Leksyon 49: Lucas 8–9

Leksyon 49

Lucas 8–9

Pasiuna

Ang Manluluwas nagpadayon sa pagpangalagad sa Galilea, diin Siya nanagna sa Iyang kamatayon ug Pagkabanhaw. Pagbiya sa Galilea, si Jesus mibiyahe padulong sa Jerusalem aron sa pagkompleto sa Iyang mortal nga misyon. Sa Samaria, si Santiago ug Juan nagtinguha sa pagtawag og kalayo gikan sa langit aron sunugon ang usa ka balangay nga Samarianhon nga misalikway ni Jesus, apan Siya mitudlo sa Iyang mga disipulo nga Siya mianhi sa pagluwas sa mga katawhan, dili sa paglaglag kanila. Si Jesus nagtudlo usab mahitungod sa tinuod nga pagkadisipulo.

Mga Sugyot alang sa Pagtudlo

Lucas 8:1–9:56

Ang Manluluwas nagbuhat og mga milagro, nagtudlo gamit ang mga sambingay, ug nagbiyahe padulong sa Jerusalem

Isulat ang mosunod nga mga sitwasyon sa pisara, o isulat ang matag usa niini sa laing piraso nga papel. Dapita ang tulo ka mga estudyante sa pagbasa niini og kusog.

Sa dihang gitarung ninyo paghangyo ang inyong igsoon nga tabangan mo sa paglimpyo sa kayamukat, ngil-ad kaayo siyang miingon nga kamo lang buhat ana.
Samtang nagplano og kalihokan sa eskwelahan, ang pipila ka mga klasmeyt nanaway ug nangatawa sa inyong ideya.
Samtang gipakigbahin ninyo ang ebanghelyo sa usa ka higala, miingon siya nimo nga salikwaut ang inyong mga tinuohan.

Unsay inyong bation sa matag usa niini nga mga sitwasyon? Unsay mahimo ninyong reaksyon?

Dapita ang mga estudyante sa pagpangita og mga kamatuoran samtang nagtuon sila sa mga pagtulun-an sa Manluluwas diha sa Lucas 8–9 nga makagiya kanila kon sila masilo sa mga binuhatan ug mga pulong sa uban.

Dapita ang usa ka estudyante sa pagbasa og kusog sa mga summary sa mga kapitulo Lucas 8–9. Hangyoa ang klase sa pagsunod, nga mangita sa mga panghitabo nga narekord niini nga mga kapitulo. Ipasabut nga tungod kay sila detalyadong nagtuon niini nga mga panghitabo sa mga leksyon sa Mateo ug Marcos, kini nga leksyon magtutok sa Lucas 9:51–62.

Dapita ang usa ka estudyante sa pagbasa og kusog sa Lucas 9:51, ug hangyoa ang klase sa pagpangita sa dapit diin ang Manluluwas nakahukom nga moadto. Ipasabut nga ang pulong “pagabayawon” nagpasabut sa nagkaduol nga Pagkayab sa Manluluwas ngadto sa langit.

Asa nakahukom ang Manluluwas nga moadto?

Ipasabut nga ang pagbuhat og butang sa malig-on gayud nagpasabut sa pagbuhat niini sa paagi nga determinado o walay pagduha-duha. Sa sayo nga bahin, ang Manluluwas mipanagna ngadto sa Iyang mga disipulo nga Siya pagabudhian, latiguhon, ug ilansang sa krus didto sa Jerusalem (tan-awa sa Mateo 20:17–19; Lucas 9:44).

Unsa ang gipadayag kabahin sa kinaiya sa Manluluwas sa Iyang determinasyon nga moadto sa Jerusalem bisan pa niini nga mga hagit?

Ipasabut nga samtang nagbiyahe paingon sa Jerusalem, si Jesus ug ang Iyang mga disipulo miagi og usa ka Samarianhon nga balangay. Dapita ang pipila ka mga estudyante sa pagpuli-puli sa pagbasa og kusog gikan sa Lucas 9:52–54, ug hangyoa ang klase sa pagpangita sa reaksyon sa mga Samarianhon sa dihang ilang nasayran nga si Jesus ug ang Iyang mga disipulo gusto nga mosulod sa ilang balangay.

