2 Timoteo 1—Mga Hebreohanon 4 (Unit 27)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod nga summary sa mga panghitabo, mga doktrina, ug mga baruganan nga nakat-unan sa imong mga estudyante dihang gitun-an nila ang 2 Timoteo 1–Mga Hebreohanon 4 (unit 27) dili tuyo nga itudlo isip kabahin sa imong leksyon. Ang mga leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Espiritu Santo samtang magkonsiderar ka sa mga panginahanglan sa imong mga estudyante.

Day 1 (2 Timoteo)

Niini nga sulat ni Pablo ngadto kang Timoteo, ang mga estudyante nakat-on sa mosunod nga mga kamatuoran: Samtang kita naninguha nga maanaa ang Espiritu uban kanato, makabuntog kita sa kahadlok ug dili maulaw sa atong pagpamatuod kang Jesukristo. Samtang nagsagubang kita sa mga kalisud ug magpabiling matinud-anon sa Ginoo, makatabang kita sa atong kaugalingon ug sa uban nga makaangkon og kaluwasan pinaagi ni Jesukristo. Kon hinloan nato ang atong mga kaugalingon sa kadautan, mas maayo kitang makaalagad sa Ginoo. Kon magpabilin kitang matinud-anon sa tanang gikinahanglan sa Ginoo kanato, makadawat kita og korona sa pagkamatarung. Nakat-on usab ang mga estudyante mahitungod sa mga kakuyaw sa atong panahon ug sa bili sa kasulatan.

Day 2 (Tito)

Samtang ang mga estudyante nagtuon sa sulat ni Pablo ngadto ni Tito, usa ka lider sa Simbahan didto sa Creta, nakat-on sila nga samtang kita naghupot sa pulong sa Dios, makagamit kita sa tinuod nga doktrina aron sa pag-awhag sa uban nga mosunod sa ebanghelyo ni Jesukristo ug sa pagpakiglantugi niadtong nagsupak niini. Mi-awhag si Pablo sa mga sumusunod ni Jesukristo nga mahimong maayo nga mga ehemplo ngadto sa uban. Mipamatuod usab siya nga gihatag ni Jesukristo ang Iyang Kaugalingon alang kanato aron matubos kita Niya ug mahinlo kita.

Day 3 (Filemon)

Sa pagtuon sa pangamuyo ni Pablo ngadto ni Filemon nga ilhon ang usa ka bag-ong kinabig nga nakalingkawas nga ulipon isip usa ka igsoon sa ebanghelyo, nakat-on ang mga estudyante nga mga igsoon nga lalaki ug mga igsoon nga babaye kita sa ebanghelyo. Nakat-on usab sila nga ang mga disipulo ni Jesukristo nagtugyan og kalooy ug kapasayloan ngadto sa uban.

Day 4 (Mga Hebreohanon 1–4)

Samtang nagtuon ang mga estudyante sa sulat ni Pablo ngadto sa mga Hebreohanon, nakat-on sila sa pipila ka mga doktrina mahitungod sa Manluluwas, lakip na ang Iyang tahas isip Tiglalang ug sa Iyang pagkasama sa Langitnong Amahan. Kini nga mga doktrina midala sa mga estudyante nga makaila sa kamatuoran nga si Jesukristo mao ang Kapitan sa atong kaluwasan. Nakat-on usab sila nga tungod kay si Jesukristo miantus ug gitintal sa tanang butang, hingpit Siyang nakasabut nato ug makatabang nato sa panahon sa panginahanglan.

Pasiuna

Kini nga leksyon naghisgut sa mga panagna ni Pablo sa kakuyaw nga makita sa ulahing mga adlaw ug mao usab sa iyang panahon. Misugo si Pablo kang Timoteo ug sa umaabut nga mga magbabasa nga magpabiling matinud-anon, taliwala niini nga mga kakuyaw, sa mga kamatuoran nga ila nang nakat-unan ug sa paggamit sa kasulatan isip usa ka kapanguhaan sa pagsabut, sa koreksyon, ug sa panudlo.

Mga Sugyot alang sa Pagtudlo

2 Timoteo 3

Naghulagway si Pablo sa malisud nga panahon sa ulahing mga adlaw

Sa dili pa magklase, hangyoa ang duha o tulo ka mga estudyante nga unang moabut nga ang matag usa mag-drowing diha sa pisara og usa ka litrato nga makuyaw o peligroso nga sitwasyon. Human makasugod ang klase, pangutan-a ang klase sa mosunod nga pangutana:

Unsa nga mga pulong ang inyong gamiton sa paghulagway sa mga kahimtang nga gi-drowing sa pisara?

Ipasabut nga isip kabahin sa iyang Ikaduhang Sulat ngadto ni Timoteo, nanagna si Pablo sa mga kahimtang sa iyang panahon ug kanato. Dapita ang usa ka estudyante sa pagbasa og kusog sa 2 Timoteo 3:1. Hangyoa ang klase sa pagsunod, nga mangita sa unsang paagi mihulagway si Pablo sa mga panahon diin kita nagpuyo.

