Leksyon 158

Pinadayag 17–19

Pasiuna

Nakita ni Juan nga ang espirituhanong Babelonia, o ang dautang kalibutan, makiggubat batok sa Kordero sa Dios ug ang Kordero modaog batok sa dautan. Ang mga Santos tawagon sa paggawas gikan sa espirituhanong Babelonia, ug ang limpyo ug matarung pagatawagon ngadto sa panihapon sa kasal sa Kordero. Nakita ni Juan ang pag-anhi ni Jesukristo sa dakong gahum aron sa pagbuntog niadtong makigbatok Kaniya.

Mga Sugyot alang sa Pagtudlo

Pinadayag 17–18

Nakita ni Juan ang kalaglagan sa espirituhanong Babelonia

Isulat sa pisara ang mosunod nga pamahayag ni Elder Lynn G. Robbins sa Seventy, ug dapita ang usa ka estudyante sa pagbasa niini og kusog. (Kini nga pamahayag anaa sa “Avoid It” [Brigham Young University nga debosyunal, Sept. 17, 2013], 1, speeches.byu.edu.)

“Mas sayon ang paglikay sa tintasyon kay sa pagsagang niini” (Elder Lynn G. Robbins).

• Ngano kaha nga mas sayon man ang paglikay sa tintasyon kay sa pagsagang niini?

• Unsa ang mahitabo kon ibutang nato ang atong kaugalingon sa mga sitwasyon diin kanunay kitang nanagang sa tintasyon?

Dapita ang mga estudyante sa pagpangita og kamatuoran samtang tun-an nila ang Pinadayag 17–18 nga makatabang kanila nga masayud kon unsaon sa paglikay sa daghang mga tintasyon ug mga sala sa kalibutan.

Pahinumdumi ang mga estudyante nga si Juan nakakita sa panan-awon og pito ka mga anghel nga mobubu og mga hampak o kasakitan ngadto sa mga dautan sa katapusang mga adlaw (tan-awa sa Pinadayag 16). Dapita ang usa ka estudyante sa pagbasa og kusog sa Pinadayag 17:1. Hangyoa ang klase sa pagsunod, nga mangita kon unsa ang gisulti sa usa sa pito ka mga anghel nga iyang ipakita kang Juan.

• Unsa ang gisulti sa anghel nga iyang ipakita kang Juan?

Dapita ang mga estudyante sa pagbasa og hilum sa Pinadayag 17:15, nga mangita kon unsay girepresentahan sa daghang tubig.

• Sumala sa bersikulo 15, unsa ang girepresentahan sa daghang tubig diin naglingkod ang babaye? (Mga tawo ug kanasuran diin siya adunay gahum ug impluwensya [tan-awa usab sa 1 Nephi 14:11].)

Dapita ang pipila ka estudyante nga magpuli-puli sa pagbasa og kusog sa Pinadayag 17:2–6. Hangyoa ang klase sa pagsunod, nga mangita sa pulong ug mga pulong nga naghulagway sa babaye ug sa iyang impluwensya sa kalibutan.

• Unsa nga pulong ug mga pulong ang naghulagway sa babaye?

• Sumala sa bersikulo 2, sa unsang paagi gihulagway ang impluwensya sa babaye nganha sa mga tigmando ug sa mga tawo sa yuta?

• Unsa kaha ang girepresentahan sa bersikulo 6 bahin sa babaye nga nahubog sa dugo sa mga Santos ug mga martir? (Sa tibuok kapanahunan, daghang matarung nga mga tawo gipamatay sa mga dautan, ug ang eskriptural nga pinulongan nag-ingon nga ang pagpamatay sa mga matarung dunay makatandog nga epekto niadtong nga mihimo sa pagpamatay.)

Ipasabut nga ang mananap nga gihulagway sa bersikulo 3 mahimong nagrepresentar sa Roma sa kapanahunan ni Juan ingon man sa dautang mga gingharian ug mga nasud sa katapusang mga adlaw (tan-awa sa Pinadayag 17:8–13).

