Leksyon 30

Mateo 26:1–30

Pasiuna

Duha ka adlaw sa wala pa ang Pagpalabay [Passover], nakigsabut si Judas sa mga lider sa mga Judeo nga nagtinguha sa pagpatay kang Jesus. Sa gabii sa Pagpalabay, gipasiugdahan ni Jesus ang sakrament.

Mga Sugyot alang sa Pagtudlo

Andama ang matag leksyon nga maghunahuna sa mga estudyante

Samtang nangandam ka sa pagtudlo, hunahunaa kon unsa ang imong panghinaut nga gamiton sa mga estudyante ang mga doktrina ug mga baruganan nga gitudlo diha sa leksyon. Si Presidente Thomas S. Monson mipahinumdom sa mga magtutudlo sa ebanghelyo nga “ang katuyoan sa pagtudlo sa ebanghelyo … dili ang ‘pagbu-bu og impormasyon’ ngadto sa hunahuna sa mga sakop sa klase. … Ang tumong mao ang pagdasig sa indibidwal nga maghunahuna, mobati, ug dayon mobuhat kalabut sa pagsunod sa mga baruganan sa ebanghelyo” (sa Conference Report, Okt. 1970, 107).

Mateo 26:1–16

Nakigsabut si Judas sa mga lider sa mga Judeo nga nagtinguha sa pagpatay kang Jesus

Sa dili pa magklase, pag-andam og lamesa pinaagi sa pagtabon niini og mantil ug ibutang sa ibabaw niini ang pipila ka piraso nga flatbread (o crackers) ug usa ka tasa. Human sa debosyonal ipasabut nga atol sa panahon ni Kristo, kining mga butanga, lakip na sa uban, makita diha sa lamesa sa mga Judeo atol sa Pagpalabay.

• Unsa man ang katuyoan sa kasaulogan sa Pagpalabay? (Ang Pagpalabay gipasiugdahan sa panahon ni Moises aron sa pagpahinumdom sa mga anak sa Israel nga ang tiglaglag nga anghel milabay sa ilang mga balay ug mipatay sa panganay nga mga anak didto sa Ehipto [tan-awa sa Exodo 12:21–28; 13:14–15]. Isip kabahin sa Pagpalabay, ang mga Israelite misakripisyo og nating karnero ug mibutang sa dugo niini sa balabag sa ilang pultahan [doorpost]. Kining nating karnero nagsimbolo sa pag-anhi sa Mesiyas, kansang maulaong sakripisyo moluwas sa katawhan gikan sa kamatayon ug sala [tan-awa sa Ang Giya ngadto sa mga Kasulatan, “Pagpalabay,” scriptures.lds.org].)

Dapita ang usa ka estudyante sa pagbasa og kusog sa Mateo 26:1–2. Hangyoa ang klase sa pagsunod, nga mangita kon unsay gisulti ni Jesus nga mahitabo human sa Pagpalabay.

• Unsa may gisulti ni Jesus nga mahitabo human sa Pagpalabay?

Dapita ang usa ka estudyante sa pagbasa og kusog sa Mateo 26:3–5. Hangyoa ang klase sa pagsunod ug ilhon kon kinsay nagplano sa pagpatay kang Jesus niining panahona.

• Nganong nakahukom man ang mga escriba ug mga Pariseo nga maghulat hangtud mahuman ang Pagpalabay sa pagpatay kang Jesus?

I-summarize ang Mateo 26:6–13 pinaagi sa pagpasabut nga samtang didto sa Betania si Jesus, usa ka babaye ang miduol Kaniya ug midihog kaniya og mahalon kaayo nga pahumot aron sa pag-ila sa Iyang nagsingabut nga kamatayon ug lubong. Ang uban sa Iyang mga disipulo, lakip na ni Judas, nga usa sa Napulog Duha ka mga Apostoles ug ang tresurero sa grupo, mireklamo nga ang pahumot mabaligya unta aron itabang sa mga kabus. Hinoon, si Judas dili gayud tinud-anay nga nabalaka alang sa mga kabus apan usa ka kawatan nga gustong iyahon ang kwarta (tan-awa sa Juan 12:4–6). (Pahinumdom: Ang pagdihog kang Jesus didto sa Betania mahisgutan og maayo diha sa leksyon sa Marcos 11–14.)

