Leksyon 27: Joseph Smith—Mateo; Mateo 24

Leksyon 27

Joseph Smith—Mateo; Mateo 24

Pasiuna

Gipanagna ni Jesukristo ang kalaglagan sa Jerusalem ug sa templo. Gipadayag Niya ang mga timailhan sa Iyang Ikaduhang Pag-anhi ug misugo sa mga matinud-anon nga magbantay ug mangandam alang niana nga adlaw.

Mga Sugyot alang sa Pagtudlo

Joseph Smith—Mateo 1:1–20

Gipanagna ni Jesukristo ang kalaglagan sa Jerusalem ug sa templo

I-display ang litrato sa Ang Ikaduha nga Pag-anhi (Libro sa mga Hulagway sa Ebanghelyo [2009], nu. 66; tan-awa usab sa LDS.org). Hangyoa ang mga estudyante sa pagpamalandong sa naa nila nga mga pangutana bahin sa Ikaduhang Pag-anhi ni Jesukristo ug sa pagsulat niini nga mga pangutana diha sa ilang mga class notebook o mga scripture study journal. Ayaw pangayo og tubag sa mga pangutana niining higayuna. Dapita ang mga estudyante sa pagpangita sa mga tubag samtang magtuon sila sa Joseph Smith—Mateo.

Ipasabut nga ang Joseph Smith—Mateo mao ang Hubad ni Joseph Smith sa Mateo 23:39 ug sa Mateo 24. I-summarize ang Joseph Smith—Mateo 1:1–3 pinaagi sa pagpasabut nga samtang nanudlo si Jesukristo didto sa templo sa Jerusalem, nasabtan sa Iyang mga disipulo nga Siya mobalik sa kalibutan. Dayon si Jesus mibiya sa templo, ug miduol Kaniya ang Iyang mga disipulo, nagtinguha nga masayud pa og dugang kon kanus-a ang templo pagalaglagon.

Dapita ang usa ka estudyante sa pagbasa og kusog sa Joseph Smith—Mateo 1:4. Hangyoa ang klase sa pagsunod, nga mangita sa duha ka pangutana sa mga disipulo ngadto kang Jesus didto sa Bungtod sa mga Oliba. Dapita ang mga estudyante sa pagreport sa ilang nakit-an, ug isulat sa pisara ang mosunod nga mga pangutana:

Kanus-a pagalaglagon ang Jerusalem ug ang templo?
Unsa ang mga timailhan sa Ikaduhang Pag-anhi ni Jesukristo ug sa pagkalaglag sa mga dautan?

Ipasabut nga si Jesukristo mihatag sa unang pangutana diha sa mga bersikulo 5–21, ug ang ikaduhang pangutana gitubag diha sa mga bersikulo 21–55. Ipares-pares ang mga estudyante. Sugoa sila sa pagbasa og kusog sa Joseph Smith—Mateo 1:5–12 uban sa ilang kapares, nga mangita sa mga timailhan nga may kalabutan sa pagkalaglag sa Jerusalem ug sa templo. Hangyoa ang mga estudyante sa pagreport sa ilang nakit-an.

Bisan og miingon si Jesus nga ang Iyang mga disipulo mag-antus niining higayuna, unsa man ang Iyang gisulti mahitungod niadtong kinsa “magpabilin nga malig-on ug dili mabuntog”? (bersikulo 11).
Unsa nga baruganan ang atong makat-unan gikan sa bersikulo 11? (Ang mga estudyante mahimong mogamit og lain-laing mga pulong apan kinahanglang mahibaloan nila ang mosunod nga baruganan: Kon magpabilin kitang malig-on ug dili mabuntog, nan kita pagaluwason. Gamit ang mga pulong sa estudyante, isulat sa pisara kining baruganan.)
Unsa ang buot ipasabut sa pagmalig-on ug dili mabuntog? Ang (magmalig-on nagsugyot nga dili matarug, solido, dili matay-og, ug dili mapildi.)

Aron matabangan ang mga estudyante nga makasabut sa pulong nga pagaluwason diha sa bersikulo 11, ipasabut nga kon kita lig-on, mahimong dili kita luwas sa kalisdanan, apan sa katapusan luwas kita sa gingharian sa Dios.