Unsa ang reaksyon sa mga Samarianhon dihang ilang nasayran nga si Jesus ug ang Iyang mga disipulo gusto nga mosulod sa ilang balangay?
Unsa ang reaksyon ni Santiago ug Juan sa pagkadili maabiabihon sa mga Samarianhon ug sa ilang pagsalikway sa Manluluwas?
Sa unsang mga paagi ang mga tawo karon sobra ra ang reaksyon ngadto sa mga insulto ug ubang mga kalapasan gikan sa uban? (Baliki ang mga sitwasyon gikan sa sinugdanan sa leksyon, ug hangyoa ang mga estudyante sa pagpamalandong sa mga paagi diin ang usa ka tawo tingali sobra ra ang reaksyon niini nga mga sitwasyon.)

Dapita ang usa ka estudyante sa pagbasa og kusog sa Lucas 9:55–56. Hangyoa ang klase sa pagsunod, nga mangita kon unsay tubag ni Jesus ngadto nila ni Santiago ug Juan. Dapita ang mga estudyante nga moreport sa unsay ilang nakat-unan.

Ipasabut nga sa dihang ang Manluluwas miingon, “Wala kamo masayud unsang espirituha ang inyong gipakig-ambitan” (bersikulo 55), Iyang gipasabut nga ang hangyo ni Santiago ug Juan wala mahiangay sa Espiritu sa Dios apan mas nahiangay sa espiritu ni Satanas, kinsa nagkutaw og kasuko sa mga kasingkasing sa mga tawo (tan-awa sa 3 Nephi 11:29–30).

Sa unsang paagi ang reaksyon sa Manluluwas ngadto sa pagsalikway sa mga Samarianhon lahi sa reaksyon ni Santiago ug Juan?
Unsa nga kamatuoran ang atong makat-unan gikan sa ehemplo sa Manluluwas nga makagiya kanato kon mag-atubang kita og mga kalapasan? (Gamit ang mga pulong sa mga estudyante, isulat sa pisara ang usa ka kamatuoran nga susama sa mosunod: Nagsunod kita sa ehemplo sa Manluluwas kon kita mopili sa pagtubag sa mga kalapasan uban sa kamapailubon ug kamainantuson.)

Dapita ang mga estudyante sa paghinumdom sa mga sitwasyon gikan sa sinugdanan sa leksyon.

Unsa man ang potensyal nga peligro sa pagpili nga masilo sa matag usa niini nga mga sitwasyon?
Sa matag sitwasyon, sa unsang paagi kita makasunod sa ehemplo sa Manluluwas?
Sa unsang paagi kita mapanalanginan kon kita mopili sa pagtubag sa mga kalapasan uban sa kamapailubon ug kamainantuson?

Hangyoa ang mga estudyante sa pagpamalandong sa usa ka higayon sa dihang mipili sila nga masilo sa mga pulong o mga buhat sa usa ka tawo. Awhaga sila sa pagsunod sa ehemplo sa Manluluwas pinaagi sa pagpili sa pagtubag sa mga kalapasan uban sa kamapailubon ug kamainantuson.

Lucas 9:57–62

Si Jesus nagtudlo mahitungod sa tinuod nga pagkadisipulo

Dapita ang usa ka estudyante sa pag-adto sa atubangan sa klase, ug ipresentar kaniya ang 20 ngadto sa 30 ka gagmay nga mga butang (sama sa beads). Sugoa ang estudyante nga iphon sa hilum ang mga butang. Samtang siya nagbuhat niini, hangyoa ang klase sa pagsuta kon mapahunong ba nila ang pag-ihap pinaagi sa pagbalda sa estudyante. Siguroa nga ang mga estudyante dili mahimong gubot sa ilang mga pagsulay sa pagbalda sa estudyante. Sultihi sila nga magpabilin nga naglingkod, ug pahimangnoi sila nga dili manglabay og bisan unsa o mohikap sa estudyante nga nag-ihap.

Sa unsang mga paagi nga ang pag-ihap sa mga butang samtang gibalda susama sa pagpaningkamot sa pagsunod ni Jesukristo?