Dapita ang usa ka estudyante sa pagbasa og kusog sa Mateo 26:14–16. Hangyoa ang klase sa pagsunod, nga mangita kon unsay gibuhat ni Judas human siya kasab-i sa Manluluwas tungod sa pagreklamo.

• Unsa may gibuhat ni Judas? (Nakigsabut siya sa mga sacerdote nga punoan sa pagtabang kanila aron matultolan ug masikop si Jesus.)

• Pila may gibayad sa mga sacerdote nga punoan kang Judas aron itugyan si Jesus ngadto kanila?

Ipasabut nga “sumala sa balaod ni Moises, ang katloan ka siclo nga salapi [thirty shekels of silver] maoy ibayad sa tag-iya alang sa kamatayon sa usa ka ulipon (tan-awa sa Exodo 21:32). … Ang bili sa pagbudhi nagpakita kon unsa ka ubos ang pagtagad ni Judas ug sa mga sacerdote nga punoan alang sa Manluluwas” (New Testament Student Manual [manwal sa Church Educational System, 2014], 81). Natuman usab niini ang panagna sa Daang Tugon mahitungod sa pagbudhi ni Judas sa Manluluwas (tan-awa sa Zacarias 11:12).

Mateo 26:17–25

Nangaon si Jesus ug ang Iyang mga disipulo sa pagkaon alang sa Pagpalabay

I-display ang usa ka salamin ug ipangutana:

• Unsa man ang ubang mga paagi nga ang salamin makatabang kanato?

Dapita ang usa ka estudyante sa pagbasa og kusog sa mosunod nga pamahayag ni Presidente Dieter F. Uchtdorf sa Unang Kapangulohan:

“Kasagaran atong likayan ang pagtan-aw og maayo sa atong mga kalag ug pag-atubang sa atong mga kahuyang, limitasyon, ug mga kahadlok. …

“Apan ang klarong pagtan-aw sa atong mga kaugalingon mahinungdanon sa atong espirituhanong paglambo ug kaayohan. …

“Mosugyot ko nga ang balaang kasulatan ug mga pakigpulong nga gihatag sa kinatibuk-ang komperensya naghatag og mga baruganan nga magamit nato sa pag-eksamin sa atong kaugalingon” (“Ako ba, Ginoo?” Ensign o Liahona, Nob. 2014, 58).

• Sa unsa kaha nga paagi nga ang mga kasulatan ug mga pakigpulong nga gihatag sa kinatibuk-ang komperensya mahimong sama sa usa ka salamin?

Samtang ang mga estudyante nagtuon sa Mateo 26:17–25, dapita sila sa pagpangita og baruganan nga makatabang nga ilang maila ang ilang mga kahuyang ug makabuhat sa pagbuntog niini.

I-summarize ang Mateo 26:17–19 pinaagi sa pagpasabut nga gisultihan ni Jesus ang Iyang mga disipulo nga siguruon nga duna silay lawak didto sa Jerusalem alang sa pagpangaon sa Pagpalabay.

Dapita ang usa ka estudyante sa pagbasa og kusog sa Mateo 26:20–21. Hangyoa ang klase sa pagsunod, nga mangita kon unsay gisulti ni Jesus sa Iyang mga Apostoles atol sa pagpangaon sa Pagpalabay.

• Unsa may gisulti ni Jesus sa Iyang mga Apostoles?

• Kon usa pa kamo sa mga Apostoles, unsa kaha ang inyong nahunahunaan niining higayuna?

Dapita ang usa ka estudyante sa pagbasa og kusog sa Mateo 26:22. Hangyoa ang klase sa pagsunod, nga mangita sa reaksyon sa mga Apostoles ngadto sa pamahayag ni Jesus.

• Unsa may gipangutana sa mga Apostoles?