Hangyoa ang mga estudyante sa pagkonsiderar kon si kinsa o unsay girepresentahan sa babaye nga gihulagway sa mga bersikulo 1–6. Dapita ang mga estudyante sa pagbasa og hilum sa Pinadayag 17:18, nga mangita kon unsay girepresentahan sa babaye.

• Sumala sa bersikulo 18, unsa ang girepresentahan sa babaye?

Ipasabut nga ang “bantugang siyudad” (sa bersikulo 18) nagpasabut sa esprituhanong Babelonia (tan-awa sa D&P 133:14). Tungod sa pagkakalibutanon ug kurapsyon sa karaang Babelonia, ug tungod kay kini usa ka lugar diin ang mga anak ni Israel nabihag, ang Babelonia kasagarang gigamit sa mga kasulatan sa paghulagway sa sala, pagkakalibutanon, sa impluwensya sa yawa dinhi sa yuta, ug sa espirituhanong pagkabihag (tan-awa usab sa 1 Nephi 13:1–9; 14:9–10).

Isulat sa pisara ang: Ang Babaye = Babelonia, o ang kadautan sa kalibutan

Dapita ang mga estudyante sa pagbasa og hilum sa Pinadayag 17:14, nga mangita kon kinsa ang ikaaway sa Babelonia. Hangyoa ang mga estudyante sa pagreport sa ilang nakit-an.

• Unsa ang mahimong sangputanan niini nga gubat? (Human makatubag ang mga estudyante, isulat sa pisara ang mosunod nga kamatuoran: Sa katapusang mga adlaw, buntugon ni Jesukristo ang kadautan sa kalibutan.)

• Sa unsang paagi ang pagkahibalo niini nga kamatuoran makatabang nimo isip usa ka sumusunod ni Jesukristo?

I-summarize ang Pinadayag 18:1–3 pinaagi sa pagpasabut nga lain na usab nga anghel ang mipahibalo sa pagkahugno sa dautang Babelonia.

Dapita ang usa ka estudyante sa pagbasa og kusog sa Pinadayag 18:4. Hangyoa ang klase sa pagsunod, nga mangita kon unsay gipabuhat sa Ginoo sa Iyang mga tawo.

• Unsa ang gisugo sa Ginoo nga buhaton sa Iyang mga tawo?

• Unsang mga rason ang gihatag sa Ginoo sa Iyang mga tawo aron mogawas sa Babelonia? (Sa paglikay sa mga sala sa kalibutan ug sa mga hampak o mga paghukom nga mahiaguman sa mga dautan.)

• Unsa nga kamatuoran ang atong mahibaloan gikan sa instruksyon sa Ginoo ngadto sa Iyang mga katawhan aron mopalayo sila gikan sa kadautan sa kalibutan? (Bisan og ang mga estudyante mogamit og lain-laing mga pulong, siguroa nga ilang mahibaloan ang usa ka kamatuoran sama sa mosunod: Ang pagpalayo sa atong kaugalingon gikan sa kadautan sa kalibutan makatabang nato nga malikay sa sala ug sa mga paghukom nga moabut sa mga dautan sa katapusang mga adlaw. Mahimo nimong isugyot nga markahan sa mga estudyante ang mga pulong sa bersikulo 4 nga nagtudlo niini nga kamatuoran.)

Tutukan o i-focus ang makakabig nga mga baruganan

Kon magdeterminar unsay itudlo diha sa usa ka scripture block, tutuki ang mga kamatuoran nga makatabang sa mga estudyante nga mas maduol sa Langitnong Amahan ug sa Manluluwas. Si Presidente Henry B. Eyring sa Unang Kapangulohan mitambag: “Kon mag-andam mo og leksyon, pangitaa diha ang makapakabig nga mga baruganan. … Ang makapakabig nga baruganan mao kanang moresulta ngadto sa pagkamasulundon sa kabubut-on sa Dios” (“Converting Principles” [evening with Elder L. Tom Perry, Feb. 2, 1996], 1, si.lds.org).