Dapita ang usa ka estudyante sa pagbasa og kusog sa mosunod nga paragraph. Hangyoa ang klase nga maminaw sa unsang paagi kadtong nagpabiling lig-on sa pagsunod sa tambag sa Manluluwas naluwas sa pagkalaglag:

Sa Joseph Smith—Mateo 1:13–18 atong nahibaloan nga gipahimangnoan ni Jesus ang Iyang mga disipulo nga mangandam sa pag-adto sa mga kabukiran ug dili mamauli sa ilang balay tungod kay ang Jerusalem sulungon ug laglagon. Iyang gitagna nga ang mga kalisdanan niadtong mga panahona maoy pinakagrabe nga sukad nahitabo sa Israel. Niadtong A.D. 70, gibana-bana nga 40 ka tuig human sa pagpamulong ni Jesus niini, ang mga Romano misulong sa Jerusalem ug mipatay og kapin sa milyon ka mga Judeo. Nalaglag ang templo, ug walay bisan usa ka bato ang nagpabilin nga nagkapatong—sama sa gipanagna sa Manluluwas (tan-awa sa Mateo 24:2). Hinoon, kadtong mga mipatalinghug sa pahimangno ni Jesus luwas nga nakaeskapo ngadto sa Pella, sa lungsod nga mga 50 ka milyas ang gilay-on sa amihanang Jerusalem (tan-awa sa Giya Ngadto sa mga Kasulatan, “Pella”).

Sa unsang paagi ang kasinatian sa mga Judeo naghulagway sa kaimportante sa pagpabiling lig-on sa pagsunod sa mga pulong sa Manluluwas?
Sa unsang paagi kamo napanalanginan tungod sa pagpabiling lig-on sa pagsunod sa mga sugo?

I-summarize ang Joseph Smith—Mateo 1:19–20 pinaagi sa pagpasabut nga gipanagna ni Jesus nga bisan og ang mga Judeo mag-antus og hilabihang mga pagsulay, sila ipreserbar tungod sa pakigsaad sa Dios uban kanila.

Joseph Smith—Mateo 1:21–37

Gipanagna ni Jesus ang mga timailhan sa Iyang Ikaduhang Pag-anhi

Ipasabut nga agig dugang sa pagpasabut sa mga timailhan nga nagpahimangno sa kalaglagan sa Jerusalem, gitubag sa Manluluwas ang ikaduhang pangutana sa iyang mga disipulo pinaagi sa pagpanagna sa mga timailhan bahin sa Iyang Ikaduhang Pag-anhi.

Hangyoa ang usa ka estudyante sa pagbasa og kusog sa Joseph Smith—Mateo 1:21–23. Dapita ang klase sa pagsunod, nga mangita kon nganong gipadayag sa Ginoo ang mga timailhan sa Iyang Ikaduhang Pag-anhi.

Nganong makatabang man sa mga disipulo ni Jesukristo ang pagkahibalo sa mga timailhan nga nagtimaan sa Ikaduhang Pag-anhi?

Dapita ang usa ka estudyante sa pagbasa og kusog sa Joseph Smith—Mateo 1:24–26. Hangyoa ang klase sa pagpangita kon sa unsang paagi ang Manluluwas mopakita sa Iyang Ikaduhang Pag-anhi.

Sa unsang paagi ang Manluluwas mopakita sa Iyang Ikaduhang Pag-anhi?
Sa unsang paagi ang pagkahibalo niini makatabang sa mga pinili nga makalikay sa pagkalingla?

Dapita ang mga estudyante sa pagbasa og hilum sa Joseph Smith—Mateo 1:27–31, nga mangita sa mga timailhan nga mag-una sa Ikaduhang Pag-anhi.

Unsa nga mga kalisdanan ang sagubangon sa mga tawo sa dili pa moabut ang Ikaduhang Pag-anhi?
Basi sa mga bersikulo 27 ug 31, unsa ang gipaabut nga mga timailhan nga mag-una sa Ikaduhang Pag-anhi? (Ang mga estudyante mahimong mogamit og lain-laing mga pulong apan kinahanglang mahibaloan nila ang mosunod nga kamatuoran: Sa dili pa moabut ang Ikaduhang Pag-anhi ni Jesukristo, ang mga pinili sa Ginoo pagapundukon ug ang ebanghelyo masangyaw sa tibuok kalibutan.)
Sa unsang mga paagi nga atong nakita kining mga panagna nga nanghitabo?

Ipasabut nga sa Joseph Smith—Mateo 1:32–36 gihulagway ang dugang nga mga timailhan nga may kalabutan sa Ikaduhang Pag-anhi.

