasakit. Isulat sa pisara kini nga kamatuoran.)

I-refer sa gilista diha sa pisara ang mga butang nga makahatag nato og kasubo o kasakit.

Sa unsang paagi nga ang pagkahibalo nga ang Dios mohupay sa Iyang mga katawhan ug motangtang sa ilang mga kasubo ug mga kasakit makatabang nato kon masinati nato ang mga hagit karon?

Mahimo usab nimong ipakigbahin ang imong pagpamatuod kabahin sa katakus sa Dios sa paghupay kanato.

Dapita ang usa ka estudyante sa pagbasa og kusog sa Pinadayag 21:7. Hangyoa ang klase sa pagsunod, nga mangita kon unsay gisaad sa Ginoo niadtong nagmatinud-anon sa paglahutay.

Unsa ang gisaad sa Dios alang niadtong molahutay?
Base sa unsay inyong nakat-unan mahitungod sa mga hagit nga anaa ug moabut sa dili pa ang Ikaduhang Pag-anhi, unsang mga butanga ang malahutay niining mga tawhana?

Dapita ang mao gihapon nga estudyante sa pagbasa og kusog sa Pinadayag 21:8. Mahimo nimong ipasabut nga ang lumayan o barangan mao kadtong apil sa mga kalihokan aron sa pagdapit sa impluwensya sa dautang mga espiritu ug ang makihilawason mao ang tawo nga makasala sa pakighilawas o pagpanapaw.

Unsa ang masinati niadtong mga tawo nga gihulagway diha sa bersikulo 8? (Ang ikaduhang kamatayon.)

Ipasabut nga ang ikaduhang kamatayon usa ka espirituhanong kamatayon, o pagkahimulag gikan sa Dios, nga masinati niadtong tuyo nga makigbatok sa kahayag ug kamatuoran human sa Katapusang Paghukom (tan-awa sa Helaman 14:16–19).

I-summarize ang Pinadayag 21:9–21 pinaagi sa pagpasabut nga gihulagway ni Juan ang celestial nga siyudad sa Dios. Iyang nakita nga ang siyudad dunay dako kaayong bongbong nga dunay 12 ka mga ganghaan nga gigwardyahan og 12 ka mga anghel.

Dapita ang pipila ka estudyante nga magpuli-puli sa pagbasa og kusog gikan sa Pinadayag 21:22–27. Hangyoa ang klase sa pagsunod, nga mangita kon unsay nakat-unan ni Juan mahitungod niini nga celestial nga siyudad.

Unsay nakat-unan ni Juan mahitungod niini nga siyudad?
Sumala sa bersikulo 27, kinsa man ang tugutan nga makasulod? (Kadto lamang kansang mga pangalan nahisulat diha sa basahon sa kinabuhi sa Kordero.)

Pinadayag 22

Si Juan mitapos sa iyang panan-awon

Dapita ang mga estudyante samtang sila nagtuon sa Pinadayag 22 sa pagpangita og kamatuoran nga makatabang nila sa pagkahibalo kon unsaon nga ang ilang mga ngalan mahisulat sa basahon sa kinabuhi sa Kordero ug matugutan sa pagsulod niining celestial nga siyudad.

Ikonsiderar ang pagpakita og litrato sa usa ka trono o magdrowing og trono sa pisara.

Hangyoa ang usa ka estudyante sa pag-adto sa pisara ug idrowing kon unsa pay nakita ni Juan agig dugang sa trono samtang lain nga estudyante mobasa og kusog sa Pinadayag 22:1–2.

Unsa pa ang nakita ni Juan sa celestial nga siyudad sa Dios?

Dapita ang estudyante sa pagbalik sa iyang lingkuranan.

Sumala sa bersikulo 2, giunsa ni Juan sa paghulagway ang kahoy sa kinabuhi? (Ang kahoy naghatag og daghang bunga sa tanang panahon, ug ang mga dahon niini moayo sa mga kanasuran.)

Pahinumdumi ang mga estudyante nga ang Basahon ni Mormon nagrekord nga si Lehi ug si Nephi nakakita og panan-awon sa kahoy sa kinabuhi. Nakat-unan ni Nephi nga ang kahoy ug ang tuburan sa buhi nga tubig nagrepresentar sa gugma sa Dios (tan-awa sa 1 Nephi 11:25). Isulat Ang gugma sa Dios tupad sa kahoy ug sa sapa diha sa gidrowing sa estudyante.