Bahina ang mga estudyante sa grupo nga magtinagurha hangtud tinagup-at. Ihatag ang mosunod nga mga pangutana ngadto sa matag grupo isip usa ka handout, ug sugoa ang mga estudyante nga hisgutan ang mga pangutana diha sa ilang grupo:

Pagpalayo sa Atong mga Kaugalingon gikan sa Espirituhanong Babelonia

Manwal sa Seminary Teacher sa Bag-ong Tugon—Leksyon 158

• Sa unsang paagi ang gipahiuli nga ebanghelyo ni Jesukristo makatabang nato nga mapalayo ang atong mga kaugalingon gikan sa kadautan sa kalibutan?

• Unsay atong mahimo aron mapalayo ang atong mga kaugalingon gikan sa kadautan sa kalibutan samtang padayon kitang magpakabuhi nga anaa ang, paghigugma, ug pagpakig-uban sa mga tawo nga lahi kanato og mga sumbanan?

• Sa unsang paagi ang pagpalayo gikan sa dili maayong mga impluwensya ug binuhatan makatabang ninyo o sa uban nga inyong nailhan nga makalikay sa pipila ka mga tintasyon ug mga sala sa kalibutan?

© 2015 pinaagi sa Intellectual Reserve, Inc. Tanang mga katungod gigahin.

Human sa igong panahon, dapita ang pipila ka mga estudyante nga ipakigbahin diha sa klase unsay nahisgutan sa ilang grupo. Dapita ang mga estudyante nga isulat sa usa ka pirasong papel (1) ang dili maayong mga impluwensya o binuhatan nga angay nilang palay-an ug (2) unsaon nila kini sa paghimo. Dapita sila nga ibutang ang papel diin maka-refer sili niini sa kanunay, ug awhaga sila nga lihukon kon unsay ilang gisulat.

I-summarize ang Pinadayag 18:5–24 pinaagi sa pagpasabut nga nakita ni Juan ang pagkahugno sa dautang Babelonia ug ang kasubo sa mga tigsuporta niini.

Pinadayag 19

Nakita ni Juan ang pag-anhi ni Jesukristo uban sa gahum aron sa pagbuntog niadtong makigbatok Kaniya

Ipakita sa mga estudyante ang litrato sa usa ka pangasaw-unon ug pamanhunon. Pangutan-a ang mga estudyante kon unsa kaha ang pinakanindot nga gasa nga ilang ikahatag sa umaabut nilang kapikas sa adlaw sa ilang kasal. Human makatubag ang mga estudyante, basaha ang mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:

“Sa adlaw sa inyong kasal ang pinakanindot nga gasa nga imong ikahatag sa mahangturon nimong kompanyon mao ang imo gayud nga kaugalingon—limpyo ug putli ug takus usab niana nga kaputli” (“Personal Purity,” Ensign, Nob. 1998, 77).

• Ngano kaha nga ang pagkalimpyo ug pagkaputli mao man ang pinakanindot nga gasa nga inyong ikahatag sa inyong kapikas sa adlaw sa inyong kasal?

Ipasabut nga ang Pinadayag 19 nagrekord sa pasumbingay nga gigamit mahitungod sa Ikaduhang Pag-anhi sa Manluluwas. I-summarize ang Pinadayag 19:1–6 pinaagi sa pagpasabut nga nakita ni Juan ang mga matarung nga modayeg sa Dios tungod sa Iyang mga paghukom batok sa dautan.

Dapita ang usa ka estudyante sa pagbasa og kusog sa Pinadayag 19:7. Hangyoa ang klase sa pagsunod, nga mangita kon kang kinsa nga kasal ang gipahibalo sa anghel ngadto ni Juan.

• Kang kinsa nga kasal ang gipahibalo sa anghel ngadto ni Juan?

• Unsay nakat-unan ni Juan mahitungod sa asawa sa Kordero?

Ipasabut nga ang “kasal sa Kordero” (Pinadayag 19:7) nagpasabut sa Ikaduhang Pag-anhi sa Manluluwas. Dapita ang usa ka estudyante sa pagbasa og kusog sa mosunod nga pamahayag ni Elder Bruce R. McConkie sa Korum sa Napulog Duha ka mga Apostoles. Hangyoa ang klase sa pagpaminaw kon si kinsa ang pangasaw-unon sa Kordero.