Pahinumdumi ang mga estudyante bahin sa pahimangno sa Manluluwas nga sa ulahing mga adlaw ang mini nga mga Kristo ug mini nga mga propeta magtinguha sa “paglingla sa labing pinili” (bersikulo 22). Dapita ang usa ka estudyante sa pagbasa og kusog sa Joseph Smith—Mateo 1:37. Hangyoa ang klase sa pagsunod, nga mangita kon sa unsang paagi ang mga pinili makalikay sa pagkalingla.

Sa unsang paagi ang mga pinili makalikay sa pagkalingla?
Unsa nga baruganan ang atong makat-unan gikan niini nga bersikulo? (Ang mga estudyante mahimong mogamit og lain-laing mga pulong apan kinahanglang mahibaloan nila ang mosunod nga baruganan: Kon atong ibahandi ang pulong sa Ginoo, nan dili kita malingla. Isulat sa pisara kining mga baruganan.)

Aron matabangan ang mga estudyante nga makasabut niini nga baruganan, dapita ang usa ka estudyante sa pagbasa og kusog sa mosunod nga istorya nga gihatag ni Elder M. Russell Ballard sa Korum sa Napulog Duha ka mga Apostoles:

“Usa sa akong maayong misyonaryo sa akong pagserbisyo pagka-mission president sa Toronto [Canada] nakigkita nako pipila ka tuig ang milabay. Nangutana ko niya, ‘Elder, unsay akong ikatabang nimo?’

“‘President,’ miingon siya, ‘sa akong hunahuna nawad-an ko sa akong pagpamatuod.’

“Dili ko makatuo niini. Nangutana ko niya kon giunsa kana sa pagkahitabo.

“‘Tungod sa unang higayon nga nakabasa ko og mga literatura sa anti-Mormon,’ miingon siya. ‘Duna koy mga pangutana, ug walay motubag nako para niini. Nalibug ko, ug sa akong hunahuna nawad-an ko sa akong pagpamatuod’” (“When Shall These Things Be?” Ensign, Dis. 1996, 60.)

Hangyoa ang mga estudyante sa pagpamalandong kon sila, o ubang tawo nga ilang nailhan, nakasinati na ba og sama sa nasinati niining kanhi misyonaryo.

Unsa nga tambag ang inyong ihatag sa tawo nga anaa niini nga sitwasyon? Ngano man?

Dapita ang usa ka estudyante nga ipadayon sa pagbasa og kusog ang istorya ni Elder Ballard.

“Nangutana ko niya unsay iyang mga pangutana, ug giingnan ko niya. Mga standard kini nga isyu sa anti-Church, apan nagkinahanglan ko og gamayng panahon para makatigom og mga materyal aron makahatag og makahuluganong mga tubag. Mao nga nag-set mi og appointment 10 ka adlaw human niadto, diin giingnan nako siya nga akong tubagon ang matag usa sa iyang pangutana. Sa mobiya na unta siya, ako siyang gipahunong.

“‘Elder, daghan ka og napangutana nako karon,’ miingon ko. ‘Karon duna koy usa ka pangutana nimo.’

“‘Oo, President?’

“‘Unsa na kadugay sukad mibasa ka sa Basahon ni Mormon?’ Nangutana ko.

“Napiyong ang iyang mga mata. Mitutok siya sa sawog sa makadiyot. Dayon mitan-aw nako. ‘Dugay na, President,’ mitug-an siya.

“‘Sige,’ miingon ko. ‘Nahatagan na ko nimo og assignment. Siguro angay lang nga hatagan pud ta ka. Gusto kong mosaad ka nako nga mobasa ka pinakaminos usa ka oras kada adlaw sugod karon ug hangtud sa sunod natong appointment.’ Miuyon siya nga buhaton kini.

“Human sa napulo ka adlaw mibalik siya sa akong office, ug andam na ko. Gipagawas nako ang akong mga papel aron sugdan ang pagtubag sa iyang mga pangutana, apan gipahunong niya ko.

“‘President,’ miingon siya, ‘wala na kana kinahanglana.’ Dayon mipasabut siya: ‘Nasayud ko nga ang Basahon ni Mormon tinuod. Ako nasayud nga si Joseph Smith propeta sa Dios.’

“‘Nan, maayo kana,’ miingon ko. ‘Apan makadawat ra gihapon kag mga tubag sa imong mga pangutana. Gitrabahoan ko ni og dugay, mao nga lingkod lang diha og paminaw.’

“Ug akong natubag ang tanan niyang pangutana ug dayon nangutana ko, ‘Elder, unsay imong nakat-unan gikan niini?’

