Mga Hebreohanon 7–10

Pasiuna

Mitudlo si Pablo nga si Jesukristo mao ang Tigpataliwala sa “bag-ong pakigsaad” (Mga Hebreohanon 8:8). Mipasabut siya nga ang sakripisyo ni Kristo labaw pa kay sa mga sakripisyo ni Moises ug nga ang mga ordinansa sa balaod ni Moises migiya sa mga tawo ngadto sa Manluluwas ug sa Iyang Pag-ula.

Mga Sugyot alang sa Pagtudlo

Mga Hebreohanon 7–8

Mitudlo si Pablo nga si Jesukristo mao ang Tigpataliwala sa bag-ong pakigsaad

Gamit ang usa ka flashlight, paghimo og anino diha sa pisara sa usa ka gamay nga butang (sama sa mga yawe o gunting). Pangutan-a ang mga estudyante kon makaila ba sila sa butang pinaagi sa pagtan-aw lamang sa anino niini. Ipasabut nga kasagaran makaila ta kon unsa ang usa ka butang pinaagi sa pagtan-aw sa anino niini.

Ipakita ang litrato nga Jesus Nag-ampo sa Getsemani (Libro sa mga Hulagway sa Ebanghelyo [2009], nu. 56; tan-awa usab sa LDS.org). Ipasabut nga ang Daang Tugon nagtala og mga seremonya ug mga ordinansa nga milihok isip mga matang ug mga anino, o nga misimbolo ug milarawan daan sa Manluluwas ug sa Iyang Pag-ula.

Unsay mga ehemplo sa mga matang ug mga anino ni Jesukristo ug sa Iyang Pag-ula nga natala diha sa Daang Tugon?

Ipasabut nga matag bahin sa balaod ni Moises gitumong nga molihok isip usa ka matang o anino nga mipatumong sa mga Israelite ngadto kang Jesukristo ug sa Iyang maulaong sakripisyo (tan-awa sa 2 Nephi 11:4; Jacob 4:4–5). Mipasabut si Pablo sa unsang paagi ang pipila ka bahin sa balaod mibuhat niini. Gusto niyang motabang sa Judeo nga mga Santos nga magpabiling matinud-anon kang Jesukristo imbis nga mobalik sa pagsunod sa balaod ni Moises.

I-summarize ang Mga Hebreohanon 7:1–22 pinaagi sa pagpasabut nga mikutlo si Pablo og usa ka panagna sa Daang Tugon mahitungod sa usa ka sacerdote “sunod sa laray ni Melchisedec” (Mga Salmo 110:4; tan-awa usab sa Mga Hebreohanon 7:1). Mitudlo siya nga kining panagna gituman ni Jesukristo. Si Melchizedek usa ka matarung nga hari ug ang halangdon nga sacerdote kinsa midumala kang Abraham (tan-awa sa Hubad ni Joseph Smith, Genesis 14:25–40 [sa Giya ngadto sa mga kasulatan]; Alma 13:14–19; Bible Dictionary sa LDS English version nga Biblia, “Melchizedek”). Migamit si Pablo kang Melchizedek isip usa ka matang ug anino ni Jesukristo. Mitudlo siya nga si Jesukristo ug ang Iyang priesthood gikinahanglan tungod kay ang Levitico nga Priesthood, uban sa balaod ni Moises nga gidumala niini, dili makahingpit sa mga anak sa Dios (tan-awa sa Mga Hebreohanon 7:11). Mahimo nimong ipasabut nga ang Levitico nga Priesthood mao ang awtoridad sa Aaronic Priesthood nga gihuptan sa mga sakop sa tribo ni Levi (tan-awa sa Bible Dictionary sa LDS English version nga Biblia, “Aaronic Priesthood”).

Ipakita ang litrato nga Si Moises Naghatag kang Aaron sa Priesthood (Libro sa mga Hulagway sa Ebanghelyo, nu. 15; tan-awa usab sa LDS.org) tupad sa litrato nga Si Jesus Nag-ampo sa Getsemani. Ipasabut nga sama sa narekord diha sa Mga Hebreohanon 7, gitandi ni Pablo ang Levitico nga mga sacerdote ngadto kang Jesukristo. Mahimo nimong ipasabut nga usa sa tahas sa usa ka Levitico nga sacerdote mao ang paglihok isip usa ka tigpataliwala, simbolikanhong nagbarug tali sa mga tawo ug sa Dios aron sa paghusay sa ilang mga panagsumpaki.

