Leksyon 146: 2 Pedro 1

Leksyon 146

2 Pedro 1

Pasiuna

Giawhag ni Pedro ang mga Santos nga maninguha nga mahimong sama ni Jesukristo. Mipasalig si Pedro kanila nga kining espirituhanong paglambo makatabang nga “masiguro ang [ilang] pagkatinawag ug pagkapinili” (2 Pedro 1:10). Naghisgut usab si Pedro sa iyang kasinatian didto sa Bukid sa Transpigurasyon ug mihatag og gibug-aton nga ang kasulatan dinasig gikan sa Dios.

Mga Sugyot alang sa Pagtudlo

2 Pedro 1:1–11

Nagtudlo si Pedro unsaon pag-ambit sa balaanong kinaiya ni Jesukristo

Sa dili pa magklase, isulat ang mosunod nga pamahayag diha sa pisara (“The Will Within,” Ensign, Mayo 1987, 68):

“Ang atong buluhaton mao ang mahimong labing maayo sa atong kaugalingon” (Presidente Thomas S. Monson).

Ipares-pares ang mga estudyante. Dapita sila sa pagbasa sa pamahayag diha sa pisara ug hisgutan ang mosunod nga mga pangutana uban sa ilang mga pares:

Unsa sa inyong hunahuna ang gipasabut ni Presidente Monson sa pagkahimong “labing maayo sa atong kaugalingon”?
Ngano kahang mahinungdanon nga mahimong labing maayo sa atong kaugalingon?
Unsay makapugong nato nga mahimong labing maayo sa atong kaugalingon?

Dapita ang mga estudyante sa pagpangita og usa ka kamatuoran samtang nagtuon sila sa 2 Pedro 1 nga makatabang nila nga mahibalo unsaon nila nga mahimong labing maayo sa ilang kaugalingon.

I-summarize ang 2 Pedro 1:1–2 pinaagi sa pagpasabut nga misulat si Pedro sa mga miyembro sa Simbahan kinsa nakabaton og hugot nga pagtuo kang Jesukristo.

Dapita ang usa ka estudyante sa pagbasa og kusog sa 2 Pedro 1:3–4. Hangyoa ang klase sa pagsunod, nga mangita kon unsay gitudlo ni Pedro aron sa pagtabang sa mga Santos nga magpabilin nga matinud-anon sa ilang mga pagpamatuod sa Manluluwas.

Sumala niini nga mga bersikulo, unsay gitudlo ni Pedro sa mga Santos?
Unsay gipasabut sa “mag-aambit sa diosnong kinaiya”? (bersikulo 4).

Dapita ang mga estudyante sa pagbasa sa 2 Pedro 1:5–7 sa hilum nga paagi, nga mangita sa mga kinaiya ni Jesukristo nga gidapit ni Pedro sa mga Santos nga palamboon. Hangyoa sila sa paglista diha sa pisara sa mga kinaiya nga ilang nakit-an. Hunahunaa ang pagdapit sa mga estudyante nga pangitaon diha sa usa ka diksyonaryo ang mga depinisyon sa bisan hain niini nga mga kinaiya nga gusto nilang mas masabtan.

Dapita ang mga estudyante sa paghunahuna og mga ehemplo diin mipahayag ang Manluluwas sa usa niini nga mga kinaiya. Dapita ang pipila ka mga estudyante sa pagreport sa ilang mga hunahuna ngadto sa klase.

Isulat ang mosunod nga dili kompleto nga baruganan diha sa pisara: Samtang nagpalambo kita sa diosnon nga mga kinaiya sa atong kaugalingon, mahimo kitang …

Dapita ang usa ka estudyante sa pagbasa og kusog sa 2 Pedro 1:8–9. Dapita ang klase sa pagsunod, nga mangita sa usa ka panalangin nga mahimo natong madawat samtang gipalambo nato ang diosnon nga mga kinaiya sa Manluluwas.