• Unsa may gitudlo kanato sa pangutana nga “Ako ba, Ginoo?” kalabut sa onse ka matinud-anong mga Apostoles?

• Basi niini nga istorya, unsa nga baruganan ang atong makat-unan kalabut kon giunsa pagtubag sa mga disipulo ni Jesukristo kon makadungog sila sa mga pulong sa Ginoo? (Human makatubag ang mga estudyante, isulat sa pisara ang mosunod nga baruganan: Sa dihang nadungog sa mga disipulo ang pulong sa Ginoo, ilang gisusi ang ilang kaugalingong kinabuhi kon sa unsang paagi nila kini magamit.)

Dapita ang usa ka estudyante sa pagbasa og kusog sa mosunod nga pamahayag ni Presidente Uchtdorf:

“Ang mga disipulo wala magduda sa kamatuoran sa unsay gisulti [ni Jesus]. Ni sila milingi sa palibut, mitudlo sa lain, ug nangutana, ‘Siya ba?’

“Hinoon, ‘sila nanagsubo pag-ayo, ug misugod sila sa pagtinagsag ingon kaniya, Ako, ba Ginoo?’ [Mateo 26:22].

“Naghunahuna ko kon unsa kahay buhaton sa matag usa kanato. … Motan-aw kaha kita sa naglibut kanato ug moingon sa atong mga kasingkasing, ‘Si Brother Johnson siguro iyang gipasabut. Dugay na kong nagduda niya,’ o ‘Maayo kay naa dinhi si Brother Brown. Kinahanglan gayud siya nga makadungog niini nga mensahe’? O kita kaha, sama niadtong mga tinun-an sa karaan, motan-aw sa kaugalingon ug mangutana nga matugkaron: ‘Ako ba?’ (“Ako ba, Ginoo?” 56).

• Unsa man ang ubang mga ehemplo kon sa unsang paagi kaha kita matintal sa pagbaliwala sa mga pulong sa Ginoo ug maghunahuna nga alang kini sa laing tawo?

Ipabasa og kusog sa usa ka estudyante ang mosunod nga pamahayag ni Presidente Uchtdorf, ug hangyoa ang klase sa pagpaminaw sa unsay gidapit nga ipabuhat ni Presidente Uchtdorf kanato kon makadungog kita sa mga pulong sa sa Ginoo:

“Niining yano nga mga pulong, ‘Ako ba, Ginoo?’ anaa ang sinugdanan sa kaalam ug ang dalan sa personal nga pagkakabig ug malungtarong kausaban. …

Ihiklin nato ang atong garbo, motan-aw lapas sa atong panghambog, ug sa kamapainubsanon mangutana, ‘Ako ba, Ginoo?’

“Ug kon mahitabo nga ang tubag ‘Oo, akong anak, adunay mga butang nga kinahanglan nimong ayohon, butang nga ako makatabang nimo nga mabuntog,’ ako nag-ampo nga atong dawaton kini nga tubag, mapainubsanong moangkon sa atong mga sala ug kasaypanan, ug mag-usab sa atong binuhatan pinaagi sa pagkamaayo” (“Ako ba, Ginoo?” 56, 58).

• Sa unsang paagi nga kamo napanalanginan dihang gigamit ninyo ang mga pulong sa Ginoo ug mihimo og mga kausaban sa inyong kinabuhi?

Ipamatuod ang mahitungod sa baruganan nga nahibaloan na sa mga estudyante. Ipasusi sa mga estudyante ang ilang kaugalingong kinabuhi kon makadungog o makabasa sila sa mga pulong sa Ginoo ug sa pagbuhat dayon sa mga pag-aghat nga ilang madawat.

Dapita ang usa ka estudyante sa pagbasa og kusog sa Mateo 26:23–25. Hangyoa ang klase sa pagsunod, nga mangita sa tubag sa Manluluwas ngadto sa mga pangutana sa mga Apostoles.

Ipasabut nga pagkahuman dayon nga gipahibalo ni Jesus nga si Judas mao ang mobudhi Kaniya, mibiya si Judas (tan-awa sa Juan 13:30).

