Leksyon 65
Juan 6
Pasiuna
Sa adllaw human sa milagruso Niyang pagpakaon sa panon nga kapin sa 5,000 ka mga tawo, gitudlo ni Jesus nga Siya ang Tinapay sa Kinabuhi Ang pipila sa Iyang mga sumusunod misalikway sa Iyang mga pagtulun-an ug mitalikod Kaniya. Agig sukwahi, si Pedro mipamatuod nga si Jesus mitudlo sa mga pulong sa kinabuhing dayon ug mao ang Anak sa Dios.
Mga Sugyot alang sa Pagtudlo
Juan 6:1–21
Si Jesus milagruso nga mipakaon sa kapin sa 5,000 ka mga tawo ug milakaw sa dagat
Ipasabut nga human ang Manluluwas mipamatuod bahin sa Iyang kabalaan didto sa Jerusalem (tan-awa sa Juan 5), mibalik Siya sa Galilea, diin Siya ug ang Iyang mga Apostoles mitudlo sa ebanghelyo ug miayo og daghang tawo (tan-awa sa Mateo 5–13). Dayon gitabok ni Jesus ang Dagat sa Galilea uban sa Iyang mga disipulo ug milagrusong gipakaon ang panon nga kapin sa 5,000 ka mga tawo (tan-awa sa Juan 6:1–13).
I-display ang usa ka pirasong tinapay. Ipa-summarize sa usa ka estudyante ang istorya bahin sa Manluluwas nga mipakaon sa kapin sa 5,000 ka mga tawo pinaagi sa lima ka piraso nga tinapay ug duha ka gagmayng isda.
-
Unsa kaha ang inyong mahunahuna kon didto pa mo atol niini nga milagro ug nakahibalo nga si Jesus dunay katakus sa paghatag og pagkaon sa milagrusong paagi?
Hangyoa ang usa ka estudyante sa pagbasa og kusog sa Juan 6:14–15 . Dapita ang klase sa pagsunod, nga mangita kon unsay gustong buhaton sa mga tawo human sila milagrusong gipakaon ni Jesus.
-
Unsa ang gustong buhaton sa mga tawo?
Ipasabut nga ang usa ka tradisyon tali sa mga Judeo sa kapanahunan ni Jesus nagsugyot nga kon ang Mesiyas o Hari sa Israel moabut, Iyang pakan-on ang mga tawo og tinapay nga gikan sa langit.
-
Sumala sa bersikulo 15, unsay gihimo ni Jesus imbis nga tugutan ang mga tawo nga mokorona Kaniya isip ilang hari?
-
Nganong dili gusto si Jesus nga mapasidunggan isip hari sa mga Judeo?
I-summarize ang Juan 6:16–21 pinaagi sa pagpahinumdom sa mga estudyante nga ang Manluluwas mipadala sa iyang mga disipulo tabok sa Dagat sa Galilea, ug dayon sa lawom nga kagabhion dihang naglisud ang mga disipulo sa pagbugsay batok sa balud ug sa hangin, si Jesus milakaw tadlas sa dagat aron moipon kanila. Ipasabut nga ang istorya ni Juan bahin niini nga hitabo nagpasabut nga dihang “gikalipay” sa mga disipulo ang pagdawat ni Jesus ngadto sa sakayan, sila “diha-diha” (bersikulo 21) luwas nga midunggo sa ilang destinasyon. Ipasabut nga kon kita andam nga modawat sa Manluluwas ug sa Iyang mga pagtulun-an, Siya makatabang sa paggiya kanato nga luwas latas sa mga kalisdanan sa mortalidad.
Juan 6:22–59
Gitudlo ni Jesus nga Siya ang Tinapay sa Kinabuhi
Ipasabut nga ang Juan 6:22–25 nagrekord nga daghan sa mga tawo kinsa milagruso nga gipakaon ni Jesus mibiyahe ngadto sa Capernaum sa pagpangita Kaniya.
Dapita ang usa ka estudyante sa pagbasa og kusog sa Juan 6:26–27, lakip ang Joseph Smith Translation sa Juan 6:26: “Ug si Jesus mitubag kanila ug miingon, Sa pagkatinuod, sa pagkatinuod, magaingon ako kaninyo, nga kamo nangita kanako, dili tungod kay nagtinguha kamo sa pagsunod sa akong mga pulong, ni tungod kay kamo nakakita sa mga milagro, kondili tungod kay kamo nakakaon man ug nangabusog sa tinapay.” Hangyoa ang klase sa pagsunod, nga mangita kon unsay gisulti ni Jesus ngadto sa mga tawo. Ipasabut nga ang pulong nga kalan-on diha bersikulo 27 nag-refer sa pagkaon.