Unsa nga panalangin ang mahimo natong madawat samtang gipalambo nato ang diosnon nga mga kinaiya? (Human makatubag ang mga estudyante, kompletuha ang pamahayag diha sa pisara aron mabasa kini sama sa mosunod: Samtang nagpalambo kita sa diosnon nga mga kinaiya sa atong kaugalingon, mahimo kitang makaila ni Jesukristo.)
Ngano kaha nga ang pagpalambo sa diosnon nga mga kinaiya makatabang nato nga makaila ni Jesukristo?

Dapita ang usa ka estudyante sa pagbasa og kusog sa 2 Pedro 1:10–11. Hangyoa ang klase sa pagsunod, nga mangita sa lain nga panalangin nga mahimong moabut niadtong kinsa makugihon sa pagpalambo sa diosnon nga mga kinaiya.

Unsa nga panalangin ang mahimong moabut niadtong makugihon sa pagpalambo sa diosnon nga mga kinaiya ni Jesukristo? (Ipasabut nga ang mga pulong “masiguro ang inyong pagkatinawag ug pagkapinili” [bersikulo 10] nagpasabut sa pagdawat niini nga kinabuhi sa pasalig sa Dios nga inyong maangkon ang kinabuhing dayon. Nagtudlo usab si Pedro niini isip “labing nahimatud-an nga pulong sa profesiya” (2 Pedro 1:19). Tan-awa sa D&P 131:5].)
Unsa nga baruganan ang atong makat-unan gikan niini nga mga bersikulo mahitungod sa nganong kinahanglan kitang makugihon sa pagpalambo sa atong diosnon nga potensyal? (Ang mga estudyante kinahanglang mahibalo sa mosunod nga baruganan: Kon makugihon kita sa pagpalambo sa atong diosnon nga potensyal samtang naa niini nga kinabuhi, mahimo natong madawat ang pasalig sa Dios sa kinabuhing dayon. Isulat sa pisara kini nga baruganan.)

Ikonsiderar ang pagpakigbahin sa imong pagpamatuod nga ang pagpalambo sa diosnon nga mga kinaiya makatabang nato nga makaila ni Jesukristo ug mag-andam nato nga modawat sa kinabuhing dayon.

Dapita ang mga estudyante nga isulat sa ilang mga class notebook o mga scripture study journal ang usa sa mga diosnon nga kinaiya nga ilang labing gustong palamboon. Hangyoa sila sa pagsulat og usa ka piho nga aksyon nga buhaton aron sa pagpalambo niana nga kinaiya.

2 Pedro 1:12–21

Si Pedro nagpakigbahin sa iyang saksi kang Jesukristo ug nagtudlo mahitungod sa kasulatan

Ikonsiderar ang pagsulat diha sa pisara sa mga edad sa pipila sa labing tigulang nga mga Apostol karon. Basaha og kusog ang mosunod nga pamahayag ni Elder M. Russell Ballard sa Korum sa Napulog Duha ka mga Apostoles:

“Ang uban moingon nga kami tigulang na kaayo. Aw, tinuod nga siyam sa mga Apostoles lapas na sa 80 ang edad! Ako 85” (“Be Still, and Know That I Am God” [Church Educational System devotional, Mayo 4, 2014], broadcasts.lds.org).

Ngano kaha nga ang ubang mga tawo nagsaway sa katigulangon sa pipila sa mga propeta ug mga apostoles?
Unsaon ninyo pagtubag sa panaway nga ang mga propeta ug mga apostol karon tigulang na kaayo aron mahimong epektibo?

Dapita ang mga estudyante samtang nagpadayon sila sa pagtuon sa 2 Pedro 1 nga mangita og usa ka kamatuoran mahitungod sa mga propeta ug mga apostoles nga mas mahinungdanon kay sa ilang mga edad.

Ipasabut nga diha sa 2 Pedro 1:12–19 mipakigbahin si Pedro sa iyang personal nga pagpamatuod kang Jesukristo.