Giunsa paghulagway ni Pablo ang atong panahon? (Kon gikinahanglan, ipasabut nga ang pulong malisud nagpasabut nga puno sa kakuyaw o risgo.)
Unsay pipila ka moral o espirituhanon nga mga kalisud o kakuyaw nga inyong nakita sa atong panahon?

Ipares-pares ang mga estudyante. Hatagi ang matag pares og kopya sa mosunod nga tsart. Dapita ang matag pares sa pagbasa sa 2 Timoteo 3:2–7 ug sa pagtubag sa mga pangutana diha sa tsart. Tudloi sila sa paggamit sa mga footnote aron makatabang uban sa lisud nga mga pulong.

2 Timoteo 3:2–7

Manwal sa Seminary Teacher sa Bag-ong Tugon—Leksyon sa Home-Study (Unit 27)

Unsay pipila ka mga ehemplo sa mga kahimtang sa ulahing mga adlaw nga gihulagway ni Pablo?	Hain niini nga mga kahimtang ang inyong nakita sa atong panahon? (Ilha ang duha o tulo niini.) Nganong makuyaw man kaayo kini nga mga kahimtang?

Human sa igong panahon, pagdapit og mga estudyante sa pagreport ngadto sa klase giunsa nila pagtubag ang mga pangutana diha sa tsart, lakip kon nganong kini nga mga kondisyon makuyaw.

Hangyoa ang mga estudyante sa pagpamalandong kon nabalaka ba sila nga tingali maapektuhan sila sa pipila sa mga kakuyaw nga nahisgutan ni Pablo sa mga bersikulo nga ilang natun-an.

Sumala sa katapusan sa 2 Timoteo 3:5, unsay gi-awhag ni Pablo nga buhaton ni Timoteo nga makatabang usab nato sa atong panahon? (Kinahanglan kitang mobiya sa pagkadautan.)

Ipasabut nga bisan pa sa kaseryoso niining makabalaka nga mga kahimtang, makakaplag kita og tabang ug pagpanalipod. Dapita ang usa ka estudyante sa pagbasa og kusog sa 2 Timoteo 3:14-15. Hangyoa ang klase sa pagsunod, nga mangita kon unsay gitudlo ni Pablo nga mahimong makatabang kanato nga mopahawa gikan niini nga mga kakuyaw.

Unsay gitudlo ni Pablo mahitungod sa pagsagubang sa mga kakuyaw nga iyang gihulagway?
Unsa kahay gipasabut sa bersikulo 14 nga “magpadayon ka diha sa mga butang nga imong nahikat-onan ug imong ginatoohan pag-ayo”?

Dapita ang mga estudyante nga mahibalo og usa ka baruganan gikan sa 2 Timoteo 3:14–15 mahitungod sa unsaon pagbuntog ang espirituhanon nga mga kakuyaw sa ulahing mga adlaw. (Human makatubag ang mga estudyante, isulat sa pisara ang mosunod: Kon magpadayon kita sa mga kamatuoran nga atong nakat-unan gikan sa makasaligan nga mga kapanguhaan ug diha sa mga kasulatan, makabuntog kita sa espirituhanon nga mga kakuyaw sa ulahing mga adlaw.)

Sa unsang paagi ang pagsalig sa mga kasulatan ug sa mga kamatuoran nga atong nakat-unan makatabang nato nga mobuntog sa mga kakuyaw sa atong panahon?
Kanus-a kamo mipili nga mosalig sa mga kamatuoran nga inyong nakat-unan? Sa unsang paagi kamo napanalanginan sa pagbuhat sa ingon? (Mahimo nimong patubagon una ang mga estudyante niining mga pangutana diha sa ilang mga scripture study journal o mga class notebook, ug dayon dapita ang pipila ka mga estudyante sa pagpakigbahin uban sa klase unsay ilang gisulat.)

Pahinumdumi ang mga estudyante nga ang 2 Timoteo 3:15–17 usa ka scripture mastery passage. Dapita ang usa ka estudyante sa pagbasa og kusog sa 2 Timoteo 3:15–17, ug hangyoa ang klase sa pagpangita sa unsay gitudlo ni Pablo mahitungod sa mga kasulatan. Mahimo nimong isugyot nga markahan sa mga estudyante ang ilang nakit-an.

Unsay gitudlo ni Pablo mahitungod sa pagtuon sa mga kasulatan nga makatabang nato sa atong panahon? (Tabangi ang klase nga mahibaloan ang mosunod nga baruganan: Samtang nagtuon kita sa mga kasulatan, makakat-on kita og doktrina ug makadawat og koreksyon ug panudlo nga motabang nato sa pag-uswag padulong sa kahingpitan. Isulat sa pisara kini nga baruganan.)