Pasalamati ang estudyante nga miihap sa mga butang, ug dapita siya sa paglingkod. Samtang nagpadayon ang mga estudyante sa pagtuon sa Lucas 9, dapita sila sa pagkonsiderar unsaon nato sa pagbuntog sa mga impluwensya nga mahimong makabalda o makapugong kanato sa pagsunod sa Manluluwas.

Dapita ang usa ka estudyante sa pagbasa og kusog sa Lucas 9:57. Hangyoa ang klase sa pagsunod, nga mangita kon unsa ang gisulti sa usa ka tawo ngadto ni Jesus samtang Siya ug ang Iyang mga disipulo mibiyahe padulong sa Jerusalem.

Unsa ang gisulti niining tawhana ngadto sa Manluluwas nga andam niyang buhaton?

Isulat ang mosunod nga mga pulong diha sa pisara: Aron mahimong tinuod nga disipulo ni Jesukristo, …

Dapita ang usa ka estudyante sa pagbasa og kusog sa Lucas 9:58, ug hangyoa ang klase sa pagpangita sa tubag sa Manluluwas ngadto sa tawo kinsa nagtinguha nga mosunod Kaniya. Dapita ang mga estudyante nga moreport sa unsay ilang nakat-unan.

Unsa ang gipasabut sa mga pulong “Ang Anak sa Tawo walay dapit nga kapahulayan sa iyang ulo” kabahin sa estilo sa kinabuhi sa Manluluwas? (Si Jesus ug ang Iyang mga disipulo kanunay nga nanglakaw. Ang ilang pagpangalagad dili komportable ni sayon.)

Dapita ang mga estudyante sa pagbasa sa hilum nga paagi sa Lucas 9:59–60, nga mangita sa tubag sa ikaduhang tawo sa pagdapit sa Manluluwas sa pagsunod Kaniya .

Unsay gustong buhaton niining tawhana una pa mosunod sa Manluluwas?
Unsa kaha ang gipasabut sa pulong nga una (bersikulo 59) mahitungod niining tawhana?

Ipasabut nga si Jesukristo wala magpasabut nga sayop ang pagbangutan sa kamatayon sa usa ka minahal o sa paghatag sa atong pagtahud sa usa ka haya (tan-awa sa D&P 42: 45). Hinoon, Siya nagtudlo niini nga tawo og importanteng leksyon kabahin sa pagkadisipulo.

Unsay atong makat-unan gikan sa tubag sa Manluluwas nga narekord diha sa bersikulo 60 mahitungod sa mga prayoridad sa usa ka tinuod nga disipulo?

Dapita ang usa ka estudyante sa pagbasa og kusog sa Lucas 9:61–62. Hangyoa ang klase sa pagsunod, nga mangita kon unsay gustong buhaton sa ikatulong tawo sa dili pa siya mosunod sa Manluluwas.

Unsay gustong buhaton niining tawhana una pa mosunod sa Manluluwas?
Giunsa man pagtubag sa Manluluwas kining tawhana?

Aron sa pagtabang sa mga estudyante nga makasabut sa sambingay sa pagkupot sa daro ug sa dili na paglingi pa, ipabasa og kusog sa usa ka estudyante ang mosunod nga pamahayag ni Presidente Howard W. Hunter:

“Aron mokalot og tul-id nga tudling sa umahan, ang magdadaro kinahanglan nga mopunting kanunay sa iyang mga mata sa usa ka permanente nga paingnan sa unahan niya. Kana makapabilin kaniya nga maanaa sa husto nga dalan. Kon, hinoon, mahitabo man nga molingi siya sa luyo sa pagtan-aw sa iyang giagian, ang kalagmitan sa iyang pagkasaag mas dako. Hiwi ang mahimong resulta ug dili pareho ang distansya sa tudling sa umahan. … Kon ang atong mga paningkamot nakasentro dili sa nangagi na apan sa unahan kanato—ngadto sa kinabuhing dayon ug sa hingpit nga kalipay sa kaluwasan—sigurado nga kita makaangkon niini” (“Am I a ‘Living’ Member?” Ensign, Mayo 1987, 17).