Isulat ang Mga Hebreohanon 7:23–28 diha sa pisara. Ipares-pares ang mga estudyante, ug dapita ang matag pares sa pagbasa og kusog niini nga mga bersikulo nga dungan. Hangyoa usab sila sa pagbasa sa Hubad ni Joseph Smith, Mga Hebreohanon 7:25–26. Kini nga kasulatan makita sa Giya ngadto sa mga Kasulatan. Dapita ang usa ka estudyante sa matag pares nga mangita sa mga pulong nga naghulagway sa Levitico nga mga sacerdote, ug hangyoa ang pares nga estudyante nga mangita sa mga pulong nga naghulagway ni Jesukristo. Ipasabut nga ang pulong sila diha sa Mga Hebreohanon 7:23 nagpasabut nga ang mga sacerdote.

Human sa igong panahon, dapita ang mga estudyante nga nangita sa mga pulong nga naghulagway sa mga sacerdote sa pagreport sa unsay ilang nakit-an. Isulat ang ilang mga tubag diha sa pisara ubos sa litrato ni Moises ug Aaron. (Ang ilang mga tubag mahimong molakip sa mosunod: ang mga sacerdote kinahanglang pulihan sa laing mga sacerdote dihang sila mamatay [tan-awa sa Mga Hebreohanon 7:23]; sa matag adlaw mitanyag sila og mga sakripisyo alang sa ilang kaugalingong mga sala ug alang sa mga sala sa mga tawo [tan-awa sa Mga Hebreohanon 7:27]; ug ang mga sacerdote adunay mga kahuyang [tan-awa sa Mga Hebreohanon 7:28].)

Dapita ang mga estudyante nga nangita sa mga pulong nga naghulagway kang Jesukristo sa pagreport sa unsay ilang nakit-an. Isulat ang ilang mga tubag diha sa pisara ubos sa litrato ni Jesukristo. (Ang ilang mga tubag kinahanglang naglakip og mga pamahayag sama sa mosunod: Si Jesukristo ug ang Iyang priesthood “dili mausab,” o mahangturon [Mga Hebreohanon 7:24]; makaluwas Siya niadtong “moduol sa Dios pinaagi kaniya” [Mga Hebreohanon 7:25]; nagpakabuhi Siya aron sa “pagpangamuyo alang [kanato]” [Mga Hebreohanon 7:25]; Siya walay sala ug busa “dili kinahanglan mohalad og sakripisyo alang sa iyang kaugalingon nga mga sala” [Hubad ni Joseph Smith, Mga Hebreohanon 7:26]; gikinahanglan lamang Niyang mohalad og usa ka sakripisyo, nga mao ang “alang sa mga sala sa mga katawhan” [Hubad ni Joseph Smith, Mga Hebreohanon 7:26]; ug Siya “nahimong hingpit hangtud sa kahangturan” [Mga Hebreohanon 7:28].)

Ipasabut nga ang mga pulong “sanglit buhi man siya sa kanunay aron sa pagpangamuyo alang kanila” (Mga Hebreohanon 7:25) nagpasabut nga ang misyon sa Manluluwas mao ang mopataliwala alang kanato aron tabangan kita nga mobalik ngadto sa Dios.

Unsaon nimo pagpasabut sa mga kalahian tali ni Jesukristo ug sa Levitico nga mga sacerdote?

Dapita ang usa ka estudyante sa pagbasa og kusog sa Mga Hebreohanon 8:1–3. Hangyoa ang klase sa pagsunod, nga mangita kon sa unsa nga buluhaton gi-ordinahan, o gitawag, ang tanang mga labawng sacerdote, lakip si Jesukristo.

Sa unsa nga buluhaton gi-ordinahan ang mga labawng sacerdote?