“Ug miingon siya, ‘Hatagan ang Ginoo og patas nga panahon’” (“When Shall These Things Be?” 60.)

Sa unsang paagi kini nga kasinatian naghulagway sa baruganan nga atong nahibaloan diha sa bersikulo 37?
Sa unsang paagi ikaw napanalanginan dihang imong gibahandi ang pulong sa Ginoo?

Joseph Smith—Mateo 1:38–55

Si Jesus mitudlo sa Iyang mga disipulo bahin sa pagkaandam alang sa Iyang Ikaduhang Pag-anhi.

Ipasabut nga sa paggamit og mga sambingay, si Jesus mitudlo sa Iyang mga disipulo kon unsaon sa pagbahandi sa Iyang pulong ug maandam para sa Iyang Ikaduhang Pag-anhi.

Ipares-pares ang mga estudyante. I-assign ang usa ka estudyante sa matag pares sa pagtuon sa Joseph Smith—Mateo 1:38–46 ug ang usa magtuon sa Joseph Smith—Mateo 1:47–54. Dapita ang mga estudyante sa pagpangita og mga doktrina ug mga baruganan diha sa gi-assign nila nga mga bersikulo ug sa pagsulat niini.

Human sa igong panahon, hangyoa ang estudyante nga i-summarize ngadto sa ilang mga kapares ang mga sambingay nga ilang nabasa ug hisgutan ang mosunod nga mga pangutana:

Unsa nga mga kamatuoran ang inyong nahibaloan?
Sa unsang paagi gihulagway sa Manluluwas kining mga kamatuoran diha sa mga bersikulo nga inyong natun-an?

Dapita ang pipila ka estudyante sa pagreport sa mga kamatuoran nga ilang nahibaloan, nga naglakip sa mosunod: Ang Langitnong Amahan lang ang nahibalo kon kanus-a mahitabo ang Ikaduhang Pag-anhi. Kon magbantay kita sa mga timailhan ug mosunod sa mga sugo sa Ginoo, niana maandam kita sa Ikaduhang Pag-anhi sa Manluluwas.

Ribyuha ang mga kamatuoran nga nahibaloan diha sa Joseph Smith—Mateo, ug hangyoa ang mga estudyante sa paghunahuna sa unsang paagi kini nga mga kamatuoran nakatabang sa pagtubag sa mga pangutana nga ilang gisulat sa pagsugod pa sa leksyon. Dapita sila sa pagpamatuod sa mga kamatuoran nga ilang nakat-unan.

Ipabasa og kusog sa usa ka estudyante ang mosunod nga pamahayag ni Elder Dallin H. Oaks sa Korum sa Napulog Duha ka mga Apostoles (kon mahimo, hatagi ang mga estudyante og mga kopya sa hand out):

“Unsa kaha kon ugma na ang Iyang pag-anhi? Kon mahibalo ta nga ugma na atong mahimamat ang Ginoo—sa dili pa ta mamatay o sa wala dahuma Niyang pag-anhi—unsay atong buhaton karon? Unsa kaha nga mga pagkumpisal ang atong buhaton? Unsa kaha nga mga binuhatan ang dili na nato buhaton? Unsa kaha nga mga pinansyal ang atong sulbaron? Unsa kaha nga mga pagpasaylo ang atong ihatag? Unsa kaha nga mga pagpamatuod ang atong ihatag?

“Kon buhaton man nato kining mga butanga nan, nganong dili na man lang karon?” (“Pagpangandam alang sa Ikaduhang Pag-anhi,” Ensign o Liahona, Mayo 2004, 9).

Dapita ang mga estudyante sa pagsulat og tubag sa mosunod nga pangutana: Kon ako nasayud nga makigkita ko sa Manluluwas ugma, unsa man ang angay nakong usbon karon? Awhaga ang mga estudyante nga i-apply unsay ilang gisulat.

Komentaryo ug Background nga Impormasyon

Joseph Smith—Mateo 1:11. “Siya nga magpabilin nga malig-on ug dili mabuntog”

Si Elder David A. Bednar Korum sa Napulog Duha ka mga Apostoles mipasabut unsay ipasabut nga magpabiling lig-on:

“Ang pulong nga ‘lig-on’ nagpasabut nga lig-on sa nahimutangan, solido ug makanunayon, dili matarug ug may determinasyon (Oxford English Dictionary Online, 2nd ed. [1989], “Steadfast”). … Ang usa ka tawo nga lig-on ug dili matarug usa ka solido, makanunayon, may determinasyon, sigurado, ug dili mapaling gikan sa nanguna nga katuyoan o misyon” (“Steadfast and Immovable: Always Abounding in Good Works,” New Era, Ene. 2008, 2).