Sa unsang paagi nga ang pagkadisipulo ni Jesukristo sama sa paggunit sa daro ug sa dili na paglingi sa nangagi?
Sa unsang paagi nga ang Manluluwas usa ka ehemplo sa unsay Iyang gitudlo nga narekord diha sa bersikulo 62? (“Iyang gituyo sa malig-on gayud nga siya moadto sa Jerusalem” [Lucas 9:51] aron sa pagkompleto sa misyon nga gisangon sa Langitnong Amahan Kaniya, ug Siya wala molingi.)

I-refer ngadto sa dili kompleto nga pamahayag diha sa pisara.

Basi sa unsay atong nakat-unan gikan sa Lucas 9:57–62, unsaon ninyo sa pag-summarize sa kamatuoran nga gitudlo sa Manluluwas mahitungod sa unsay Iyang gikinahanglan sa Iyang mga disipulo? (Ang mga estudyante mahimong mosulti og lain-laing mga baruganan. Human sila motubag, kompletuha ang pamahayag sa pisara aron mapasabut niini ang mosunod nga kamatuoran: Aron mahimong tinuod nga disipulo ni Jesukristo, kita kinahanglang dili motugot sa bisan unsang butang nga mas molabaw pa og prayoridad kay sa pagsunod Kaniya.)
Nganong unahon man nato usahay ang ubang mga prayoridad kay sa atong mga responsibilidad isip mga disipulo ni Jesukristo?

Dapita ang usa ka estudyante sa pagbasa og kusog sa mosunod nga pamahayag ni Elder Richard G. Scott sa Korum sa Napulog Duha ka mga Apostoles:

“Si Satanas adunay gamhanan nga himan nga gamiton batok sa buotan nga mga tawo. Kini ang pagbalda. Gusto niya nga ang buotan nga mga tawo mapuno sa ‘maayong mga butang’ aron wala nay dapit alang sa mahinungdanon nga mga butang” (“First Things First,” Ensign, Mayo 2001, 7).

Aron sa pagtabang sa mga estudyante sa pagkonsiderar kon unsay makapugong kanila sa hingpit nga pagsunod ni Jesukristo, drowinga ang mosunod nga tsart sa pisara ug hangyoa ang mga estudyante sa pagkopya niini ngadto sa ilang mga notebook sa klase o scripture study journal.

Mga responsibilidad sa usa ka disipulo ni Jesukristo	Ubang mga prayoridad

Ipares-pares ang mga estudyante. Hangyoa sila sa pagtrabaho uban sa ilang mga pares sa paglista diha sa tsart sa mga responsibilidad sa usa ka tinuod nga disipulo ni Jesukristo (nga tingali maglakip sa pagkamatinuoron, pagserbisyo sa uban, pagpakigbahin sa ebanghelyo, pagbuhat sa family history ug buhat sa templo, ug pag-amuma og pamilya). Alang sa matag responsibilidad nga gilista diha sa ilang mga tsart, hangyoa ang mga estudyante sa paglista og mga ehemplo sa ubang prayoridad nga tingali unahon sa usa ka tawo kay sa niana nga responsibilidad.

Dapita ang pipila ka mga estudyante sa pagreport sa unsay ilang gilista.

Awhaga ang mga estudyante sa pagpakigbahin og positibo nga mga ehemplo sa mga disipulo ni Jesukristo pinaagi sa pagpangutana:

Kanus-a kamo nakakita og usa ka tawo nga mipili sa paghiklin sa ubang mga tumong o prayoridad aron sa pagsunod sa Manluluwas?

Hangyoa ang mga estudyante sa pagpamalandong kon unsa ang tingali ilang gitugutan nga molabaw og prayoridad kay sa pagsunod kang Jesukristo ug sa Iyang mga pagtulun-an. Dapita sila sa pagsulat og tumong sa ilang scripture study journal sa unsay ilang buhaton aron hatagan og mas taas nga prayoridad ang Manluluwas ug ang Iyang ebanghelyo.