Ipasabut nga ang Joseph Smith Translation sa Mga Hebreohanon 8:4 nag-ingon: “Busa samtang anaa siya sa kalibutan, gihalad niya ang iyang kaugalingong kinabuhi isip sakripisyo alang sa mga sala sa katawhan. Karon ang matag sacerdote ubos sa balaod, kinahanglang mohalad og mga gasa, o mga sakripisyo, sumala sa balaod.” Hangyoa ang klase sa pagsunod, nga mangita sa sakripisyo nga gihalad ni Jesukristo.

Unsa nga kamatuoran ang atong makat-unan gikan niini nga bersikulo mahitungod sa unsay gibuhat ni Jesukristo alang kanato? (Gamit ang ilang kaugalingong mga pulong, ang mga estudyante kinahanglang mahibalo sa mosunod nga kamatuoran: Gihalad ni Jesukristo ang Iyang kaugalingong kinabuhi isip usa ka sakripisyo alang sa atong mga sala.)
Unsa nga mga pulong nga nalista sa pisara ang makatabang nato nga makasabut nganong mahimo ni Jesukristo nga mohalad sa Iyang kaugalingong kinabuhi isip usa ka sakripisyo alang sa atong mga sala?

Dapita ang mga estudyante nga mamalandong sa unsay gipasabut ngadto kanila sa maulaong sakripisyo ni Jesukristo. Hangyoa sila sa pagkompleto sa usa sa mosunod nga mga pamahayag diha sa ilang mga class notebook o mga scripture study journal:

Mapasalamaton ako sa akong Manluluwas tungod kay …
Nasayud ako nga gihigugma ako sa akong Manluluwas tungod kay …
Napanalanginan ako pinaagi sa Pag-ula tungod kay …

Human sa igong panahon, dapita ang pipila ka estudyante sa pagpakigbahin sa ilang gisulat kon ilang gibati nga dili ra kaayo kini personal.

I-summarize ang Mga Hebreohanon 8:5–13 pinaagi sa pagpasabut nga tungod sa Iyang sakripisyo, si Jesukristo nahimong “[tigpataliwala sa] pakigsaad nga … labi pa man ka maayo” (bersikulo 6), usa ka pakigsaad diin, kon dawaton sa mga katawhan, makatabang nila nga “maila ang Ginoo” (bersikulo 11) ug malimpyohan gikan sa ilang mga kadautan.

Mga Hebreohanon 9–10

Gipakita ni Pablo sa unsang paagi ang mga ordinansa sa balaod ni Moises nagpunting ngadto sa Pag-ula

Sa dili pa magklase, i-drowing ang kauban nga diagram diha sa pisara.

Ipasabut nga sama sa narekord diha sa Mga Hebreohanon 9–10, mipadayon si Pablo sa pagtandi sa Levitico nga mga labawng sacerdote ngadto kang Jesukristo pinaagi sa paghisgut sa mga katungdanan nga gibuhat sa mga sacerdote sa Adlaw sa Pag-ula. Dapita ang usa ka estudyante sa pagbasa og kusog sa mosunod nga paragraph:

Matag tuig atol sa balaan nga adlaw sa Judeo nga gitawag og Adlaw sa Pag-ula (gitawag usab nga Yom Kippur), ang labawng sacerdote gitugutan nga mosulod sa dapit nga labing balaan didto sa tabernakulo o, sa wala madugay, sa templo sa Jerusalem. Didto, ang labawng sacerdote misakripisyo sa usa ka lalaki nga baka ug usa ka lalaki nga kanding. Gisablig niya ang dugo sa mga hayop sa napili nga mga dapit didto sa Labing Balaan nga Dapit aron sa pagsimbolo sa Pag-ula ni Jesukristo alang sa mga sala sa sacerdote ug alang sa mga sala sa mga katawhan. Dayon ang labawng sacerdote simbolikanhong mibalhin sa mga sala sa katawhan ngadto sa laing lalaki nga kanding (gitawag nga pinasanginlan), diin abugon dayon kini ngadto sa kamingawan, nagtimaan sa pagkatangtang sa mga sala sa katawhan. Misakripisyo usab siya og duha ka karnerong toro isip mga halad nga sinunog alang sa iyang kaugalingon ug sa mga katawhan. (Tan-awa sa Bible Dictionary sa LDS English version nga Biblia, “Fasts”; tan-awa usab sa Levitico 16:22.)