-
Sumala sa Manluluwas, ngano nga nangita man kining mga tawhana Kaniya? (Ang mga pulong sa Manluluwas nagsugyot nga sila misunod Kaniya aron makakuha og daghan pang pagkaon gikan Niya.)
-
Unsa ang gisulti sa Manluluwas kanila nga angay nilang pangitaon?
Ipasabut nga ang “kalan-on [o pagkaon] nga molungtad ngadto sa kinabuhing dayon” sa (bersikulo 27) mahimong mag-refer ngadto sa mahangturong mga kamatuoran sa ebanghelyo sa Manluluwas.
-
Sa unsang paagi kaha kini nga mga bersikulo makatabang nato nga makasabut nganong si Jesus wala motugot nga kining pundok sa mga tawo mokorona Kaniya isip ilang Hari?
Dapita ang usa ka estudyante sa pagbasa og kusog sa Juan 6:28–31, ug hangyoa ang klase sa pagpangita kon unsay gitinguha sa mga tawo kang Jesus aron makadawat sila og dugang pa nga pruweba nga Siya ang Mesiyas.
-
Unsa ang gusto sa mga tawo nga buhaton ni Jesus alang nila? (Ipasabut nga ang manna mao ang “tinapay gikan sa langit” [bersikulo 31] nga gihatag sa Dios alang sa mga anak sa Israel dihang didto sila sa kamingawan.)
-
Sa pagkonsiderar unsay gihimo sa Manluluwas sa milabayng adlaw, unsa kaha ang buot ipasabut bahin niini nga hangyo sa mga tawo?
-
Isip mga sumusunod ni Jesukristo karon, unsa ang pipila ka mga paagi nga kita matintal sa paglihok nga sama sa gihimo sa mga tawo.
Dapita ang pipila ka estudyante nga magpuli-puli sa pagbasa og kusog sa Juan 6:32–35, ug hangyoa ang klase sa pagpangita kon unsay gitudlo sa Manluluwas ngadto sa mga tawo agig tubag sa ilang gihangyo nga usa ka timailhan.
-
Unsa man ang gitudlo sa Manluluwas mahitungod sa Iyang kaugalingon dihang gihisgutan Niya ang manna, o tinapay gikan sa langit?
Mahimo nimong isugyot nga markahan sa mga estudyante ang mga pulong nga “Ako mao ang tinapay nga nagahatag ug kinabuhi” diha bersikulo 35.
-
Sa unsa nga mga paagi atong mapahisama ang Manluluwas ug ang Iyang mga pagtulun-an sa tinapay?
-
Sa inyong hunahuna unsay ipasabut nga kadtong kinsa moduol kang Jesukristo “dili gutumon”? (bersikulo 35).
-
Unsa nga kamatuoran ang atong makat-unan gikan sa mga pagtulun-an sa Manluluwas diha sa bersikulo 35? (Bisan og ang mga estudyante mogamit og lain-laing mga pulong, kinahanglang mahibaloan nila ang baruganan nga susama sa mosunod: Kon moduol kita ni Jesukristo, Siya moamuma kanato sa espirituhanong paagi. Mahimo nimong isugyot nga isulat sa mga estudyante kini nga baruganan diha sa margin sa ilang mga kasulatan tapad sa Juan 6:35.)
Isulat sa pisara ang mosunod nga dili kompleto nga pamahayag:
|
Moduol kita kang Jesukristo pinaagi sa … |
Moamuma Siya nato pinaagi sa … |
Ipares-pares ang mga estudyante. Hangyoa sila nga magtinabangay sa paghimo og lista diha sa ilang mga class notebook o mga scripture study journal sa pipila ka mga butang nga ilang mahimo aron makaduol kang Jesukristo ug sa mga paagi nga Siya moamuma kanato sa espirituhanong paagi. Dapita ang pipila ka estudyante sa pagreport sa ilang mga tubag ngadto sa klase.