Unsa ang pinakadakong pagpakita sa gugma sa Dios? (Ang Pag-ula ni Jesukristo [tan-awa sa Juan 3:16; 1 Juan 4:9]. Ang bunga sa kahoy mahimo usab nga nagrepresentar sa mga panalangin sa Pag-ula.)

I-summarize ang Pinadayag 22:3–10 pinaagi sa pagpasabut nga agig dugang sa pagkakita niining celestial nga siyudad, nakadawat usab si Juan og pagsaksi gikan sa anghel kinsa namulong kaniya nga ang mga butang nga gipadayag diha kaniya mga tinuod.

Dapita ang usa ka estudyante sa pagbasa og kusog sa Pinadayag 22:11–13. Hangyoa ang klase sa pagunod, nga mangita kon unsay buhaton sa Ginoo kon Siya moanhi pag-usab.

Unsa ang buhaton sa Ginoo kon Siya moanhi pag-usab?

Dapita ang usa ka estudyante sa pagbasa og kusog sa Pinadayag 22:14. Hangyoa ang klase sa pagsunod, nga mangita kon unsay kinahanglan gayud natong buhaton aron matugutan kita nga makasulod sa celestial nga gingharian.

Unsay kinahanglan gayud natong buhaton aron makasulod sa celestial nga gingharian?

Ipasabut nga ang “makabaton sila sa katungod sa pagpahimulos sa kahoy” nagpasabut sa pagkahimong takus nga makadawat sa tanang panalangin sa Pag-ula, lakip ang kinabuhing dayon.

Unsa nga baruganan ang atong mahibaloan gikan sa bersikulo 14? (Ang mga estudyante mahimong mogamit og lain-laing mga pulong, apan kinahanglan nilang mahibaloan ang usa ka baruganan nga susama sa mosunod: Kon tumanon nato ang mga sugo sa Ginoo, nan makadawat kita sa tanang panalangin sa Pag-ula ni Jesukristo ug makasulod sa celestial nga gingharian. Ipasabut nga ang pagtuman sa Iyang mga sugo naglakip sa pagkadawat sa tanang mga ordinansa nga gikinahanglan aron makasulod sa celestial nga gingharian.)

Ipasabut nga bisan og ang pipila ka mga panalangin sa Pag-ula—sama sa gasa sa pagkabanhaw—gihatag nga walay bayad sa tanang mga anak sa Dios, ang ubang panalangin—sama sa kinabuhing dayon—madawat lamang niadtong magkugi sa paggamit sa hugot nga pagtuo kang Jesukristo, maghinulsol, ug mosunod sa Iyang mga sugo.

Isulat ang mosunod nga mga pangutana sa pisara:

Unsa nga mga sugo ug mga pagtulun-an ang inyong nakat-unan atol sa inyong pagtuon sa Bag-ong Tugon ug gisulayan sa paggamit sa inyong kinabuhi?

Sa unsang paagi ang inyong mga paningkamot nga magamit kining mga sugo nakatabang nga inyong madawat ang mga panalangin sa Ginoo ug miandam kaninyo sa pagbalik ngadto sa presensya sa inyong Amahan sa Langit?

Dapita ang mga estudyante sa pagkonsiderar kon unsaon nila sa pagtubag kining duha ka mga pangutana pinaagi sa pagribyu kon unsay ilang nasulat diha sa ilang mga scripture study journal, kon unsay ilang narekord o namarkahan diha sa ilang mga kasulatan, ug sa mga bersikulo sa scripture mastery nga ilang gitun-an niining tuiga. Hangyoa sila sa pagsulat sa ilang mga tubag niining duha ka pangutana diha sa ilang mga class notebook o mga scripture study journal.

Human sa igo nga panahon, dapita ang pipila ka mga estudyante sa pagpakigbahin diha sa klase sa unsay ilang gisulat. (Pahinumdumi ang mga estudyante nga dili ipakigbahin ang bisan unsa nga personal o pribado ra kaayo.)

I-summarize ang Pinadayag 22:15–19 pinaagi sa pagpasabut nga kadtong dili motuman sa mga sugo sa Ginoo dili makasulod sa celestial nga siyudad. Mipamatuod si Jesukristo nga Iyang gihatag kini nga pagpadayag ngadto ni Juan, ug gidapit ni Juan ang tanan sa pag-adto sa mga tubig sa kinabuhi ug gawasnong moinom niini. Gipasidan-an ni Juan ang iyang mga tigbasa nga dili usbon ang mensahe sa basahon nga iyang gisulat.