I-assign ang katunga sa klase sa pagbasa sa Mga Hebreohanon 9:11, 12, 24, 28 ug ang pikas katunga sa pagbasa sa Hebreohanon 10:1, 4, 10–12. Dapita ang matag grupo sa pagbasa sa gi-assign kanila nga mga bersikulo sa hilum nga paagi, nga mangita kon sa unsang paagi ang mga panghitabo sa Adlaw sa Pag-ula mga matang ug mga anino sa sakripisyo ni Jesukristo. Human sa igong panahon, dapita ang mga estudyante gikan sa matag grupo sa pagreport sa unsay ilang nakit-an. Dayon ipangutana:

Sama sa pagsulod sa mga labawng sacerdote sa Labing Balaan nga Dapit sa tabernakulo sa Adlaw sa Pag-ula, unsa nga “balaang dapit” (Mga Hebreohanon 9:12) ang mahimong sudlan sa Manluluwas tungod sa Iyang Pag-ula? (Presensya sa Langitnong Amahan, o celestial nga himaya.)
Unsay mahimo sa sakripisyo ni Jesukristo nga ang “dugo sa mga toro nga baka ug mga kanding” (Mga Hebreohanon 10:4) dili makahimo?
Dayon, nganong mibuhat man ang mga labawng sacerdote niini nga mga sakripisyo sa Adlaw sa Pag-ula? (Aron sa pagpakita nga “aduna man lamay landong sa mga maayong butang nga umalabut” [Mga Hebreohanon 10:1], o sa pagpunting ngadto sa Pag-ula sa Manluluwas.)

Dapita ang usa ka estudyante sa pagbasa og kusog sa Mga Hebreohanon 10:17–20. Hangyoa ang klase sa pagsunod, nga mangita kon unsay nahimong posible tungod sa Pag-ula.

Sumala sa bersikulo 19, asa kita mahimong mosulod tungod sa sakripisyo sa Manluluwas? (Sa “balaan” nga dapit, o sa presensya sa Dios didto sa celestial nga gingharian.)
Sumala sa bersikulo 20, unsaon nato pagsulod sa presensya sa Dios?

Ipasabut nga ang “bag-o ug buhi nga agianan” nagpasabut ngadto sa ebanghelyo ni Jesukristo, o ang plano diin kita mahimong mapasaylo ug mabalaan pinaagi sa Iyang Pag-ula ug gumikan niana mahimong takus nga mobalik sa presensya sa Dios.

Isulat sa pisara ang mosunod nga dili kompleto nga pamahayag: Tungod sa Pag-ula ni Jesukristo, mahimo kitang mosulod sa celestial nga gingharian kon …

Dapita ang usa ka estudyante sa pagbasa og kusog sa Mga Hebreohanon 10:22–23. Hangyoa ang klase sa pagsunod, nga mangita kon unsay atong kinahanglan gayud nga buhaton aron makasulod sa celestial nga gingharian. Dapita ang mga estudyante sa pagreport sa unsay ilang nakit-an.

Kompletuha ang pamahayag diha sa pisara aron mabasa kini sama sa mosunod: Tungod sa Pag-ula ni Jesukristo, mahimo kitang mosulod sa celestial nga gingharian kon mohupot kita og maayo sa atong hugot nga pagtuo diha Kaniya.

Unsa kaha ang gipasabut sa “pangusgan [sa] pagkupot” (bersikulo 23) ang atong hugot nga pagtuo kang Jesukristo?

Dapita ang usa ka estudyante sa pagbasa og kusog sa Mga Hebreohanon 10:35–38. Hangyoa ang klase sa pagsunod, nga mangita sa tambag nga gihatag ni Pablo nga makatabang kanato nga maghupot og maayo sa atong hugot nga pagtuo kang Jesukristo.

Unsay mahimo natong buhaton aron maghupot og maayo sa atong hugot nga pagtuo kang Jesukristo?
Unsay gipasabut sa “ayaw ninyo pagwad-a ang inyong pagsalig”? (bersikulo 35).