Mahimo nimong tapuson ang leksyon pinaagi sa pagdapit sa mga estudyante sa pagkanta sa himno nga “Lord, I Would Follow Thee” (Hymns, nu. 220) o lain nga himno kabahin sa pagsunod ni Jesukristo ug sa Iyang mga pagtulun-an.

Komentaryo ug Background nga Impormasyon

Lucas 8:1–3. Ang matinud-anong mga babaye nga mitabang ug nangalagad ngadto sa Manluluwas

Girekord ni Lucas nga samtang ang Manluluwas mibiyahe uban sa Iyang mga Apostoles sa tibuok Galilea, nagtudlo sa “mga kalungsuran ug kabalangayan” sa rehiyon (Lucas 8:1), daghan nga mga babaye ang mipanaw usab uban Kaniya. Ang pipila niini nga mga babaye naayo sa nagkalain-lain nga mga sakit; ang uban tingali mga asawa sa mga Apostoles. Pipila niining sama nga mga babaye nagpadayon sa pagsunod ni Jesus hangtud sa panahon sa Iyang kamatayon ug Pagkabanhaw (tan-awa sa Lucas 23:27, 49; 24:10; Juan 20:11–18).

Ang istorya ni Lucas sa mga babaye kinsa mibiyahe uban ni Jesus mipatataw sa kabalaka sa Manluluwas alang sa tanang katawhan, lakip sa mga babaye—kinsa kasagaran gibale-wala sa katilingban sa Judeo sa unang siglo. Gamit ang ilang mga kapanguhaan, kini nga mga babaye misuporta ni Jesus ug sa Iyang pinili nga mga sulugoon.

Si Presidente Howard W. Hunter nanghimatuod sa panghunahuna sa Manluluwas alang sa tanang mga babaye ug mihangyo sa mga babaye sa Simbahan sa atong panahon nga makighiusa sa mga Kaigsoonan sa pagpadayon sa buhat sa Ginoo:

“Makahupay gayud kaninyo minahal nga mga sister sa iyang Simbahan sa paghinumdom nga kining maong Jesus, atong Manluluwas pinaagi sa Pag-ula, mipakita sa iyang gugma ug pagpakabana alang sa kababayen-an sa iyang panahon. Siya nalingaw sa pakig-uban sa kababayen-an ug adunay suod nga mga higala taliwala kanila. …

“Aduna bay bisan unsang rason aron maghunahuna nga wala kaayo siya magpakabana sa kababayen-an karon? …

“Sama nga ang atong Ginoo ug Manluluwas nagkinahanglan sa kababayen-an sa iyang panahon alang sa makapahupay nga kamot, mapaminawon nga dunggan, matuohon nga kasingkasing, mabination nga pagtan-aw, makadasig nga pulong, pagkamaunungon—bisan sa iyang oras sa pagpakaulaw, pag-antus ug kamatayon—kami usab, iyang mga sulugoon sa tibuok Simbahan, nagkinahanglan ninyo, mga babaye sa Simbahan, sa pagbarug uban kanamo ug alang kanato sa pagsanta sa bul-og sa dautan nga naghulga sa pagtabon kanato. Kinahanglang maghiusa kita nga mobarug nga matinud-anon ug malig-on sa pagtuo batok sa mas labaw nga gidaghanon sa katawhan nga lahi og mga opinyon. Maingon og alang kanako adunay dakong panginahanglan sa paghiusa sa mga babaye sa Simbahan sa pagbarug kauban sa mga Kaigsoonan aron sa pagsanta sa bul-og sa dautan nga nagpalibut kanato ug sa pagpauswag sa buhat sa atong Manluluwas” (“To the Women of the Church,” Ensign, Nov. 1992, 95–96).