Ang Manluluwas mitudlo: “Siya nga magpabilin nga malig-on ug dili mabuntog, ang mao pagaluwason.” (Joseph Smith—Mateo 1:11). Ang pagkaluwas wala magpasabut nga nalikay na sa tanang kalisdanan. Si Propeta Joseph Smith mipasabut:

“Usa ka sayop nga ideya nga ang mga Santos makalikay sa mga paghukom, sama nga ang mga dautan mag-antus, kay ang tanang tawo ubos sa pag-antus, ug ‘ang mga matarung maglisud sa paglikay;’ … daghan sa mga matarung mahimong biktima sa sakit, sa mga kagaw, ug uban pa., tungod sa kahuyang sa unod, ug sa gihapon maluwas didto sa Gingharian sa Dios” (sa History of the Church, 4:11; tan-awa usab sa Journals, Vplume 1: 1832–1839, vol. 1 sa Journals series sa The Joseph Smith Papers, ed. Dean C. Jessee, Ronald K. Esplin, ug Richard Lyman Bushman [2008], 352–53).

Joseph Smith—Mateo 1:22. “Adunay motungha nga mga mini nga Kristo, ug mini nga mga propeta”

Ang mga termino nga “mini nga mga Kristo” ug “mini nga mga propeta” nagpasabut nga tanan—sa sulod ug gawas sa Simbahan—kinsa nangangkon nga namulong alang sa Ginoo nga wala ang awtoridad o kinsa nanudlo og mga butang nga sukwahi sa mga pulong sa buhi nga mga propeta. Ang sayop nga mga sistema mahimo usab nga usa ka mini nga mga Kristo (tan-awa sa Bruce R. McConkie, The Millennial Messiah [1982], 48). Ang mga pulong nga “mga pinili sumala sa pakigsaad” sa bersikulo 22 nag-refer sa mga miyembro sa Simbahan ni Jesukristo.

Si Elder M. Russell Ballard sa Korum sa Napulog Duha ka mga Apostoles mipasabut sa mga termino nga “mini nga mga Kristo” ug “mini nga mga propeta”:

“Kon maghunahuna ta og mini nga mga propeta ug mini nga mga magtutudlo, maghunahuna dayon ta sa mga tawo nga mituo og sayop nga doktrina o moingon nga sila dunay awtoridad sa pagtudlo sa tinuod nga ebanghelyo ni Kristo sumala sa kaugalingon nilang interpretasyon. Sa kasagaran magtuo ta nga mga tawo sila nga apil sa gamayng radikal nga pundok nga sa kinatibuk-an wala dawata sa katilingban. Hinoon, akong ipasabut: dunay mini nga mga propeta ug mini nga mga magtutudlo nga moangkon usab nga mga miyembro sa Simbahan. Dunay mga tawo, nga walay awtoridad, nangangkon nga gisuportahan sa Simbahan ang ilang mga produkto ug mga binuhatan. Magbantay sa ingon niini” (“Beware of False Prophets and False Teachers,” Ensign, Nob. 1999, 62).

Joseph Smith—Mateo 1:22. “Kon mahimo, linglahon nila ang labing pinili”

Si Presidente Joseph F. Smith mipasidaan sa mga miyembro sa Simbahan:

“Dili nato madawat nga awtorisado ang usa ka tawo gawas kon naggikan kini direkta sa pinili nga channel, ang giestablisar nga organisasyon sa priesthood, nga mao ang channel nga gipili sa Dios diin adto ipahibalo ang iyang hunahuna ug kabubut-on alang sa kalibutan.

“… Ug sa higayon nga kanang mga tawhana mangita og laing tinubdan, nianang higayuna gibantang nila ang ilang kaugalingon sa makaagni nga mga impluwensya ni Satanas, ug gitugyan ang ilang kaugalingon nga mahimong mga sulugoon sa yawa; mawala sa ilang panan-aw ang tinuod nga han-ay diin ang mga panalangin sa Priesthood matagamtam; ang ilang pagtikang wala na sa utlanan sa gingharian sa Dios, ug namiligro sila. Kon ugaling makakita mo og tawo nga mangangkon nga nakadawat og pagpadayag gikan sa Ginoo para sa Simbahan, nga dili subay sa han-ay ug channel sa priesthood, maila ninyo siya nga usa ka impostor” (Gospel Doctrine, 5th ed. [1939], 42).