“Niini nga dispensasyon ang Pamanhunon, nga mao ang Kordero sa Dios, moabut sa pagpangangkon sa iyang pangasaw-unon, nga mao ang Simbahan nga gilangkuban sa matinud-anong mga santos kinsa nanaghulat sa iyang pagbalik” (Mormon Doctrine, 2nd ed. [1966], 469).

• Sa unsang mga paagi ang relasyon sa kaminyoon usa ka haum nga simbolo sa atong gipakigsaad nga relasyon uban ni Jesukristo? (Mahimo nimong ipasabut nga ang kaminyoon usa ka relasyon nga nagkinahanglan og kamatinud-anon, sakripisyo, gugma, pasalig o komitment, ug pagsalig.)

Dapita ang usa ka estudyante sa pagbasa og kusog sa Pinadayag 19:8–9. Hangyoa ang klase sa pagsunod, nga mangita kon unsay mahimo sa mga Santos aron maandam sila sa Ikaduhang Pag-anhi sa Manluluwas. Mahimo nimong ipasabut nga ang puti nga panapton mahimong magsimbolo sa kabalaan, kalimpyo, ug pagkamatarung.

• Sigun sa gisimbolo sa gisul-ob sa asawa sa Kordero, unsay angay natong buhaton aron maandam kita alang sa pag-anhi sa Ginoo nga si Jesukristo? (Human makatubag ang mga estudyante, isulat sa pisara ang mosunod nga baruganan: Kon limpyo kita og matarung, niana maandam kita alang sa pag-anhi sa Ginoo nga si Jesukristo.)

Ipasabut nga ang pulong nga gitugot diha sa bersikulo 8 nagpasabut nga gihatag o gitugyan. Ang malimpyuhan sa sala ug pagkahimong matarung usa ka gasa gikan sa Dios.

• Unsa man ang gihimo sa Dios nga paagi aron kita malimpyuhan sa sala ug mahimong matarung?

• Ngano kaha nga ang pagkahimong limpyo ug pagkamatarung usa man sa pinakamaayong mga gasa nga atong ikahatag sa Manluluwas kon Siya moanhi pag-usab?

Dapita ang mga estudyante sa pagbasa og hilum sa Pinadayag 19:10, nga mangita unsay reaksyon ni Juan human madungog ang gipamahayag sa anghel kaniya. Hangyoa ang mga estudyante sa pagreport sa ilang nakit-an.

• Unsa ang gisulti sa anghel ngadto ni Juan nga iyang gihuptan (sa anghel) ug sa ubang mga sulugoon sa Dios? (Ang pagpamatuod kang Jesus, nga mao ang espiritu sa panagna.)

Ipasabut nga ang “espiritu sa panagna o propesiya” (bersikulo 10) nagpasabut sa gasa sa pagpadayag ug inspirasyon gikan sa Dios, nga nagtugot sa tawo nga makadawat ug makapamulong sa Iyang pulong (tan-awa sa Giya ngadto sa mga Kasulatan, “Pagpanagna, Panagna,” scriptures.lds.org).

• Unsaon kaha sa usa ka tawo nga nagbaton og pagpamatuod kang Jesus nga maandam alang sa Ikaduhang Pag-anhi?

Dapita ang pipila ka mga estudyante nga magpuli-puli sa pagbasa og kusog gikan sa Pinadayag 19:11–16, lakip ang Hubad ni Joseph Smith sa Pinadayag 19:15. Hangyoa ang klase sa pagsunod, nga mangita sa mga pulong nga naghulagway sa Manluluwas sa Iyang Ikaduhang Pag-anhi. Hangyoa ang mga estudyante sa pagreport sa ilang nakit-an.

Ipasabut nga ang maputi nga kabayo nga gihisgutan diha sa bersikulo 11 nagsimbolo sa pagbuntog ug sa kadaugan. Moanhi ang Manluluwas aron sa pagbuntog sa sala ug sa kadautan.