Mateo 26:26–30

Gipasiugdahan ni Jesukristo ang sakrament atol sa Pagpalabay

I-display ang hulagway sa Katapusang Panihapon [The Last Supper] (Libro sa mga Hulagway sa Ebanghelyo [2009], nu. 54; tan-awa usab sa LDS.org). Ipahibalo sa mga estudyante nga samtang mikaon ang Manluluwas sa pagkaon sa Pagpalabay kauban sa Iyang mga Apostoles, gipasiugdahan Niya ang ordinansa sa sakrament.

Ipasulat sa mga estudyante diha sa ilang mga class notebook o mga scripture study journal ang ilang mga tubag sa mosunod nga mga pangutana (mahimo nimong isulat kini nga mga pangutana diha sa pisara sa dili pa magklase):

Sa katapusan ninyong pag-ambit sa sakrament, unsay inyong gibuhat? Unsay inyong gihunahuna? Unsay inyong gibati?

Iisa ang tasa ug ang pan nga gi-display diha sa lamesa. Dapita ang usa ka estudyante sa pagbasa og kusog sa Mateo 26:26–29. Hangyoa ang klase sa pagsunod, nga mangita kon unsay gibuhat sa Ginoo sa pan ug sa sulod sa tasa.

• Unsa may gibuhat sa Ginoo sa pan ug sa sulod sa tasa?

• Sumala niini nga mga bersikulo, unsay girepresentar niining mga simbolo sa sakrament? (Kinahanglang mahibalo ang mga estudyante sa mosunod nga baruganan: Ang mga simbolo sa sakrament nagrepresentar sa lawas ug sa dugo ni Jesukristo, nga Iyang gisakripisyo alang kanato.)

Pasabta ang mga estudyante nga ang Hubad ni Joseph Smith naghatag og dugang nga panabut niini nga mga bersikulo. Ipabasa og hilum sa mga estudyante ang kinutlo gikan sa Hubad ni Joseph Smith, Mateo 26:22 nga makita diha sa Ang Giya ngadto sa mga Kasulatan . Ipabasa usab nila ang Hubad ni Joseph Smith, Mateo 26:24–25 (diha sa Ang Giya ngadto sa mga Kasulatan). Hangyoa ang mga estudyante sa pagpangita kon unsay dinasig nga mga kausaban nga gihimo ngadto niini nga mga bersikulo, nga makatabang kanato nga makasabut sa importante nga katuyoan sa sakrament.

• Nganong gipasiugdahan man ni Jesukristo ang sakrament? (Human makatubag ang mga estudyante, isulat sa pisara ang mosunod nga kamatuoran: Gipasiugdahan ni Jesukristo ang sakrament aron mahinumdom kita Kaniya ug sa Iyang Pag-ula sa atong mga sala.)

• Unsa ang ubang mga butang nga atong mahimo aron masiguro nga makatabang kanato ang sakrament nga mahinumduman si Jesukristo ug ang Iyang Pag-ula sa atong mga sala?

• Sa unsang paagi nga ang pagpaningkamot sa paghinumdom sa Manluluwas ug sa Iyang Pag-ula makaimpluwensya sa inyong mga pagbati ug mga kasinatian samtang nag-ambit sa sakrament?

Aron matabangan ang mga estudyante nga mahibalo og laing baruganan, ipangutana:

• Sumala sa mga bersikulo 27–28, unsa may gitugutan nga atong madawat tungod sa pagpaagas sa dugo ni Kristo samtang nag-ambit kita sa sakrament? (Usa ka kapasayloan sa atong mga sala.)