Aron matabangan ang klase nga mobati sa kamatuoran ug kaimportante sa baruganan nga ilang nahibaloan sa bersikulo 35, ikonsiderar ang pagdapit og pipila ka estudyante nga mopakigbahin kon unsay ilang gibati dihang nadawat nila ang espirituhanong pag-amuma dihang miduol sila sa Manluluwas.
I-summarize ang Juan 6:36–47 pinaagi sa pagpasabut nga pipila sa mga tawo nagbagulbol batok sa Manluluwas kay gitudlo man Niya nga Siya ang tinapay nga mikanaog gikan sa langit.
Aron maandam ang mga estudyante nga mahibaloan ang dugang nga baruganan nga gitudlo sa Manluluwas, dapita ang pipila ka estudyante sa pagduol sa atubangan ug hatagi sila og usa ka piraso nga pan. Dapita sila sa pagsimhot sa pan ug ipa-imagine kon unsa kahay lami niini.
-
Sa unsang paagi kaha kini nga pan makabusog kon inyo lamang kining simhuton, i-imagine lang kon unsay lami, ug sigihon lang og dala-dala sa tibuok adlaw?
-
Unsa ang angay natong buhaton aron makabenipisyo sa unsay ikahatag sa pan?
Dapita ang pipila ka estudyante nga magpuli-puli sa pagbasa og kusog sa Juan 6:49–54 . Hangyoa ang klase sa pagsunod, nga mangita kon sa unsang paagi ang kasinatian sa ilang mga classmate ikapahisama sa gitudlo sa Manluluwas niini nga mga bersikulo.
-
Sa unsang paagi ang Tinapay sa Kinabuhi lahi kay sa kasagaran nga tinapay? (Dili sama sa tinapay nga makatagbaw nato sa mubo lang nga panahon, si Jesukristo mitanyag kanato og mga panalangin nga molungtad sa kahangturan.)
Ipasabut ang mosunod nga mga pulong sa bersikulo 51: “Ang tinapay nga akong igahatag alang sa kinabuhi sa kalibutan mao ang akong unod.”
-
Sa unsang paagi ang Manluluwas mitanyag sa iyang unod ug dugo alang sa kinabuhi sa kalibutan?
-
Sumala sa bersikulo 53–54, unsa ang gitudlo sa Manluluwas nga buhaton sa mga tawo?
Ipasabut nga ang Manluluwas migamit sa mga termino nga simbolo sa pagkaon ug pag-inom. Aron matabangan ang klase nga makasabut sa mga pagtulun-an sa Manluluwas, pagdapit og mga estudyante nga moboluntaryo nga mokaon sa pan. Dayon pabalika sila sa ilang mga lingkuranan.
-
Unsa ang mahitabo sa pan ug sa mga sustansya kon kini gikaon na. (Ang mga bitamina ug mga sustansya nahimong kabahin sa lawas, naghatag og kusog ug kamaayo sa panglawas.)
-
Sa inyong hunahuna unsay ipasabut sa pagkaon sa unod ug pag-inom sa dugo ni Jesukristo? (Mahimong nagpasabut kini nga ipatuhop gayud dinhi kanato ang Iyang mga pagtulun-an ug Pag-ula. Mahimo sab nga magrepresentar kini sa pag-ambit sa sakrament, nga sa dili madugay himoon sa Manluluwas.)
-
Sumala sa bersikulo 54, unsa nga panalangin ang atong madawat kon atong ipatuhop o gamiton, ang mga pagtulun-an ug Pag-ula ni Jesukristo? (Human makatubag ang mga estudyante, isulat sa pisara ang mosunod nga baruganan: Kon atong ipatuhop, o gamiton, ang mga pagtulun-an ug ang Pag-ula ni Jesukristo, atong madawat ang kinabuhing dayon.)
Hangyoa ang mga estudyante sa pagpamalandong sa mosunod nga pangutana, ug dayon dapita ang pipila kanila sa pagpakigbahin sa ilang mga tubag:
-
Sa unsang paagi nato mapatuhop ang mga pagtulun-an ug Pag-ula ni Jesukristo? (Ang posibling mga tubag maglakip sa pagdawat kang Jesukristo nga tinuod nga Anak sa Dios, pag-ambit sa sakrament matag semana, pagtuman sa mga kasugoan, ug paglahutay hangtud sa katapusan diha sa pagkamatarung [tan-awa sa Bruce R. McConkie, Doctrinal New Testament Commentary, 3 vols. (1965–73), 1:358].)