• Sumala sa bersikulo 13, giunsa sa paghulagway ang bisti o saput sa Manluluwas? (Ipasabut nga ang mga pulong nga “bisti nga gikatuslob sa dugo” nagpasabut nga ang Iyang saput sama og kolor sa dugo. Kini nga kolor nagsimbolo sa kalaglagan sa mga dautan sa Iyang pag-anhi [tan-awa sa D&P 133:46–51] ug mapahinumduman usab kita sa pag-antus nga iyang nasinati atol sa Iyang Pag-ula.)

Ipasabut nga ang Hubad ni Joseph Smith sa, Pinadayag 19:15 nagklaro nga si Juan nakakita nga inig anhi sa Manluluwas isip Hari sa mga Hari ug Ginoo sa mga Ginoo, Siya ang modumala sa tanang nasud uban sa pulong sa Dios. I-summarize ang Pinadayag 19:17–21 pinaagi sa pagpasabut nga nakita ni Juan ang kalaglagan niadtong makig-away batok sa Kordero sa Dios (tan-awa sa Joseph Smith Translation, Pinadayag 19:18).

Tapusa pinaagi sa paghangyo sa mga estudyante unsay ilang mahimo aron maandam ang ilang mga kaugalingon alang sa pag-anhi ni Jesukristo. Awhaga sila nga lihukon ang bisan unsang pag-aghat nga ilang madawat.

Komentaryo ug Background nga Impormasyon

Pinadayag 17:5. “Ang bantugan nga Babelonia”

Ang panan-awon ni Juan sa Babelonia tupong kaayo sa panan-awon ni Nephi bahin sa dako ug salawayon nga simbahan, o ang simbahan sa yawa (tan-awa sa 1 Nephi 13–14). Si Elder Bruce R. McConkie (1915–85) sa Korum sa Napulog Duha ka mga Apostoles mitudlo:

“Ang bantugan nga Babelonia mao ang simbahan sa yawa; ang kalibutan kana diin anaa ang tanang kadautan ug pagkakalibutanon; ang matag organisasyon niini ug tanang matang, kinaiyahan ug porma—sa relihiyon man, sibik, politikal, mga pundok, o di gani—miuyon sa pilosopiya o nagpasiugda og kawsa nga modala sa katawhan palayo sa kaluwasan ug padulong sa mga gingharian nga mas minus ang himaya ngadto sa walay katapusang kalibutan” (Doctrinal New Testament Commentary, 3 vols. [1966–73], 3:558).

Pinadayag 18:4. “Gumuwa kamo sa [Babelonia], … dili moapil sa iyang kasal-anan”

Si Elder Richard G. Scott sa Korum sa Napulog Duha ka mga Apostoles mitudlo unsa ang mahimo sa mga miyembro sa Simbahan aron sa pagpakabuhi sa kalibutan nga dili madihugan sa mga kadautan niini:

“Kadaghanan dinhi sa kalibutan gidaog sa nagtubo nga kadautan sa kinaiya, uban sa pagbiya sa hiyas, pagkamatarung, personal nga kaligdong, tradisyonal nga kaminyoon, ug kinabuhi nga may pamilya. …

“… Bisan pa man sa kahigayunan sa kadautan, ang kalibutan sa kinatibuk-an halangdon ug maanindot, puno sa daghang maayo ug matinud-anon nga mga tawo. Ang Dios mihatag og paagi sa pagpuyo niini nga kalibutan ug dili matakdan sa makauulaw nga mga pamugos sa mga dautan nga gisabwag niini. Mahimo kamong magpuyo og mahiyason, mabungahon, matarung nga kinabuhi pinaagi sa pagsunod sa plano sa panalipud nga gimugna sa inyong Amahan sa Langit; ang Iyang plano sa kalipay” (“Unsaon Pagpuyo sa Minaayo taliwala sa Nagkagrabe nga Pagkadautan,” Ensign o Liahona, Mayo 2004, 100).