Dapita ang usa ka estudyante sa pagbasa og kusog sa 2 Pedro 1:20–21, ug human makabasa ang estudyante, ipasabut nga ang Joseph Smith Translation sa 2 Pedro 1:20 nag-ingon, “Kinahanglan inyong mahibaloan kini, una sa tanan, nga walay profesiya diha sa kasulatan nga arang kahimoan sa kinaugalingon nga pagpanabut” Hangyoa ang klase sa pagsunod, nga mangita kon unsay gitudlo ni Pedro mahitungod sa tahas sa “mga balaang tawo sa Dios,” nagpasabut niini nga higayon nga mga propeta.

Unsay gitudlo ni Pedro mahitungod sa tahas sa mga propeta? (Ang mga estudyante kinahanglang mahibalo sa mosunod nga kamatuoran: Ang mga propeta nagdawat og kasulatan pinaagi sa Espiritu Santo. Isulat sa pisara kini nga kamatuoran.)

Aron matabangan ang klase nga makasabut kon unsa ang mga kasulatan, ipabasa og kusog sa usa ka estudyante ang mosunod nga pamahayag:

“[Ang kasulatan mao ang] mga pulong, gisulat ug gipamulong, sa balaan nga mga tawo sa Dios kon gidasig pinaagi sa Espiritu Santo” (Giya ngadto sa mga Kasulatan, “Kasulatan, Mga,” scriptures.lds.org; tan-awa usab sa D&P 68:2–4). Ang pipila sa kasulatan na-canonize [nahimong kabahin sa sumbanan nga mga kasulatan sa Simbahan] na. Ang canon mao ang “usa ka giila, gamhanan nga pagtipon sa sagrado nga mga basahon. Diha sa Ang Simbahan ni Jesukristo sa mga Santos sa Ulahing mga Adlaw, ang kanonikal nga mga basahon gitawag og sumbanan nga mga kasulatan ug naglakip sa Daan ug Bag-ong Tugon, ang Basahon ni Mormon, ang Doktrina ug mga Pakigsaad, ug ang Perlas nga Labing Bililhon” (Giya ngadto sa mga Kasulatan, “Kanon,” scriptures.lds.org).

Dapita ang usa ka estudyante sa pagbasa og kusog sa mosunod nga pamahayag ni Elder Dallin H. Oaks sa Korum sa Napulog Duha ka mga Apostoles. Hangyoa ang klase sa pagpaminaw sa iyang pagsaksi nga ang mga propeta nagpadayon sa pagdawat og kasulatan karon.

“[Ang mga propeta mao ang] agianan diin ang Dios nakigsulti sa Iyang mga anak pinaagi sa mga kasulatan sa nanglabay nga mga panahon. Ug niini nga linya Siya karon nakigsulti pinaagi sa mga pagtulun-an ug tambag sa buhi nga mga propeta ug mga apostoles ug ubang dinasig nga mga lider” (“Duha ka Linya sa Komunikasyon,” Ensign o Liahona, Nob. 2010, 84).

Ngano kahang mahinungdanong mahibaloan nga ang Dios naggamit niini nga sumbanan sa paghimo og kasulatan alang sa Iyang mga anak?
Sa unsang paagi ang pagkasabut niini nga sumbanan naghatag ninyo og mas dakong pagsalig sa gisulti ug gisulat nga pulong sa karaan ug bag-o nga mga propeta?

Basaha og kusog ang mosunod nga mga pangutana, ug dapita ang mga estudyante sa pagsulat sa ilang mga tubag diha sa ilang mga class notebook o mga scripture study journal.

Unsa nga mga tudling sa kasulatan, gikan man sa karaan nga mga propeta o gikan sa mga propeta karon, ang nakaimpluwensya sa inyong kinabuhi? Sa unsang paagi kamo napanalanginan pinaagi niadto nga mga kasulatan?

Dapita ang pipila ka mga estudyante sa pagpakigbahin sa ilang mga tubag uban sa klase. Mahimo usab kang mopakigbahin og usa ka ehemplo sa unsang paagi ikaw napanalanginan pinaagi sa kasulatan.