Ipasabut nga ang kinabuhing dayon mao ang pagpuyo sa kahangturan ug mamahimong sama sa atong Langitnong Amahan ug sa iyang Anak, nga si Jesukristo. Dapita ang usa ka estudyante sa pagbasa og kusog sa Juan 6:56–57, ug hangyoa ang klase sa pagpangita kon sa unsang paagi kita mamahimong sama Kanila kon atong ipatuhop dinhi kanato ang mga pagtulun-an ug ang Pag-ula ni Jesukristo. Dapita ang mga estudyante sa pagreport sa ilang nakit-an.
Ipasabut nga ang Manluluwas dili makig-uban kanato sa pisikal nga paagi, apan hinoon ang Iyang balaang impluwensya magpabilin kanato aron matabangan kita nga mahimong mas sama Kaniya ug sa Langitnong Amahan.
Ipaambit ang inyong pagpamatuod bahin sa mga kamatuoran nga nahibaloan sa mga estudyante. Dapita ang mga estudyante nga isulat diha sa ilang mga class notebook o mga scripture study journal ang tumong kon unsaon nga mas mapatuhop diha kanila ang Pag-ula sa Manluluwas o ang usa sa Iyang mga pagtulun-an.
Juan 6:60–71
Si Pedro mipamatuod nga anaa kang Jesus ang mga pulong sa kinabuhing dayon
Isulat sa pisara ang mosunod nga pangutana: Mopadayon o mohunong?
Hangyoa ang mga estudyante sa paghunahuna og usa ka panahon dihang kinahanglan silang mopili kon mopadayon ba sa pagbuhat sa usa ka lisud nga butang o mohunong. Mahimo sab kang mohangyo og usa o duha ka mga estudyante nga ipakigbahin ang ilang mga kasinatian.
Ipasabut nga human sa sermon nga gihatag ni Jesus nga narekord sa Juan 6, ang Iyang mga disipulo nag-atubang og susama nga desisyon.
Dapita ang usa ka estudyante sa pagbasa og kusog sa Juan 6:60, 66 . Hangyoa ang klase sa pagsunod, nga mangita kon giunsa sa pagsanong sa daghang mga disipulo ni Jesus ang Iyang mga pagtulun-an.
-
Nganong daghan sa mga disipulo ni Jesus mipili man nga mohunong sa pagsunod Kaniya? (Ipasabut nga ang mga pulong nga “lisud kining sultiha” [bersikulo 60] nagpasabut nga mibati sila nga lisud kaayong sundon ang mga pagtulun-an ni Jesus.)
-
Ngano nga ang pipila ka mga tawo maglisud sa pagtuman sa mga kasugoan sa Ginoo.
Dapita ang usa ka estudyante sa pagbasa og kusog sa Juan 6:67, ug hangyoa ang klase sa pagpangita sa gipangutana ni Jesukristo ngadto sa Iyang mga Apostoles.
-
Unsa ang gipangutana sa Manluluwas ngadto sa Iyang mga Apostoles?
Dapita ang usa ka estudyante sa pagbasa og kusog sa Juan 6:68–69, ug hangyoa ang klase sa pagpangita kon sa unsang paagi si Simon Pedro mitubag sa Manluluwas. Hangyoa ang mga estudyante sa pagreport sa ilang nakit-an.
-
Gikan sa tubag ni Pedro, unsa nga kamatuoran ang atong makat-unan nga makatabang kanato nga magpabiling matinud-anon atol sa mga panahon nga ingon og lisud ang pagsunod sa Manluluwas o pagsunod sa Iyang mga pagtulun-an? (Human makatubag ang mga estudyante, isulat sa pisara ang mosunod nga baruganan: Ang lig-on nga pagpamatuod kang Jesukristo makatabang nato nga magpabiling matinud-anon atol sa mga panahon nga ingon og lisud ang pagsunod sa Manluluwas o pagsunod sa Iyang mga pagtulun-an.)
-
Sa unsang paagi ang kalig-on sa pagpamatuod bahin sa Manluluwas nakatabang ninyo o sa uban nga inyong nailhan nga magpabiling matinud-anon, bisan kon ang mga pagtulun-an sa ebanghelyo ingon og lisud sundon?