Dapita ang usa ka estudyante sa pagbasa og kusog sa Pinadayag 22:20. Hangyoa ang klase sa pagsunod, nga mangita sa gipangamuyo ni Juan.

Unsa ang gipangamuyo ni Juan?
Base sa unsay inyong nakat-unan diha sa basahon sa Pinadayag, ngano kaha nga gusto na man kaayo si Juan nga moanhi na ang Ginoo?

Tapusa pinaagi sa pagpamatuod sa mga kamatuoran nga nadiskubrihan sa mga estudyante diha sa Pinadayag 21–22.

Komentaryo ug Background nga Impormasyon

Pinadayag 20:4. “Pahiran sa Dios ang tanang mga luha”

Si Elder Joseph B. Wirthlin sa Korum sa Napulog Duha Ka mga Apostoles mitudlo nga sa kaugalingong panahon sa Ginoo, ang mga kasub-anan sa mga matinud-anon pulihan og kalipay:

“Ang Ginoo mobalos sa matag matinud-anon sa matag mawala. Nga kana diin gikuha gikan sa niadtong nahigugma sa Ginoo mahimong idugang ngadto kanila sa Iyang kaugalingong pamaagi. Samtang kini dili moabut sa panahon nga kini atong gitinguha, ang matinud-anon mahimong masayud nga ang matag luha karon sa katapusan mahimong ibalik gatusan pil-a uban sa mga luha sa kalipay ug pasalamat” (“Bisan Unsa ang Mahitabo, ug Dawata Kini,” Ensign o Liahona, Nob. 2008, 28).

Pinadayag 22:18. “Kon adunay magadugang niinig bisan unsa”

Ang ubang mga tawo mosalikway sa Basahon ni Mormon ug sa ubang mga kasulatan tungod kay nagtuo sila nga nahuman na ang pagpadayag sa Ginoo og mga kasulatan ngadto sa Iyang mga anak. Daghan ang nasayop sa paggamit sa Pinadayag 22:18 sa pagpahayag nga ang Ginoo dili na gayud mohatag og dugang nga kasulatan lapas sa Biblia ug si bisan kinsang tawhana ang mangangkon nga nakadawat og dugang nga kasulatan mag-antus sa mga silot nga gipasidaan ni Juan. Si Elder Jeffrey R. Holland sa Korum sa Napulog Duha ka mga Apostoles miingon mahitungod niining sayop nga interpretasyon:

“May lig-on nga paghiusa karon ang mga iskolar sa Biblia nga kini nga bersikulo nagpasabut lamang sa basahon sa Pinadayag, dili sa tibuok Biblia. Kadtong mga iskolar sa atong panahon miila og daghang mga ‘basahon’ sa Bag-ong Tugon nga hapit kadaghanan nasulat human gayud sa pinadayag ni Juan nga nadawat didto sa Isla sa Patmos. Nalakip niini nga kategoriya mao ang mga basahon ni Judas, ang tulo ka mga Sulat ni Juan, ug mahimo nga ang tibuok gayud nga Ebanghelyo ni Juan. Tingali adunay dugang pa gani kay niini.

“Apan may mas sayon nga tubag kon ngano nga kanang tudling nga anaa sa katapusang basahon sa kasamtangan nga Bag-ong Tugon wala magpasabut sa tibuok Biblia. Kini tungod kay ang tibuok Biblia sigun sa atong nahibaloan—usa ka koleksyon sa mga sinulat nga gihugpong sa usa ka libro—wala pa sa diha nga kanang mao nga bersikulo nasulat. Sulod sa mga siglo human nahimo ni Juan ang iyang sinulat, ang indibidwal nga mga basahon sa Bag-ong Tugon namantala na nga nag-inusara o mahimong kauban sa pipila ka mga sinulat apan hapit dili gayud ingon nga usa ka kompleto nga koleksyon. Sa tibuok nga koleksyon sa 5,366 nga nahibaloan nga Griyego nga mga manuskrito sa Bag-ong Tugon, 35 lang ang naglangkob sa tibuok Bag-ong Tugon nga ato karon nga nahibaloan, ug ang 34 niini nahugpong human sa A.D. 1000” (“Ang Akong mga Pulong … Dili Gayud Mohunong,” Ensign o Liahona, Mayo 2008, 91–92).