Ipasabut nga ang pagkaon lamang sa pan ug pag-inum sa tubig atol sa sakrament dili awtomatik nga mohimo natong kwalipikado nga makadawat og kapasalyoan, o pagpasaylo, sa atong mga sala. Kinahanglan kita nga magpakita og hugot nga pagtuo kang Jesukristo, maghinulsol, ug moambit sa sakrament uban sa tinuod nga katuyoan pinaagi sa kanunay nga paghinumdom Kaniya ug pagpaningkamot sa pagtuman sa Iyang mga sugo. Pinaagi sa takus nga pag-ambit sa sakrament, atong gibag-o ang atong mga pakigsaad sa bunyag. Isulat sa pisara ang mosunod nga kamatuoran: Kon maghinulsol ug moambit kita sa sakrament uban sa tinuod nga katuyoan, makadawat kita og kapasayloan sa atong mga sala.

Ipasulat sa mga estudyante diha sa ilang mga class notebook o mga scripture study journal kon unsaon nila paggamit ang mga kamatuoran kalabut sa sakrament nga ilang nahibaloan diha sa Mateo 26. Dapita ang pipila ka mga estudyante nga komportable sa pagbuhat sa ingon sa pagpakigbahin sa ilang mga tubag ngadto sa klase.

Dapita ang usa ka estudyante sa pagbasa og kusog sa Mateo 26:29. Hangyoa ang klase sa pagsunod, nga mangita sa gisulti sa Manluluwas kon kanus-a ang sunod Niya nga pag-ambit sa sakrament. Hangyoa ang mga estudyante sa pagreport kon unsay ilang nakit-an.

Ipasabut nga “ang sakrament wala lamang magsimbolo sa Pag-ula sa Manluluwas apan nagpaabut sa panahon nga Siya mobalik sa yuta diha sa himaya (tan-awa sa 1 Mga Taga-Corinto 11:26)” (New Testament Student Manual, 83). Kon atong tumanon ang atong mga pakigsaad ug molahutay sa katapusan, malakip kita niadtong moambit sa sakrament kauban ang Manluluwas sa umaabut nga panahon (tan-awa sa D&P 27:4–14).

Tapusa pinaagi sa pagpakigbahin sa imong pagpamatuod mahitungod sa mga kamatuoran nga nahibalon diha sa leksyon karon.

Komentaryo ug Background nga Impormasyon

Mateo 26:16. “Siya nagpangitag higayon sa pagtugyan Kaniya”

Ang Hubad ni Joseph Smith sa Marcos 14:10 miklaro sa usa ka rason nganong gibudhian ni Judas si Jesus: “Ug si Judas Iscariote, usa sa napulog duha, miadto sa mga sacerdote nga punoan, aron sa pagtugyan kang Jesus ngadto kanila; kay iya siyang gisalikway, ug nasilo siya tungod sa iyang mga pulong”.

Mateo 26:28. “Alang sa kapasayloan sa mga sala”

Si Elder Vaughn J. Featherstone sa Seventy nagtudlo kon unsay buot ipasabut sa takus nga moambit sa sakrament aron makadawat kita og kapasayloan sa atong mga sala:

“Mahinungdanon nga atong bag-uhon ang atong mga pakigsaad pinaagi sa pag-ambit sa sakrament. Kon ato kining buhaton sa kinasingkasing, uban sa tinuod nga katuyoan, mosalikway sa atong mga sala, ug mobag-o sa atong pasalig ngadto sa Dios, ang Ginoo mohatag og paagi diin ang mga sala mapasaylo sa matag semana. Ang yanong pagkaon sa pan ug pag-inum sa tubig dili makahatag nianang kapasayloan. Kinahanglan gayud kitang mangandam ug dayon moambit uban sa masulub-on nga kasingkasing ug mahinulsulon nga espiritu. Ang espirituhanong pagpangandam nga atong himoon aron sa pag-ambit sa sakrament mahinungdanon sa pagdawat og kapasayloan sa atong mga sala” (“Sacrament Meeting and the Sacrament,” Ensign, Sept. 2001, 24–25).