Lucas 9:54. Kalayo gikan sa langit aron sa pag-ut-ot sa mga Samarianhon

Si Elder Bruce R. McConkie sa Korum sa Napulog Duha ka mga Apostoles mipasabut sa posible nga mga rason ni Santiago ug Juan sa pagpangayo sa gahum sa pagtawag og kalayo gikan sa langit aron sa pag-ut-ot sa mga Samarianhon:

“[Si Santiago ug Juan] nasayud nga ang Dios sa Israel—ang sama nga Jesus kansang presensya anaa sila nagbarug—nagpadala og kalayo gikan sa langit pinaagi sa pulong ni Elias aron sa pagbuntog sa mga kaaway niana nga karaang propeta. (2 Mga Hari 1.) Nasayud usab sila nga ang mao gihapon nga maloloy-ong Dios molaglag sa dautan pinaagi sa kalayo sa Iyang Ikaduha nga Pag-anhi. (Mal. 4:1.) Ang kinahanglan pa nilang makat-unan mao nga alang sa ilang dispensasyon, ubos sa mga kahimtang nga kaniadto anaa … , ang mensahe sa ebanghelyo magpadayon uban sa gugmang putli, pailub, mapugnganon, ug kamainantuson. …

“… Bisan wala sila makahibalo sa tinubdan niini, si Santiago ug Juan dinhi naimpluwensya sa ilang tanyag pinaagi sa espiritu nga gikan sa ubos imbis nga sa Espiritu nga gikan sa itaas” (Doctrinal New Testament Commentary, 3 vols. [1965–73], 1:440).

Lucas 9:54–56. Pagpili nga motubag sa mga makapasilo uban sa kamapailubon ug kamainantuson

Si Elder David A. Bednar sa Korum sa Napulog Duha ka mga Apostoles mitudlo nga mahimo natong pilion nga dili masilo sa mga pulong ug mga aksyon sa uban:

“Ang pagtuo nga adunay tawo o butang nga makapahimo kanato nga masilo, masuko, masakitan, o maglagot mopaubos sa atong moral nga kabubut-on ug mohimo kanato nga mga butang nga aghaton pa sa paglihok. Isip mga tinugyanan, hinoon, kamo ug ako adunay gahum sa paglihok ug sa pagpili unsaon nato pagtubag sa usa ka makapasilo o sakit nga sitwasyon. …

“Ang Manluluwas mao ang pinakamaayong ehemplo kon unsaon nato pagtubag ang posibleng makapasilo nga mga panghitabo o sitwasyon” (“Ug Walay Makapasilo Kanila,” Ensign o Liahona, Nob. 2006, 90).

Lucas 9:60. “Pasagdi ang mga patay nga maoy magalubong sa ilang kaugalingong mga minatay”

Alang sa panabut sa tubag sa Manluluwas ngadto sa tawo kinsa nagtinguha sa paglubong sa iyang amahan una mosunod ni Kristo, tan-awa ang komentaryo alang sa Lucas 9:59–60 diha sa New Testament Student Manual ([manwal sa Church Educational System, 2014], 158).

Lucas 9:62. Pagsunod sa ehemplo sa Manluluwas ug sa dili paglingi sa likod

Si Presidente Dieter F. Uchtdorf mitudlo nga ang pagkadisipulo nagpasabut og hingpit nga pagsunod sa mga tunob sa Manluluwas:

“Kadtong nagpabunyag ug nakadawat sa gasa sa Espiritu Santo nagsugod na diha sa dalan sa pagkadisipulo ug gisangunan nga mosunod sa makanunayon ug matinud-anon nga paagi sa mga tunob sa Manluluwas” (“Mga Santos Para sa Tanang Panahon,” Ensign o Liahona, Sept. 2013, 5).

Si Elder Edward Dube sa Seventy mitudlo nga si Jesus mihatag kanato og ehemplo kon unsa ang kahulugan sa paggunit sa daro ug dili na molingi sa likod:

“Ang atong Manluluwas, si Jesukristo, nakakita sa sinugdanan ngadto sa katapusan, nahibalo gayud sa dalan nga Iyang agian ngadto sa Getsemani ug Golgota dihang miingon Siya, “Walay tawo nga angayan alang sa gingharian sa Dios kon kini siya sa nagakupot na sa daro, molingi pa sa likod” (Luke 9:62). Sa panan-aw sa Ginoo, dili kaayo importante unsay atong nahimo o naabtan apan kon asa kita andam moadto” (“Tan-aw sa Unahan ug Salig,” Ensign o Liahona, Nob. 2013, 17).