Dapita ang usa ka estudyante sa pagbasa og kusog sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles, diin gipasabut niya unsay gipasabut sa “[dili pagwala] sa [atong] pagsalig”:

“Sa pinulongan sa mga Santos sa Ulahing mga Adlaw mahimong ipamulong niini nga paagi, Oo, lisud ang agianan—sa dili pa kamo magpasakop sa Simbahan, samtang naninguha kamo sa pagpasakop, ug human kamo nagpasakop. Ingon na gyud niana sukad pa kaniadto, nag-ingon si Pablo, apan ayaw pagduhaduha. Ayaw og kalisang ug hunong. Ayaw wad-a ang inyong pagsalig. Ayaw kalimti unsay inyong gibati kaniadto. Ayaw kawad-i og pagsalig sa inyong kasinatian. Kana nga kalig-on maoy nakaluwas ni Moises ug ni Joseph Smith sa dihang ang kaaway miharong kanila, ug mao kini ang moluwas kaninyo” (“Cast Not Away Therefore Your Confidence,” Ensign, Mar. 2000, 8).

Kinsay inyong nailhan nga usa ka maayong ehemplo nga naghupot og maayo sa iyang hugot nga pagtuo kang Jesukristo?

Dapita ang mga estudyante sa pagpamalandong sa ilang pasalig nga manghupot pag-ayo sa ilang hugot nga pagtuo kang Jesukristo. Hangyoa sila sa pagsulat kon unsaon nila nga madugangan ang ilang pasalig ug abilidad sa pagbuhat niini.

Komentaryo ug Background nga Impormasyon

Mga Hebreohanon 7:1–2. Melchizedek

“Si Melchizedek ‘usa ka dungganan nga halangdon nga pari diha sa Daang Tugon, propeta, ug pangulo, kinsa nagpuyo human sa lunop ug sa panahon ni Abraham. Siya gitawag og ang hari sa Salem (Jerusalem), hari sa kalinaw, hari sa pagkamatarung (nga mao ang kahulugan sa pulong Hebreohanon nga Melchizedek), ug pari sa labing halangdon nga Dios’ (Giya ngadto sa mga Kasulatan, ‘Melchizedek’; scriptures.lds.org). Ang ubang kasulatan nagsaysay nga mitugyan si Melchizedek sa priesthood kang Abraham, midawat og mga ikapulo gikan ni Abraham, ug wala malabwi sa iyang kadungganan (tan-awa sa D&P 84:14; Mga Hebreohanon 7:4; Genesis 14:18–20; Hubad ni Joseph Smith, Genesis 14:25–40 [diha sa Giya ngadto sa mga Kasulatan]; Alma 13:19). Sa Sulat ngadto sa Mga Hebreohanon, si Melchizedek nagbarug isip usa ka ehemplo sa Anak sa Dios (tan-awa sa Mga Hebreohanon 7:15–16)” (New Testament Student Manual [manwal sa Church Educational System, 2014], 480).

Mga Hebreohanon 7:3. “Walay amahan, walay inahan”

“Ang Hubad ni Joseph Smith sa Mga Hebreohanon 7:3 nagklaro nga ang priesthood mao ang ‘walay amahan, walay inahan’: ‘Kay kini nga Melchizedek gi-orden nga usa ka pari subay sa kapunongan sa Anak sa Dios, diin nga kapunongan walay amahan, walay inahan’ (diha sa Giya ngadto sa mga Kasulatan). Kini nga pinulongan nagpasabut nga, dili sama sa Levitico o Aaronic nga kapunongan sa karaan nga mga panahon, ang Melchizedek Priesthood wala gitugyan base lamang sa kaliwatan. Si Elder Bruce R. McConkie … sa Korum sa Napulog Duha ka mga Apostoles dugang pang mipasabut: ‘Ang katungod niining labaw nga priesthood wala napanunod sa samang paagi sa nahitabo sa mga Levita ug mga anak nga lalaki ni Aaron. Ang pagkamatarung mao ang usa ka hingpit nga gikinahanglan alang sa pagtugyan sa labaw nga priesthood’ (Mormon Doctrine, 2nd ed. [1966], 478)” (New Testament Student Manual [manwal sa Church Educational System, 2014], 480).