Awhaga ang mga estudyante nga mosalig sa ilang mga pagpamatuod kang Jesukristo kon ang mga pagtulun-an sa ebanghelyo ingon og para nila lisud nga sundon. Dapita ang mga estudyante kinsa mibati nga kulang sa kalig-on ang ilang pagpamatuod kang Jesukristo nga palig-unon ang ilang pagpamatuod pinaagi sa pagtinguha nga mapatuhop diha kanila ang Iyang mga pagtulun-an ug ang Pag-ula.
Komentaryo ug Background nga Impormasyon
Juan 6:33–35. Ang Tinuod nga Pan [Tinapay] sa Kinabuhi
Si Elder D. Todd Christofferson sa Korum sa Napulog Duha ka mga Apostoles mitudlo nga si Jesukristo mao ang Tinapay sa Kinabuhi:
“Mohatag ko sa akong pagsaksi sa buhing kamatuoran sa Tinapay sa Kinabuhi, si Jesukristo, ug sa walay kinutuban nga gahum ug maabut sa Iyang Pag-ula. Sa katapusan, ang Iyang Pag-ula ug ang Iyang grasya mao ang atong pagkaon sa matag adlaw” (“Pag-ila sa Kamot sa Dios diha sa Atong Inadlaw nga mga Panalangin,” Ensign, Ene. 2012, 23).
Sa pagkat-on pa og dugang mahitungod sa mga simbolo nga gigamit ni Jesukristo, sa relihiyusong kasaysayan sa mga Judeo, ug sa hiyograpikanhong lokasyon sa Iyang mga tigpaminaw sa pagtudlo sa Iyang sermon bahin sa Tinapay sa Kinabuhi (Juan 6), tan-awa sa Thomas R. Valetta, “The True Bread of Life,” Ensign, Mar. 1999, 6–13; tan-awa usab sa “Juan 6:32–35, 48–51. ‘The True Bread from Heaven,’” sa New Testament Student Manual [manwal sa Church Educational System, 2014], 221–22.
Si Elder James E. Talmage sa Korum sa Napulog Duha ka mga Apostoles mitudlo:
“Ang manna usa ka langitnong pagkaon; apan ang pan nga Iyang gihatag kanila gikan sa yuta, ug hapit na gani maparehas sa barley nga pan. Gikinahanglan pa Niyang mopakita og mas dagko pang mga timailhan, ug hatagan silag mas daghang pagkaon [o mas maayong pagkaon], sa dili pa sila modawat Kaniya isip Usa kinsa maoy unang gidawat nga mao Siya ug kinsa sa karon Iyang gipahayag ang Iyang kaugalingon nga mao Siya” (Jesus the Christ, 3rd. ed. [1916], 339–40).
Juan 6:53. “Mokaon kamo sa unod sa Anak sa Tawo ug moinom sa Iyang dugo”
Si Elder Bruce R. McConkie sa Korum sa Napulog Duha ka mga Apostoles mitudlo:
“Ang pagkaon sa lawas ug pag-inom sa dugo sa Anak sa Dios mao, una, pagdawat kaniya sa tinuoray ug sa kinatibuk-ang kahulugan, nga walay pagduha-duha bisan sa unsa man, isip personal nga kaliwatan sa lawas sa Mahangturon nga Amahan; ug, ikaduha, mao ang pagsunod sa mga sugo sa Anak pinaagi sa pagdawat sa iyang ebanghelyo, pagpamiyembro sa iyang Simbahan, ug sa paglahutay pinaagi sa kamasulundon ug kamatarung hangtud sa katapusan. Kadtong misubay niini nga pamaagi nga mokaon sa iyang lawas ug moinom sa iyang dugo makaangkon og kinabuhing dayon, nagpasabut sa kahimayaan sa kinatas-an nga langit sa celestial nga kalibutan” (Doctrinal New Testament Commentary, 3 vols. [1965–73], 1:358).
Juan 6:56. “Siya nga mokaon sa akong unod ug moinom sa akong dugo magapuyo sa sulod nako, ug ako sa sulod niya.”
Si Elder Bruce R. McConkie sa Korum sa Napulog Duha ka mga Apostoles mipasabut unsay ipasabut sa mga pulong nga “nagapuyo sulod kanako, ug ako kaniya:
“Tungod kay kadtong nagkahiusa pareho og hunahuna ug gituohan, nagbaton sila og sama nga mga kinaiya ug hiyas. … Sa ingon, sa mahulagwayong paagi sa usag usa, sila nagkahiusa”, (Doctrinal New Testament Commentary, 3 vols. (1965–73), 1:766).