Hangyoa ang mga estudyante sa paghunahuna og usa ka higayon nga ang mga kasulatan—tingali usa ka tudling nga ilang natun-an diha sa Bag-ong Tugon—nakatabang kanila sa usa sa mosunod nga mga paagi:

Aron masabtan ang usa ka doktrina sa ebanghelyo
Pinaagi sa paghatag og pagbadlong o koreksyon mahitungod sa usa ka butang sa ilang hunahuna, mga pagpili, o kinaiya nga dili husto
Pinaagi sa paghatag og tubag sa usa ka pag-ampo o paghatag og panudlo unsaon pagsulbad sa problema

Hatagi og panahon ang mga estudyante nga maghuhuna og mga kasinatian, ug dayon dapita ang pipila ka mga estudyante sa pagpakigbahin uban sa klase unsay ilang nahunahunaan.

Sa paghunahuna unsay atong nakat-unan mahitungod sa bili sa mga kasulatan, ngano kaha nga gi-awhag kita sa pagtuon niini matag adlaw?

Hatagi ang mga estudyante og kopya sa mosunod nga pamahayag ni Elder Richard G. Scott sa Korum sa Napulog Duha ka mga Apostoles. Dapita ang usa ka estudyante sa pagbasa niini og kusog, ug hangyoa ang klase sa pagpangita sa tambag ug saad ni Elder Scott mahitungod sa pagtuon sa kasulatan.

“Ayaw patuo sa bakak ni Satanas nga kamo walay panahon sa pagtuon sa kasulatan. Pilia nga makagahin og panahon sa pagtuon niini. Ang pagbusog sa pulong sa Dios matag adlaw mas importante kay sa katulog, eskwelahan, trabaho, salida sa telebisyon, mga video game, o social media. Tingali kinahanglan ninyong i-organisar og usab ang inyong mga prayoridad aron makagahin og panahon sa pagtuon sa pulong sa Dios. Kon mao, buhata kini!

“… Sa paggahin ninyo og panahon matag adlaw, sa personal ug uban sa pamilya, sa pagtuon sa pulong sa Dios, ang kalinaw mopatigbabaw sa inyong kinabuhi” (“Himoa ang Paggamit sa Pagtuo nga Inyong Unang Prayoridad,” Ensign o Liahona, Nob. 2014, 93).

Pagpamatuod sa kahilwasan ug kalinaw nga moabut niadtong kinsa nagpadayon sa mga kamatuoran nga makita sa mga kasulatan.

Dapita ang mga estudyante sa pagpilo og kaduha sa usa ka piraso nga papel, maghimo og tulo ka kolum. Hangyoa sila sa pagsulat og Doktrina sa ibabaw sa una nga kolum, Pamadlong ug Koreksyon sa ibabaw sa ikaduha nga kolum, ug Panudlo sa pagkamatarung sa ibabaw sa ikatulo nga kolum.

Dapita ang mga estudyante sa paggamit niini nga papel isip usa ka bookmark diha sa ilang mga kasulatan sulod sa usa ka semana, magsulat diha sa tukma nga seksyon matag higayon nga makabasa sila og kasulatan nga nagtuman sa usa niini nga mga katuyoan. Sama pananglit, ubos sa ulohan nga “Doktrina,” mahimong mosulat ang mga estudyante og usa ka pakisayran sa kasulatan ug ang doktrina o baruganan nga ilang nakat-unan gikan niana nga pakisayran. Ubos sa ulohan nga “Pamadlong ug koreksyon,” mahimo silang mosulat pakisayran sa kasulatan ug sa unsang paagi ang tudling nagtul-id sa sayop nga mga ideya. Ug ubos sa “Panudlo sa pagkamatarung,” mahimo silang mo-rekord og mga tudling nga naghatag nila og panabut sa unsay maayong mga buhat nga ilang mahimo.

Awhaga ang mga estudyante sa pagdala sa ilang mga papel sa klase sulod sa usa ka semana aron sa pag-report sa ilang mga kasinatian. Mahimo kang magbutang og usa ka pahinumdom diha sa imong mga kasulatan o manwal nga maghimo og usa ka mubo nga panaghisgut sa pagribyu giunsa nila paggamit niini nga scripture mastery passage.

Sunod nga Unit (Mga Hebreohanon 5–Santiago 1)

Awhaga ang mga estudyante sa pagpangita og mga tubag sa mosunod nga mga pangutana samtang nagtuon sila sa sunod nga unit: Sa unsang paagi ang mga young men tawgon sa priesthood? Kinsay gihisgutan sa Mga Hebreohanon nga adunay dakong pagtuo? Nakaila ba mo sa mga lalaki ug mga babaye nga inyong nakat-unan niini nga unit? Unsa nga bersikulo sa kasulatan ang nabasa ni Joseph Smith nga midala niya nga “mangayo sa Dios,” diin misangput sa Unang Panan-awon? Unsa ang relihiyon nga putli?