Pinadayag 18:4. “Aron dili kamo makaambit sa iyang mga hampak [kasakit]”

Si Propeta Joseph Smith mitudlo nga ang mga matarung dili makalikay sa mga pagsulay ug pag-antus inubanan sa mga paghukom nga moabut ngadto sa mga dautan:

“Usa ka sayop nga ideya ang pag-ingon nga ang mga Santos makalikay sa mga paghukom, sama ra nga ang mga dautan mag-antus, kay ang tanang tawo ubos sa pag-antus, ug ‘ang mga matarung maglisud sa paglikay;’ … daghan sa mga matarung mahimong biktima sa sakit, sa mga kagaw, ug uban pa., tungod sa kahuyang sa unod, ug sa gihapon maluwas didto sa Gingharian sa Dios” (sa History of the Church, 4:11).

Pinadayag 19:9. “Ang panihapon sa kasal sa Kordero”

Ang “panihapon sa kasal sa Kordero” (Pinadayag 19:9) usa ka simbolo sa Ikaduhang Pag-anhi ni Jesukristo. Si Propeta Joseph Smith mitudlo:

“Kadtong kinsa nagsunod sa mga sugo sa Ginoo ug maglakaw sa Iyang pamalaod hangtud sa katapusan, mao lamang ang mga tawo nga pagatugutan sa paglingkod dinha niining mahimayaon nga salo-salo. …

“Pamalandunga og makadiyot, mga kaigsoonan, ug pagpakisayud, kon gihunahuna ba ninyo sa inyong mga kaugalingon nga takus [sa] usa ka lingkuranan diha sa salo-salo sa kasal” (Mga Pagtulun-an sa mga Presidente sa Simbahan: Joseph Smith [2007], 196).

Pinadayag 19:13. “Nagasul-ob ug bisti nga gikatuslob sa dugo”

Si Elder Neal A. Maxwell sa Korum sa Napulog Duha ka mga Apostoles mitudlo sa mosunod mahitungod sa pula nga saput sa Manluluwas sa Iyang Ikaduha nga Pag-anhi:

“Midugo ang matag lungag sa panit, pagkapula kaha sa Iyang saput didto sa Getsemani, pagkapula niana nga kupo!

“Dili ikatingala, kon inig abut nii Kristo uban sa gahum ug himaya, moanhi Siya sa makapahinumdom niyang pula nga saput (tan-awa sa D&P 133:48), nagpasabut dili lang sa pugaanan sa bino sa kasuko, apan usab sa pagdala diha sa atong panumduman sa labihan Niyang pag-antus para sa matag usa kanato sa Getsemani ug ngadto sa Kalbaryo!” (“Overcome … Even As I Also Overcame,” Ensign, Mayo 1987, 72).

Dugang nga mga Ideya sa Pagtudlo

Pinadayag 17:14. “Ang Kordero mobuntog”

Human sa pag-ila sa kamatuoran nga sa katapusang mga adlaw, si Jesukristo mobuntog sa kadautan sa kalibutan, dapita ang usa ka estudyante sa pagbasa og kusog sa 1 Nephi 14:13–14. Hangyoa ang klase sa pagsunod, nga mangita kon unsay nakita ni Nephi nga isangkap sa mga Santos sa Simbahan sa katapusang mga adlaw. Dapita ang mga estudyante sa pagreport sa unsay ilang nakit-an.

• Unsa kaha ang buot ipasabut sa “gisangkapan sa katarung ug uban sa gahum sa Dios ? (1 Nephi 14:14).

• Sa unsa kaha nga paagi makatabang ang “[pagsangkap] sa katarung ug uban sa gahum sa Dios” (1 Nephi 14:14) sa atong pagpakigbatok sa sala ug sa dautan?

Pinadayag 19:8. “[Gibistihan] og lino nga manipis, masidlak, ug maputli”

Human sa pagbasa sa Pinadayag 19:8–9, hangyoa ang estudyante sa pagkumpara kon sa unsang paagi ang mga Santos nagbisti o nagsinina sigun sa narekord sa Pinadayag 19:8 ngadto sa unsang paagi ang babaye nagbisti o nagsinina sigun sa narekord sa Pinadayag 17:4.

• Unsay kalainan sa sinina sa mga Santos kay sa niana nga babaye?

• Unsa kaha ang girepresentahan niini nga panagkalahi sa sinina?