Balik ngadto sa nag-unang pamahayag ni Elder Oaks, ug dapita ang mga estudyante sa pagpamatuod ngadto sa uban sigun sa itudlo sa Espiritu mahitungod sa katinuod sa mga propeta ug kasulatan.

Komentaryo ug Background nga Impormasyon

2 Pedro 1:10. “Paghatag og kakugi aron masiguro ang inyong pagkatinawag ug pagkapinili”

Si Elder Bruce R. McConkie sa Korum sa Napulog Duha ka mga Apostoles mitudlo nga “ang pagkasiguro sa pagkatinawag ug pagkapinili sa usa ka tawo mao ang masilyo sa kinabuhing dayon; mao kini ang makaangkon sa walay kondisyon nga pasalig sa kahimayaan sa kinatas-an nga langit sa celestial nga kalibutan … sa wala pa ang adlaw nga ang matinud-anon sa pagkatinuod mosulod ngadto sa balaan nga presensya aron molingkod uban ni Kristo sa iyang trono” (Doctrinal New Testament Commentary, 3 vols. [1965–73], 3:330–31).

Si Elder McConkie mitudlo usab sa mosunod:

“Ang matag usa diha sa Simbahan kinsa naa sa higpit ug pig-ot nga dalan, kinsa naningkamot ug nakigbisog ug naninguha sa pagbuhat sa unsay husto, bisan og layo ra sa pagkahingpit dinhi niini nga kinabuhi, kon siya mobiya niini nga kinabuhi samtang naa siya sa higpit ug pig-ot nga dalan, sa katapusan makadawat siya sa mahangturon nga ganti didto sa gingharian sa iyang Amahan.

“… Kon anaa kamo niana nga dalan ug nagpadayon paingon ngadto sa unahan, ug kamo mamatay, dili gayud kamo mobiya sa maong dalan. … Ang angay ninyong buhaton mao nga magpabiling matinud-anon diha sa Simbahan ug magpakabuhi sama sa matarung ug maligdong nga mga tawo sa Simbahan—nagsunod sa mga kasugoan, nagbayad sa inyong ikapulo, nag-alagad sa mga organisasyon sa Simbahan, naghigugma sa Ginoo, nagpabilin sa higpit ug pig-ot nga dalan. Kon naa kamo niana nga dalan inig abot sa kamatayon—tungod kay kini nga kinabuhi mao ang panahon ug adlaw nga gikatakda, mao kini ang kahimtang sa pagsulay—dili gayud kamo mahulog gikan niini, ug, ang resulta, masiguro ang inyong pagkatinawag ug pagkapinili. Karon, dili kana mao ang depinisyon sa ‘masiguro ang pagkatinawag ug pagkapinili’, apan ang resulta mao ra” (“The Probationary Test of Mortality,” debosyonal sa Institute of Religion sa Salt Lake, Ene. 10, 1982, 12–13).

2 Pedro 1:19. “Labing kasiguroan nga pulong sa panagna”

Ang bag-ong pagpadayag naghimatuod ug nagklaro sa kahulugan sa “labing kasiguroan nga pulong sa panagna” (2 Pedro 1:19). Ang Doktrina ug mga Pakigsaad 131:5 nag-ingon, “Ang labing kasiguroan nga pulong sa panagna nagkahulugan nga ang tawo nasayud nga siya nabugkos ngadto sa kinabuhi nga dayon, pinaagi sa pagpadayag ug sa espiritu sa panagna, pinaagi sa gahum sa balaan nga Pagkapari.”

Ang matinud-anon nga babaye ingon man usab sa lalaki nga mga miyembro sa Simbahan mahimong makabaton sa panalangin nga masiguro ang ilang pagkatinawag ug pagkapinili, o makadawat sa labing kasiguroan nga pulong sa panagna.