Dugang nga mga Ideya sa Pagtudlo

Mateo 26:26–30. Video presentation—“Always Remember Him”

Human magtuon ang mga estudyante sa Mateo 26:26–28 ug mahibalo sa baruganan nga gipasiugdahan ni Jesukristo ang sakrament aron makahinumdom kita Kaniya ug sa Iyang Pag-ula alang sa atong mga sala, mahimo nimong ipasalida ang video nga “Always Remember Him” (5:27) aron matabangan sila nga mas makasabut sa katuyoan ug kaimportante sa sakrament. Dinhi niini nga video, si Elder Jeffrey R. Holland sa Korum sa Napulog Duha ka mga Apostoles mipasabut nga ang katuyoan sa sakrament mao ang paghinumdom kang Jesukristo ug sa Iyang Maulaong sakripisyo. Kini nga video anaa sa LDS.org.

Human mapasalida ang video, mahimo nimong ipangutana kining mosunod nga mga pangutana:

• Unsa ang ubang mga butang nga makabalda kanato atol sa pagdumala sa sakrament?

• Sa unsang paagi nga ang paglikay niining mga makabalda atol sa sakrament miting makatabang kanato nga makabaton og mas espiritwal nga kasinatian?

Dapita ang mga estudyante sa pagpakigbahin kon unsay ilang gibuhat aron matabangan ang ilang kaugalingon nga makatutok sa Manluluwas ug sa kamahinungdanon niining ordinansa ug sa paghinumdom Kaniya sa tibuok semana.

Mateo 26:28. “Alang sa kapasayloan sa mga sala”

Human mabasa sa mga estudyante ang Mateo 26:28, ipasabut ang mga pulong nga “kini mao ang akong dugo sa [bag-ong tugon] pakigsaad.” Ipasabut nga ang usa ka kahulugan sa pulong nga tugon mao ang “pakigsaad.” Aron matabangan ang mga estudyante nga makasabut sa mga pulong nga “bag-ong tugon,” drowinga sa pisara ang mosunod nga diagram:

• Unsa may gitudlo sa Ginoo sa Iyang katawhan panahon sa Daang Tugon nga ilang buhaton aron matumong ang ilang mga hunahuna ngadto sa Pag-ula ni Jesukristo? (Kinahanglan silang mopahigayon og mga sakripisyo sa hayop.)

Isulat sa pisara ang mga sakripisyo sa hayop ubos sa Daan.) Ipasabut nga “sa dihang ang Ginoo mihimo sa Iyang pakigsaad ngadto sa mga anak sa Israel [sa panahon sa Daang Tugon], ang mga tawo mipakigsaad nga mosunod sa mga pulong sa Ginoo. Si Moises mihalad og sakripisyo ngadto sa Ginoo, ug dayon gikuha niya ang dugo gikan sa sakripisyo ug gisablig kini ngadto sa katawhan, nga nag-ingon, ‘Ania karon ang dugo sa tugon, nga gibuhat sa Ginoo uban kaninyo’ (Exodo 24:8; tan-awa usab sa Exodo 24:3–8). Sa dihang si Jesukristo naghisgot niini nga pamahayag, sama sa narekord diha sa Mateo 26:28, Iyang gitudlo nga ang bag-ong ‘tugon,’ o pakigsaad, hapit na mahatagi og timaan pinaagi sa dugo, sa samang paagi sa daang tugon, ug nga ang dugo nga Iyang ipaagas alang kanato motabon sa atong mga sala ug motangtang niini, sama sa dugo sa gisakrpisyo nga simbolikanhong mitabon sa mga tawo sa panahon ni Moises. … Sa dihang gipresentar ni Jesus ang kopa sa bino ngadto sa Iyang mga Apostoles, mihatag na Siya og timailhan sa katumanan sa daang pakigsaad ug sa pag-establisar sa bag-ong pakigsaad” (New Testament Student Manual [manwal sa Church Educational System, 2014], 83).

Isulat sa pisara ang pulong nga sakrament ubos sa Bag-o. Ipasabut nga sama nga ang dugo sa gisakripisyo nga mga hayop nagsimbolo sa daang pakigsaad nga gihimo sa Dios ngadto sa Iyang katawhan, ang tubig nagpahinumdom kanato sa dugo ni Jesukristo nga gipaagas isip kabahin sa bag-ong pakigsaad.