Si Elder Bruce R. McConkie sa Korum sa Napulog Duha ka mga Apostoles mitudlo:

“Kadtong mga miyembro sa Simbahan kinsa hingpit nga nagpakamatarung, nagpakabuhi pinaagi sa matag pulong nga mogula gikan sa ba-ba sa Dios, nagsiguro sa ilang pagkatinawag ug pagkapinili. Mao kana, sila nagdawat sa labing kasiguroan nga pulong sa panagna, nga nagpasabut nga ang Ginoo nagsilyo sa ilang kahimayaan nganha kanila samtang ania pa sila niining kinabuhi. Gi-summarize ni Pedro ang dalan sa pagkamatarung nga kinahanglang paninguhaon sa mga santos aron masiguro ang ilang pagkatinawag ug pagkapinili ug dayon (nagtudlo sa iyang kasinatian didto sa Bukid sa Transpigurasyon uban ni Santiago ug ni Juan) nag-ingon nga ang kadtong tulo nakadawat niining labing kasiguroan nga pulong sa panagna. (2 Ped. 1.)” (Mormon Doctrine, 2nd ed. [1966], 109).

Si Propeta Joseph Smith mitudlo:

“Human ang usa ka tawo makabaton og hugot nga pagtuo kang Kristo, naghinulsol sa iyang mga sala, ug nabunyagan alang sa kapasayloan sa iyang mga sala ug nakadawat sa Espiritu Santo, (pinaagi sa pagpatong sa mga kamot), nga mao ang unang Maghuhupay, unya magpadayon sa kamapainubsanon sa iyang kaugalingon atubangan sa Dios, gigutom ug giuhaw sa pagkamatarung, ug magsunod sa matag pulong sa Dios, ug ang Ginoo sa dili madugay moingon ngadto kaniya, Anak, ikaw pagahimayaon. Kon hingpit nang nasulayan sa Ginoo ang iyang katakus, ug nakita nga ang tawo buot gayud nga moalagad Kaniya nga walay pagsapayan sa nalakip nga mga hagit, makita dayon sa tawo nga nasiguro na ang iyang pagkatinawag ug pagkapinili, iya na dayong kahigayunan nga madawat ang laing Maghuhupay. …

“Kinsa man ang laing Maghuhupay? Walay lain kon dili si Ginoong Jesukristo Mismo; … kon si bisan kinsang tawo makabaton niining katapusan nga Maghuhupay, ang personahe ni Jesukristo moatiman kaniya, o magpakita ngadto kaniya” (sa History of the Church, 3:380–81).

2 Pedro 1:20–21. “Mga balaang tawo sa Dios”

Si Elder M. Russell Ballard sa Korum sa Napulog Duha ka mga Apostoles misulti sa mga kaayohan kon naay hamtong, batid nga mga lider diha sa tigdumalang mga konseho sa Simbahan:

“Adunay butang kabahin sa usa ka tawo ug sa tinipon nga kaalam sa mga Brethren nga kinahanglan nga mohatag og gamayng kahupayan. Among nasinati kining tanan, lakip ang mga sangputanan sa lain-laing mga balaod ug mga polisiya sa publiko, pagkawala sa kadasig, mga trahedya, ug kamatayon diha sa atong kaugalingong pamilya. Nasabtan namo ang mga panghitabo sa inyong mga kinabuhi.

“Sultihan ko usab kamo nga walay usa sa Napulog Duha nga manggiulawon. Kaming tanan may lig-on nga mga personalidad. Busa kon kami nagkahiusa sa usa ka desisyon, kamo makasalig nga kami nagtinambagay ug miabut niana nga desisyon human sa daghang pag-ampo ug mabinantayon nga paghisgot. …

“Mga batan-on kami og kasingkasing, ug ang Ginoo nagpanalangin kanamo sa pagpalihok sa Iyang buluhaton sa talagsaon nga mga paagi” (“Humilom Kamo, ug Ilhon Ninyo nga Ako Mao ang Dios” [CES Debosyonal alang sa mga Young Adult, Mayo 4, 2014], broadcast.lds.org).